Matáyoso 26
26
Ɛdɔg bámándɛ́n Yésu
(Mál 14.1-2; Lúk 22.1-2; Sáŋ 11.47-49,53)
1Yésu máal úmáman gufúnyifunyi manda amaány gidigid, ugany gá bafɔ́nɔfɔ́n bág ká: 2«Nugúlɛnsaan ká agá medug mándɛ, budɔ́mb bá Pásíka gabá: bégendú yaŋuá Mɔɔn wá mɔnd ká bánsánd agá kolós.» 3Kányɛ bɔgɔgɔ na bagɔn bá gɛdɔŋ mábɛ́gɔ́sɛ́gán agá ndáŋa yá Kayíf, ɔgɔ́gɔ uwɔgɔn. 4Abaám ekelu ká bádɛgɛn Yésu agá dubénd bɔɔ́n wɔ́. 5Bɔ́mɔbiɔ́yɔɔ́n ká: «Didigúbianan ká diádɛgɛn wɔ́ gɛsɛgɛl gá budɔ́mb, emény band gɔguɔ́ns.»
Agánd omodió gúsugunen Yésu megud agá ɔduɔ́
(Mál 14.3-9; Sáŋ 12.1-8)
6Yésu mabá agá gɛsɛgɛl igiány Betaní agá nuyá ná Símune umánúmá nŋun. 7Gɛsɛgɛl ɛgɛ́ Yésu máabá uganyá gúnyánan, agánd uwabɛ́nyɛkɛnɛn wɔ́ na idógodóg bámáayɛ́ŋaán na nɛdany bábɛ́laná ká alabátɛl, ímáabá ifuógón na megud má ɔlɔf má mfí, uwesugunen mɔ́ agá ɔduɔ́ wá Yésu. 8Bafɔ́nɔfɔ́n máal ná guán anaány, ɔbɔ́b gudá, ebédúm bɔ́bɔ́ na bɔ́bɔ́ guɔyɔ ká: «Bágúsɛŋaan megud ma ɔlɔf eme aya gɔg gá giag e? 9Úmábá bágual udú mɔ́ gá muonyi giod o giod béŋeen mú gá basɔ́gasɔga.» 10Anyɛ́ Yésu málɛnsɛ buanda bámabá bɔ́biɔ́yɔɔn, ugany gɔ́b ká: «Gá giág nuságaná agánd uwaány ɔdɛm e? Ginɔ́g gá buanda igiány umánúŋala. 11Búnyɛ nɔ́, nugabá na basɔ́gasɔga bigúl bim, yaŋuá gɔg, ndɛgabá nanɔ́ bigúl bim. 12Umákɛ́n guŋág megud má ɔlɔ́f,#26.12 Beyudɛ́n mabá bákɛn gufú gɛlɔŋ ɔ megud u má ɔlɔ́fɔ bábád gunyo gɛ́. Buanda agánd ewe mál mabá gianta gá bulinsi bá nigú ná Yésu, ɔwɔ́ gɔg udɛmalɛnsan nɔ́ gá gúdábúna munyon mám múmányá múdísíam. 13Agá meliŋítas, ngúnuɔ́yɔɔn agá gus gidigid agá mɔkɔɔ́m ɔgɔ́ bɔ́gɔnuɔ́yɔ ndág ya nsɔ́m, bɔ́nuɔ́yɔ sɔ́n buanda ubú agánd ewe mánuala, bónd bábídága wɔ́.»
Bémédú Yésu
(Mál 14.10-11; Lúk 22.3-6)
14Kányɛ omoom wá Bát na bándɛ ɔfɛ́n ká Yúdasa Ísikalioto máab aga bɔgɔ́gɔ, 15ugany gɔ́b ká: «Giág nugagúnúmfá íménúduún Yésu e?» Bɔgɔ́gɔ abaány abában bɛkɔ́ŋ bá muonyi nitín na biát, ebéŋin wɔ́.#26.15 Diny bégúgedi na Sakalia 11.12 16Gubanyɛg ány, Yúdasa gudúm guamba nŋili ya bese ká údú Yésu.
