Nnwẹr s'Osenga 29
29
Oche kw'abẹ m'asi afọhnẹja p'Ubinọkpaabyi akhaama awurada
1“Maa wọ ode oche kw'm'asi abẹ akhaama awurada, ọfha abẹ asi ọtọhm f'afọhnẹja: tạkha ọbhaamnwa-dim, ọttạra arạkhạmaan-dim afa p'nạn ekhem akhaam. 2Bạra tima abubuma ọkkọkka p'wit asi brẹd kw'abẹ nạn yist nágia, ọttạra ekpo ẹkkạngapyẹ py'abẹ age ana, ọttạra abukpa py'abẹ nạn yist nágia, py'abẹ abạra arẹbhẹ ana p'oliv. 3Yikha pyẹ k'ikhạrạbang atima akwu, ọttạra ẹbhaam njọ, ọttạra arạkhạmaan-dim mbọ afa. 4Ma wọ, m'atima Aarọn ọttạra ajunungva pẹ akwu k'ẹchọhmma ch'ukkira nwọ kw'etobha, atima asi akpobhu bẹ ifor. 5Tạkha nnya nnọ s'ide ọnọhma-baba, ọttạra ọkpaar-mbọhk kw'ẹphọd, ọttạra ẹphọd oyeni, ọttạra ẹvạrakpa ch'ittemmạma, ge Aarọn. Akpẹ-ẹ udikhikpa kw'abẹ atim emmengkka ayok, atima avạkha ẹphọd nwọ ma irin. 6Kpẹ-ẹ ọdạbhecho, abạra akhubh-ẹ ikpo s'awurada amaana ma ọdạbhecho nwọ. 7Tạkha ana p'abẹ n'abyenga ọnạng k'echo byeng-ẹ k'echo. 8Atima ajunungva pẹ akwu, age bẹ anọhma-baba, 9abạra akpa bẹ ọdạbhecho. Atạkha adikhikpa akpa Aarọn ọttạra ajunungva pẹ. Inyina nja ch'ẹjafufọhnọ m'ede chabẹ tạrr ipimmanitor. Ma wọ m'anạna Aarọn ọttạra ajunungva pẹ ọbọhk k'echo.
10“Tima ẹbhaamdim kwu k'ititikha s'ukkira kw'etobha, Aarọn ọttạra ajunungva pẹ m'anạna chẹ mbọhk k'echo. 11Yẹk ẹbhaamdim njọ ẹdwạngọ ma ititikha s'Ọvaar Ubinọkpaabyi, ma ẹchọhmma ch'ukkira kw'etobha. 12Tima ẹnọhna chọ kperi isẹ rạnẹ s'ẹbhaamdim njọ, atwạkhọ k'abhik p'ijabyi, abạra atạkha s'irikhi abyenga ma irin ch'ijabyi nnọ. 13Atạkha iyaak phyi-phyibh s'ifhạrọ afhạrọ, ọttạra s'ibubh ẹnnạng, ọttạra s'ibubh adwạdwạrọ, akkạmọ pyẹ ma ijabyi. 14Okhenka, kkạmọ atennạng p'ẹbhaamdim njọ, ọttạra atenkpa pẹ, ọttạra afhạrọ pẹ k'iyaan-iyaan kw'ibyibhingasẹ. Ẹjọ m'ede ẹnạnga ch'ipyibha kpukpobhu.
15“Tạkha ọrakhạmaandim wạnọ ma mbọ afa, Aarọn ọttạra ajunungva pẹ anạna chẹ mbọhk k'echo. 16Yẹk ọrạkhạmaandim nwọ ẹdwạngọ, atạkha isẹ sẹ awobhu k'akhaan-ọkhaan phyi-phyibh p'ijabyi nnọ. 17Jẹk ọrạkhạmaan-dim nwọ bẹ́ sẹkhẹ-sẹkhẹ, akpobhu afhạrọ pẹ, ọttạra mfhok, atạkha echo attạra k'nnọkha s'ajẹkhẹ. 18Kkạmọ ọrạkhạmaandim nwọ phyi-phyibh ma ijabyi nnọ. Ma wọ m'ode ẹnạnga ẹkkạmachẹ ẹnạng Ọvaar Ubinọkpaabyi, ch'erebhi iruk, ẹbạra ede ẹnạnga ch'abẹ aseng k'ekpon akkạmọ anạng Ọvaar Ubinọkpaabyi.
