Mata 27
27
Əy jeɓza Yesu ara Pəylatu
1Mala mapat beŋ ca, madakal dakal mala kwakwas ege tewtew leŋ madakal dakal ma a tama ege, əy jav ma tata ka, ŋ ja Yesu aza. 2Aya, əy jawaw, əy jeɓza, əy velene ŋ Pəylatu, mambal hayak Rawma.
Lamac Yahuda
3Maa Yahuda, ɗala ma səkam Yesu aza wese, a zləme əy kándavza Yesu aza ata la ja guma ca, a la marava, a təwse ca, a zenetene səlay ma ramahkaɗ wese ka ŋ madakal dakal mala kwakwas ege leŋ ŋ madakal dakal ma a tama ege. 4A zlepetene, a ŋgaya: «Sa kála gay, mavəday sa kásəkam ɗala ma kaw kágayha səkan askwaw, ŋ ja aza.» Cemey, əy zenene, əy ŋgaya: «Ma ŋcene vemey! Ara ma ŋkwa!» 5A təwse ca, Yahuda wese, a kwayza səlay wese aza kəɗe ujek kwakwas. A dəwze anta, a nda, a zen serek ata ula anta, a ja ha anta aza.
6Madakal dakal mala kwakwas ege, əy cam səlay wese, aya, əy zlap, əy ŋgaya: «Ma maŋkanaŋkan a kapal taf ŋ ca səlay anta aka a həzlar səlay maɓahaɓah a ujek kwakwas səkwaw, mavəday ara səlay mala mbambaz.» 7A dəwze maa, əy jav ma tata aza ca, əy nda, əy səkam la a səlay anta ara ɗala malam ɗawar, ŋ kah mce mbəlam ege ŋma. 8Mavəday anta, ha hwas a tambaca, əy kayaɓa la anta ca: «La mbambaz.» 9Ana ebe ŋghe, ma maa Yereməya, mba ma zlap ma mala Gazlavay, maa a zlap wese ca, a la njenjəwen. A zlap, a ŋgaya: «Əy káŋta səlay ramahkaɗ. Ara səlay maa hejəye Əysərayəyla ege əy jav ma tata aza ŋ səkam a mbe. 10A dəwze anta, əy kásəkam la ara ɗala malam ɗawar, a səlay anta, ana maa bay madakal, a zlepekey.»
Yesu mbəy a tama Pəylatu
11Əy jeɓza Yesu ara Pəylatu, mambal hayak Rawma. Aya, mambal hayak wese, a ɗawza, a ŋgaya: «Hwa ca, hwa bay mala Yahudu ege vaw?» A təwse ca, Yesu a zenene, a ŋgaya: «Ana ma hwa zlap.» 12Cemey, madakal dakal mala kwakwas ege ey madakal dakal ma a tama Yahudu ege, əy zla metəwle ata Yesu, cemey, kaw kézenetene zlap, askwaw. 13Aya, Pəylatu a ɗawza, a ŋgaya: «Hwa kezləme laŋkəɗaw ege ma ata hwa ŋgha, askwaw vaw?» 14Cemey, kaw Yesu kézenene zlap wende, askwaw. Aya, mambal hayak a ghar anta a heɗe mambaza.
Əy kéghem Yesu aza ŋ jaw
15Ata va kaw vekey, mada gwaygwaya Paska mala Yahudu ege a kajaha ca, Pəylatu, mambal hayak, a kapalza ɗala ma ŋ ujek daŋgay aka teŋguleŋ. A palha ca, ɗala ma hejəye əy kaɗawaw. 16Ata va wese ca, heje wende ŋ ujek daŋgay aka, hejəye vəram əy kasanaw, zlam anta ca, Yesu Barabas. 17A təwse ca, Pəylatu a ɗawzata hejəye meɓeceɓec ege, a ŋgaya: «Ɗala ma hune kaɗaw sa palahune ka ca, vayay? Yesu Barabas vaw? Askwaw ca, Yesu maa əy kayaɓa a Almasəyhu vaw?» 18Cemey, Pəylatu a kasanaw, əy valza Yesu ŋ mbal ŋgha ca, ata sərah. 19Maa Pəylatu kénjeye ata laja guma ca, wala anta a laɓa ɗala ŋ zlepene, a ŋgaya: «Kaw hwa ɗaw ŋ nah ŋ ma mala heje ma kala səkan a heɗe a heɗe ŋghe, səkwaw! A zaɗaw ŋgha, seŋseŋ kédekey ma ata ma anta dakala mambaza.» 20Madakal dakal mala kwakwas ege ey madakal dakal ma a tama Yahudu ege, əy ŋcakwzata hejəye ŋ ɗawza Pəylatu, mapalaza Barabas aka, maja Yesu aza. 21Mambal hayak wese, a ŋta zlap, a ɗawzata zeney, a ŋgaya: «Ŋ taba hejəye ma gbak ŋghe ege ca, hune ɗaw sa palahune ka ca, vayay?» Əy zenene, əy ŋgaya: «Barabas!» 22Pəylatu a ɗawzata, a ŋgaya: «Sa nelene ŋ Yesu maa əy kayaɓa a Almasəyhu eze, vemey?» Tata tewtew tata əy zenene, əy ŋgaya: «Dar ka ata mpe gafaŋgal!» 23Pəylatu a ɗawzata zeney, a ŋgaya: «Heje anta a la səkan ma kadak səkwaw vekey?» Cemey, hejəye əy vas ŋ ja ula a mazlazlay, əy ŋgaya: «Dar ka ata mpe gafaŋgal!» 24Aya, Pəylatu a gəre ca, mbəy kula ŋ laɓa səkan wende aza, askwaw, səy ula ma kavas ŋ ja. A təwse ca, a ŋta yam, a ban ra anta aza a tama hejəye tewtew, aya, a zlap, a ŋgaya: «Ma naka ŋ laja heje ŋghe askwaw, ara ma ŋkune!» 25Hejəye tewtew, əy zenene, əy ŋgaya: «Nene káŋta ghem lamac anta aza ata ha ŋcene ege leŋ ata uzəye ŋcene ege!» 26Aya, Pəylatu, a peletene Barabas aka. A zlepetene ŋ hejəye, əy maŋtaw Yesu a lakwatay, a dəwze anta ca, a valza ka asa ra tata, ndar əy dar ka ata mpe gafaŋgal.