Bɛbiándɛ́n bá ɔnyɔ́ wá pasaka
(Mál 14.12-16; Lúk 22.7-13)
17Budúg bá busió bá budɔ́mb bá bɛnyɔka bá kand ginudígíné, bafɔ́nɔfɔ́n ganyɛ gá Yésu ká: «Nány ambaná ká dígúnámbɛ́n manyán má Pásíka e?» 18Uwal gɔ́b ká: «Ánɔ́b agá tísɔ́n, aga déné, nuál gág ká: “Ofúnyifúny maál ká: Gɛsɛgɛl gám ganyɛ egúy, ɔgɔwɔ ndúmbenyé budɔ́mb bá Pásíka na bafɔ́nɔfɔ́n bám.”» 19Bafɔ́nɔfɔ́n abál kɔɔ́kɔ anyɛ́ Yésu mábɛ́dɛ́n bɔ́, abádábɔ́na budɔmb bá Pásíka.
Yésu médíyé mɔnd ugenúdú wɔ́
(Mál 14.17-21; Lúk 22.14; Sáŋ 13.21-30)
20Niɔ́b máal nímágua, Yésu gulukumin na bát na bándɛ agá tébéle. 21Bámáal bágányá gúnyánan, ugany ká: «Agá meliŋítas ngúnuɔ́yɔɔn ká, omoom agán gá ɔlɔŋ gegúŋdú.» 22Gianta gá isígíl igiádɛgɛn bɔ́, abábanyɛg omoom omoomó guófoon ká: «Saá yaŋuá, ɔ́gɔɔ́ Ɔgúnɔ́?» 23Uwondinyi ká: «Mɔnd uménuyugín gɛnyɔka ɔlɔŋ nam agá gɛsuá#26.23 Dɛlɛ́ŋɛ́d Mál 14.20 na buanda búnyá ká buɔ́ŋɔ́n, uwɔ́ ugenúŋdú. 24Yaŋuá Mɔɔn wá mɔnd ngegú gɔɔ́gɔ anyɛ́ búnyá buɔyɛ́dɔ́n agá iŋɔ́ŋɛ́n gám gá busió#26.24 Alɛ́ŋɛ́d ɛsag 22.2-19; Isayí 53. Gɔsɔ́g gɔg na waád mɔnd wuŋduénené, búgubá menyí bese ká mɔnd uwaány dibíbién!» 25Yúdasa uméduénén wɔ́ gugɔ́l gugál uganyɛ ká: «Ofúnyifúnyi, búdɛ́bá yaŋuá wɔ́ ɔ́gɔɔ́». Yésu guondinyi wɔ́ ká: «Ɔguɔ́yɔ.»
Manyán ma Ɔgúnɔ́
(Mál 14.22-25; Lúk 22.15-20; 1Kɔ 11.23-26)
26Gɛsɛgɛl gá ɔnyɔ́, Yésu gugɔ́l gɛnyɔka, umáal ná gual mbísógól yá nukany, uwáns gɛ́, uwad guéŋin bafɔ́nɔfɔ́n, uganyɛ ká: «Ɔ́nugɔ́l núnyá, ebue nyɛ nuɔ́l nám.» 27Agá gélem ány, uwɔgɔ́l ɛdɔ́ga, umáal ná gual mbísógól yá nukany, uwéŋin bɔ́ yɛ́, ugany ká: «Ánubúwá banuá gidigid, 28ebue nyɛ manɔŋ mám, manɔŋ má nɛlad módígonó gá giod gá band, gá gɛnɛnɛna gá bɛfal bɔ́b. 29Ngúnuɔ́yɔɔn ká: Gudúm nɛ́nuán ndɛgand gubúwá magɛ́b eme ta buɔ́s gutɔ guám buɔ́s ubú nganúbúwá magɛ́b ɔmɔgɔ́s nanɔ agá Bufuŋ bá Baba.»
