Matáyoso 13
13
Nsab ya Bufuŋ bá muana
(Mál 4.1-9; Lúk 8.4)
1Buɔ́s ubúany, Yésu uwaám agá gians, uwɔb guelúkúmín agá gɛsál gá manáŋ abɔ́sa gá gufúnyifunyi band. 2Bianta bá biŋi bá band ibiábɛ́gɔ́sa agág gá masiá, nɛnama nɛ́nyá ká, uwanabɔ́lɛg agá gilu, uwelukumin kɔ́ nagadá. Giŋi gá band igiábɛ́gɔ́sɛ́d agá gɛsal. 3Umɔyɔɔ́n bɔ́ nsab giod. Uganyɛ́ gɔ́b ká: «Mɔnd máab gá guebuénén imbu. 4Anɛ́ umáabá wuúl ufámaán sɛ́, esié isiáguanan agá másía má nŋili; munoni umuúl umuɔsɔbɔɔn sɛ́ tákɔ. 5Síndodió isiánaguanán agá gúsi gá anságáy kɔɔ́m nsánɔ́ diábáná á kɔ́ nsɔ́b. Isiédúmbi gubumug anyɛ́ nsanɔ́ meén sídial kɔ́ nsɔ́b; 6Anɛ́ ɔɔny máab gágúlánsá, uwébegesi sɛ́, isiágɔ́d gágual ká sídimesumi iŋaŋa. 7Síndodió sɔ́n isiánaguanan agá bigud bá insánd, bigud bá insánd ibiány ibiágɔm, bɛ́bɛ́ gumányɛ́gɛnɛn imbu símɔ́ɔsɔɔ́g. 8Síndodió sɔ́n isiánaguánán agá gɛ́nɔ́g gá gus. Isiébumug, isiágɔm, isióm biínd: ebie ágaan insamɔ́ nɔgɔn, bindodi etín ádadɔ, bíndodió sɔ́n insamɔ nitín na siát. 9Yésu ganyɛ gɔ́b ká: Unyá na idú sá guɔ́b, wɔɔ́b!»
Góbúsió bá giág Yésu gálaná agá nsab e?
(Mál 4.10-12; Lúk 10.9-10)
10Biŋi bá band máal bɛ́másánɛ́gɛ, bafɔ́nɔfɔ́n bá Yésu gɔbɛ́sɛdɛnɛn wɔ́, obófún wɔ́ ká: «Giágɛ́ agálaná bandɔ agá nsab e?» 11Uwondinyi bɔ́ ká: «Banuá, bégunúlínsi niɔs ná búfuŋ bá muana, bɔsɔ́gɔ́ bádiábáná nasɔ aya, bɔ́bɔ́ bádɛ́bá ná gɔlɛns uguány. 12Mɔnd ubiánaná, bágaand guɔ́yɛ́kɛnɛn wɔ́, úbia gudúmbídenyi; ewe gɔg udiábiánáná, ta ubú ubiananá, bɔ́gɔgɔ́l. 13Buád buanda ngálaná bɔ́ nsab nsaba gágual ká bágúlɛ́ŋa, bádián, bɔ́bídɔ́lɛ́gɔɔn, bɔdiɔ́b, bádisɔ́ŋɔ́n. 14Anaány gugál gá ibús Isayí mɔ́ɔyɔ́ gɔ́b gá busió bífuógonyó. Umɔ́yɔ́ ká:
Ta nubɛ́dɔ́lɛ́gɔɔn nanyá, nudɛgasɔ́ŋɔ́n;
ta nugalɛ́ŋa nanyá, nudɛgáan.
15Gágual ká ɔdɛm wá band ebe nyɛ gulal,
bányɛ́ na idú
bégúbífugen eŋís
ká bádiánaan na eŋís yɔ́b,
ká bɔ́diɔ́bɔɔ́n na idú sɔɔ́b,
ká bádɛ́sɔ́ŋɔ́n na ɛdɛm sɔɔ́b,
anaány gágual ká bédínúgí ɛdɛm sɔɔ́b#13.15 Alɛ́ŋɛ́d Isa 6.9-10 ká ndisódí bɔ́.
