Sáŋa 9
9
Giéŋugie gá obúdobudo
1Anyɛ́ Yésu mádɔ́mbána, uwɔ́ guán mɔnd uméebíbién na bibúde. 2Bafɔ́nɔfɔ́n bág ganyɛ gág ká: «Ofúnyifúny, ányá umáal gɛfal ká mɔnd ewe bíbién na bibúde e? Ɔwɔ́ e, ta ɔ́g ká bebiény bág e?» 3Yésu guondinyi ká: «Ta ɔwɔ́, ta bebiény bág, ta mɔnd udɛmaal gɛfal, búnyɛ́ gágual ká masɔ́m ma Gɔdányá bífuógidonyi agág gá nuɔ́l. 4Gɛsɛgɛl buɔ́s nyá kɔ́, búguófoon ká diála buol bá ewe umáandɔ́m. Budúg moól, ta mɔnd udɛbá bágual buol; 5gɛsɛgɛl gidigid imányá egegus, inyɛ gise gá gus.»
6Yésu máal náguɔyɛd anaány, uwetuún bité egegus, uwɔdɔ́bɛ́d bɛsamba na bité ibiány, uwegúgúle agá eŋís yá obúdobudo. 7Uwɔyɛdɛn wɔ́ ká: «Gabɛ́sɔ́gɛ́d agá gɛsɔ́ gá Siluwé, gúgúnyá edúmeb.» Obúdobudo gɔb guabɛ́sɔ́gɛ́d, uwosiónd uganyá guánaan. 8Band bá ɛfág na ebe bámáabá bámámán gufɛ́l guánaan wɔ́ nsua usɔ́gɔsɔg manda mɔyɔ́ ká: «Saá uwɔ́ umáabá ilukié éné agá buáy bá nŋili usɔ́gɔsɔg manda e?» 9Ebe ɔ́yɔ ká: «Búnyɛ ɔwɔ́ wɔ́!» Bómodió ɔyɔ́ ká: «Ágó, búnyɛ mɔnd ubɛ́fuágananá wɔ́.» Obúdobudo ɔ́yɔ ká: «Yaŋuá muát wɔ́.» 10Obófún wɔ́ ká: «Eŋís yɔ́w gɔg, nanyá yányá gual ká ébífuun e?» 11Uwondinyi ká: «Mɔnd bábɛ́laná Yésu umɔ́ɔdɔ́bɛ́d bɛsamba, uwengúgúle agá eŋís, uwaal gám ká: “Ɛmbɛ́ agá gɛsɔ́ gá Siluwé, ábɛ́sɔ́gɛ́d.” Ány gɔg, yaŋuá gɔɔb iyanabɛ́sɔ́gɛ́d, iyedúm guánaan.» 12Bágányɛ gág ká: «Ɔwɔ́ waád, unye nány e?» Uwondinyi ká: «Ndɛgɔ́lɛnsaan.» 13Abábaan mɔnd umáabá na bibúde aga Bafalisiɛ́ŋ. 14Nánie búmabá buɔ́s bá Sábat Yésu mɔ́ɔdɔ́bɛ́d bɛsamba, uwegúgúle wɔ́ agá eŋís, eyébífuun. 15Bafalisiɛ́ŋ bɔbɔ́ sɔ́n guófún wɔ́ ká: «Giág gínyá gubɛ́dɔ́mb ká ánd guánaan?» Uwondinyi ká: «Úgungúgúlid bɛsamba agá eŋís, iyabɛ́sɔ́gɛd, nɛ́nuán nguánaán.» 16Agá ɔlɔŋ wá Bafalisiɛ́ŋ, bómodió ɔ́yɔ ká: «Mɔnd ewe digúkanya Sábát, udigúleén aga Gɔdányá.» Bómódió ɔ́yɔ ká: «Nanyá afalafal nyá bágubia bugaga báguala nɛnama ná bisey ana e?» Ány, bádɛmand gubá ekelu bɔ́bɔ́ na bɔ́bɔ́. 17Bafalisiɛ́ŋ guand guófún mɔnd umáabá na bibúde ká: «Aŋuá ɔguɔ́yɔ ká giág gá ewe uméegufuún eŋís e?» Uwondinyi ká: «Unyɛ ibús ímoom yá Gɔdányá.» 18Beyúdɛn ebeén guádáb ká úgubá obúdobudo nsua uwedúm guánaan, buád buanda bámáabɛ́lɛ́gɛ́n bebiény bág. 19Obófún bebiény bág ká: «Mɔnd ewe nyɛ meliŋítas mɔɔn uwɔ́ nuɔyɔnɔ́ ká umebíbién obúdobudo e? Nanyá wánaná gɔg nɛ́nuán e?» 20Bebiény guondinyi bɔ́ ká: «Dɛguádábaan meliŋítas ká unyɛ mɔɔn wasɔ umébíbién na bibúde. 