Lúkasa 23
23
Yésu agá Piláta ngɔ́mɔnɔ wa Balomɛ́ŋ
(Mat 27.2,11-14; Mál 15.1-5)
1Agá gélem ány bɔ́bɔ́ bem abában Yésu agá Piláta. 2Ebédúm gusɔ́mɔɔn wɔ́, bɔ́yɔ ká: «Dígufuɔgɛn mɔnd ewe udídígen band bá gɛdɔŋ ká bála ɔduɔ́ gulal: Ulegen bɔ́ ká bádɛ́namaán taás wa ofuŋ uwɔgɔ́n bábɛ́laná ká Sesála, wond wɔyɔ uwɔ́ muát ká, unyɛ Kilíse, ofuŋ.» 3Piláta uwófún wɔ́ ká: «Anyɛ ofuŋ wá Beyúdɛn e?» Yésu guondinyi ká: «Ɔguɔ́yɔ.» 4Piláta ganyɛ gá bɔgɔ́gɔ na giŋi gá band ká: «Yaŋuá ndiguánaan ɔduɔ́ wá buóny wá gisɔ́mɔnɔ úgusenyé mɔnd ewe.» 5Ta anaány, bábaan na busió na guɔyɔ magɔ́gɔ́n ká: «Agá gufúnyifunyi gág, úgudídígen band bá gɛdoŋ ká bála ɔduɔ́ gulal. Umedúmín agá giéns gá gus gá Galilé, uwuúl wúbán yudé gidigid, nɛ́nuán, uganyɛ aya.» 6Anyɛ́ Piláta mɔ́ɔb anaány, uwófún ɔ́gɔ mɔnd uwaány nyɛ wa giéns gá gus gá Galilé. 7Umáal nɔguɔ́b ká Yésu nyɛ wa giéns gá gus ɛgɛ́ Elódo nyá ofuŋ, uwɔ́ gudɔ́m wɔ́ agagá, gágual ká Elódo mabá mɔɔ́s amaány Yelúsalɛm.
Yésu aga Elódo
8Guán ugú Elódo máan Yésu, uwabia bɛdɔdɛn ta bɔ́guɔyɔ, gágual ká umɔ́ɔbɔɔ́n bɔ́yɔ manda ɔmɔ́ Yésu máabá wala, búgányɛ gianta gá gɛsɛgɛl umáabá ubíléne ká úlúmen naga, ká waán wɔ́ wala gisey. 9Elódo móofoón Yésu iŋófúny, uwɔ́ ta guondiyi. 10Bɔgɔ́gɔ na bóŋ bisele mabá ány beligenyi buóny. 11Elódo na bebíd bág masɛ́gɛ́nán Yésu, bekuéle wɔ́; abaág wɔ́ gɛla gímésegímíné anyɛ ɔɔ́ny gá gúsɛga wɔ́. Uwondi wɔ́ gɔg agá Piláta. 12Na Elódo na Piláta mabá bambɛ́lɛmbɛ́l nsua, buɔ́s ubuány, abɛɛ́y begúl.
Bámásɔ́mb ká Yésu gúsigimana ká úgú
13Piláta uwabɛ́lɛ́gɛn bɔgɔ́gɔ, na befuŋ na band bá gɛdɔŋ, 14uganyɛ gɔ́b ká: «Núguŋólónin mɔnd ewe nuganyɛ ká ugúdídígen band ká bála ɔduɔ́ gulal, nánié, yaŋuá nguófoon wɔ́ nŋófúny agán gá busió, ndɛ́guán buanda ubɔbɛ́ kɔ́. 15Ta Elódo sɔ́n anyɛ́ usógudióndinyi wɔ́, udimaán buanda búsígimananá na nigú ná mɔnd uwaány. 16Yaál gufá wɔ́ mɔɔn wá nusésídény, mbád gunɛn wɔ́.» [ 17#23.17 Nulia enue dɛbá agá imbɔbɔnɔ giod síndodió sá nsua.]
