Yohani 5
5
Yesu kankumponiziya muntu
1Shakapanu, Yesu kagenditi Yerusalemu kumsambu gwa Wayawudi. 2Kulaa Yerusalemu, pakwegera na ligomi gwawagushemiti Ligomi lwa kondolu, kweniti na litanda lyawalishemiti kwa Shiebraniya Betizata, liweriti na seemu midamu muhanu. 3Lipinga likulu lya walweli walivagiti seemu azi, wanalwisi na wavibyeketu na yawalewelekiti. Su waweriti wankuhepera mashi gatimbuki, 4toziya ntumintumi gwa kumpindi kulawa kwa Mtuwa kila mala pakiza na kugatimbula mashi. Mlweri gwa kwanja kwingira mumashi pagatimbuka kaponiziwa. 5Paliya paweriti na muntu yumu yakalwaliti kwa shaka sha mivinja malongu mitatu na nane. 6Yesu pakamwoniti muntu uliya kagonja paliya na kavimaniti kuwera kalwariti kwa shaka shivuwa, su kamkosiyiti, “Hashi, gufira guponi?”
7Muntu yakalwala kankula, “Mtuwa, kwahera muntu panu gwankuntula mumashi shaka mashi pagatimbuka. Panjeriti kwingira kumbiti kila mala, muntu yumonga kanongulera.”
8Yesu kamgambira, “Gugoloki, gutoli lisaga lyaku gugendigendi.” 9Palaa paliya muntu uliya kapona. Kagutoliti lisaga lyakuwi na kanja kugendagenda.
Shitwatila ashi shitendikiti Mulishaka lya kwoyera. 10Wakulu wa Wayawudi pawawoniti muntu ulii yakaponiziwitwi, womberi wamgambira, “Leru ndo lishaka lya kwoyera! Kwahera ulekeziwu kwa gwenga kupapa lisaga lyaku.”
11Kumbiti Yomberi kawagambira, “Muntu yakamponiziyiti kang'ambiriti ntoli lisaga, ng'ending'endi.”
12Nawomberi wamkosiyiti, “Ndo gaa yakakugambiriti gutoli lisaga lyaku na gugendigendi?”
13Kumbiti yomberi kamumana ndiri muntu yakamuponiziiti, mana Yesu kaweriti kalihanganiya mulipinga lya wantu.
14Shapakanu Yesu kaliwoniti na muntu yakamponiziyiti Mnumba nkulu ya Mlungu, su kamgambira, “Gupikani vinu gwamkomu, guleki kutenda vidoda ama vitwatira vidoda virawili kwaku.”
15Shakapanu muntu uliya kagenda, kawagambira wakolamlima wa Shiyawudi kuwera Yesu ndo yakamuponiziiti. 16Su Wayawudi wanjiti kumgaziya Yesu, toziya yomberi katenditi shitwatila ashi sha kuponiziya mulishaka lya Kwoyera. 17Yesu kawagambira womberi, “Tati gwangu kankutenda lihengu mashaka goseri, naneni viraa ntenda lihengu.”
18Visoweru avi viwatenda wakulu wa Shiyawudi wendereyi kusakula ntambu ya kumlaga Yesu, toziya kalitenda ndiri weri lilagaliru lya lishaka lya Kwoyera na katakuliti kuwera Mlungu ndo Tati gwakuwi na viraa vilii pakalitenda kuwera gambira Mlungu.
Uwezu wa Mwana gwa Mlungu
19Yesu kawagambiriti womberi, “Nukugambirani nakaka, Mwana kaweza ndiri kutenda shoseri gweka yakuwi, katenda shilii shakawoniti Tati gwakuwi pakatenda. Vilii vyakatendaga Tati, viraa vilii ndo vyakatenda Mwana. 20Toziya Tati kamfira Mwana na kamlangalira yomberi vyoseri vyakatenditi mweni, viraa vilii hakamlanguzii vitwatira vikulu kuliku avi, mwenga hamlikangashi. 21Handa virii Tati pakawazyukisiyiti wahowiti na kuwapanani ukomu, ntambu iraayi Mwana kawapanani ukomu walii yawafira. 22Tati hapeni katozi muntu yoseri, kumbiti lihengu lyoseri lya kutoza kamupa Mwana, 23su wantu woseri wamgohilili Mwana ntambu yawamgohelera Tati. Yakamgohelira ndiri Mwana, kamgohalila ndiri Tati. Tati ndo mweni yakamtumiti Mwana.
