Luka 5
5
Okwetebwa kwa beegesebwa abeekereire
(Mat 4:18-22; Mak 1:16-20)
1Ekiro kimwei oYesu niyaali ayemereire ogwa ku nyanja ya Genesaaleeti,#5:1 Ibara lya nyanja ya Galiraaya. abantu ni bamweruguurya omu kamigo, okuwuliirya ekigambo kya Kanca. 2OYesu nʼabona obwato bubiri abategi bwebaali nibalekere oku kirimbi nibayabire okusaayiirya obutimba bwabwe. 3Nʼatemba omu kaato akamwei, akaali aka Simooni. Nʼakoba oSimooni, akagimbe akongereyoku e buluba. OYesu nʼaikala nʼatandika okwegesya abantu naikaliire omu kaato.
4Niyamaare okubaza nʼakoba oSimooni, “Akaato kaigeeryeyo omu maizi agalai onage obutimba leke okwatisye encwi.”
5OSimooni nʼakoba, “Mukama wange, twagadire obwire bwona bwona, ni tutakwatisya ncwi yeena yeena, baitu olwa kigambo kyamu kanage obutimba.”
6Nibaakoore nkʼoYesu niyabakobere ni bakwatisya encwi zingi nʼobutimba ni butandika okwonoka. 7Ni basumirya abataayi baabwe abaali omu bwato obundi leke baize babajune. Abataayi baabwe ni baiza ni baizulya obwato bukali bubiri era obwato buni ni bwendya okutandika okulika.
8OSimooni Peetero niyaboine kini nʼabundaala ampi nʼamagulu ga Yesu, nʼakoba, “Mukama wange ndi muntu aizwire ebibbi, tinsemeire we okubba ampi nanje, igeerayo.” 9OPeetero yabazire kini, ye nʼabeyaali nabo ni bakwewuunya encwi ezingi zebaali ni bakwatisirye. 10OYakobo nʼoYokaana abataani ba Zebbedaayo era abataayi ba Simooni boona ni beewuunya. OYesu nʼakoba oSimooni, “Otatiina, okuluga ati waakuleetanga bantu gyendi omu kifo kya kutega encwi.” 11Ni bakokota obwato bwabwe ni babwirya oku kirimbi, ni baleka awo buli kintu kyebaali nakyo, ni baaba nʼoYesu.
Omusaiza eyaalina ebigenge
(Mat 8:1-4; Mak 1:40-45)
12OYesu niyaali omu kimwei oku bibuga, omusaiza eyaalina ebigenge nʼaiza. Omusaiza ni yaboine oYesu, nʼakubba amajwi nabundaire, ni yeesengeerya oYesu ngʼakukoba ati, “Mukama niwaabba nʼosiimire oyinza okunsemeza.”
13OYesu nʼagolola omukono gwamwe nʼakwata oku musaiza nʼakoba, “Nsiimire, semezebwa!” Amangu ago ebigenge ni bimuwonaku.
14OYesu nʼalagira omusaiza ati, “Otosubiira muntu yeena yeena, okwiyaku yaba weerange egiri kabona era olwa kusaayiribwa oweeryeyo ebyakuweeryayo oMusa byeyalagiire, leke abantu bamanye nka niwasaayiriibwe.”
15Gonze oYesu yalagiire omusaiza obutasubiira muntu yeena yeena, baitu amawuro gaamwe ni geeyongera okuraranga woona woona, abantu baingi ni baizanga okumuwuliirya nʼokusemezebwa endwaire zaabwe, 16baitu obundi oYesu yabeesoroorangaku nʼayaba omu bifo ambula bantu nʼasaba.
OYesu okutamba ondema
(Mat 9:1-8; Mak 2:1-12)
17Ekiro kimwei oYesu yaali nakwegesya, aBafarisaayo#5:17 Baali bantu ba kibiina kya diini ekyakwatanga amateeka nʼokwegesya kwa Musa nʼobuwangwa amwei nemikirokiro gya Bayudaaya gyona gyona. nʼabeegesya bʼamateeka ga kiyudaaya, abaali nibalugire omu byalo byona byona ebya Galiraaya, e Buyudaaya nʼe Yerusaalemu boona ni baiza ni baikaara awo. OMukama yaali nawaire oYesu amaani aga kutamba abantu abalwaire. 18Waalowo abasaiza abaizire nibeetikire ondema oku kaara. Ni bagezaku okumwingirya omu nyumba leke bamute omu maiso ga Yesu. 19Nibaalemereirwe okumwingirya olwa bantu abanyamwingi, ni batemba oku lukanga lwa nyumba, ni boowaku ekitundu ni bamwakalya omu kiwulu kyebaakubbire. Ni bamubiikirya akati omu bantu oYesu weyaali, nagalaamiriire oku kaara.