(Mat 27.15-26; Mál 15.6-15)
18Abánsɛ́d magɔ́gɔ́n bɔ́bɔ́ bem ká: «Ɔɔ́n wɔ́, ádɛ́nɛnɛn Balábasa.» 19Wád Balábasa béméetí wɔ́ agá gians gá mbíne gágual ká umabá agá ɔlɔŋ wá band bámáal gibueŋidie agá tísɔn, uwond uwɔɔ́n mɔnd. 20Piláta guondidonyi gugál gág na ɛmbɛ́dágɛ́dɛ́n yá gual ká útɛ́n Yésu. 21Bɔ́bɔ́ guánsɛ́d ká: «Sánd wɔ́, sánd wɔ́.» 22Gá gɛsɛgɛl gá gádadɔ, Piláta ganyɛ gɔ́b ká: «Giág gá bɔbɛ mɔnd ewe nyá gual e? Ndíguán buanda búdíyenyé ká ugúsigimanan na nigú, yaál gufá wɔ́ nusésídény, mbád gunɛn wɔ́.» 23Ta anaány bámabaán nobusió na guánsa bɔ́yɔ ká: Sánd wɔ́. Gians gɔ́b igiámányɛ́n. 24Piláta uwaán besé ká wádábɛn bɔ́ ubú bómóofún wɔ́. 25Uwémi ewe bómóofoón, uwɔ́ waád béméetí agá bɛmbɔg gágual ká umabá agá ɔlɔŋ wá band bámáalá gibueŋidie agá tísɔn uwond uwɔɔ́n mɔnd. Piláta guéŋin bɔ́ bugaga ká baál na Yésu anyɛ́ bébílénené.
Yésu agá nŋili yá gɛsanda
(Mat 27.32; Mál 15.21)
26Anyɛ́ bámábaán naga, ebélumen na mɔnd omodió umóolón agá tísɔn, ɔfɛ́n ká Símune wa Silɛ́n, abádɔ́gɛn wɔ́ ɛgɔnɔ, Yésu agá busió, uwɔ́ uládaan. 27Giant gá giŋi gá band maládán Yésu, bagánd mabá kɔ́ bábáŋa, bábɛ́dálaan ɛmbɔ́g agá ɛduá, bónd bábísɔ́sɔ́la gág góbusió. 28Yésu uwabɛ́guagalɛdɛn bɔ́, uganyɛ ká: «Babúla bá Yelúsalɛm, nudímbaŋá, anúbíbáŋá banuá muát na baan bán. 29Gágual ká medug gúlén ɔmɔ́ bɔnuɔ́yɔnɔ́ ká: “Bese na bɛwád bá bagánd, na bámáal bédíbién, na bámáal bédífúŋí.” 30Gigúl igiány, band gɔyɔɔn dɔgɔnd ká: “Ánudɛ́guánɛ́n.” Bɔ́yɔɔn bɛɛnyɛ ká: “Ánudɛ́bɔ́gaán.” 31Gágual ká bámála anaány nam inyá anyɛ bɔdɛ́d bugɔ́s, bɛsɛgɛl bíník nanɔ nunyá anyɛ madɛ́d emeguén e?» 32Bámabán sɔ́n bɛmbuánsɛl biándɛ ká bɔɔ́n bɛ́ ɔlɔŋ na Yésu.
Gɛsanda gá Yésu
(Mat 27.33-44; Mál 15.22-32)
33Anyɛ́ bámáab guám agá kɔɔ́m bámáabɛ́laán ká «Ginkólóŋ kólóŋ» gá ɔduɔ́, abásand wɔ́ ɔlɔŋ na bɛmbuánsɛl biándɛ, na mɔɔn a gá waga Kolós, omoom ɔmbɔ́g uwɔnɛ́m, omodió ɔmbɔ́g adád. 34Yésu mobísógólónyí wɔyɔ ká: «Babá, nɛɛ́nɛ́n bɔ́ gágual ká bádɛgɔ́lɛnsan buand bálaná.» Ká báfɛd bɛla bág, abál ɛfɛdafɛda. 35Band mɔlɔ́b ány gá gúlɛ́ŋa, bagɔn bá Beyúdɛn mekuélé wɔ́ bɔ́yɔ ká: «Úgusódonyi band bóndodió, nsɛ́ úbísódi uwɔ́ muát ɔ́gɔ unyɛ Kilíse uwɔ́ Gɔdányá méeyíd.» 36Musia mɔdɔ́gɔ́ wɔ́ sɔ́n, umuábɛ́sɛdɛnɛn wɔ́, umuédíye wɔ́ magɛ́b matuán, muɔ́yɔ ká: 37«Ɔ́gɔ anyɛ ofuŋ wá Beyúdɛn, bísódí aŋuá muát.» 38Iniɔ́ŋ mabá ugumuana wa ɔduɔ́ wág símɔ́yɔ́ ká: «Ofuŋ wá Beyúdɛn ewe.» 39Gɛmbuánsɛl gá gímoom bámáasánd masɛgá Yésu, giɔ́yɔ gág ká: «Adɛbá Kilíse e? Bísódí, ónd ódísódi.» 40Gɛmbuánsɛl gímodió igiánsɛ́dɛn sɔ́gɔ waga ká: «Anyɛ nanyá e, edigúdíne Gɔdányá e, aŋuá agá meyú mád mómoom e? 41Gás, búnyɛ osi ká dídáŋáb bɛnama gá ubɔ́ dímáal, uwɔ́ gɔg, ta buanda ɔbɔbɛ́ udimal.» 42Uwand guɔyɛd ká: «Yésu, ambɛ́dágɛd anyɛ́ egenuúl anyɛ ofuŋ.» 43Yésu guondinyi ká: «Agá meliŋítas, mmaál gɔ́w ká inén eye, agagúbá nam agá kɔɔ́m bábɛ́laná ká paladís#23.43 Paladís nyɛ gisién gá Gɔdányá, kɔɔ́m gá bɛdɔdɛn gá Gɔdányá, kɔɔ́m meyú diandáná gubá..»