19“M'atạkha ọrakhạmaandim nwọkha, Aarọn ọttạra ajunungva pẹ anạna chẹ mbọhk k'echo. 20Yẹk chẹ ẹdwạngọ, atạkha isẹ sẹ rạnẹ afokha k'itọhngkpa s'udimbọhk kw'Aarọn, ọttạra ajunungva pẹ, ọttạra k'nnọhnadim s'udimbọhk kwabẹ, ọttạra k'nnọhnadim s'udimfok kwabẹ. Abạra awobhu isẹ k'akhaan-ọkhaan phyi-phyibh kw'ijabyi nnọ. 21Gba tạkha isẹ rạnẹ k'ijabyi, attạra k'ana p'abẹ n'abyenga ọnạng k'echo, awobhu Aarọn, ọttạra k'nnya sẹ, abạra awobhu ajunungva pẹ, ọttạra k'nnya sabẹ. Ma wọ, ẹma ọttạra ajunungva pẹ, ọttạra nnya sabẹ m'akhaama awurada.
22“Tạkha iyaak s'ọrạkhạmaan-dim nwọ, ọttạra iyaak s'ẹsạra, ọttạra iyaak s'ibubh afhạrọ, ọttạra s'ibubh attennạng, ọttạra s'adwạdwạrọ, ọttạra ọtaak kw'udimfhok. Ma wọ m'ode ọrạkhạmaandim kw'ẹbọhk-nạna. 23Ma ikhạrạbang nnọ s'brẹd kw'abẹ nạn yist nágia, s'ining k'ititikha s'Ọvaar Ubinọkpaabyi, m'atạkha brẹd wạnọ, wạnọ kw'udin-udini kw'abẹ age ana, ọttạra wạnọ kw'obhekh-obhekhi. 24Tạkha pyẹ phyi-phyibh ge Aarọn ọttạra ajunungva pẹ k'mbọhk, awobhu pyẹ masẹ ẹnạnga ch'ẹbạrẹ udik k'ititikha s'Ọvaar Ubinọkpaabyi. 25Bạra atạkha pyẹ kabẹ k'mbọhk, akkạmọ k'ijabyi, ọttạra ẹnạnga ẹkkạmachẹ, ch'erebhi Ọvaar Ubinọkpaabyi iruk, ẹnạnga ch'abẹ asengi k'ekpon akkạmọ anạng Ọvaar Ubinọkpaabyi. 26Okpe kw'kk'ọkwọ kw'ọrạkhạmaan-dim atima asi ẹbọhk-nạna ch'Aarọn, wobhu ẹnạnga njọ k'ititikha s'Ọvaar Ubinọkpaabyi masẹ ẹnạnga ch'ẹbạrẹ udik. Okhebh pfọ vọ ma.
27“Tạkha nten nnọ s'ẹrạkhạmaan-dim s'ẹbọhk-nạna, s'ide s'Aarọn ọttạra ajunungva pẹ, ọttạra k'ọkwọ nwọ kw'awobh-owobhu, ọttạra ọtaak kw'anạng-ẹ, asi asẹ ikhaama awurada. 28Ma wọ ode okhebh f'anạng p'Israẹl m'anạng Aarọn ọttạra iva pẹ k'okpe kwidede. Ẹvọ ode ọtạbha kw'anạng p'Israẹl m'asi anạng Ọvaar Ubinọkpaabyi masẹ nnạnga sabẹ s'ẹgbạkha.
29“Nnya s'Aarọn s'awurada ikhaam iva p'iva pẹ, sabẹ m'age sabẹ m'abyenga bẹ ana k'echo, ọttạra sabẹ m'anạna bẹ ọbọhk k'echo. 30Ujunungnwa kw'm'ọtạkha ininga ch'otte masẹ ọfọhnẹja, kw'm'ukwu bẹ́, ukwu usi ọtọhm k'ukkira kw'etobha, k'Ibyi s'Awurada, m'oge nnya nnọ k'iwu isenọfa.”
