Luka 20
20
OYesu bakumubuulya oku buyinza bwamwe
(Mat 21:23-27; Mak 11:27-33)
1Ekiro kimwei, oYesu niyaali nakwegesya abantu omu mbuga ya Iramyo nakubakobera Amawuro Agasai, abakabona abakulu nʼabeegesya bʼamateeka, amwei nʼabakaire ni baiza gyali. 2Ni bamubuulya, “Tukobere obuyinza obukola ebintu bini obwiya ayi? Era naani yabukuwaire?”
3Ye nʼabairamu, “Njeena ka mbabuulye ekibuulyo. Munyiremu, 4okubatiza kwa Yokaana kwalugire wa Kanca, kanda mu bantu?”
5Baitu bo ni babazamu bonkai na bonkai nti, “Nitwamukoba nti, ‘Kwazwire wa Kanca,’ akwiza okutubuulya, ‘Obwo lwaki timwamwikiriize?’ 6Yete nitwakoba nti, ‘Kwazwire mu bantu,’ abantu boona bakwiza okutukubba amabbaale kubba baikiriize nti oYokaana yaali mulangi.”
7Obwo ni bakoba, “Titumaite gyekwazwire.”
8OYesu nʼakoba, “Njeena tinabakobere obuyinza obunkolesya bini gyembwiya.”
Olufumo lwʼabapangisya ba ndumiro ya mizabbibbu
(Mat 21:33-46; Mak 12:1-12)
9Awo oYesu nikwo okusubiira abantu olufumo luni: “Waalowo omusaiza eyasimbire endumiro ya mizabbibbu, nʼagipangisya abalumi ye nʼayaba omu nsi yʼalai, nʼalwayo. 10Ebiro bya ku kunokola ni byaikire, nʼatuma omwei oku baweereza baamwe egiri abapangisya bamuweeryeku ebyana bya mizabbibbu. Baitu abapangisya ni bamukubba ni bamupeka nambula kantu. 11Nikwo okutuma omwiru owondi, baitu yeena ni bamukubba, ni bamuwemulawemula, ni bamupeka nambula kantu. 12Nʼaira nʼatuma omwiru owakasatu, yeena ni bamuwutaaza ni bamupeka.
13“Omukama wa ndumiro ya mizabbibbu nikwo okwebuulya ati, ‘Nakola ntyai? Natuma omwana wange, gwenyendya omuno; Kanda ye bamuweerya ekitiinisya.’
14“Baitu abapangisya ni baamuboine, nibaakobangana bati, ‘Oni niye mugwetwa waamwe, leka tumwite, endumiro ebbe yaiswe!’ 15Bo nikwo okumuwulukya omu ndumiro ya mizabbibbu, ni bamwita.
“Mukulowooza omukama wa ndumiro ya mizabbibbu alibakola atyai? 16Aliiza nʼaita abapangisya abo, endumiro egyo nʼagiweerya abandi.” Abantu nibawuliire kini ni bakoba bati, “Kini kireke kubbaawo!”
17Baitu oYesu nʼabaroleera nʼabuulya, “Ale ekyawandiikiibwe kini kimanyisya ki:
‘Eibbaale abomboki lye bagaine
ati lifookere erya ku nsonda?’#Zab 118:22
18“Omuntu yeena yeena aligwa oku ibbaale rini alicwacwanuka, nʼoyo gwe lirigwaku lirimwatyayatya.”
19Abeegesya bʼamateeka nʼabakabona abakulu ni basala amagezi aga kumukwatirawo, kubba baakyetejerye nti olufumo luni lukwaite ku nibo. Baitu ni batiina abantu.
Ebikufa oku kuweerya omusolo
(Bona Mat 22:15-22; Mak 12:13-17)
20Nibaali bakulindiirya obwire obusai obwa kumukwatiramu, ni batuma abakeiti nibakwesanisiirya abantu abʼamazima. Nibakusuubira okumukwatisya omu bigambo byakubaza leke bamuweeryeyo egiri omukama oMurooma. 21Abakeiti ni bamubuulya: “Mwegesya, tukimaite nti obaza nʼoyegesya ebiikire, era nga we tosoroora mu bantu, baitu oyegesya oku muwanda gwa Kanca nkʼamazima nigali. 22Kisemeire iswe okuweerya oKaisaali omusolo kanda bbe?”
