Markus 1
1
Laghwal zlap mala Yuhana maban hejəye a yam Baptəysma
1Ana ebe ŋghe, ana lamar Ma Mewe ma Taŋtaŋ mala Yesu Almasəyhu, Mba Gazlavay. 2Ana maa kéŋtereye ŋ ɗerewel Esaya, mba ma zlap ma mala Gazlavay, a ŋgaya:
«Ŋghe, sa kalaɓza mba malaɓ naka mpar aha hwa,
ŋ lamzahwaw taf ŋkwa aka.
3Ɗala a kaja ula ata darzlam, a ŋgaya:
“Hune lemzene taf aka ŋ Bay Madakal.
Hune lemzene taf anta aka gbar delele!”»
4Ana ebe ŋghe, Yuhana a ndaha ata darzlam, a kabanata hejəye a yam baptəysma, a keghwelzetene zlap mala Gazlavay, a zlepetene, a ŋgaya: «Hune bawza lanja ŋkune ege aza, hune lem laban aza a yam baptəysma, aya, Gazlavay yam napalzahune gay ŋkune ege aka.» 5Hayak Yahudəya tewtew leŋ hejəye ma ŋ Urusaləyma ege tewtew, əy nda ara mbe, əy ghwalza gay tata ege. Aya, Yuhana a banata aza a yam baptəysma ŋ zlazlar maa əy kayaɓa, Urdun.
6Yuhana a ca ata kusam anta ca, rəgwac majaja a jukwaɗ ŋgaluba, kájaw gaŋ anta aka a kanda mala bukəla, a zam ca, wayak leŋ ɓamam damaw. 7A təwse ca, a keghwelzetene zlap mala Gazlavay ŋ hejəye, a ŋgaya: «Ɗala ma pa ŋ ɓarɓar aha sa, a nandaha a dəwze naka. Kaw sa káhwas ŋ ŋteɓ ŋ pal serek ŋte ma ata ŋgas anta səkwaw. 8Sa ca, sa banahune baptəysma ca, a yam, cemey, mbe ca, a nabanahune ca, a Zəwet ma keweɗ.»
Yesu a lem laban aza a yam baptəysma
9Aya, ata vah wese ca, Yesu a ndaha aka ŋ uzam Nasaratu, ŋ hayak Galəyləy. A təwse ca, Yuhana a banaw, a yam baptəysma ŋ zlazlar Urdun. 10Maa Yesu a kadamha aza ŋ yam wese ca, a gəre la ma mgba ata uzlaf a zlar. A təwse ca, a gəre Zəwet ma keweɗ a katadakw aha a heɗe ana məyɗanak. 11Aya, ula a jaha aka mgba ata uzlaf, a zlepene, a ŋgaya: «Hwa ca, hwa Mba naka maa sa kaɗaw mambaza. Sa kasasam dakala ata hwa.»
Malula a slanza Yesu ata darzlam
12A təwse a təwse, Zəwet a ŋcakwza Yesu ata darzlam. 13Wan raŋfaɗ, mbəy a təwse, Malula a kaslanza, a nja ca, ŋ taba səkan damaw ege, malaɓ Gazlavay ege əy kelene zlan.
Yesu a ghwal Ma Mewe ma Taŋtaŋ ŋ hayak Galəyləy
14A dəwze maa əy kánahza Yuhana aza ŋ daŋgay ca, Yesu a nda ŋ hayak Galəyləy, a ghwelzetene Ma Mewe ma Taŋtaŋ mala Gazlavay ŋ hejəye, a ŋgaya: 15«Vah maa Gazlavay a caw, kála anta. Lazam bay mala Gazlavay slaɓ, hune bawzata lanja ŋkune ege aza, hune lamza Ma Mewe ma Taŋtaŋ.»
Yesu a yata madarlaŋw ma mpar ege
16Maa a kanda a mazlam ŋtele Galəyləy ca, a gəreta ata Səymawn ey Andəyre, zlaŋgan Səymawn, əy kanah taba tata ege ŋ yam. Tata mambal ŋkəlef ege. 17A təwse ca, a zlepetene, a ŋgaya: «Hune səberekey, sa nalahune ŋ mambal hejəye.» 18A təwse a təwse, əy yakzata taba tata ege aka, əy səbar Yesu. 19Aya, əy nda gədak cekuɗe ca, Yesu a gəreta ata Yakuba ey zlaŋgan Yuhana, uzəye Zebede ege əy kénjeye ŋ kwambawal, əy kalamzata taba tata ege, 20A təwse ca, Yesu a yata. Aya, əy yakza cen tata Zebede aka zlaɓa mala zlan ege ŋ kwambawal, əy səbaraw.