31Tạkha ọrạkhạmaan-dim kw'ẹbọhk-nạna, awọhn nten sẹ ma ibyi s'awurada. 32Aarọn ọttạra ajunungva pẹ m'aninga ma ẹchọhmma ch'ukkira kw'etobha achi nten s'ọrạkhạmaan-dim nwọ, ọttạra brẹd kw'uning ma ikhạrạbang nnọ. 33Abẹ m'achi nnạnga nnọ s'ekpobhu ch'efokhu, sabẹ atim asi ẹbọhk-nạna chabẹ, ọttạra wuwur kwabẹ. Okhenka, ọnọng ọdwạkh-ọdwạk sẹ múchi, ukwuru bẹ́, iseng ittạra awurada. 34Fidede f'ochobh iwu, ode eten, ọbạra ode brẹd, annemeden akkạmọ, ọnạng nạngẹ uchi, ukwuru bẹ́, apfe oseng ọttạra awurada.
35“Si udik kwidede kw'kkọ-ọ ntọhna nạng Aarọn ọttạra ajunungva pẹ, atima iwu isenọfa anạna bẹ ọbọhk k'echo. 36Iwu chidede, m'atima ẹbhaamdim afọhnọ ẹja ch'efokhu ch'ipyibha. Si efokhu tima si ijabbyi nnọ ikhaama awurada, abạra abyenga sẹ ana, ọfha asẹ ikhaama awurada. 37Tima iwu isenọfa si efokhu ch'ijabyi, abạra asi asẹ ikhaama awurada. Ma wọ, ijabyi nnọ n'abạra ide ibyi s'awurada, fidede f'utwu ma n'ọkhaam awurada.
38“Maa wọ ode ẹnạnga ch'm'anạng k'ijabyi k'iwu chidede: arạkhạmaan-va afa p'ade cho gwạnọ. 39Tima ọrạkhạmaan-nwa wạnọ k'ekpebha, abạra atima wạnọ k'ẹchọhkha afọhnọ ẹja. 40K'ocheden-rạkhạmaan-nwa nwọ, yoma okpobhumbọhk wạnọ k'akpobhumbọhk jobh p'abubuma ọkkọkka p'wit, p'afhunu ọttạra ẹna-kpomma ch'ana p'oliv, ọttạra k'itwuk-kpomma jạnẹ ch'm'ede masẹ ẹnạnga ch'ugwua. 41Tima ọrạkhạmaan-nwa nwọkha fọhnọ ẹja k'ẹchọkha, ọttạra k'ẹnạnga ch'agwu, ọttạra k'ẹnạnga ch'itwuk-byenga k'oche kw'wạra asi k'ekpebha. Achẹ m'ede ẹnạnga ch'erebhi iruk, ch'abẹ aseng k'ekpon anạng Ọvaar Ubinọkpaabyi.
42“Igbọ s'm'ikwu k'ororo m'isi ẹnạnga ẹkkạmachẹ nja k'okpe kwidede k'ẹchọhmma ch'ukkira kw'etobha, k'ititikha s'Ọvaar Ubinọkpaabyi. Ma wọ m'nkhebha bạnga, mkpaak udik nnạng bạnga. 43Ma wọ m'mbạra nkhebha anạng p'Israẹl, ntima abạrada paam nsi ibyi nnọ ikhaama awurada.
44“Ma wọ, amma m'nsi ukkira nwọ kw'etobha, ọttạra ijabyi nnọ ikhaama awurada, mbạra nsi Aarọn ọttạra ajunungva pẹ akhaama awurada, ọfha abẹ asi ọtọhm f'afọhnẹja. 45Ma wọ, amma m'nninga iva p'Israẹl abẹ, mbạra nde Ubinọkpaabyi kwabẹ. 46Abẹ m'asonga bẹ́, amma wọ nde Ọvaar Ubinọkpaabyi, kw'ode Ubinọkpaabyi kwabẹ, kw'utim bẹ ubina k'Ijip, ọfha nnuk bẹ abẹ. Amma wọ nde Ọvaar Ubinọkpaabyi, kw'ode Ubinọkpaabyi kwabẹ.
Àwon tá yàn lọ́wọ́lọ́wọ́ báyìí:
Nnwẹr s'Osenga 29: mfn-x-os
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©️2025 West Africa Christian Mission