16«Banuá gɔg, bese nanɔ gágual ká eŋís yaán guánan, idú sán ɔ́bɔn. 17Ngúnuɔ́yɔɔn agá meliŋítas ká mubús giod, na besi bá band giod mebíléné guán ubú nuánaná, bɔ́bɔ́ ta guán, ebébíléne guɔ́b ubú banuá nuɔ́bɔnɔ́, bɔ́dimɔɔ́b.
Gubúlún gá nsab
(Mál 4.13-20; Lúk 8.11-15)
18«Banuá gɔg, ɔ́nubɛ́dɔ́lɛ́gɛ́n gubúlún gá nsab ya mɔnd uméebuénén imbu. 19Gɛsɛgɛl mɔnd bɛ́dɔ́lɛ́gɔnɔ́ gugál gá Bufuŋ bá muana udisɔ́ŋɔ́nɔ, anaány gúnyá ɔmbɛ́lɛmbɛ́l gúleén wéli buanda bányá guág agág gá ɔdɛm. Mɔnd uwaány nyɛ anyɛ masiá má nŋili kɔɔ́m ansamɔ máaguá. 20Ewe úmáaguá agá anságáy, unyɛ anyɛ ewe ubɛ́dɔ́lɛ́gɔnɔ́ gugál gá Gɔdányá, úgɔ́l gú na bɛdɔdɛn; 21Gugál gɔg dɛluá ɛŋaŋa ɔgɔbɔ́, unyɛ mɔnd unúgenyé fiaŋ, gɛsɛgɛl meyú mánusiámá, gúmén bésésenyé wɔ́ góbusió bá gugál, ubɛ́nɛɛn. 22Ewe úmáaguá agá bigud bá insánd, búnyɛ mɔnd wɔ́bɔnɔ́ gugál, ɛŋágɛ́nɛ́n gɔg na gubísésenyi manda má gus mányɛ́gɛnɛn gugál, ulɔb udióm biínd. 23Ombu úmáaguá agá ginɔ́g gá gus, unyɛ́ anyɛ mɔnd ubɛ́dɔ́lɛ́gɔnɔ́ gugál wond usɔ́ŋɔ́n gú. Wád guóm biínd, gímoom insamɔ nɔgɔn, gímodió etín ádadɔ, gímodió sɔ́n nitín na siát.»
Nsab ya biád bá bigud
24Uwand gudúmín bɔ́ nsab imodió, uganyɛ ká: «Bufuŋ bá muana gúbífuáganan mɔnd umáagɔ́n bɛnɔg bá magɔ́nɛd agág gá gisién. 25Na budug, gɛsɛgɛl band máabá bábɛ́dɛ́mana, ɔmbɛ́lɛmbɛ́l waga uwuúl, uwagɔ́na biád bá bigud agá gadágadá wa buanda búbɛ́fuágananá nkene, uwadɔ́mb. 26Anyɛ́ magɔ́nɛd méedúm guámaan, omóom, biád bá bigud sɔ́n yegeny. 27Beli buol bá muát gisién ɔbɔ́siɔyɛ́dɛ́n wɔ́ ká: “Ɔgúnɔ́, saá bɛnɔ́g bá magɔ́nɛd amáagɔ́n agá gisién a? Nanyá biád bá bigud ganyá kɔ́.” 28Uganyɛ gɔ́b ká: “Ɔmbɛlɛ́mbɛl unyá gual bú.” Bágányɛ gág ká: “Aguámba gɔg ká dɛɛ́b gualáŋɔ́ná bá e?” 29Uganyɛ ká: “Ágó, gɛsɛgɛl nugenuélenyi biád bá bigud, nunyɛ bágúbálá buanda búbɛ́fuágananá nkene. 30Ánɔnɛɛ́n manda amaány mem mágɔ́man ɔlɔŋ gutɔ guám agá magaya, ngɔyɛd gá begeyi agá gɛsɛgɛ́l giád igiány ká: Ánuál guélenyi biád bá bigud, nuála bimbi gá gúbegesi bɛ́. Núgɔ́l buanda búbɛ́fuágananá nkene nuágaan agám gá gɛsasɔ.”»
