Nnwẹr s'Osenga 28
28
Nnya s'ọfọhn-ẹja
1“Yeri nwakka Aarọn, ọttạra ajunungva pẹ p'ade Nadab, ọttạra Abihu, ọttạra Ẹleyaza, ọttạra Itamar k'ikhaana s'anạng p'Israẹl, ọfha abẹ asi ọtọhm f'afọhnẹja. 2Bọhra nnya s'awurada nạng nwakka Aarọn, ọfha ọkhaama ikpukpobha ọttạra abạrada. 3Ben ajunung phyibh p'asi emmengkka, p'kk'ekkoji ch'ọbọhkttọhm-dema mvọ nnạng bẹ́, abẹ abọhra Aarọn nnya k'ẹbọhk-nạna chẹ, ọfha usi ọttọhm f'ọfọhnẹja. 4Maa wọ ode nnya sabẹ m'abọhra: ẹvạrakpa ch'ittemmạma, ọttạra ẹphọd, ọttạra ọkpaar-mbọhk, ọttạra ọnọhma-baba, ọttạra ẹvạrakpa ch'echo-dạdạbh, ọttạra udikhikpa kw'irin. Abẹ m'abọhra nnya nnọ s'awurada anạng nwakka Aarọn, ọttạra ajunungva pẹ, ọfha abẹ asi ọtọhm f'afọhnẹja. 5Tte abẹ atima ndikhi s'gol, ọttạra s'ide blu, ọttạra s'ikhor-ichicho, ọttạra s'ikhor-isisẹ, ọttạra ndikhi ikkasẹ abọhra nnya nnọ.
Ẹphọd
6“Tte ommengkka-nạng utima ndikhi s'gol, ọttạra s'blu, ọttạra s'ikhor-ichicho, ọttạra s'ikhor-isisẹ, ọttạra ndikhi ikkasẹ sabẹ ayokh-oyok, ọbọhra ẹphọd. 7Awẹ m'ọkhaama mvạrakpa mfa k'nkkang, p'abẹ m'abọhra amaana k'nnwyạnga sẹ mfa, ọfha asẹ ivạkha ayok. 8Udikhikpa kwẹ kw'abẹ atim emengkka ayok m'ode ukhira ngwọ gwạnọ. Abẹ m'atima ndikhi s'gol ayok, ọttạra s'blu, ọttạra s'ikhor-ichicho, ọttạra s'ikhor-isisẹ, ọttạra ndikhi ikkasẹ sabẹ ayokh-oyok.
9“Tạkha nta afa p'oniks, akkẹr ache p'iva p'Israẹl ma. 10Kkẹr ache asajạnẹ k'ẹta jạnẹ, abạra akkẹr mbọkha asajạnẹ k'ẹta njọkha, kkẹr sẹ tor k'igbọ sabẹ. 11Kkẹr ache p'iva p'Israẹl ma ata mbọ afa, k'oche kw'omengkkanạng n'ọkkẹr ọttọhk k'ata. Atạkha gol afhạrọ ammakpabem p'ata mbọ afa, 12abạra atạkha sẹ akpa k'avạrakpa mbọ p'nkkang s'ẹphọd, ede masẹ ata p'ijima anạng iva p'Israẹl. Aarọn m'utima ache mbọ k'nkkang sẹ, ede masẹ ijima k'ititikha s'Ọvaar Ubinọkpaabyi. 13Bẹ gol abaabha ammakpabem p'ata mbọ afa, 14ọttạra mgbakkọhbhọ mfa s'gol ọkkakwẹ masẹ idikhi, akpạna sẹ ma ata mbọ.
Ẹvạrakpa ch'ittemmạma
15“Bọhra ẹvạrakpa ch'ittemmạma ch'ẹkka ch'Ubinọkpaabyi ororu, f'ode ọbọhktọhm f'ommengkka-nạng. Tima ndikhi s'gol, ọttạra s'ide blu, ọttạra s'ikhor-ichicho, ọttạra s'ikhor-isisẹ, ọttạra ndikhi ikkasẹ sabẹ ayokh-oyok, abọhra chẹ masẹ ẹphọd. 16Adum ọttạra ẹkpa chẹ m'ade obengana de ayom ẹbọhkpattem, abạra anwyạnga chẹ nden mfa. 17Ge akhaana annebung kw'nta s'ijibh-ujibh ma. K'ọkhaana kw'ucheden, ge ẹta ch'ruby, ọttạra ch'topaz, ọttạra cha bẹryl 18k'ọkhaana kw'otong afa, bẹ ẹta ch'tọkwọis, ọttạra ch'saphiya, ọttạra ch'ẹmẹral; 19k'ọkhaana kw'ottong attaan, bẹ ẹta ch'jasin, ọttạra ch'agate, ọttạra ch'amẹtist, 20k'ọkhaana kw'ottong annebung, bẹ ẹta ch'krisolita, ọttạra ch'oniks, ọttạra ch'jaspa. Bẹ gol afhạrọ ammakpabem p'ata mbọ. 21Apyẹ m'ade ata jobh-kamfa, chidede m'ebe k'eche ch'ujunungnwa wạnọ kw'Israẹl. Kkẹr eche jạnẹ masẹ ẹkhọhkha k'ẹta chidede ch'm'ebe k'echo ch'mfonama chidede k'mfonama nnọ jobh-kamfa.
22“Tima gol ọkkọkka kw'abẹ ayokhu masẹ idikhi si mgbakkọhbhọ akpạna ma ẹvạrakpa njọ ch'ittemmạma. 23Tima gol si ariringi afa, akpa pyẹ ma nnwyạnga nnọ mfa s'ẹvạrakpa ch'ittemmạma.