Yesu a rehza ɗala maa zəwet malula kámbalza
21Ata Yesu ey madarlaŋw anta ege, əy nda ŋ uzam Kafarnahum. A pes ma ata zazak mala Yahudu ege ca, Yesu a dam ŋ ujek ma ata rak Gazlavay mala Yahudu ege, a sasərakzata hejəye. 22Lasasərak anta kéveletene ledeŋ ŋkwaɓ dakala, mavəday a zlap ca, ana maghwal ma maŋkanaŋkan ege səkwaw, cemey, a zlap ca, a ɓardakw. 23Lec maa Yesu a kaghwal zlap ca, ɗala maa zəwet malula kámbalza ŋ ujek ma ata rak Gazlavay mala Yahudu ege wese aka, a ja ula, a ŋgaya: 24«Hwa ɗaw ara nene vemey, Yesu, ɗala Nasaratu? Hwa ndaha ca, ŋ fətekzeney vaw? Sa kasanahwaw, hwa ca, hwa ɗala ma keweɗ ma ndaha aka ara Gazlavay!» 25Aya, Yesu a bebecza zəwet malula wese a mazlazlay, a zlepene, a ŋgaya: «Mpak ma ŋkwa ka, damha aza ŋ heje ŋghe.» 26Aya, zəwet malula a gwegwecza heje wese a mazlazlay, a ja ula a mazlazlay, a damha aza ŋ heje wese. 27A təwse ca, hejəye tewtew əy ŋga ŋkwaɓ dakala, əy ɗawza ha tata ege, əy ŋgaya: «Ma vekey? Ara lasasərak mewe a ɓarɓar vaw? Heje anta mbəy a ɓarɓar, a kezlepetene ŋ zəwet malula ege əy kewenzene ha aka!» 28Aya, hejəye əy kaya zlam Yesu kaw a katay, ŋ hayak Galəyləy tewtew.
Yesu a rehza man wala Səymawn aza
29Maa Yesu a damaha aza ŋ ujek ma ata rak Gazlavay mala Yahudu ege wese ca, a nda anta kəcaŋ a wata ata Səymawn ey Andəyre. Ata Yakuba ey Yuhana əy kasəbar ara. 30A təwse ca, man wala Səymawn mbəy werwer askwaw, hendərey a kedene ma. A təwse ca, əy ghwelzene dawar anta ŋ Yesu. 31Aya, Yesu a nda ara mbe, a mbelene ra, a gwarzamza. A təwse, hendərey wese kese a kese anta a heɗe. A dəwze anta, man wala Səymawn wese, a veletene səkan ŋ zam.
Yesu a rehzata hejəye ma kadawar ege aza vəram
32La zewzew mala mackwahw ca, əy data hejəye ma kadawar ege ey hejəye maa zəwet malula a mbalata aza ege tewtew ara Yesu. 33Hejəye ma ŋ uzam anta ege tewtew, əy kéɓeceye a ma ujek. 34A təwse ca, Yesu kérehzata hejəye aza vəram ŋ dawar tata ege vedəye vedəye. Kágamata zəwet malula ege aza vəram, kaw képelzetene taf ŋ zəwet malula anta ege ŋ zlap, askwaw, mavəday əy kasanaw.
Yesu a yakza uzam Kafarnahum aka, a nda ŋ hayak Galəyləy
35A mapat anta ca, Yesu a wal beŋ, a nda ata darzlam, a rak Gazlavay a təwse. 36Ata Səymawn ey ŋgama anta ege, əy nda ŋ mpam Yesu. 37Aya, maa əy ndewzene aza ca, əy zlepene, əy ŋgaya: «Hejəye tewtew, əy kampamahwaw.» 38Cemey, Yesu a zlepetene, a ŋgaya: «Kazakwaw aza ata la matakan, ŋ kəva ege ma mbermber a uzam ŋghe anta ege, ndar sa ghwalza Ma Mewe ma Taŋtaŋ a təwse yam. Mavəday zlan anta mbəy ma dekey ete ŋghe.» 39Aya, a nda ŋ uzam ma ŋ hayak Galəyləy ege tewtew. A kaghwal zlap a ujek tata ma ata rak Gazlavay ege leŋ a kagam zəwet malula ege.
