Roman 10
10
1Yayuwa na, lepa na nja mbode na bila anya Mirikisi! E shiya de ntani Izireyila su samu sila! 2Ni mani tebeshi nkye su man memeri bowuta Mirikisi; sede memeri asu e ma a kiya shina Mirikisi naba. 3Tunde su shina turiki gangasi de butu dege anya Mirikisi ba se su ma bila turiki daa mbom ni zunwa gangasi a geba Mirikisi, e shiya sa su ki munka kiya su a turiki de Mirikisi ma bila de ntani su ma gangasi. 4Kiristi e shiya ma karishe doka Musa sobon konwawa de beigaskye e samu zunwa gangasi a geba Mirikisi.
5Musa rubuta mbom a kiya gangasi de su ma samu te anya kokoyi doka nkye: <<Guru nsude biya kokoyi doka mu yaman leyi te anya doka.>> 6Sede mina Takada Mirikisi pala a kiya gangasi Mirikisi de sua samu te anya beigaskye: <<Kede ki pala a siki dishiya ke nkye, waa yaa nunwa ta a bisi?>> De e sonka ni Kiristi. 7<<Ko ki nkye, waa yaa sonka ta a kisi a durinya ni worede muntu?>> de e dege Kiristi a kumsha. 8Mbode beta Mirikisi meyi nupi e shiya ma: <<Beta Mirikisi ma mala nja ke, e ma a baki ke nja dishiya ke,>> beta mu e shiya ma, manki beigaskye de muma beyi manki yi. 9Nde ki pala mbaki ke nkye, Yesu e ma Obagizi la, ki kwa beigaskye a siki dishiya ke nkye Mirikisi dege yi a kumsha, Mirikisi yaa sila nke. 10Sobon dege siki dishiya nsebeki yaa beigaskye de yi zunwa mere lepi a geba Mirikisi, ni baki la nsebeki yaa beyi sheeda de e samu sila. 11Yiride beta Mirikisi pala nkye, <<Guru nsude beigaskye nja Mirikisi yaa zi kumnya ba.>> 12Nsum ma nzun konwawa, sobon bombom ma a sisika Yawudawa nja worede su ma Yawudawa ba; Mirikisi ma daa la kya e shiya ma Obagizi ni guru e ma beyi anabirika ba guru worede sukwa yi, 13Yiride takada Mirikisi nkye, <<Guru nsude sukwa seni Obagizi yaa sila.>>
14Sede yaya na sua sukwa nsude su beigaskye nja shi ba? Yaya na sua yeda ni nsude su taba zi nabari yi ba? Yaya na sua zi mba nseda keyi su manki ba? 15Yaya na nsu beyi manki sua beyi manki mba su saka su ba? Yiride e ma a rubutu a siki takada Mirikisi nkye, <<Yaama mbo kyakyawu la zo ni worede sua beyi manki nabari kyakyawu!>> 16Sede ba guru ntani Izireyila na su yeda ni manki nabari kyakyawu mu ba. Sobon anebi Ishaya nkye, <<Obagizi, waa yeda ni manki mu?>> 17Sobon yomu beigaskye zo te turiki zi manki la, yomuna kuma su ma zi manki te turiki beyi manki a kiya Kiristi la.
18Sede Na minya: Ni gaskye na su zi manki bo? Gaskye su zi, yiride takada Mirikisi nkye,
<<Murinya manki su e gyowe anya guru a durinya;
beta su keyi karishe durinya.>>
19Ni kwa minya nkye: Ntani Izireyila su shina bo? Musa nkiya yi para pala nkye,
<<Na sa ku sikiwuta sobon worede su ma ntani na ba;
Na sa ku ku yi anwashi sobon ntani de su ma Odundu.>>
20Yomuna anebi Ishaya yi dishiya nkye Mirikisi pala nkye,
<<Worede su bila ni ba osu na su samu geni ni;
Ni nana kiya na te nja worede su minya mbodaa a kiya na ba.>>
21Sede a kiya ni Izireyila Mirikisi pala nkye,
<<Guru nana Ni munka nani na
te nja ntani nsu tori kiya nja nsu lesa zi de Ni yi su naaba.>>
The Word for the World International and The Word for the World Nigeria