24Kpa mgbakkọhbhọ mvọ ọfa f'gol k'ariringi p'nnwyạnga s'ẹvạrakpa njọ ch'ittemmạma, 25abạra akpa acho mbọkha afa p'mgbakkọhbhọ k'ata mbọ afa, amaana k'nkkang, k'ititikha s'ẹphọd. 26Si ariringi afa p'gol, akpạna pyẹ k'nnmyạnga nnọkha mfa k'ẹtaanga kw'ẹvạrakpa ch'ittemmạma abaanga ẹphọd. 27Si adạkhẹ ariringi afa p'gol, akpạna pẹ k'isekhisek kw'mvạrakpa s'nkkang, k'ititikha s'ẹphọd, ọbaanga k'ẹbọhra ch'ẹrạng-erạng kw'udikhikpa kw'ẹphọd. 28Tima idikhi ch'ede blu, kpạna k'ariringi p'ẹvạrakpa ch'ittemmạma, mạnna k'ariringi p'ẹphọd, akpạna kha udikhikpa kw'irin, ọfha ẹvạrakpa njọ ch'ittemmạma nạngẹ ẹchaarẹ etto.
29“Okpe kwidede kw'Aarọn n'oben bẹ́, ọnwa k'ibyi s'awurada, m'ujima ache p'ajunungva p'Israẹl k'ettem chẹ, p'abẹ abbẹ k'ẹvạrakpa ch'ittemmạma ch'ẹkka ọkkachẹ, ọfha Ubinọkpaabyi n'utima ujima anạng pẹ. 30M'abạra abẹ Urim ọttạra Tumim ma ẹvarakpa ch'ittemmạma, ọfha Aarọn n'utima k'ittemmạma k'okpe kwidede kw'obe Ọvaar Ubinọkpaabyi k'ititikha. Ma wọ kw'Aarọn m'n'utima ujima k'ettem oche kw'm'ọkhaama ẹkka ọkkachẹ otena anạng p'Israẹl k'ititikha s'Ọvaar Ubinọkpaabyi.
Nnya nnọkha s'afọhn-ẹja
31“Tima ivạra s'blu mạnkkeni bọhra ọnọhma-baba kw'ẹphọd, 32awẹ m'ọkhaama ọmma kw'echo-gige k'ottemkwẹ. Abẹ abạra ayok inọhma-dwạngọ oyok ọfha nạng'ọyaakhẹ. 33Tima ndikhi s'blu, ọttạra okhor-ichicho, ọttạra okhor-isisẹ, ọttạra ndikh'ikkasẹ yokh achidwuk, fhạrọ ammakpa p'inọhma-diden nnọ, ọttạra nganyaang s'gol k'ottemkwẹ kwabẹ. 34Abẹ m'atima nganyaang ọttạra achidwuk mbọ afhạrọ ammakpa p'ọnọhma-baba nwọ phyi-phyibh. 35Aarọn m'oge wẹ k'okpe kw'm'usi ọtọhm f'ọfọhnẹja. Abẹ m'abhaanga mmạng s'nganyaang k'okpe kw'm'ọnwa k'Ibyi s'Awurada k'ititikha s'Ubinọkpaabyi, ọttạra k'okpe kw'm'uyin k'iyaan, ọfha nạngẹ ope.
36“Tima gol ọkkọkka si ẹchaangkpa, akkẹr ma masẹ ẹkhọhkha bẹ́, AWURADA AYIM ANẠNG ỌVAAR UBINỌKPAABYI. 37Tima idikhi ch'ede blu dạbh amaana k'ọdạbhecho kw'ọfọhnẹja; ininga k'ititkha kw'ọdạbhecho nwọ. 38M'ininga Aarọn k'ititikha-ttem, Aarọn m'ọtọhkha ẹkhọngkwuru ch'ining k'nnạnga s'awurada s'anạng p'Israẹl, usi asẹ iwur, s'ọbạra nnạnga ide yạn. M'efona ororo ẹnạna Aarọn ma ititikha-ttem, ọfha Ọvaar Ubinọkpaabyi ochera ọtakha nnạnga nnọ.
39“Tima ndikhi ikkasẹ sabẹ ayokh-oyok ayok ọnọhma-baba nwọ, abạra atima ndikhi ikkasẹ sabẹ ayokh-oyok ayok ọdạbhecho. Udikhikpa kw'irin m'ode ọbọhktọhm f'odokh-ọvạra. 40Gba bọhra ọnọhma-baba, ọttạra ẹvạrakpa-dikhi, ọttạra avạrakpa p'echo anạng ajunungva p'Aarọn, ọfha abẹ akhaama ikpukpobha ọttạra abạrada. 41Ode kk'nwakka Aarọn ọttạra ajunungva pẹ nnya nnọ agia, byenga bẹ ana k'echo, abạra anạna bẹ ọbọhk k'echo. Do bẹ abẹ awur, ọfha abẹ asi-m ọtọhm f'afọhnẹja.
42“Tima ndikhi sabẹ ayokh-oyok bọhra ekpo-khuma py'ẹtaanga, py'm'ẹtạma k'irin ikpira k'ntaak, ibubha bẹ ifor. 43Aarọn ọttạra ajunungva pẹ m'age pyẹ k'okpe kwidede kw'abẹ m'anwa k'ukkira kw'etobha, ọbạra ode bẹ́, abẹ m'asenga afona k'ijabyi, ọfha abẹ asi ọtọhm k'Ibyi s'Awurada, ọfha abẹ nạngẹ apini, akwu ape.
“Inyina nja m'ininga ẹnạng Aarọn ọttạra iva p'iva pẹ tạrr ipimmanitor.
Àwon tá yàn lọ́wọ́lọ́wọ́ báyìí:
Nnwẹr s'Osenga 28: mfn-x-os
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©️2025 West Africa Christian Mission