Yesu a rehza ɗala maa fagwalakw a heɗe aza
40Aya, ɗala maa fagwalakw a heɗe wende aka, a nda ara Yesu, a gəleɓ aka a tama anta, a rakaw, a ŋgaya: «Mada hwa kaɗaw aza ca, hwa kula ŋ rehzekey aza.» 41A təwse ca, hahar kája Yesu dakala a heɗe, a daɗ ra anta, a ca ata ɗala maa fagwalakw a heɗe wese, a zlepene a ŋgaya: «Sa kaɗaw aza, reh ŋkwa.» 42A təwse a təwse, ɗala maa fagwalakw a heɗe wese a reh anta. 43Aya, Yesu a ŋgaz ka, a zlepene a ɓarɓar, a ŋgaya: 44«Teh zlam kadak kadak! Hwa ɗaw ŋ zlepene ma anta ŋ kaw vayay səkwaw. Cemey, nda ŋ ghwalza ha ŋkwa a tama mala kwakwas, valza səkan kwakwas mavəday lereh ŋkwa ana maa ma maŋkanaŋkan mala Musa a zlap, ndar hejəye tewtew əy san ca, hwa kéreh ŋkwa.» 45Aya, heje wese tel a nah ma, a keghwelzetene ma anta ara ŋ hejəye tewtew kaw a katay. Mavəday anta, Yesu kula ŋ nda ŋ uzam bezbez ata nje hejəye zeney səkwaw, kanja ka ata darzlam. A təwse ca, hejəye kaw a katay a katay, əy kandaha ara mbe.
Àwon tá yàn lọ́wọ́lọ́wọ́ báyìí:
Markus 1: BHS
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2025 CABTAL
Markus 1
1
Laghwal zlap mala Yuhana maban hejəye a yam Baptəysma
1Ana ebe ŋghe, ana lamar Ma Mewe ma Taŋtaŋ mala Yesu Almasəyhu, Mba Gazlavay. 2Ana maa kéŋtereye ŋ ɗerewel Esaya, mba ma zlap ma mala Gazlavay, a ŋgaya:
«Ŋghe, sa kalaɓza mba malaɓ naka mpar aha hwa,
ŋ lamzahwaw taf ŋkwa aka.
3Ɗala a kaja ula ata darzlam, a ŋgaya:
“Hune lemzene taf aka ŋ Bay Madakal.
Hune lemzene taf anta aka gbar delele!”»
4Ana ebe ŋghe, Yuhana a ndaha ata darzlam, a kabanata hejəye a yam baptəysma, a keghwelzetene zlap mala Gazlavay, a zlepetene, a ŋgaya: «Hune bawza lanja ŋkune ege aza, hune lem laban aza a yam baptəysma, aya, Gazlavay yam napalzahune gay ŋkune ege aka.» 5Hayak Yahudəya tewtew leŋ hejəye ma ŋ Urusaləyma ege tewtew, əy nda ara mbe, əy ghwalza gay tata ege. Aya, Yuhana a banata aza a yam baptəysma ŋ zlazlar maa əy kayaɓa, Urdun.
6Yuhana a ca ata kusam anta ca, rəgwac majaja a jukwaɗ ŋgaluba, kájaw gaŋ anta aka a kanda mala bukəla, a zam ca, wayak leŋ ɓamam damaw. 7A təwse ca, a keghwelzetene zlap mala Gazlavay ŋ hejəye, a ŋgaya: «Ɗala ma pa ŋ ɓarɓar aha sa, a nandaha a dəwze naka. Kaw sa káhwas ŋ ŋteɓ ŋ pal serek ŋte ma ata ŋgas anta səkwaw. 8Sa ca, sa banahune baptəysma ca, a yam, cemey, mbe ca, a nabanahune ca, a Zəwet ma keweɗ.»