Yésu mɔ́yɛ́d ká Piéle gabɛ́sáŋɔ́n wɔ́
(Mál 14.22-25; Lúk 22.15-20; 1Kɔ 11.23-26)
30Bámáal bɔ́mɔ́dɔ́ŋɔ ɛsag sá budɔ́mb#26.30 Ɛsag isiány nyɛ ɛsag bɔ́dɔ́ŋɔɔ́ agá guman gá manyán má Pásaka, ɛsag 113 na 118, abaám gá gɔb agá nɔgɔnd ná Bolifié. 31Yésu ganyɛ gɔ́b gɔg ká: «Nugagúmbɛ́yɛ́bɛd banuá gidigid na budug bá ínen. Búnyɛ buɔ́ŋɔ́n ká: Ngɔɔ́n ogiíg, bɛdɔ́mbá bínyá agá ɔmɛndɛ sálámand.#26.31 Dián Sakaliás 13.7 32Ta anaány, anyɛ́ nganuányɔg aga ebeguén, ngakɛn gán Galilé.» 33Piéle gugɔ́l gugál uganyɛ ká: «Ta band gidigid gubɛ́yɛ́bɛd, yaŋuá ndigagubɛ́yɛ́bɛd ta buɔ́s.» 34Yésu ganyɛ gág ká: «Agá meliŋítas, ngúguɔyɔɔn ká na budug bá ínen, ká gided sién gídádɛ́d, agagúbá amámán gumbɛ́sáŋɔ́n bɛsɛgɛl bídadɔ.» 35Piéle guondinyi ká: «Ta buɔ́s ndɛgɔyɛd ká ndɛgúgulɛnsaan ta búguófoon ká ngú nɔw.» Bafɔ́nɔfɔ́n bem ɔbɔ́yɛd buanda búmoom.
Mbísógól yá Yésu Gesemané
(Mál 14.32-42; Lúk 22.40-46)
36Agá gélem ány, Yésu na bafɔ́nɔfɔ́n bág abáb agá kɔɔ́m bábɛ́laná ká Gesemané, uganyɛ gɔ́b ká: «Ɔ́nulɔbɛ́n aya gɛsɛgɛl yobísógólónyó éné.» 37Uwɔbígɔ́gɛ́d na Piéle na baan bá Sebedé bándɛ, buwa ubuadɛgɛn wɔ́ manɔŋ mág amáb gá gúsɔ́mb sɔ́mb. 38Uganyɛ gɔ́b gɔg ká: «Ɔdɛ́m wám nyɛ na isígíl yá nigú ta bɔ́guɔyɔ. Ɔnulɔbɛ́n aya, núkúle nam!» 39Uwɔbɛ́gɔ́gɛ́d enéné, uwagua busió lɛ́ŋa gus, uwedúm gubísógólonyi wɔyɔ ká: «Babá, ímábá búnyɛ bágubá nɔ́, mbagɛ́n ɛdɔ́ga yá meyú eye. Ta anaány, nsɛ́ búbiál anyɛ́ ebílénené, saá anyɛ́ mbílénené!» 40Uwand gusiónd buáy bá bafɔ́nɔfɔ́n, uwɔfuɔg bɔ́ gá dunɔ́. Uganyɛ gá Piéle ká: «Anaány gúnyá nudɛbá na bugaga bégúkúlíd nam ta gá háwa omoom e? 41Énukúlé, nubísógólonyi ká nudɛguɛ́n agá mbuge. Ɔdɛ́m wá mɔnd nyɛ na bɛ́nɔ́g bá ɛmbɛ́dágɛ́dɛn, nuɔ́l nág gɔ́g nyɛ na bunɔn.» 42Uwand gubɛ́gɔ́gɛ́d gá gándɛ gá guobísógólónyí, wɔyɔ ká: «Eé Babá, ɔ́g ɛdɔga eye dɛbá na mbagɛ́n ká ndɛbuwa yɛ́, nsɛ́ gubílén gɔ́w biál!» 43Uwand gusiónd egúy na bafɔ́nɔfɔ́n bág, gufuɔg bɔ́ gá dunɔ́, gágual ká eŋís yɔ́b mabá yásɛ́ma. 44Uwanɛn bɔ́, uwand gubɛ́gɔ́gɛ́d gá gúbísógólonyi gá gɛsɛgɛl gá gádadɔ, uwondidononyi gugál gúmoom. 45Uwad gusióndo agá bafɔ́nɔfɔ́n, ugany gɔ́b ká: «Ánɔbaán na busió na dunɔ́ nudúke o! Gɛsɛgɛl gá gúŋdú yaŋuá Mɔɔn wá mɔnd agá ɛmbɔ́g sá bafalafal mámán gúsiége. 46Ánuadɔ́g, dɛ́dɔ́mb! Ɛ́nɛ́, mɔnd ugegúnúndú ganyɛ kɔ́.»