Sawje ege əy ɓas ata Yesu
27Aya, sawje mala Pəylatu ege, əy jeɓza Yesu a wata mambal hayak. Sawje ege tewtew, əy ɓecha a heɗe. 28Əy cekwene rəgwac aza ata kusam, əy cene rəgwac ma cap ma vəre. 29Əy ɓəram jəkeɗ, əy cene ata ha leŋ əy velene zlambay ŋkem ŋ ra zam. A dəwze anta, əy gəleɓene a tama, əy ɓas a heɗe, əy ŋgaya: «Nene kazlapzahwaw, bay mala Yahudu ege!» 30Əy ŋtef mejəkəne a heɗe, əy ŋta zlambay uraf ma asa ra anta wese, əy gazlaw a mbe ŋ ha. 31A dəwze maa əy káɓasa aza a heɗe kəɗaŋ ca, əy cekwene rəgwac ma cap ma vəre wese aza, əy zen ŋ cene rəgwac anta, aya, əy jeɓza ŋ daraza ka ata mpe gafaŋgal.
Yesu kédereye ata mpe gafaŋgal
32Maa əy kadamha aza ŋ uzam wese ca, əy ŋgel ma a heje ma ŋ Səyrene wende aka, zlam anta Səymawn. Əy cene mpe gafaŋgal Yesu ata ha anta ata gwaya ŋ tewew. 33Əy hwas ata la maa əy kayaɓa Gwalgwata, ana zlap ca: «kerŋgesl ha.» 34A təwse ca, əy velene mavaw makəvaɗakəvaɗ a yam ma ɗeɗəwek ŋ saw. Cemey, maa a zlanza ca, a kaɗaw ŋ sa səkwaw. 35Maa sawje ege əy darza ata mpe gafaŋgal ca, əy ɓez rəgwac anta ege a laja caca. 36A dəwze anta, əy nja ka a təwse ŋ həbaraw. 37Əy kéŋter ma maa əy ja a heɗe ka ata papalam, əy kádar ka mgba ata ha mpe gafaŋgal maa əy dar Yesu ka a heɗe wese, əy ŋgaya: «Heje ŋghe ca, ara Yesu, bay mala Yahudu ege!» 38A təwse ca, sawje ege əy kádar ŋhel ege aka gbak a həzlar Yesu. Ma teŋguleŋ ata kəva ra zam anta, wende yam ata kəva ra gula anta.
39Hejəye ma kanda ta a təwse ege, əy gaŋgazl ha, əy raɓa. 40A təwse ca, əy zlepene, əy ŋgaya: «Hwa káɗaw ŋ ghwaramza ujek kwakwas aza, ŋ lam ka ata la anta ŋ wan mahkaɗ. Mada hwa Mba Gazlavay ca, rehza ha ŋkwa aza, tadakw aza ata mpe gafaŋgal!» 41Madakal dakal mala kwakwas ege, maghwal ma maŋkanaŋkan ege ey madakal dakal ma a tama ege, əy ɓas a heɗe, əy ŋgaya: 42«Kérehzata hejəye vedəye aza, ca, mbəy kula ŋ rehza ha anta səkwaw vaw? Ara bay Əysərayəyla səkwaw vaw? Səy matadakw aza na ŋgha ata mpe gafaŋgal ca, ndar heje lamza. 43Kávalza ha anta ka asa ra Gazlavay, a ŋgaya: “Sa ca, sa Mba Gazlavay.” Kadak, mada Gazlavay a kaɗaw ca, merehza aza na ŋgha eze may!» 44A təwse ca, kaw ŋhel madaradar a həzlar ege wese, əy kaɓas a heɗe yam.