23Baitu niyeetegerye olukwe lwabwe nʼabakoba, 24“Mundange edinaari, kuluku kisani kya naani?”
25Ni bairamu, “Kya Kaisaali.” OYesu nʼabakoba, “Ale ebya Kaisaali mubiweerye oKaisaali, nʼebya Kanca mubiweerye oKanca.”
26Nibaalemerwe okumukwatisya omu kigambo kyona kyona omu maiso gʼabantu, ni basirikambe nibakwewuunya engeri gye yabairemu.
Ebikufa oku kuyimbooka
(Bona Mat 22:23-33; Mak 12:18-27)
27Abamwei oku Basadukaayo#20:27 Baali Bayudaaya abanyadiini okwisanaku nʼaBafarisaayo. Baitu bo tibaikiririzanga mu kuyimbooka kwa bafu. abakoba nambu ndooyo kuyimbooka, ni baiza e wa Yesu ni bamubuulya, 28“Mwegesya, oMusa yatuwandiikiire eiteeka erikoba nti: Omusaiza ni yaafanga nʼaleka omukali, natabyaire mwana, omugande ateekwa okuswera onamwandu okubyara orufa abaana. 29Ale niwaakulowo abaluganda musanju; omukulu nʼaswera omukali, baitu nʼafa atabyaire mwana. 30Nʼowakabiri nʼaswera onamwandu oyo baitu yeena nʼafa, 31nʼowakasatu atyo, boona omusanju nibafa batabyaire baana. 32Kyairai omukali yeena nʼafa. 33Ale ekiro kya kuyimbooka onamwandu alibba mukali wa naani, kubba boona omusanju baamusweireku?”
34OYesu nʼabairamu ati, “Abantu ba biro bini baswera amwei nʼokuswerwa. 35Baitu abantu abalibba basemeire okuyimbooka nʼokubba omu mulembe ogwo tibaliswera gonze okuswerwa. 36Tibaliiramu kufa kubba balibba nkʼabamalaika. Balibba baana ba Kanca kubba balibba bayimbookere. 37NʼoMusa yagumirye ekya kuyimbooka kwa bafu, niyawandiikire oku kwaka kwa kisaka, niyayetere oKanca, ‘OKanca wa Ibbulaimu, oKanca wa Isaaka era oKanca wa Yakobo.’#20:37 Eni mbazo ekolesebwa aBayudaaya nibakubaza oku Kanca wa baize baabwe okumanyisya nti nʼati acaali Kanca wabwe owamaani. Kuz 3:6. 38Ye ti Kanca wa bafu baitu owa boomi, olwakubba egiri Ye boona boona boomi.”
39Abamwei oku beegesya bʼamateeka ni bakoba, “Mwegesya, obazire kusai.” 40Okuliga okwolwo, ndoowo wondi eyepampalikire okumubuulya ekibuulyo ekindi.
OKurisito nʼoDawudi
(Mat 22:41-46; Mak 12:35-37)
41OYesu nʼababuulya ati, “Lwaki abantu bakoba nti, oKurisito Mwizukulu wa Dawudi? 42Yete oDawudi omwenyenere omu kitabo kya zabbuli, akoba ati:
‘OMukama yakobere oMukama wange nti:
Ikaara oku mukono ogulyo
43okwica nindifoola abanyanzugu baamu entebe ya magulu gaamu.’#Zab 110:1
44“ODawudi niyaabba amweta Mukama waamwe, obwote asobola atyai okumweta omwana waamwe?”
Okwerinda abeegesya bʼamateeka gʼaBayudaaya
(Mat 23:1-36; Mak 12:38-40)
45Abantu boona nibamuwuliriirye, oYesu nʼakoba abeegesebwa baamwe ati, 46“Mwerinde abeegesya bʼamateeka abendya okubonebwa nibazwaire engoye eza muwendo ezikukweya, era okulamucibwa omu butale nʼokwikaara omu bikaaro ebya kitiinisya omu makumbaaniro nʼomu bikaaro ebya kitiinisya oku bugenyi. 47Bagobya ebintu bya banamwandu ale ni basaba esaala ezinyamulai abantu leke babawaisye. Bani balibonerezebwa muno.”
Àwon tá yàn lọ́wọ́lọ́wọ́ báyìí:
Luka 20: RUULI-NYALA
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
