Mata 14
14
Lamac Yuhana maban hejəye a yam baptəysma
1Ata vah wese ca, Həyrudus, mambal hayak mala Galəyləy, a zləme zlap ata Yesu. 2Aya, a zlepetene ŋ mala zlan anta ege, a ŋgaya: «Heje anta ca, ara Yuhana maban hejəye, ma gwarzamha aza ata lamac, mavəday anta, mbəy a ɓarɓar ma ata la zaɓəla ege.» 3Həyrudus a zlap ana ebe ŋghe ca, mavəday ara mbe ma zlap ŋ mbal Yuhana, ŋ jawaw leŋ ŋ nahza ŋ daŋgay. A mbal Yuhana anta ca, mavəday maa Həyrudus anta a ŋta Həyrudəya, wala zlaŋgan, Fəyləyp aza ŋ wala anta. 4Mavəday Yuhana kézlepene, a ŋgaya: «Taf képeleye ŋ hwa ŋ ŋta wala zlanahw ŋghe ca, askwaw.» 5Həyrudus, a ɗaw kəɗe ca, a ja Yuhana aza, cemey, a kalalak ata Yahudu ege, mavəday əy cakza ca, Yuhana ca, ara mba ma zlap ma mala Gazlavay. 6Aya, a pes gwaygwaya ma ata senzene a pes maa Həyrudus a mbawha ca, həla Həyrudəya, a dəmas a tama hejəye mayaya ege. A təwse ca, dəmas anta kéndəremzene aza ŋ Həyrudus. 7Aya, a meɗene ma ŋ haldəma wese, a ŋgaya: «Ɗewzekey səkan maa hwa kaɗaw kaw vekey, sa navalahwaw.» 8A təwse ca, ata həla wese, əy zen zlap a maman, aya, a zlepene Həyrudus, a ŋgaya: «Velekey ha mala Yuhana maban hejəye a yam baptəysma, na na ŋgha ŋ tekeɗ ete ŋghe.» 9Maa Bay Həyrudus, a zləme ana ebe ŋghe ca, unaf anta kémber anta. A təwse ca, a pal taf ŋ velene ha mala Yuhana anta ŋ həla wese, mavəday maa kémeɗene ma aza a tama hejəye mayaya ege. 10Aya, a laɓ ɗala ŋ daŋgay ŋ razlaza ha mala Yuhana maban hejəye a yam baptəysma aza. 11A təwse ca, a daza ha wese ŋ tekeɗ, a velene ŋ həla wese. Aya, həla wese a dene ŋ maman. 12A dəwze anta ca, madarlaŋw Yuhana ege, əy ndaha, əy ŋta mce anta aza, əy nda, əy mpasaza aka. Aya, əy nda, əy ghwelzene ma anta ŋ Yesu.
Yesu a zemetene səkan ŋ hejəye bəlakw jaɓan
13Maa Yesu a zləme ma ata lamac Yuhana maban hejəye a yam baptəysma wese ca, a gwarzam anta a təwse, a ŋta kwambawal, a nda anta ata darzlam, mbəy teŋguleŋ anta. Aya maa hejəye ma a təwse ege, əy zləme Yesu ɗak ca, əy nda a ŋgas mazlam mazlam lakwat, əy səbaraw. 14Aya, maa Yesu a tadakwha aza ŋ kwambawal ca, a sar la ca, a gəre hejəye vəram əy kéɓeceye. Aya, a senzetene hahar, a rehzata hejəye tata ege ma kadawar ege aza. 15Maa pes slaɓ ŋ ndav ca, madarlaŋw Yesu ege əy zlepene, əy ŋgaya: «Na ŋgha ca, heje ata darzlam, mackwahw tew. Zlepetene ŋ hejəye, əy manda kəɗa ŋ uzam ege ndar əy lem səkan ta zam.» 16Cemey, Yesu a zenetene, a ŋgaya: «Hune ɗaw hejəye ŋghe anta ege əy manda ŋ uzam ege ca, ŋ vay? Hune a ha ŋkune ege, hune veletene səkan ta zam.» 17Cemey, madarlaŋw anta ege wese, əy zenene, əy ŋgaya: «Ara nene ete ŋghe ca, peŋ jaɓan leŋ ŋkəlef gbak.» 18Aya, Yesu a zlepetene, a ŋgaya: «Hune dekey ata ete ŋghe.» 19A dəwze anta, Yesu a zlepetene ŋ hejəye tewtew, əy manja ka ata ŋkusaf. Aya, a ŋta ata peŋ ma jaɓan ege leŋ ŋkəlef ma gbak ege wese, a baŋgaɗ nje kəɗa mgba ata uzlaf, a lene wasay ŋ Gazlavay. A dəwze anta, a ŋgata ka, a veletene ŋ madarlaŋw anta ege, ndar əy ɓezetene ŋ hejəye meɓeceɓec ege wese, tewtew. 20A təwse ca, kaw vayay a zam, həraɗ. Madarlaŋw anta ege, əy cam ma menha anta, ujam ghef ghef wam aha gbak. 21Hejəye ma zam peŋ anta ege ca, əy la tata bəlakw jaɓan ege. Weləye ey uzəye, əy kéŋgeɗeye askwaw.