Nsab ya ansásamɔ
(Mál 4.30-32; Lúk 13.18-19)
31Uwand gudúmín bɔ́ nsab imodió, uganyɛ ká: «Bufuŋ bá muana gúbɛ́fuáganan ansásamɔ siɔdɛdɛdɛd mɔnd mɔ́ɔgɔ́l gá gúgɔ́n agá gisién gág. 32Únyɛ menyí siɔdɛd gá insamɔ gidigid; gɛsɛgɛl úmánuám gɔɔ́gɔ, wɛɛ́y gianta gá bɔdɛ́d gɔdɔ́mb bɔsɔ́gɔ́ madɛ́d á, munoni sifuágá aŋana yɔ́b agá bɛgas bá bɔ́.»
Nsab ya ginudígin
(Lúk 13.20-21)
33Uwand gudúmín bɔ́ nsab imodió, uganyɛ ká: «Bufuŋ bá Gɔdányá nyɛ anyɛ ginudúgin agánd gɔ́lɔnɔ́ udɔ́bɔ agá bokílo nitín na bátaán bá okuŋ bálaná makala na wɔ́, gidɔ́b igiány gidigid fɔdɔga.»
Góbúsió bá giág Yésu gálaná agá nsab
(Mál 4.33-34)
34Yésu mɔyɔɔ́n biŋi bá band manda amaány gidigid agá insab, ta buóny búmoom udimɔyɔɔn bɔ́ kand nsab, 35anaány gugál gá ibús móobífuógídónyí, umɔyɛ́d ká: Ngagála gɔ́b agá insab, ngɔyɔɔn bɔ́ manda mɔsɛ́gɔ́n guedúm anyɛ́ gus máabɛ́bɔ́nd.#13.35 Alɛ́ŋɛ́d Ɛsag 78.2
Gubúlún gá nsab ya biád bá bigud
36Yésu uwanɛn biŋi bá band uwɔb agá nuyá, bafɔ́nɔfɔ́n bág abábɛ́nyɛkɛnɛn wɔ́, bágányɛ gág ká: «Díbúlúnín nsab ya biád bá bigud agá gisién.» 37Uganyɛ gɔ́b ká: «Ewe ugúnaná bɛnɔg bá magɔ́nɛd, unyɛ Mɔɔn wá mɔnd. 38Gisién nyɛ́ gus egue, bɛnɔ́g bá magɔ́nɛ́d nyɛ band bá Bufuŋ bá muana, biád bá bigud nyɛ band bɔ́bɔnɛnɔ́ giád gá gíliíndié, 39ɔmbɛ́lɛmbɛ́l umáagɔ́n biád bá bigud nyɛ ahand, magaya nyɛ guman gá gus egue, begeyi nyɛ ɛngɛlɛs. 40Nɛnama ɛnɛ́ bámáabádá biád bá bigud ká bébégesi, anaány búganúbá gá band gá gúman gá gus egue. 41Mɔɔn wá mɔnd gadɔ́m ɛngɛlɛs bág ká bélenyi agá bufuŋ bág, band gidigid béfúdenyé bɔsɔ́g bandua, na ebe bálaná bɔbɛ, 42bétenyi bɔ́ agá gɛgɔ́lɔ́gɔdɔ gá yoóg; band abaány gabaŋa, bábíbánda bikeléd#13.42 Alɛ́ŋɛ́d sɔ́n Mat 8.12 43Ebe bányá besi aga Gɔdányá gabá seeee anyɛ gise agá Bufuŋ bá sié wɔbɔ. Ewe unyá na idú sɔ́guɔ́b, wɔɔ́b!
