Málákuse 5
5
Gieŋugie gá mɔnd umáabiánán biád bá bíliíndié
(Mat 8.28-34; Lúk 8.26-39)
1Ebénége negúné wa manáŋ abúsa, agá Bagalaseniɛ́ŋ#5.1 Band bámáabá bɔ́sɔ́dɔn agá giéns gá gus igiány dɛmabá Beyúdɛn, bómodio gúbɛ́laan gɛ́ sɔ́n ká Galasa, gúmén Gelasa.. 2Yésu máal uselen agá gilu, mɔnd umáabiánán giád gá gíliíndié uwenegúdúgín wɔ́, umóolónín agá bɛbɛl. 3Mɔnd uwaány mabá ubába agá bɛbɛl. Ta yɔndɔ́nd ɛdɛmabianan bugaga báguadɛgɛn wɔ́, ká ɛ́gɔ́d wɔ́, ta na duoli dá biléŋuleŋ 4bigúl bímodió, bámabá bámaág wɔ́ gilu#5.4 Búdɛ́bá gilu bábɔ́lɛ́ganá gá gɛ́ ká báyɔg madɛ́ga. agá bɛgɔnd, bágɔ́d wɔ́ ɛmbɔ́g na masɛŋɛ, ta anaány ugása mɔ́ mem nɛnama nɛ́nyá ká, ta mɔnd wagumányɛ́gɛnɛn wɔ́ dɛmabá. 5Umabá bigúl bim, ta na budug ta na buɔ́s wuúl úbúndábá wɔ́mbɔ́lɔ agá bɛbɛl na agá dɔgɔnd, ɔbɛ́dában na adany. 6Anyɛ́ uméebídúm Yésu eŋís umányɛ ayáyá, uwɔgɔ́l ɔdɛ́d, uwesigunsín wɔ́ enú. 7Uganyɛ gág ekelu magɔ́gɔ́n ká: «Yésu, Mɔɔn wá Gɔdányá unyá ugumuana, dinyɛ buóny nɔw e? Sígól, agá ɔfɛ́n wá Gɔdányá, ediméŋélídí.» 8Umɔyɔ́ anaány góbusió ká Yésu máal ká: «Giád gá gíliíndié aám agá nuɔ́l ná mɔnd ewe!» 9Yésu ganyɛ ká: «Ɔfɛ́n wɔ́w únyá ányá e?» Igiondinyi ká: «Ɔfɛ́n wám ká Gudege#5.9 Gudege Lesíɔ́ŋ: mabá gɛgaga gá ɔlɔŋɔ wá musia wá Balomɛ́ŋ, umabiánán band gudúm nɔns númoomu guám dɔns dútíndád., gágual ká dinyɛ giod.» 10Igíedúm gubísógólonyi Yésu ká udɛdɔ́m bɛ́ agá giéns gá gus gá ayáyá. 11Nánié gɛnaŋ gá ɛŋɔnáf mabá ány agá masiá má nɔgɔnd giámba manyán. 12Biád bá bíliíndié ibiány ɛbɛ́b gá gúbísógólonyi Yésu biɔ́yɔ ká: «Dɛ́dɔ́m agá ɛŋɔnaf esíné, ádɛ́tɛɛ́n díbíŋín gá sɛ́.» 13Uwádábɛn bɛ́, ibiámaan ibiénebíŋén agá ɛŋɔnaf, ɛŋɔnaf isiány guegúdúg agá nɔgɔnd isiánaguánán agá manáŋ abúsa, isiáfɔ́f; sɛ́mabá buanda bá dɔns duándɛ. 14Begiíg ɛŋɔnaf ɔbɔ́bɛ́nɔnɔn, ebénedúmbényí buóny agá bɔtísɔn na agá bɛdɔŋ nɛnama nɛ́nyá ká, band móoloón gá gúsiánán buanda búmáabɛ́dɔ́mb. Band oboóloon gá gúsiánán buanda búmáabɛ́dɔ́mb. 15Abásiámánɛ́n Yésu, abánaán mɔnd umáabiánán biád bá bíliíndié ilukié na bɛla agá nuɔ́l, uganyɛ cáŋ Kilíse, buwa ubuól bɔ́. 16Band bámáanaán buanda gidigid búmáabɛ́dɔ́mbaán, ebédúm guɔyɔɔn bɔsɔ́gɔ́ bómóoloón ubú búmáabɛ́dɔ́mb na mɔnd wa biád bá bíliíndié na ɛŋɔnaf. 17Ebédúm gúbísógólonyi Yésu ká wélíki ɔgɔ́b gá giéns gá gus. 18Umáal uganyá gɔ́bɔ́lɛ́gan agá gilu ká údɔ́mbɔ, mɔnd uwaány uwedúm gubísógólonyi wɔ́ ká bábá ɔlɔŋ naga. 19Yésu dɛmáadábɛn wɔ́, uganyɛ gág gɔg ká: «Ondo agá gians gɔ́w gá band, ɔ́yɔɔn bɔ́ buanda gidigid ubú Gɔdányá mánuguala agág gá bese.» 20Mɔnd gɔdɔ́mb, uwɔb gá guúl údúmbényi agá bɔtísɔn bát bábɛ́laná ká Dekapól buanda gidigid ubú Yésu máal wɔ́. Band gidigid bɔ́mɔ́ɔbɛ́dɔ́lɛ́gɔɔ́n wɔ́ ebédúm guméŋemeŋ.
