Matiyu 8
8
Yesu Worikye Nseminji De Ma kputuru
Mk 1.40-45; Lk 5.12-16
1De Yesu sonka a bisi zo a keteri dunsi, yowa ntani su biya yi. 2Nseminji de ma kputuru e zo dunkye a geba e yi nkye, <<Obagizi nde ki yeda, ki sa ni de ni worikye.>>
3Yesu munka nani yi kpa nseminji nsu kputuru. <<E pala nkye ni yeda de ki worikye!>> dandani e worikye dege suwo yi. 4Yesu gye yi nkye, <<Kone kede ki gye nseda ba. Sede te, de ki nana kiya ke ba pirisi de ki beyi sedeka yiride Musa e pala, de nana sheeda worikye.>>
Yesu Worikye Bunwa Ni Tolense Shoja
Lk 7.1-10
5De Yesu yuru akapanawu, se totolo tolense shoja ni Roma zo anya yi yaa bila de Yesu e sua yi nto. 6<<Nkye Obagizi,>> <<Bunwa naa e man lapiya ba ema a gizi yaa zi nki yowa nja suwo nki sharuwa.>>
7Yesu gye yi nkye, <<Na te de worikye yi.>> 8Tolense shoja keleba yi nkye, <<Obagizi, Ni deta de ka zo a gizi na ba. Sede ki pala kelima kin, bunwa na yaa worikye. 9Ko eni ma ni ma yiko nseda na du, sede ni man shoja agizina. Na gye nseda nkye, <Te,> Yaa dege te; nseda na gye nkye, <zo,> yaa zo. Ni gye bunwa na, yi ANKI mu yaa yi.>>
10De Yesu zi yomu e yi mamanki e gye nsu worede su biya yi nkye, <<Na gye ku gaskye, Ni taba geni nseda a siki Izireyila de beigaskye yomu ba. 11Na gye ku gaskye ntani nyowa de su shina Mirikisi ba sua butu anya nyisa, sua zo anya buki a pili nja Abireyi, Ishaku nja Yakubu a gizi bisi. 12Sede worede su ma yaya solota ba, sua la su kutiri a siki dopuwa, anya de sua yi kuka nja suku ankuri.>>
13Yesu gye tolense shoja Roma nkye, <<Te ma ke a gizi, mbode ki beigaskye e shiya sua yi ke nshi,>> anya ni bunwa tolense shoja worikye dandani
Yesu Worikye Ntani Nyowa
Mk 1.29-34; Lk 4.38-41
14De Yesu ta a gizi ni Biturusu, e geni amaa ni mata yi kwakwana a kiya gbodo yaa yi suwo mashapo. 15Yesu kpa nani nki yi suwo mashapo bila e yi, e dege a bisi e yi su mbosi.
16De nyema yi, su kwa yi ntani nyowa de mani arizeni zo anya Yesu, E butu mumungu aworo nja bete, e kwa worikye worede su ma suwo. 17E yi yomu de e sika mbode anebi Ishaya pala nkye, <<E shi e la suwo amu. nja shuwuta mu.>>
Sua Ma Nsu Biya Yesu
Lk 9.57-62
18De Yesu geni yowa ntani gyowe yi, e gye yayagizi yi nkye su nyenteri te ni keteri ni riki. 19Se male ni kokoyi doka ni Musa zo anya yi gye yi nkye, <<Male, Na biya ke te anya de ka te guru.>>
20Yesu keleba yi nkye, <<Kere bikiya e man romu, nsusuwa bisi mani gizi kwana, sede E ni Yaa nsebeki ni man anya de Na la kiya ja ba.>>
21Daa a siki yayagizi yi gye yi nkye, <<Obagizi, na te de ni bishina adaa na tuku.>>
22Sede Yesu gye yi nkye, <<Biya ni, de ki bila worede shina Mirikisi ba de su bishina yayuwa asu de su muntu.>>
Yesu Sakisi Ni Totolo Akusuka
Mk 4.35-41; Lk 8.22-25
23Se Yesu yuru a siki kwanto, Yayagizi yi yuru biya e yi. 24Dandani totolo akusuka dege a siki totolo riki, riki wula yuru a siki kwanto, Yesu ma yi kwana. 25Yayagizi yi dege yi, su nkye, <<Obagizi, sila mu! Mua bila muntu!>>
26<<Yesu keleba su, oku mere beigaskye, mina sa kwa yi womba?>> Se e dege a bisi kwabe akusuka nja angwe riki guru su yi ship.
27Konwawa su yi mamanki su minya nkye, <<Woni yiri nsebeki mu? De akusuka nja angwe riki su zi betayi?>>
Yesu Worikye Menza Bi De Su ma Mumungu Aworo.
Mk 5.1-20; Lk 8.26-39
28De Yesu keyi keteri riki ni gunduma Ganesere, menza bi de suman Aworo mumungu su butu a siki kumsha sa nshi. Su ma mbo womba nja nseda ma sori de yaa biya a turiki ni ba. 29<<Dandani Su yi kuruwa nkye mina na ka bila anya mu, E ke Yaa Mirikisi?>> <<Ki zo de ki ba mu poro tunde kwanki mu keyi wo ba?>>
30E yi nyisa nja su ba de sua ke anyade alede si mbo si. 31Mumungu aworo su pata Yesu nkye, <<Nde ka kula mu de mu butu ta woze, kula mu de mu te a siki alede mu.>> 32E gye su nkye, <<Ku te!>> Su butu te siki alede, guru alede su te yuru a siki totolo riki se guru asu su muntu teke a siki riki. 33Nsu worede sua kiwo alede su yi gudu te siki geri, su gye ntani mbode e paru nja menza de su ma ni mumungu aworo. 34Se guru ntani geri su butu te woze de su geni Yesu. De su geni Yesu, su ologba de e bila kesa su.
Àwon tá yàn lọ́wọ́lọ́wọ́ báyìí:
Matiyu 8: Gaa
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
The Word for the World International and The Word for the World Nigeria
