Yohana 4
4
Yesu nende Omukhasi Musamaria
1Mana olu Omwami kamanya mbo Avafarisayo vawuliye mbo Yesu analombanga nokhuvatisa avalondi okhukhira Yohana, 2(Owang'ali wuli mbo Yesu mwene sikavatisa tawe, njavalondi vave vong'ene), 3kachula Yudea kakoola Galilaya. 4Yali mbo okhwola avichire Samaria. 5Kho kola mwitookho lia Samaria mbo Sukari (Shekemu), aambi nende omukunda ku Yakopo kaweresa omwana wuwe Yosefu. 6Esovere yamachi ya Yakopo yali awenao, ne Yesu naluyire esikira yolukendo, kekhala aasovere. Yali aambi saa sita.
7Omukhasi Musamaria kachao okhutaa amachi. Yesu kamuwolera, “Mbekho amachi nywe.” 8Avalondi vave vali vachiye mwitookho okhukula eviokhulia. 9Omukhasi Musamaria kamuwolera, “Kali kachie mbo ewe, Omuyahudi, wacheva okhunywa okhuchula khwise, omukhasi Musamaria?” Avayahudi sivali nouambani nende Avasamaria tawe. 10Yesu Kamuchipa, “Ova numanyire esianwa sia Nyasaye, ne njanu onakhuwoleranga mbo, ‘Mbe khumachi nywe,’ wakhamuchevire, ne kakhakhuwaye amachi kowulamu.” 11Omukhasi kamuwolera, “Omukali, oumakho siosisiosi esiokhutayira, ne esovere yino yekha; ochusena amachi kowulamu? 12Ewe okhira papa wefwe Yakopo, owachuweresa esovere yamachi yino, ne kanywamo, navasoliri vave, nende eng'ombe chichie?” 13Yesu kamuwolera, “wulimunju onywa khumachi kano alikhuwulira owuluwo nundi, 14naye oyo onywa amachi aka ndi khumuwa sialinyola owuluwo, amachi kandikhumuwa kali khwekhola muniye efututusi, eyifututukha khuwulamu wa wuli lwosi.” 15Omukhasi kamuwolera, “Omukali, mbe amachi kano, kho ndove khuwulira owuluwo namwe ngoole ano okhutaya.”
16Yesu kamuwolera, “Chia, olange omusacha wuwo, mana mwiche ano.” 17Omukhasi kamuchipa, “Embuma Omusacha.” Yesu kamuwolera, “Oli ng'ali okhuwola ochi owuma omusacha; 18sikira wakhava navasacha vachanu, noyo oyuli naye siwuwo tawe; elio owoye awene.” 19Omukhasi kamuwolera, “Omukali, mbona ewe oli nabii. 20Ava papa vasalanga khusikulu sino; nanywe muwola mbo Yerusalemu njawunju aavanju venyekha vasalire.” 21Yesu kamuwolera, “Mukhasi ewe, suvire, evise vicha evi muchachia okhwinamira papa khusikulu namwe Yerusalemu ta. 22Mwinamiranga esi mukochiswe; efwe khwinamiranga sikhumanyire, esikira owuwonia wuchula khu Muyahudi. 23Ne esa yicha, ne evise vino violire, olu omwinamirisi wang'ali achia okhwinamira Papa mu roho nowung'ali, sikira avo njava Papa atakhatakha vamwinamire. 24Nyasaye Roho niye, navo avamwinamira okhwola vamwinamire mu roho nowung'ali.” 25Omukhasi kamuwolera, “Emanyire nji Masiya kacha (eyivalanga mbo Kristo); nikakhacha, alichwekesa wulisinju.” 26Yesu kamuwolera, “Ese olomaloma ninawe, nise niye.”