Gieŋugie gá agánd na ɔmbúlɔ ɔwɔ́ Yésu meényi
(Mat 9.18-26; Lúk 8.40-56)
21Yésu agá gilu nagadá, guand guyɔg negúné wa manáŋ abɔ́sa, gianta gá giŋi gá band igiábɛ́gɔ́sɛ́d agág gá masiá. Umabá egúy na madɛ́ga. 22Ɔgɔ́n wá gians gá mbísógól gá Beyúdɛn ondodió ɔfɛ́n ká Yálúyuse uwasiam, anyɛ́ umáan, Yésu, uwanagɔɔ́n wɔ́ agá ambana, 23uwobísógólonyi wɔ́ teéééée, wɔyɔ gág ká: «Ɛbɔ́bɔ́lá yám ganyɛ bágúgásɛ́g, ólo gasɛ́dál yɛ́ ɛmbɔ́g ká yéŋúg ɛsɔd!» 24Yésu uwadɔ́mb ɔlɔŋ naga; gianta gá giŋi gá band oól gíládaán wɔ́, gídídígen wɔ́ máy mem.
25Agánd omodió manɔŋ máabá máamaan wɔ́ búgányɛ duɔŋ duát na duandɛ mabá kɔ́. 26Umáanaán muyú giod agá ɛmbɔ́g sá banyány. Umetúlúgúgényí bɔnɛ́m gidigid umáabiánán, ta guúl bese. Ta anaány gunúma gág gubíbéyenyá gubíbéyenyi, 27umɔ́ɔb anyɛ́ bɔ́mɔ́ɔyɔ́ manda ɔmɔ́ Yésu máabá wala. Uwoólín agá gélem gá giŋi gá band, uwebísíd gɛla gá Yésu. 28Umɔbiɔ́yɔɔn agág gá ɔdɛm ká: «Ímámɛ́nɛn ká ta bɛla bág imébísíd, ngeguéŋúg.» 29Kɔ́ na kɔ́, manɔŋ ɔmɔ́dɔmb guámaán, uwɔbiɔ́b ká uméŋug. 30Ád ány Yésu uwɔbiɔ́b ká nuɔ́l nág meémí mɔɔn wá magɛ́nda. Uwabɛ́guagalɛd agá gadágadá wá giŋi gá band uwófún ká: «Ányá uménúmbísíd bɛla bámɛ e?» 31Bafɔ́nɔfɔ́n bág guondinyi wɔ́ ká: «Águánaan ká giŋi gá band sɔgubɔŋ máy mem, ófoon ká: “Ányá uménúmbísíd e?”» 32Ta anaány uwɔb nobusió na gubɛ́lɛ́ŋan ká waán mɔnd uménúbísíd wɔ́. 33Buwa ubuádɛgɛn agánd, uwɔb gá gútatan, ulɛnsan buanda búságual wɔ́, uwanagɔɔ́n Yésu agá ambana, uwɔyɛdɛn wɔ́ meliŋítas gidigid. 34Uganyɛ gág gɔg ká: «Mɔɔn ɔ, giondiɔdɛ́mɔ́ gɔ́w méguéŋúgí; ɛmbɛ, ɔdɛm wɔ́w bá fueee, gunúma gɔ́w mámán púm púm.»
35Umáal umányá gúgála, band obónoólín agá nuyá ná Yálúyuse. Bágányɛ gág ká: «Ɔmbúlɔ wɔ́w mégu, buanda bá guand gusésenyi Ofúnyifúny dɛbá sɔ́n ány.» 36Yésu dɛmɔgɔ́l gɛsɛgɛl na gugál uguány, uganyɛ gá Yálúyuse ká: «Adɛbiá buwa, bá na giondiɔdɛ́mɔ́.» 37Kɔɔ́kɔ Piéle, Sáka na endimen waga Sáŋa umáadábɛ́n bɔ́ ká bédílígín wɔ́. 38Bámaán agá nuyá na mɔnd uwaány, Yésu uwofuɔg band bɔ́yɔ́gɔ́dɔ, bábáŋa, bábɛ́sɔ́sɔ́la magɔ́gɔ́n. 39Uwebíŋín agá gians uganyɛ gɔ́b ká: «Giág gínyá na giyɔ́gɔ́d na oŋóny nɛnama enié e? Mɔɔ́nɔmbɔ dimégú, ɔgɔ́bɛ́dɛ́maan#5.39 Yésu malɛnsán ká mɔɔn mbɔ megú, ta anányɛ, uwɔyɛd ká ugúbɛ́dɛ́man. Umɔyɔ́ anány, gágual ká umalɛnsán ká ugegúenyugi wɔ́, búbá anyɛ umeényí wɔ́ gá dunɔ́..» 40Abásɛ́gɛ́nan wɔ́. Ta nɔ́, uwémi band gidigid bámáabá agá gians nagadá, uwɔlɔb na bebiény bá mɔ́nɔmbɔ na band bémeédílígén wɔ́, uwabád gubíŋín agá nɛgɛlɛ kɔɔ́m mɔ́nɔmbɔ máabá, 41uwɔgɔ́l ɔmbɔ́g wá mɔ́nɔmbɔ uganyɛ ká: «Talíta kúm!» Anaány gúnyá ká: «Mɔ́nɔmbɔ, mmaál gɔ́w ká anyɔ́g!» 42Ád ány, mɔ́nɔmbɔ uwadɔg ndényé, uwɔb gá guanda. Umabiánán duɔŋ duát na duándɛ. Anyɛ́ band máan anaány, abáb gá guméŋeméŋ giod. 43Uwasásɛ́d bɔ́ na bugaga ká bɔ́diɔyɛ́dɛ́n ta mɔnd buanda, uganyɛ gɔ́b sɔ́n ká béŋin mɔ́nɔmbɔ uwaány buanda bá gúnyá.
Àwon tá yàn lọ́wọ́lọ́wọ́ báyìí:
Málákuse 5: MMU2
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
CABTAL
