Walawi 5
5
Tambiku ya kuwusiya vidoda vya ntambu yingi yingi
1Tambiku za kuwusiya vidoda zifiruwa kutenderwa hangu.
Handa muntu yoseri pakatenda vidoda toziya kasinda kulaviya ukapitawu kuusu shilii shakawoniti ama kushipikanira, su azabu ayi hayiweri kwa muntu ayu.
2Ama muntu yoseri pakati penu pakashinkula shintu shashiwera shihumba, pashiwera mzoga gwa nkanyama gwa mutundu ama nkanyama gwa kulolerwa ama wavigongolu, muntu ayu hakaweri na likosa.
3Ama muntu yoseri pakashinkula shintu shoseri sha muntu shashiwera shihumba, shintu shoseri sashimtenda muntu kaweri muhumba, pakatenda pota na kuvimana, kumbiti pakavimana yomberi hakaweri na likosa.
4Ama muntu yoseri pakalirapa kwa kutenda shintu shoseri shilii, shiheri ama shidoda pota kulihola, pakavimana shilii shakatenditi, yomberi hakaweri na likosa.
5Su muntu pakawera na likosa kuusu vitwatira avi kafiruwa kaleki vidoda vyakuyi vyakatenditi, 6kamjegeri Mtuwa Mlungu tambiku yakuyi ya kuwusiya vidoda. Toziya ya vidoda vyakatenditi yomberi hakajegi kondolu gwashidala ama mbuzi gwashidala kamlaviyi tambiku ya kuwusiya vidoda. Mtambika hakalaviyi tambiku na yomberi hakalekeziwi vidoda vyakatenditi.
7Kumbiti pakaweza ndiri kumlaviya mwana gwa kondolu kuwera tambiku ya kuwusiya vidoda vyakuyi, su hakajegi wankunda wawili ama wateteli wawili. Mpongu yumu kwajili ya tambiku ya kuwusiya vidoda na yumonga kwajili ya tambiku ya kulunguziwa. 8Yomberi hawajegi kwa mtambika, mtambika hakamlaviyi mpongu yumu kuwera tambiku ya kuwusiya vidoda kwa kumumindula singu yakuyi, nakamnyofola mtuwi gwakuyi. 9Seemu ya mwazi gwakuyi hakagumishili mumbwega mwa shitalawanda sha kutambikira. Ayi hayiweri tambiku ya kuwusiya vidoda. 10Shakapanu hakamlaviyi mpongu ulii gwa pili kuwera tambiku ya kulunguziwa kulawirana na malagaliru. Kwanjira ayi mtambika hakalaviyi tambiku ya kuwusiya vidoda vyakatenditi, su yomberi hakalekeziwi.
11Kumbiti pakasinda kulaviya wankunda wawili ama wateteli wawili kuwera tambiku yakuyi ya kuwusiya vidoda vyakatenditi, su yomberi hakajegi ubumu kilu yimu. Kumbiti hapeni kaulekeri lipaki ama ubani toziya ayi iwera tambiku ya kuwusiya vidoda. 12Yomberi hakamjegeri mtambika, mtambika hakautoli ubumu ulii muliwoku lyakuyi limu kuulunguziya pashitalawanda sha kutambikira kulanguziya tambiku yoseri iwera ya Mtuwa Mlungu, pamuhera na tambiku zyawamlavilira Mtuwa Mlungu kwa motu. Ayi iwera tambiku ya kuwusiya vidoda. 13Su mtambika hakalaviyi tambiku kwajili ya kuwusiya vidoda vya muntu ayu, na yomberi hakalekeziwi. Ubumu yausigaliti hauweri wa mtambika ntambu yaiweriti mutambiku ya viboga.
Tambiku ya kulipira fidiya
14Shakapanu Mtuwa Mlungu kamgambiriti Musa, 15Muntu yoseri pakatenda vidoda pota kuvimana kuusu kulaviya ndiri vintu vinanagala vyakalaviliruwa Mtuwa Mlungu, yomberi hakamjegi kondolu gwashipalu yakahera ndiri shidoda shoseri. Gwenga hagupimi samani yakuyi kulawirana na shipimu sha Pahala Pananagala. Ayi hayiweri tambiku ya kuwusiya likosa. 16Viraa muntu ayu hakalipi vyoseri vyavilawiriti kuusu vintu vinanagala kwa kwongera seemu yimu ya vintu muhanu vya samani yakuyi na kumpanana yoseri mtambika. Su mtambika hakalaviyi tambiku ya kuwusiya vidoda vya muntu kwa kondolu gwashipalu yakawera tambiku ya kuwusiya vidoda, na yomberi hakalekeziwi.
17Muntu yoseri pakatenda vidoda pota kuvimana, kwa kuleka shashilagaliritwi na Mtuwa Mlungu, yomberi hakaweri na likosa, su hakalipi kwajili ya likosa lyakuyi. 18Yomberi hakamjegeri mtambika kondolu gwashipalu yakahera ndiri shidoda shoseri, pakawera na samani teratera na samani ya tambiku ya kuwusiya vidoda. Mtambika hakamlaviliri tambiku kwa vidoda vyakatenditi, su yomberi hakalekeziwi. 19Ayi iwera tambiku ya kuwusiya vidoda, yomberi kawera na likosa kulongolu kwa Mtuwa Mlungu.
Àwon tá yàn lọ́wọ́lọ́wọ́ báyìí:
Walawi 5: PBV
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
The Bible version in the Pogoro Language. @The Word for The World International and Pogoro Language translation. All rights reserved.