20OYesu niyaboine okwikiriza kwabwe nʼakoba ondema, “Musaiza we, ebibbi byamu bikusaasiirwe.”
21Buli omwei oku Bafarisaayo nʼabeegesya bʼamateeka nibatandika okwebuulya bati, “Oni niye naani akweyeta oKanca? Notoireku oKanca, naanite owondi asaasira ebibbi?”
22OYesu nʼamanya byebaali bakwebuulya, nʼababuulya, “Lwaki mukwebuulya ebigambo bini omu mitima gyanywe? 23Oku bibiri ekikusinga obwangu kiri ayi: Okukoba nti, ‘Ebibbi byamu bikusaasiirwe,’ Oba okukoba nti, ‘Imuka otambule?’ 24Kini nakikola leke mumanye nti oMwana wa Muntu alina obusobozi oku nsi okusaasira ebibbi.” Nʼakoba ondema nti, “Imuka okwate akaara kaamu oyabe eka.” 25Amangu ago, abantu boona boona ni bakubona, ondema nʼaimuka, nʼakwata bye yaali nʼagalaamiriireku, nʼayaba eka nakuwaisya oKanca. 26Buli muntu ni yeewuuunya era nʼawaisya oKanca. Ni baizula okutiina ni bakoba, “Ekiro kyaleero tuboine ebintu ebikulu.”
Okwetebwa kwa Leevi
(Mat 9:9-13; Mak 2:13-17)
27Kini nikyaweire, oYesu nʼawuluka omu kibuga nʼabona omusoroorya wa musolo eyayetebwanga Leevi, naikaliire weyasorooleeryanga omusolo.#5:27 Abasoroorya ba musolo nʼabasiisi; baali bantu abazumibwanga olwakukolagana naBarooma abafuganga omu biro ebyo. Basorooryanga omusolo ogukiikiraine ni beebiikira ezaakairemu. Abasiisi nibo bantu abatakwatanga amateeka nʼokwegesya kwa Musa. Omu biragiro bya Musa, omuntu yeena yeena eyaalyanga nabo yeena yabalibwanga okuba ataikiriire omu maiso ga Kanca. OYesu nʼakoba oLeevi, “Iza, obbe omwegesebwa wange.” 28OLeevi nʼaimuka, nʼaleka ebintu byona byona byeyaali nabyo, nʼayaba abbe omwegesebwa wa Yesu.
29OLeevi, omu maka gaamwe, nʼakoora oYesu obugenyi obwʼamaani. Abasoroorya ba musolo banyamwingi nʼabantu abandi ni baliira amwei nʼoYesu nʼoLeevi. 30ABafarisaayo nʼabeegesya bʼamateeka aba mwabwe, ni bagongoizekera egiri abeegesebwa ba Yesu, ni bakoba, “Lwaki mukulya nʼokunywa nʼabasoroorya ba musolo era nʼabakoli ba bibbi abandi?” 31OYesu nʼabairamu ati, “Atali mulwaire tataka murulumuli, omulwaire niye amutaka. 32Tinaiziriire bantu abaikiririire, abalina ebibbi nibo naiziriire leke mbeete balige omu bibbi.”
OYesu bakumubuulya oku kusiiba
(Mat 9:14-17; Mak 2:18-22)
33Ni bamukoba, “Abeegesebwa ba Yokaana basiiba era ni basaba. Nʼabeegesebwa bʼaBafarisaayo boona nimwo bakola batyo. Abaamu nka batasiiba?”
34OYesu nʼabairamu, “Abagenyi abaayeteibwe oku bugenyi bwakuswera oyinza okubasiibisya omukama wa bugenyi nʼacaali nabo? 35Ekiseera kikwiza omukama wa bugenyi abaiyibweku, nalibaiyibwaku ale nimwo balisiiba.”
36Nʼabasubiira olufumo luni, “Omuntu tayonola katundu oku lugoye oluyaaka leke akalibbikirisye ekiwulu ekiri oku lugoye olukaire. Nakola atyo olugoye oluyaaka abba alusiisire, nʼakatundu akasaarwe oku lugoye oluyaaka, oku lugoye olukaire kwe kabaziriirwe tikananiraku. 37Era ndoowo muntu asuka oiyeera wa viini mu nsawu za byanzo ezikaire. Nʼakikola oiyeera oni akaakula ebyanzo nʼasukuka nʼensawu nʼesiisikala. 38Oiyeera wa viini ateekwa kusukibwa mu nsawu za byanzo eziyaaka. 39Era ndoowo muntu amala okunywa ompolwe wa viini ayendya okunywa oiyeera, kubanga akoba ati, ‘Ompolwe niye akukira obusai.’”
Àwon tá yàn lọ́wọ́lọ́wọ́ báyìí:
Luka 5: RUULI-NYALA
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