Lamac Yesu
45A pes wereywerey ca, kuzle kpek a jaɓ la ata hayak tewtew ha hwas ata ler mahkaɗ mala mackwahw. 46Yesu a ja ula a mazlazlay a ŋgaya: «Eləy, Eləy, lema sabaktanəy?» ana zlap ca: «Gazlavay naka, Gazlavay naka, hwa yekzekey ka ŋ vay?» 47Hejəye vedəye ma kédeŋeye a təwse ege wese, əy kézləme, əy zlap, əy ŋgaya: «Hune sarza, a kayaɓa Eləya!» 48Kəcaŋ, ɗala ma teŋguleŋ ŋ taba tata, a hey, a təkaɗ maslaga ata zlambay uraf, a cughwaɓaw ŋ mavaw ma kwəycacaŋ, a kefzene ŋ Yesu ŋ saw. 49Cemey, hejəye vedəye ca, əy ŋgaya: «Kwagwa, ŋ həbarakwaw, ketegəre Eləya a nandaha ŋ reh aza ka vaw!» 50A təwse ca, Yesu a vas ŋ ja ula a mazlazlay zeney, aya, mac a mac anta. 51A dəwze maa a mac anta ca, rəgwac jakar ma a ujek kwakwas a slah, a ŋtez anta ŋ gbak, mar aka mgba ha hwas ata hayak. Hayak a həɓal, kefe ege əy pəɗak. 52Jeɓ ege əy zlar, hejəye mamacamac ma lamza Gazlavay aza ege vəram əy kágwarzamha aza ata lamac. 53Maa əy gwarzamha aza ata lamac a dəwze maa Yesu kágwarzamha aza ŋ jeɓ ca, əy dam ŋ uzam ma keweɗ, a təwse ca, hejəye vəram, əy kégəreta.
54Maa madakal sawje Rawma ege ey sawje ma kahəbar Yesu ege, əy gəre maa hayak a həɓal leŋ səkan ege tewtew ma laha wese ca, əy kálalak tata mambaza, əy zlap, əy ŋgaya: «Njenjəwen heje ŋghe ca, ara Mba Gazlavay!» 55Weləye vəram, a təwse aka, əy kasarza ata gədak. Əy kásəbaraza Yesu ara ŋ Galəyləy ŋ lene zlan. 56Ŋ taba tata ca, ara ata Marəyama ma ŋ uzam Magdala, Marəyama man ata Yakuba ey Yusufu, leŋ man uzəye Zebede ege.
Lampas Yesu
57Maa mackwahw a la anta ca, heje wende aka, zlam anta, Yusufu a ndaha. Ara ɗala maŋcaɗaŋcaɗ ma ŋ uzam Arəymatəya. Mbəy yam, ara ɗala ma kasəbar Yesu 58A ndaha ara Pəylatu, ŋ ɗawza mce Yesu. A təwse ca, Pəylatu a pal taf ŋ velene. 59Yusufu a ŋta mce Yesu wese, a paɗ ka a maslaga mewe, 60a wanza ka ŋ jeɓ mewe, ŋ kefe maa a ra ka ŋ mpas ha anta, a dəwze anta, a tatəŋgwalha beleler ma dakal, a mpak ma jeɓ anta ka a mbe, aya, tel a nah ma. 61Cemey, Marəyama Magdala ey Marəyama wende a təwse aka, əy kénjeye a tama jeɓ anta.
Sawje ege əy həbar jeɓ Yesu
62A mapat anta, ana zlap ca, vah ma kasəbar pes ma ata sla pes ma ata zazak, madakal dakal mala kwakwas ege ey Farəysa ege əy ɓec a wata Pəylatu. 63A təwse ca, əy zlepene, əy ŋgaya: «Bay madakal, nene ndaha ca, mavəday səkan teŋguleŋ, heje metəwle ŋghe wese, mar a namac ca, kázlap, a ŋgaya: “A dəwze wan mahkaɗ ca, sa nagwarzamha aza ata lamac.” 64Zlepetene ŋ sawje ege, əy mahəbar jeɓ aka ha hwas ata wan mahkaɗ, mavəday madarlaŋw anta ege, əy ɗaw ŋ ndaha ŋ ŋta mce anta aza, aya dəwze anta, əy zlepetene ŋ hejəye əy ŋgaya: “Kágwarzamha aza ata lamac!” səkwaw. Askwaw ca, metəwle ŋghe anta a nala anta day aha ma mpar zeney,» 65Pəylatu a zlepetene, a ŋgaya: «Ŋghe sawje ege cakwa, hune nda, hune həbar jeɓ anta ana maa hune kaɗawaw.» 66Aya, əy nda, əy cap ma jeɓ anta aka leŋ əy cata sawje ege ka ŋ həbaraw.
Àwon tá yàn lọ́wọ́lọ́wọ́ báyìí:
Mata 27: BHS
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2025 CABTAL