Bámádɛ́gɛ́n Yésu
(Mál 14.43-52; Lúk 22.47-53; Sáŋ 18.2-11)
47Umáal umányá gúgála, Yúdasa omoom wá bát na bándɛ gusiám. Umabá ɔlɔŋ na gianta gá giŋi gá band. Band abaány mabiánán dugub na iŋumb, bɔgɔ́gɔ na bagɔn bá gidɔŋ bámáadɔ́m bɔ́. 48Yúdasa umáabá ká ugegúdú Yésu méŋín giŋi igiány bulinsi ká: «Mɔnd uwɔ́ ngɔgúnúgɔ́l wɔ́ nŋund, ɔwɔ́, ánubíkuá wɔ́.» 49Kɔ́ na kɔ́, Yúdasa gubɛ́nyɛkɛnɛn Yésu, uganyɛ ká: «Imégubígélídí Ofúnyifúny!» Uwad gugɔ́l wɔ́ nŋund. 50Yésu ganyɛ gág ká: «Ogúl e, alaán gɔ́w gá buol!» Bɔsɔ́gɔ́ bómodió gɔg abábɛ́nyɛkɛn Yésu, gubíliɔ́gɛdɛn wɔ́, abádɛgɛn wɔ́. 51Omoom wa ɔlɔŋ wá Yésu gusɔmɔn nugub nág uwádɛ́n eŋél buol wa ɔgɔn wa bɔgɔ́gɔ, uwasɔ́mb wɔ́ odú. 52Yésu ganyɛ gág gɔg ká: «Ondí nugub nɔ́w agá niluku ná nú, gágual ká mɔnd gidigid ugɔ́lɔnɔ́ nugub gá guɔ́n mɔnd na nú, bɔ́gɔɔ́n wɔ́ sɔ́n na nugub. 53Lɛns ká ímábaŋɛdɛn Babá ká wúŋágɛ́n ɔmbɔ́g, ád ány, ugagúŋdɔ́mɛ́n biŋi anyɛ biŋi bá ɛngɛlɛs bág. 54Nanyá gɔg iŋɔ́ŋɛ́n siɔ́yɔnɔ́ ká buanda gidigid gúbianan ká búbɛ́dɔ́mb anaány ká gúbífuógidonyi e?» 55Yésu ganyɛ gá giŋi gá band ká: «Nuguŋólonin na dugub na iŋúmb ká núsiŋadɛ́gɛ́n anyɛ inyɛ gɛmbuánsɛl, ndɛ́ɛgubá medug mem ilukié agá gians gá Gɔdányá mfúnyifunyi, banuá ta guŋadɛgɛn e? 56Manda amaány gidigid másiám anaány ká iŋɔ́ŋɛ́n sá mubús má Gɔdányá bífuógidonyi.» Bafɔ́nɔfɔ́n gidigid abábɛ́yɛ́bɛd wɔ́ gɔg, ɔbɔ́bínɔ.
Bámábán Yésu aga nɛgál ɛnɛgɔn
(Mál 14.53-65; Lúk 22.54-55,63-71; Sáŋ 18.12-18)
57Ebe bámáadɛ́gɛ́n Yésu gubaan wɔ́ agá Kayífe ɔgɔn wa bɔgɔ́gɔ. Bóŋ na bagɔn mabɛ́gɔ́sɛ́gán agagá. 58Piéle uwɔ́, umabá ayáyá úládaán Yésu gutɔ guám agá ɔɔnd wá ndáŋa ya ɔgɔn wa bɔgɔ́gɔ; uwelukumin na begiíg ká wán guamana gá buóny ubuány. 59Bɔgɔ́gɔ na band gidigid bá nɛgál ɛnɛgɔn mámbá gɛɛ́mbɛ́n ta agá gɛsɔbɔ ká Yésu gua gɛsan anaány básɔ́mb ká úgú. 60Ta anaány, bádɛmabia; ta anyɛ́ búnyá band giod móoloón na móony má bɛsɔbɔ mámáabɛ́lɛ́ŋán wɔ́#26.60 Alɛ́ŋɛ́d ɛsag 27.12; 35.11. Gá guamaná, band bándɛ obólúgun, 61bágányɛ ká: «Mɔnd ewe mɔyɛ́d ká: “Inyɛ bágúgad gians gá Gɔdányá yond mfuág gɛ́ gá medug mádadɔ#26.61 Alɛ́ŋɛ́d Sáŋa 2.19 .”» 