24“Nakugambirani nakaka, woseri yawapikanira visoweru vyangu na kumjimira ulii yakantumiti, hakaweri na ukomu wa mashaka goseri. Hapeni katozwi, ira kapita kala kulawa mukuhowa na kwingira muukomu. 25Nukugambirani nakaka, shaka shankwiza, kayi shisoka kala, ndo sheni wahowiti hawapikiniri liziwu lya Mwana gwa Mlungu na woseri yawapikanira hawalikali. 26Gambira Tati ntambu yakawera shyanziru sha ukomu, hera hangu viraa ntambu yakamtenda Mwana gwakuwi kuwera shyanziru sha ukomu. 27Na kamupiti Mwana uwezu wa kutoza, toziya yomberi ndo Mwana gwa Muntu. 28Namulikangasha shitwatila ashi, shaka shankwiza yawahowiti woseri hawapikiniri liziwu lyakuwi 29nawomberi hawalawi mumapumba mwawu, woseri walii yawatenditi viherepa hawazyuki na kulikala, na woseri yawatenditi vidoda, hawazyuki na kutozwa.”
Wapitawu wa Yesu
30“Neni weza ndiri kutenda shoseri kwa uwezu waneni. Neni ntenda hera ntambu ya Mlungu pakang'ambira, su kutoza kwaneni ndo teratera, toziya njeriti ndiri kutenda shirii shanfira, kumbiti ntenda shirii shakafira ulii yakantumiti.
31“Handa panulitakulila namweni, upitawu wa neni hapeni ujimilwi kuwera wa nakaka. 32Kumbiti kwana yumonga ndo mweni katakulaga upitawu kuusu neni, naneni nuvimana kuwera vyoseri vyakatakula kuusu neni ndo vyanakaka. 33Mwenga mtumiti ujumbi kwa Yohani, nayomberi kawutakuliti nakaka. 34Neni nuwutumbira ndiri upitawu wa wantu, kumbiti ntakula vitwatira avi mpati kulopoziwa. 35Yohani kaweriti gambira lumuliku lwaluweriti lwakuyaka na kulangala na mwenga musekereriti kulangala kwa shaka shididiki hera.
36“Neni nanawu upitawu kuusu namweni ndo weni mkulu mnu kuliku ulii wa Yohani. Shantenda ndo sheni shakung'ambira kuwera Tati ndo yakantumiti. 37Tati ndo yakantumiti, viraa kananguziya. Mwenga hapeni mpikaniri liziwu lyakuwi ama mwoni sheni shakuwi, 38na visoweru vyakuwi hapeni vikali mumyoyu mwenu, toziya mumjimira ndiri ulii yakamtumiti.
39“Mwenga mgalola weri Malembu Mananagala, toziya mulihola kuwera mngati mwakuwi hampati ukomu wa mashaka goseri, kumbiti Malembu galaa galiya gantakula! 40Pamuhera na hangu, mwenga mlema kwiza kwaneni mpati ukomu.
41“Ndolera ndiri ukwisa kulawa kwa wantu. 42Kumbiti nuwamana mwenga, nuvimana kuwera ufiru wa Mlungu kwahera mumyoyu mwenu. 43Neni niza kwa uwezu wa Tati gwangu, su munshemera ndiri, Kumbiti mwenga muwashemeraga wantu pawiza muuwezu wawu. 44Mfira kuwanka uzyumi kwa wantu, kumbiti mfira ndiri kujera kutenda vitwatira kwa ulii yakawera Mlungu gweka yakuwi, hashi mweza kunjimira neni?
45“Namulihola handa neni hanuwasitaki mwenga kwa Tati gwangu. Musa ndo mweni, mwenga mumtumbiriti mweni ndo hakawasitaki. 46Handa nakaka mwenga memjimiri Musa, viraa memunjimiri naneni, toziya Musa kalembiti kuusu neni. 47Kumbiti mugajimiriti ndiri galii gakalembiti Musa, hamuwezi hashi kuvijimira visoweru vyangu?”
Àwon tá yàn lọ́wọ́lọ́wọ́ báyìí:
Yohani 5: PBV
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
The Bible version in the Pogoro Language. @The Word for The World International and Pogoro Language translation. All rights reserved.