27Awenao avalondi vave vacha. Vawuka mbo analomalomanga khumukhasi, nausa awumao owawola, “siosina esi wenya? Namwe esikira sina ni onalomalomanga ninaye?” 28Kho omukhasi oyo kalekha esongo yiye eyamachi, ne kachia mwitookho ne kawolera avanju, 29“Yiche, muwone omusacha wumboleye kosi aka nakhola. Ono anyala okhuva nje Kristo?” 30Vachula mwitookho ne vali vanachianga khuniye. 31Olwenolwo avalondi vave vamwesaya nivawola, “Omwekesi, lia.” 32Nausa kavawolera, “Ndi nesiokhulia esi mukochiswe.” 33Kho avalondi vachevana, “Omunju yesiyesi amulecheyekho esiokhulia?” 34Yesu kavawolera, “Esiokhulia siange njokhukhola elienya lioyo owanjuma, nende okhumalirisa emilimo kikye. 35Simuwolanga mbo, ‘kiriwo emiesi kine kho ekesa liole’? Evawolera, lengere muwone ngemikunda kilavire nende ekesa. 36Oyo okesa anyola omuchungo nowungeresa eviamo khulwa owulamu wa wuli lwosi, kho omuchaki nende okesa vasangalira alala. 37Sikira ano elomaloma lino liri ng'ali, ‘Mulala achaka ne oundi akesa.’ 38Navachuma okhukesa evi muchakholera emilimo, avandi vakhalavana, ne enywe mwingiye mumilimo kiawe.”
39Avasamaria avangi okhuchula mwitookho vasuvira muniye esikira yowuloli womukhasi oyo, “Kamboleye kosi aka nakhola.” 40Kho olu Avasamaria vacha khuniye, vamucheva mbo atong'e navo, ne kekhalayo enyinga chiviri. 41Avangi vasuvira sikira yekhuwa lilie. 42Vawolera omukhasi oyo, “Sikali amakhuwa kako wusa akakira nikhusuvira ta, sikira khuwuliye fwavene, ne khumanyire mbo ng'ali ono nje Omuwonia wesialo.”
Yesu Awonia Omwana Womuchuki
43Endalo chiviri nichiakhavicha kachekukha kachia Galilaya. 44Sikira Yesu mwene kachusa owuloli mbo nabii awuma oluyali musialo sisie. 45Kho olu kacha Galilaya, Avagalilaya vamwingisa, nivakhawonanga kosi aka kali nakholire Yerusalemu musao, sikira vosi vali vachiye musao omwo.
46Kho kacha nundi Kana ya Galilaya, eyikali nakalusanisie amachi okhuva edivai. Nende Kafernaumu eyimwana womukhongo kali nalwala. 47Olu kawulira mbo Yesu kali kachire okhuchula Yudea nali Galilaya, kachia kamwesaya kekhe aasi naye awonie omwana wuwe, sikira kali khuvise viokhufwa. 48Mana Yesu kamuwolera, “Nuchawona evimanyiro nende amangayimwa susuvira tawe.” 49Omukhongo kamuwolera, “Omukali, yicha nange omwana wange nasiri khufwa.” 50Yesu kamuwolera, “Chia, omwana wuwo alikhumenya.” Omusacha oyo kasuvira ekhuwa eli Yesu kamuwolera mana kawao. 51Olu kali nachia engo, avakhalavani vave vawukanana naye vamuwolera vachi omwana wuwe mulamu. 52Kho kavacheva evise evi kanjiyemo okhusosa, vamuwolera, “Mungolove sasaba musiteche, owulwaye wamulekhire.” 53Simwana kamanya mbo njevise evi Yesu kamuwoleye “Omwana wuwo alikhumenya”, naye omwene kasuvira alala nenju yiye. 54Sino njesimanyiro sia khaviri esi Yesu kakhola olu kacha Galilaya nachula Yudea.
Àwon tá yàn lọ́wọ́lọ́wọ́ báyìí:
Yohana 4: LNTPP
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©The Bible Society of Kenya, 2024
