Matiyu 24
24
Yesu yi Beta A kiya Juru Ni Laki Mirikisi
Mk 13.1,2; Lk 21.5,6
1Yesu bila gizi Mirikisi yaa yi tepiya se yayagizi e yi zo anya yi de su jaa ankeli e yi ta a beta gini. 2<<Sede Yesu gye su nkye,>> Ku geni guru mbo mu? <<Na gye ku gaskye, ba dunsi daa de yaa te ma kiya daa ba; kowoni daa sua kutiri yi te a kisi.>>
Wuya nja Genbeki
Mk 13.3-13; Lk 21.7-19
3De Yesu zunwa a kiya Ogbo ntasi zetu, yayagizi e yi su zo anya yi a boyi. <<Su nkye,>> Gye mu, <<Woshe na mbo mu yaa paru, nja mina ma alama ni zo ake nja alama ni karishe durinya mu?>>
4Yesu keleba nkye: <<Ku kone kyakyawu kede nse daa e shirigye ku ba. 5Ntani yowa sua zo a siki seni na, sua nkye, <E ni na ni ma kiristi,> Sua shishirigye ku. 6Kwa zi beta yanki nja nkye ni yanki, sede kede ku zi womba ba. Sobon dole na yaa paru, sede karishe e tuku zo wo ba. 7Kesa sua yi yanki nja kesa, solota kesa daa sua yi geba nja solota kesa daa. Sua yi nyunwa nja juru kesa anya guru a durinya. 8Guru mbo mu e ma kankye pari ni Genbeki ni yapu yaa la. 9<<Se sua la ku ba su de su ba ku Genbeki ari sua sa de ku muntu, guru worede shina Obagizi ba sua zi anwashi aku sobon de kwa biya ni. 10A kwanki ni ntani nyowa sua juyi bila beigaskye nja butu nkyasu a beyi sua kin nkyasu, 11anebi nsu yi yaruwa nyowa sua butu de su shishirigye ntani nyowa. 12Sobon mungu ntani sua jan nyowa guru anya a woze, so ni ntani nyowa yaa seni, 13sede nsude e sakisi nsori ari karishe yaa sila. 14Nabari kyakyawu ni solota Mirikisi sua pala yi anya guru durinya de e ma sheeda ba nsu worede shina beta Mirikisi ba, tukuna karishe yaa zo.
Mumungu Wuya
Mk 13.14-23; Lk 21.20-24
15<<Nde na ku geni mbo sakisi anya nsuseki <Mbode rebi de yaa zo ni bebeta,> de suyi beta anya anebi Daniye nsu de yaa karanta yi gane. 16Se worede su ma Yawudiya su yi gudu ta a kiya dunsi. 17Kede nse daa e sonka alenda laki e yi ta kisi de e la mbo daa butu a gizi e yi ba. 18Kede nsu de ma bikiya e kuma beyi te la keyi e yi ba. 19Gbotuma mata de man siki nja worede su ma yaya de yaa sha nono! 20Ku yi lepa kede gudu mu e sa ku kwanki yari ko nana pushe ni asibi. 21Nde na kwanki te yi sua Genbeki, de butu a pari ni durinya ari kuzukam su yi yiri e yi ba sua kwa sakye yi yiri e yi ba. 22Nde su rigye nana ni naba, ba nsu de yaa te sila ba a siki nsebeki, sede sobon nsu worede su zabi su e shiya sa sua rigye nana ni. 23Kwanki ni nse daa yaa gye ku nkye, <Ku geni, kiristi de ma anya ni!> ko, <Ema anya mu!> kede ku yeda ba. 24Sobon nsu yi yaruwa nkye su ma kiristi nja nsu yi yaruwa nkye su ma Anebi sua zo yi mbo mamanki totolo de su zi ntani ari nsu worede su zabi su nde yayu. 25Geni, Na te gye ku kami de kwanki e yi.