Yesu a lem laban aza a yam baptəysma
9Aya, ata vah wese ca, Yesu a ndaha aka ŋ uzam Nasaratu, ŋ hayak Galəyləy. A təwse ca, Yuhana a banaw, a yam baptəysma ŋ zlazlar Urdun. 10Maa Yesu a kadamha aza ŋ yam wese ca, a gəre la ma mgba ata uzlaf a zlar. A təwse ca, a gəre Zəwet ma keweɗ a katadakw aha a heɗe ana məyɗanak. 11Aya, ula a jaha aka mgba ata uzlaf, a zlepene, a ŋgaya: «Hwa ca, hwa Mba naka maa sa kaɗaw mambaza. Sa kasasam dakala ata hwa.»
Malula a slanza Yesu ata darzlam
12A təwse a təwse, Zəwet a ŋcakwza Yesu ata darzlam. 13Wan raŋfaɗ, mbəy a təwse, Malula a kaslanza, a nja ca, ŋ taba səkan damaw ege, malaɓ Gazlavay ege əy kelene zlan.
Yesu a ghwal Ma Mewe ma Taŋtaŋ ŋ hayak Galəyləy
14A dəwze maa əy kánahza Yuhana aza ŋ daŋgay ca, Yesu a nda ŋ hayak Galəyləy, a ghwelzetene Ma Mewe ma Taŋtaŋ mala Gazlavay ŋ hejəye, a ŋgaya: 15«Vah maa Gazlavay a caw, kála anta. Lazam bay mala Gazlavay slaɓ, hune bawzata lanja ŋkune ege aza, hune lamza Ma Mewe ma Taŋtaŋ.»
Yesu a yata madarlaŋw ma mpar ege
16Maa a kanda a mazlam ŋtele Galəyləy ca, a gəreta ata Səymawn ey Andəyre, zlaŋgan Səymawn, əy kanah taba tata ege ŋ yam. Tata mambal ŋkəlef ege. 17A təwse ca, a zlepetene, a ŋgaya: «Hune səberekey, sa nalahune ŋ mambal hejəye.» 18A təwse a təwse, əy yakzata taba tata ege aka, əy səbar Yesu. 19Aya, əy nda gədak cekuɗe ca, Yesu a gəreta ata Yakuba ey zlaŋgan Yuhana, uzəye Zebede ege əy kénjeye ŋ kwambawal, əy kalamzata taba tata ege, 20A təwse ca, Yesu a yata. Aya, əy yakza cen tata Zebede aka zlaɓa mala zlan ege ŋ kwambawal, əy səbaraw.
Yesu a rehza ɗala maa zəwet malula kámbalza
21Ata Yesu ey madarlaŋw anta ege, əy nda ŋ uzam Kafarnahum. A pes ma ata zazak mala Yahudu ege ca, Yesu a dam ŋ ujek ma ata rak Gazlavay mala Yahudu ege, a sasərakzata hejəye. 22Lasasərak anta kéveletene ledeŋ ŋkwaɓ dakala, mavəday a zlap ca, ana maghwal ma maŋkanaŋkan ege səkwaw, cemey, a zlap ca, a ɓardakw. 23Lec maa Yesu a kaghwal zlap ca, ɗala maa zəwet malula kámbalza ŋ ujek ma ata rak Gazlavay mala Yahudu ege wese aka, a ja ula, a ŋgaya: 24«Hwa ɗaw ara nene vemey, Yesu, ɗala Nasaratu? Hwa ndaha ca, ŋ fətekzeney vaw? Sa kasanahwaw, hwa ca, hwa ɗala ma keweɗ ma ndaha aka ara Gazlavay!» 25Aya, Yesu a bebecza zəwet malula wese a mazlazlay, a zlepene, a ŋgaya: «Mpak ma ŋkwa ka, damha aza ŋ heje ŋghe.» 26Aya, zəwet malula a gwegwecza heje wese a mazlazlay, a ja ula a mazlazlay, a damha aza ŋ heje wese. 27A təwse ca, hejəye tewtew əy ŋga ŋkwaɓ dakala, əy ɗawza ha tata ege, əy ŋgaya: «Ma vekey? Ara lasasərak mewe a ɓarɓar vaw? Heje anta mbəy a ɓarɓar, a kezlepetene ŋ zəwet malula ege əy kewenzene ha aka!» 28Aya, hejəye əy kaya zlam Yesu kaw a katay, ŋ hayak Galəyləy tewtew.