62Ɔgɔ́n wa bɔgɔ́gɔ gudélímin uganyɛ gág ká: «Adɛgúbɛ́sága gá buóny ebue bɔ́yɔnɔ́ gɔ́w gá busió e?» 63Yésu uweluŋ pɔɔ́. Ɔgɔ́n uwaány ganyɛ gág ká: «Imóguófún agá ɔfɛ́n wá Gɔdányá usɔ́dɔnɔ́, diɔ́yɛ́dɛ́n ímábá anyɛ Kilíse, mɔɔn wá Gɔdányá.» 64Yésu guondinyi ká: «Aŋuá ɔyɔnɔ́ bú, ngúnuɔ́yɔɔn ká, gubanyɛg nɛ́nuán, nugaŋán yaŋuá Mɔɔn wá mɔnd ilukié agá ɔmbɔ́g ɔnɛ́m wá Gɔdányá wa bugaga buum, nugaŋán sɔ́n yiíleen agá nugánd ugumuana.» 65Anyɛ́ ɔgɔ́n uwaány mɔ́ɔb anaány, uwalaf bɛla bág uganyɛ ká: «Ugúsɛga Gɔdányá! Eŋél gɛ́laluá unúm diándaná guamba e? Banuá muát numɔ́biɔ́bɛ́n nsɛgɛ. 66Banuá nugúbɛ́dága ká nanyá e?» Obóndinyi ká: «Ugúsɛgɛmanan na nigú#26.66 Alɛ́ŋɛ́d Lef 2416.» 67Abád gudúm gutúnen wɔ́ bité agá busió, ebégide wɔ́ na bibúm, bómodió sába wɔ́ ɛmbɛl#26.67 Alɛ́ŋɛ́d Isayi 50.6 bɔ́yɔ ká: 68«Aŋuá Kilíse, lɛnsɛ́, ɔ́diɔ́yɛ́dɛ́n ewe umánugunáŋɛ́d.»
Piéle mábɛ́sáŋɔ́n Yésu
(Mál 14.66-72; Lúk 22.56-62; Sáŋ 18.17,25-27)
69Piéle mabá ilukié agá ɔɔnd. Agánd omodió uwabɛ́nyɛkɛnɛn Piéle, uganyɛ ká: «Aŋuá sɔ́n asabá na Yésu mɔnd wa Galilé!» 70Piéle gubɛ́sáŋɔ́n agá eŋís yá mɔnd gidigid uganyɛ ká: «Ndɛgɔ́lɛnsan buanda ambaná guɔyɛd.» 71Anyɛ́ umáabá wɔbaan buáy bá nibíŋínín ná ɔɔnd, eŋél buol agánd omodió uwaán wɔ́. Uganyɛ gá band bámáabá ány ká: «Sɔ́gɔ ewe águbá na Yésu wá Násalɛd.» 72Piéle guand gubɛ́sáŋɔ́n, uwabɛ́lia wɔyɔ ká: «Ndɛgɔ́lɛnsan mɔnd uwaány!» 73Mɔɔn wá gɛsɛgɛl, band bámáabá ány, abábɛ́nyɛkɛnɛn Piéle bágányɛ gág ká: «Cácácá, anyɛ sɔ́n omoom wɔbɔ! Nɛnama nɔ́w ná gúgálágal iniány gúdíyenyi nɔ́.» 74Piéle gudúm guɔyɔ ká: «Nsɛ́ Gɔdányá ámfá nusésídény imábá ngúnéŋe ká ndɛgɔ́lɛnsan mɔnd uwaány.» Kɔ́ na kɔ́, gided igiádádɛ́d. 75Piéle gudúmbi gubɛ́dágɛd gugál gá Yésu ugú umɔ́ɔyɛ́dɛ́n wɔ́ ká: «Ká gided sién gídádɛ́d, agagúbá amámbɛ́sáŋɔ́n bɛsɛgɛl bɛ́dadɔ#26.75 Alɛ́ŋɛ́d 26.34.» Uwaám, uwenegú nióny.
Àwon tá yàn lọ́wọ́lọ́wọ́ báyìí:
Matáyoso 26: MMU2
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
CABTAL
