Mata Diw ma
Diw ma
Ma ndə ɗerewal watsə a ŋtirha dawna sha
Ma wiyə ma təwah ndə Mata a ŋtir ci, a ŋtiratana a həji Kərist, ma ɗa Yahuda ma ŋter aagi. A zlap ata ŋter dzəv ma wiyə ma təwah ma zleezle. Mata a kaghal ci, Yesu ana ma ndza andza, ala ma kakəliy səkən ma ghal aka a ɗerewal dzəv ma watsa. A ŋgəɗata aska. Mata a kaŋtir ɗerewal, ndə aa kagam həji Kərist ma ɗa ŋter Yahuda aara a jak ta tarha Yahuda aagi. Aa kadiw ladzam ataa həji ma kalamzə həji ma ŋkula ɗa Yahuda aagi yəm.
Ara Mata ci, Yesu a ɗa Masərək səkən ma kazlap abə dagal ata səkən ndə Bizlaf a kaɗiwi ara həji Kərist aagi. Masərək səkən watsa ci, a mayə a ghalahəji a vaŋgəy abə həji a zlima ma ma garagar ma ndaha a ɗerewal Ma wiyə ma təwah ma zleezle. Yesu a ɗa Misi ndə Yahuda aagi aa katehi. Ndə a kazlap ata La ndza bay ma ndza a wəzəm a wəzlaf, iŋgaya: «Bizlaf a ɗa bay, azha dagal tə taghal tə ata hayak tiw».
Ma wiyə ma təwah ndə Mata a ŋtir ci, a səbar Ma wiyə ma təwah ataa həji ma mahkaɗ mampər aagi tiwtiw.
A wəzaha a zlən watsa ci, Mata a tamgbəw ma ndə Yesu a zlapata aagi ka, a zlap ma gulakwakw ma dzaɓən aagi: Diw tə ata Mata 5 a vaŋ ata Mata 7 aka səku zlap ma ndza aha a wəzəm, ma kazlap ata ma ma gara ka ata ndza ataa həji ta zlən ataa Yesu aagi. Zhana a zlap ata la ndza həji ma dəgnak, ma ɗa dzəv abə Bizlaf. Magbak tə, zlap ma ndza a Mata 10 ci, a vəla gar ma abə ghal ma, a həji ma kanda ghal Ma wiyə ma təwah aagi. Mamahkaɗ tə, zlap ma ndza a Mata 13 ci, la dzəv ataa ma ŋgəla ndə Yesu a kaghalata aagi, aska a zlima səkən ma kapew aagi ndə Bizlaf a ɗa bay. Maŋfaɗ tə, zlap ma ndza a Mata 18 ci, a ghalə həji a la ndza takwa a ɗa, dzəv abə zlina mama aagi abə hildimi mama aagi a wəzaha a ladzam ataa həji Kərist aagi. Madzaɓən tə, zlap ma ndza a Mata 24 abə 25 ci, a zlap avaŋgəy abə həji ta zlən Yesu aagi, aagi ateh kwakuɗaŋ ɓas ataa Bizlaf.
Tiɗa zlap aagi awli kwagwa aka səku diwzha zlap watsa, zlap watsa a kaghalə avaŋgəy, abə Yesu a kambəl həji dawər aagi, a kavəlatana səkən zəm a ŋgaɓa həji aagi, a kaŋgəɗ ma labar ma kavəla deŋ ŋkwaɓ aagi, zhan a kadza səbakw abə masərək səkən ataa Yahuda aagi.
Ata diw Ma wiyə ma təwah watsa, Mata a kazlap ata mbəwha Yesu, la ndza tə a mbə, Yesu a ɗa bay ataa Yahuda aagi (Mata 1 abə 2). A kwakuɗaŋ ataa Ma wiyə ma təwah watsa ya, Yesu, ma ɗa bay ataa Yahuda aagi, tatsaya a dza ka a mci zhana aagi dar ka ata mpi ma gəzlaŋgarak (Mata 27). Ama Bizlaf tagarazə a wəzəm a jiɓ. Yesu a kaghalanə ha tə a magəli tə aagi. A kazlapatana a aagi a ɗaf Ma wiyə ma təwah a həji ma ndza ata manahayak aagi tiwtiw (Mata 28).
Tiɗa ndə Yesu awli a mbəwha, zləm tə a ɗa «Emaniyel», a may a ghal ci, «Bizlaf abə ŋkwa» (Mata 1.23). Ma wiyə ma təwah ataa Mata a kəɗaŋ abə səkən ndə Yesu a ghal ka a vəla watsə: «Azha sa, sa abə huni kala pish a vaŋ ata kwakuɗaŋ manahayak» (28.20). Yesu ana ma ndza a ŋgas Bizlaf a taba həji aagi.
Àwon tá yàn lọ́wọ́lọ́wọ́ báyìí:
Mata Diw ma: GOU
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