Yesu a rehza man wala Səymawn aza
29Maa Yesu a damaha aza ŋ ujek ma ata rak Gazlavay mala Yahudu ege wese ca, a nda anta kəcaŋ a wata ata Səymawn ey Andəyre. Ata Yakuba ey Yuhana əy kasəbar ara. 30A təwse ca, man wala Səymawn mbəy werwer askwaw, hendərey a kedene ma. A təwse ca, əy ghwelzene dawar anta ŋ Yesu. 31Aya, Yesu a nda ara mbe, a mbelene ra, a gwarzamza. A təwse, hendərey wese kese a kese anta a heɗe. A dəwze anta, man wala Səymawn wese, a veletene səkan ŋ zam.
Yesu a rehzata hejəye ma kadawar ege aza vəram
32La zewzew mala mackwahw ca, əy data hejəye ma kadawar ege ey hejəye maa zəwet malula a mbalata aza ege tewtew ara Yesu. 33Hejəye ma ŋ uzam anta ege tewtew, əy kéɓeceye a ma ujek. 34A təwse ca, Yesu kérehzata hejəye aza vəram ŋ dawar tata ege vedəye vedəye. Kágamata zəwet malula ege aza vəram, kaw képelzetene taf ŋ zəwet malula anta ege ŋ zlap, askwaw, mavəday əy kasanaw.
Yesu a yakza uzam Kafarnahum aka, a nda ŋ hayak Galəyləy
35A mapat anta ca, Yesu a wal beŋ, a nda ata darzlam, a rak Gazlavay a təwse. 36Ata Səymawn ey ŋgama anta ege, əy nda ŋ mpam Yesu. 37Aya, maa əy ndewzene aza ca, əy zlepene, əy ŋgaya: «Hejəye tewtew, əy kampamahwaw.» 38Cemey, Yesu a zlepetene, a ŋgaya: «Kazakwaw aza ata la matakan, ŋ kəva ege ma mbermber a uzam ŋghe anta ege, ndar sa ghwalza Ma Mewe ma Taŋtaŋ a təwse yam. Mavəday zlan anta mbəy ma dekey ete ŋghe.» 39Aya, a nda ŋ uzam ma ŋ hayak Galəyləy ege tewtew. A kaghwal zlap a ujek tata ma ata rak Gazlavay ege leŋ a kagam zəwet malula ege.
Yesu a rehza ɗala maa fagwalakw a heɗe aza
40Aya, ɗala maa fagwalakw a heɗe wende aka, a nda ara Yesu, a gəleɓ aka a tama anta, a rakaw, a ŋgaya: «Mada hwa kaɗaw aza ca, hwa kula ŋ rehzekey aza.» 41A təwse ca, hahar kája Yesu dakala a heɗe, a daɗ ra anta, a ca ata ɗala maa fagwalakw a heɗe wese, a zlepene a ŋgaya: «Sa kaɗaw aza, reh ŋkwa.» 42A təwse a təwse, ɗala maa fagwalakw a heɗe wese a reh anta. 43Aya, Yesu a ŋgaz ka, a zlepene a ɓarɓar, a ŋgaya: 44«Teh zlam kadak kadak! Hwa ɗaw ŋ zlepene ma anta ŋ kaw vayay səkwaw. Cemey, nda ŋ ghwalza ha ŋkwa a tama mala kwakwas, valza səkan kwakwas mavəday lereh ŋkwa ana maa ma maŋkanaŋkan mala Musa a zlap, ndar hejəye tewtew əy san ca, hwa kéreh ŋkwa.» 45Aya, heje wese tel a nah ma, a keghwelzetene ma anta ara ŋ hejəye tewtew kaw a katay. Mavəday anta, Yesu kula ŋ nda ŋ uzam bezbez ata nje hejəye zeney səkwaw, kanja ka ata darzlam. A təwse ca, hejəye kaw a katay a katay, əy kandaha ara mbe.
Àwon tá yàn lọ́wọ́lọ́wọ́ báyìí:
:
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2025 CABTAL