Nigú ná Yésu
(Mat 27.45-56; Mál 15.33-41)
44Búmabá búgányɛ bágubá tólóf, imbíné iyagua agá gɛdɔŋ igiány gidigid, guám gá bɛsɛgɛl bɛ́dadɔ, 45ɔɔ́ny uwéfú, gianta gá sanda gímáaduná ɔnyɛb wá Gɔdányá igiásalɛg gadágadá; 46Yésu guánsɛ́d magɔ́gɔ́n uganyɛ ká: «Babá, imóndí ɛdány yám ɔgɔ́w gá ɛmbɔ́g.» Umáal ná guɔyɛd anaány, uwafaŋɛg ambak. 47Ɔgúnɔ́ wá musia#23.47 Isia iyan dɛmabá yá Beyúdɛn, ímabá yá Balomɛŋ. umáabá ány, anyɛ́ umáan buanda búmáabɛ́dɔ́mbaán, uwakanya Gɔdányá wɔyɔ ká: «Agá meliŋítas, mɔnd ewe águbá osi.» 48Band gidigid bámáabɛ́gɔ́sá gá gúlɛ́ŋa buanda búmáabɛ́dɔ́mbaán mondoón bábɛ́dálaan ɛmbɔ́g agá ɛduá. 49Begúl bá Yésu na bagánd bámáaládaán wɔ́ gutɔ guedúm agá giéns gá gus gá Galilé medélímeén ayáyá gá gúlɛ́ŋa buanda búmáabɛ́dɔ́mbaán.
Munyon má Yésu
(Mat 27.57; 28.1-9; Mál 15.42-47; 16.1-8)
50Mɔnd ondodió ɔfɛ́n ká Yɔ́sɛba wa ɔlɔŋ wá besúmb bɛsan wá Beyúdɛn, umabá bese, uwɔ́ osi: 51Udimaám ekelu ná buɔbɔ gá ɛmbɛ́dágɛ́dɛ́n sɔ́b, na gual gɔ́b. Umabá mɔnd wa Alimaté, tísɔn wa Beyúdɛn, umebídényí Bufuŋ bá Gɔdányá. 52Ɔwɔ́ gɔb agá Píláta guófun gɛlɔŋ gá Yésu. 53Uweseli gɛ́ agá Kolós, uwemúŋe gɛ́ agá ɛndɔ́mb, uwononyó gɛ́ agá gɛbɛl bámáaduáná agá gɛgɔns, bámabá bámányɛ bádiág gɛlɔŋ kɔ́. 54Buɔ́s ubuány mabá buɔ́s bá muándɛ́n má Sábát umáabá ubányɛg. 55Bagánd béméedílígén wɔ́ gutɔ guedúmín Galilé maládaán Yɔ́sɛba, bámalɛ́ŋa gɛbɛl, na anyɛ́ bámáag gɛlɔŋ. 56Abád guond agá tísɔn gá guadábúná nɛnama ná megud nímodió, na megud má ɔlɔf gá gɛlɔŋ. Buɔ́s bá Sábát, ebédúke, Kɔɔ́kɔ anyɛ́ bisele bá Moyíso ɔ́yɔnɔ́.
Àwon tá yàn lọ́wọ́lọ́wọ́ báyìí:
Lúkasa 23: MMU2
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
CABTAL