Nsab ya bɔnɛ́m na bulaŋ
44«Bufuŋ bá muana gúbɛ́fuáganan bɔnɛ́m búmáabá buɔsɛ́gɔ́n agá gɛsɔmb, mɔnd uwɔfuɔg bɔ́, uwɔsɛg. Na bɛdɔdɛn giod, uwɔb uwedú buanda gidigid umáabiánán, uwɔɔ́nd gɛsɔ́mb igiány. 45Bufuŋ bá muana nyɛ sɔ́n anyɛ eduús umáambá bɛnɔg bá malaŋ. 46Anyɛ́ umáan bulaŋ bá muonyi giod, uwɔb uwenedú buanda gidigid umáabiánán, uwɔɔ́nd bú.
Nsab ya buoli
47«Bufuŋ bá muana guánd gubɛ́fuáganan buoli bétenyé agá manáŋ abɔ́sa, buádɛgɛn anama yá muɔbɔ gidigid. 48Gɛsɛgɛl búmónufuógo, bɔ́gɔ́gɛ́d bú, bág bú agá nsɔ́l, bélúkumin, bélenyi bɛnɔ́g bá muɔbɔ, bágaan agá insada, múdiábáná mamɛ́nɛmámɛ́n, boómbo. 49Anaány búganúbá na guman gá gus egue. Bɛɛ́ngɛlɛs gól gá gúsidándúná babɛ na band bányá besi, 50bétenyi babɛ agá gɛgɔ́lɔ́gɔdɔ gá yoóg; ány báganúbáŋa, bábɛ́bánda bikeled.»
51Uwad guófún bɔ́ ká: «Numásɔ́ŋɔ́n manda amaány gidigid a?» Báganyɛ ká: «Ɛŋɛ́ɛ!» 52Uganyɛ sɔ́n ká: «Oŋóŋ bisele gidigid unyá gufɔ́nɔfɔn manda málɛ́ŋaná Bufuŋ bá muana nyɛ anyɛ muát nuyá ugɔ́lɔnɔ́ agá bɔnɛ́m bág, bilunu bá manda, na bɛŋɔ́lɔŋɔ́siɔ.»
Band bá Násalɛd meén guádáb Yésu
(Mál 6.1-6; Lúk 4.16-24)
53Yésu máal úmɔ́dɔmb guɔyɔɔn bɔ́ insab isiány, uwélíki ány. 54Anyɛ́ umáab agá gɛdɔŋ gág, uwefúnyifunyi ɔgɔ́b gá gians gá mbísógól, ubuál ká band bɔ́mɔ́ɔbɛ́dɔ́lɛ́gɔɔ́n wɔ́ méŋemeŋ giod, bɔ́mɔyɔ́ ká: «Nsiŋi eyíné gúlenin wɔ́ nány, ányá unyá gufá wɔ́ bugaga báguala mesey? 55Udɛbá mɔɔn wá kábínda e? Saá Maliá unyá inyódió a? Sáa belimen bág bányá Sáka, Yɔ́sɛba, Símune, na Yúde a? 56Belimen bág bagánd gidigid digúlɔbɔɔn agasuá? Manda eméné gidigid guúlenin wɔ́ nány?» 57Ubuál ká beén guádáb Yésu. Uganyɛ gɔ́b ká: «Bɔdigúgɔ́lɔɔn ibús gianta gá buanda agág gá gɛdɔŋ, ta agág gá nuyá.» 58Udimal mesey giod agá kɔɔ́m agany gágual ká bódimondonyi ɔdɛm gág.
Àwon tá yàn lọ́wọ́lọ́wọ́ báyìí:
Matáyoso 13: MMU2
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
CABTAL
