Mata 2
2
Hejəye kəleŋ ege əy ndaha ŋ sarza Yesu
1Yesu a mbawha ca, ŋ Baytəylama, uzam ma ŋ hayak Yahudəya, ata vah maa Həyrudus mbəy Bay. A dəwze lambaw anta ca, hejəye kəleŋ ma kasan səkan ata gamzla ege, əy ndaha aka ta uza ata ladamha pes, əy hwasha ŋ uzam Urusaləyma. 2Əy ɗawzata hejəye ma a təwse ege, əy ŋgaya: «Mba ma mbawha, ma kananja ŋ bay mala Yahudu ege wese ca, mbəy a katay? Nene kégəre gamzla anta a ghwalha aka ta ŋ uza ata ladamha pes, amba nene ndaha ŋ həmanza.» 3Maa bay Həyrudus a zləme ma ŋgha anta ca, kálalak anta dakala mambaza, a zeney, hejəye ma ŋ uzam Urusaləyma ege tewtew, əy kálalak tata dakala mambaza yam. 4A javata madakal dakal mala mala kwakwas ege tewtew leŋ maghwal ma maŋkanaŋkan ege tewtew, aya, a ɗawzata ata la maa keɗe Almasəyhu, a nambawha a təwse, wese. 5A təwse ca, hejəye wese ege, əy zenene, əy ŋgaya: «A nambawha ca, ŋ Baytəylama, uzam ma ŋ hayak Yahudəya. Cemey, kéŋtereye ŋ ɗerewel mba ma zlap ma mala Gazlavay, a ŋgaya:
6“Hwa, Baytəylama, uzam ma ŋ hayak Yahudəya,
njenjəwen, hwa ca, hwa pa ma pəzekw aha uzam ege vedəye ma ŋ hayak Yahudəya səkwaw,
mavəday, bay ma kanahəbarata hejəye naka, Əysərayəyla ege,
a nadamha ta ŋ hwa.”»
7Aya, Həyrudus a yata hejəye kəleŋ ege wese ata deh, a ɗawzata, a ŋgaya: «Gamzla anta a ghwalha ca, ata vah vekey?» 8A dəwze anta, a laɓzata ŋ uzam Baytəylama, a zlepetene, a ŋgaya: «Hune nda, hune mpam mba anta kadak kadak. Mada hune kéndewzene aza ca, hune ndaha ŋ ghwelzekey, ndar sa nda ŋ həmanza yam.» 9A dəwze maa əy zləme zlap aza ara bay ca, tel əy nah ma. Kəɗe ca, gamzla maa əy gəre uza ata ladamha pes wese, a kanda a tama tata. Aya, maa gamzla anta a hwas ata la maa mba wese mbəy a təwse, wese ca, gar a gar aka. 10Maa əy gəre gamzla wese ca, əy sasam dakala mambaza. 11Əy dam a ujek, əy gəre mba anta ey maman Marəyama, aya, əy gəleɓ a tama mba anta, əy həmanza. A təwse ca, əy zlarzata bakatar tata ege, əy velene səkan ege. Səkan maa əy velene anta ege ca, ara bənaɓ, mel mpe maa əy kayaɓa məyr leŋ dama mpe ma kenjef feŋfeŋ. 12A dəwze anta ca, Gazlavay a zlepetene ta ŋ seŋseŋ, əy ɗaw ŋ zen ta ara bay Həyrudus səkwaw. Aya, əy ŋta taf matakan ŋ zen ŋ hayak tata.
Ata Yusufu ey Marəyama əy hey tata ŋ hayak Məysəra
13A dəwze maa hejəye kəleŋ ege wese, əy nda tata ca, malaɓ Bay Madakal a ghwelene kusam ŋ Yusufu ta ŋ seŋseŋ, a zlepene, a ŋgaya: «Gwarzam, ŋta ata mbaw ey maman, hey ŋkwa ŋ hayak Məysəra, nja ka a təwse, ha hwas ata vah maa sa kanazlapahwaw ŋ zenha, mavəday Həyrudus a nampam mba anta ŋ jaza.» 14A təwse ca, Yusufu a gwarzam, a ŋta ata mbaw ey maman, aya, a hey anta ŋ hayak Məysəra a zaɗaw. 15Yusufu a nja a təwse, ha hwas ata vah maa Həyrudus a mac anta. Ana ebe ŋghe, səkan anta kála anta ana maa Bay Madakal a zlap ta ŋ pakam mba ma zlap ma anta, maa a ŋgaya: «Sa káyaɓa mba naka aza ŋ hayak Məysəra.»
Həyrudus a jata uzəye mawal ege ma ŋ uzam Baytəylama aza
16Aya, maa Həyrudus a san aza, hejəye kəleŋ ege wese, əy kábaɗza aza ca, kághwaɗ anta dakala mambaza. A təwse ca, a laɓzata hejəye anta ege ŋ Baytəylama leŋ ŋ uzam ma a mazlam ege ŋ jata uzəye mawal ege aza tewtew. A zlepetene ŋ jata aza ca, uzəye ma mbawha ma na ŋgha ege, ha hwas ata uzəye ma va gbak gbak ege. Vah anta ca, tete ana maa hejəye kəleŋ ege, əy ghwelzene ma ata vah maa gamzla a ghwalha wese. 17A təwse ca, zlap ma Yereməya, mba ma zlap ma mala Gazlavay maa a zlap zlezle, a ŋgaya:
18«Ula a kaja ŋ hayak Rama,
Lahan zlaɓa varay dəydey.
Ara Rahəylu ma kahan uzəye anta ege,
a kaɗaw hejəye əy deɓene unaf aka səkwaw,
mavəday uzəye anta ege əy kámac tata,» wese, kála anta njenjəwen.
Ata Yusufu ey Marəyama əy zenha aza ŋ Nasaratu
19Aya, maa Həyrudus a mac anta ca, malaɓ Bay Madakal a ghwelene kusam ŋ Yusufu ta ŋ seŋseŋ ŋ hayak Məysəra. 20A zlepene, a ŋgaya: «Gwarzam, ŋta ata ata mbaw ey maman, hune zen ŋkune ŋ hayak Əysərayəyla, mavəday hejəye ma kampam mba anta ege ŋ jaza wese, əy kámac tata.» 21A təwse ca, Yusufu a gwarzam, a ŋta ata ata mbaw ey maman, əy zen tata ŋ hayak Əysərayəyla. 22Cemey, maa Yusufu a zləme, ara Arkəylawus ma kazam bay ata hayak Yahudəya a uley cen ca, kálalak anta ŋ nja a təwse. Aya, Bay Madakal a ghwelzene səkan ege maa Yusufu a kanalata ta ŋ seŋseŋ. Aya, a nda anta ŋ hayak Galəyləy, 23a nja a uzam maa əy kayaɓa Nasaratu. Ana ebe ŋghe, səkan anta kála anta ana maa uzəye ma zlap ma mala Gazlavay ege, əy zlap, əy ŋgaya: «Əy nayaɓa, a ɗala Nasaratu.»
Àwon tá yàn lọ́wọ́lọ́wọ́ báyìí:
Mata 2: BHS
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2025 CABTAL