Yesu a nda ata ŋtele a ŋgas
22A dəwze anta, Yesu a letene kulakw ŋ madarlaŋw anta ege, əy metev ŋ kwambawal, əy mazlaŋ tata mpar aha mbe kəɗa aha kəva ŋtele wende, A təwse ca, a kezlepetene ŋ hejəye əy ma nda tata. 23Maa Yesu kézlepzetene aza ŋ hejəye ŋ nda tata wese ca, a tev ata barla ŋ rak Gazlavay teŋguleŋ anta. Zaɗaw a ndewzene a təwse, mbəy teŋguleŋ anta. 24Kwambawal maa madarlaŋw anta ege əy ŋma wese ca, mbəy ŋ ŋtele yam, gədak ata kəva ŋtele wese a hayak. A təwse ca, tatəɗam a ja aha tata, latatəŋgwal yam a həɓalza kwambawal. 25Maa mapat slaɓ ŋ zlarha ca, Yesu a nda ara madarlaŋw anta ege ata yam a ŋgas. 26Aya, maa madarlaŋw anta ege, əy gəre Yesu a kanda ata yam a ŋgas wese ca, əy kálalak tata mambaza, aya, əy zlap ŋ taba tata, əy ŋgaya: «Ara welɓe!» Aya, əy ja ula a mazlazlay mavəday ŋgəzleŋ kájata aza. 27Cemey, a təwse a təwse, Yesu a zlepetene, a ŋgaya: «Hune mbal unaf ŋkune ege ka, hune lalak səkwaw, ara sa!» 28A təwse ca, Pəyer a zlepene, a ŋgaya: «Bay Madakal naka, mada ara hwa njenjəwen ca, pelzekey taf, sa nda ata yam a ŋgas kəɗa ara hwa yam.» 29Yesu a zlepene, a ŋgaya: «Ndaha!» Aya, Pəyer a tadakwha ŋ kwambawal, a nda ata yam a ŋgas kəɗa ara Yesu. 30Cemey, maa Pəyer a gəre tatəɗam a kaja ca, ŋgəzleŋ a jaw. A təwse ca, a mar ŋ dam asa yam, aya, a ja ula, a ŋgaya: «Bay Madakal naka, rehzekey aza!» 31A təwse a təwse, Yesu a ɗafza ra anta kəcaŋ, a mbalaw, a zlepene, a ŋgaya: «Hwa maa lalam ŋkwa parham ŋgha, hwa deŋ ŋkwaɓ gbak gbak ca, ŋ vay?» 32Aya, a dəwze maa əy tev tata gbak tata ŋ kwambawal wese ca, tatəɗam wese ɗekɗek a nja ka. 33A təwse ca, madarlaŋw Yesu ma ŋ kwambawal ege wese, əy gəleɓene ŋ Yesu, əy zlepene, əy ŋgaya: «Njenjəwen, hwa ca, hwa Mba Gazlavay.»
Yesu a rehzata hejəye ma kadawar ege aza ŋ uzam Genesaret
34A dəwze maa ata Yesu ey madarlaŋw anta ege, əy zlaŋ tata ca, əy nda hwas ŋ uzam Genesaret. 35A təwse ca, hejəye ma ŋ uzam anta ege, əy kásan Yesu aza. Aya, əy ghwalza ma anta ŋ uzam tata anta tewtew. A təwse ca, əy dene hejəye tata ege ma kadawar ege tewtew. 36Aya, əy jene mbahw, mepelzetene taf ŋ hejəye ma kadawar ege, əy macaɓa ra tata ege kaw ata mazlam rəgwac anta ende ŋghe may. A təwse ca, hejəye tewtew ma ca ra tata ege ata mbe ca, əy kéreh tata.
Àwon tá yàn lọ́wọ́lọ́wọ́ báyìí:
Mata 14: BHS
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2025 CABTAL