21Nanyá wánaná nɛ́nuán, dɛgɔ́nɔmɔnɔm mɔnd unyá gufuun wɔ́ eŋís. Uganyɛ gianta, ónuófún wɔ́, únuóndinyi ɔwɔ́ muát!» 22Bebiény bág magálá anaány gágual ká bámabiánán buwa na bagɔn bá Beyúdɛn. Gágual ká bɔ́mɔyɛ́d ká mɔnd welumenyé ká Yésu nyɛ Kilíse, bágakɔ́ŋa wɔ́ agá gians gá mbísógól. 23Buád buanda bebiény bág móndínyí ká: «Usaman gugɔm, ónuófún wɔ́ banuá muát.» 24Bafalisiɛ́ŋ abánd gubɛ́lɛ́gɛn mɔnd umáabá na bibúde. Abaál gág ká: «Gúményí Gɔdányá! Basuá dɛgɔ́lɛnsaan ká mɔnd uwaány nyɛ afalafal.» 25Uwondinyi ká: «Ndɛgɔ́lɛnsaan ímábá unyɛ afalafal, buanda búmoom ílɛnsaná búnyá, ngubá na bibúde, nɛ́nuán, nguánan.» 26Bágányɛ gág gɔg ká: «Giág unyá guguál e? Nanyá unyá gugufuun eŋís e?» 27Uwondinyi ká: «Nsaman gunuɔ́yɔɔn bɔ́, nudɛmɔmbɛ́dɔ́lɛ́gɛn gɔg. Gagiɛ́g nuambaná ká yánd guondidonyi gunuɔ́yɛdɛn e, búnyá banuá sɔ́n nuguámba guɛ́y bafɔ́nɔfɔ́n bág e?» 28Bafalisiɛ́ŋ ebédúm gusɛga wɔ́. Bɔ́yɔ ká: «Aŋuá ányá ɔfɔ́nɔfɔ́n waga. Basuá dɛnyɛ bafɔ́nɔfɔ́n bá Moyíso. 29Dɛgɔlɛnsaan ká Gɔdányá magálá gá Moyíso. Basuá dɛdɛgɔ́lɛnsan kɔɔ́m wúleniné.» 30Mɔnd uwondinyi bɔ ká: «Buóny bá guméŋemeŋ nyá ká nudɛgɔ́lɛnsaan kɔɔ́m wúleniné, uméemfuún eŋís gɔg. 31Dɛgɔ́lɛnsaan ká Gɔdányá diguóndinonyi mbísógól ya bafalafal. Mɔnd mábá gɔg na nŋɔ́bɛnɔ, wala guɔyɛd gá Gɔdányá, Gɔdányá gɔbɛ́dɔ́lɛ́gɛn mbísógól yaga. 32Dimabása didiɔ́b ká mɔnd méfuún eŋís yá ewe uméebíbién na bibúde. 33Wád mɔnd maál udílénín aga Gɔdányá, udibá bágual ta buanda.» 34Obóndinyi ká: «Aŋuá anyɛ onkimo wɔw agá gɛfal, guabanyɛ́g agá gubíbién gɔ́w, aguámba ká ésidífúnyifúnyi e?» Ebéti wɔ́ gɔg agá ɔnd. 35Yésu máal na guɔ́b ká Bafalisiɛ́ŋ makɔ́ŋɛ́d mɔnd uwaány. Ebélumen naga, uganyɛ gág ká: «Aŋuá aguádábaan Mɔɔn wá Mɔnd e?» 36Uganyɛ ká: «Ofúnyifúnyi nŋɔyɛ́dɛ́n mɔnd waád mbád guadáb wɔ́.» 37Yésu ganyɛ gág ká: «Wád mɔnd ewe ugálána gɔ́w nɛ́nuán, Águánaan wɔ́.» 38Mɔnd ganyɛ ká: «Nguádában Ɔgúnɔ́.» Uwegunsin wɔ́ enú egegus. 39Yésu ganyɛ gɔg ká: «Nguúl egegus gá gugélenyi, nɛnama nɛ́nyá ká ebe bádiánáná banyɛg guánan, ebe bánaná, bónd bebúdebude.» 40Gɛdam gá Bafalisiɛ́ŋ gɛ́máabá kɔ́ máal na guɔ́b anaány, bágányɛ gág ká: «Basuá sɔ́n dɛnyɛ bebúdebude e?» 41Yésu guondinyi bɔ́ ká: «Ímábá nunyɛ bebúdebude nudɛgabia gɛfal. Nɛ́nuán nuguɔ́yɔ ká nuguánan, núgúlɔbɛn aga gɛfal.»
Àwon tá yàn lọ́wọ́lọ́wọ́ báyìí:
Sáŋa 9: MMU2
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
CABTAL