26<<Nde nse da gye ku nkye, <E shi aka anya ni, a woze adenka,> kede ku butu a woze; ko, <su nkye e shi aka, a siki siki laki,> kede ku yeda ba. 27Yiride Kwa geni asikye de yaa butu ni anse e ma yomuna anyema, de konse yaa geni, yomuna yaa na zo Yaa nsebeki. 28Nkaa yomu guru anya de gan ema, anya ni onguru shakushaku sua tala.
Zo ni Yaa Nsebeki
Mk 13.24-27; Lk 21.25-28
29<<Dandani beyi ni Genbeki ni nana ni Nana yaa yi dopuwa, Wonta yaa beyi asikye ba; kemu sua puari butu a bisi, nja guru sori de e ma bisi sua zizika.
30<<A kwanki ni alama ni Yaa nsebeki yaa butu a bisi, se guru nsu worede su ma durinya sua yi sasa. Sua geni zo ni Yesu butu a siki gidagida a bisi, nja sori nja yowa dereja. 31Yaa saka meleku yi ni totolo kala ni koho sukwa, nja de sua tala worede e zabi su butu keteri wuru ni karishe bisi te ni durinya.
Mbo shina ni Ntasi Bori
Mk 13.28-31; Lk 21.29-33
32<<Kuzukam ku kokoyi shina mu dege ayan ntasi bori: Nde yaya nani yi yaa puari nja genya sabuwa tompa, ku shina nkye damina ma yi. 33Ko e ma yomu, Nde ku geni guru mbo worosu mu, ku shina nkye e yi kusa naka, mala baki kopa. 34Na gye ku gaskye, kwanki mu yaa bise ba se guru mbo mu yaa paru. 35Bisi ni kisi sua bise sede beta na yaa taba bise ba.
Nana Ko Kwanki De Nse Daa Shina Ba
Mk 13.32-37; Lk 17.26-30,34-36
36<<Nse daa shina nana ko kwanki ni ba, ko meleku de su ma a bisi ko Yaa, sede Adaa e shina kin shina. 37Nta yiri de e paru a kwanki Nuwu, yomuna yaa paru nana zo ni Yaa nsebeki. 38Nana de e ma kami kwanki de riki yaa zo juru anya guru, ntani sua si nja sha, sua yi amere nja beyi mase amere, ari nana de Nuwu yuru A kwanto; 39nja su shina mbodaa a kiya mbode yaa paru ba ari riki zo la su guru te. Yomuna yaa te paru kwanki de Yaa Nsebeki yaa zo. 40Menza bi sua ma bikiya; sua la daa sua bila daa. 41Mata bi sua leda nja dunsi nani; sua la daa sua bila daa.
42<<Nkaa yomu kuma a kiya kone, sobon ku shina kowoni nana na Obagizi aku yaa zo ba. 43Nde nsugizi shina ko woni kwanki na ndederi bolowa yaa zo, yaa man shiri yaa bila gizi e yi wokye de bolowa e te yuru a siki e yi ba. 44Nkaa yomu oku ma se ku zunwa nshiri, sobon Yaa nsebeki yaa zo kwanki de ku shina nkye yaa zo ba.
Gangasi ko Mumungu Bunwa
Lk 12.41-48
45<<Waa na ma bunwa mu nsu aminshi nja nsu simi, de tolense e sayi a kiya bunwa e yi de sua kula ni gizi e yi de e ba su mbo si asu a kwanki kyakyawu? 46Bunwa mu Yaa ma nsu anabirika nde nsugizi yi san shi yaa yi yomu a kwanki de e kuma. 47Na gye ku gaskye, yaa sayi de yaa kula ni guru mbode e manshi. 48Sede nde ema mungu bunwa yaa gye kiya yi nkye, <Nsugizi na yaa zunwa ni kwanki nyowa,> 49Se e shi geba ndukwa ririgye bunwa de su ma nja shi ema ma yi ma si ma sha ari e bugu. 50Nsugizi ni bunwa ni yaa zo nana de e sa dishiya ba nja kwanki de e shina ba. 51Nsugizi e yi yaa yi dukwa yaa sa de samu lobo yi munabuki. anya de yaa yi kuka nja suku akuri.
Àwon tá yàn lọ́wọ́lọ́wọ́ báyìí:
Matiyu 24: Gaa
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
The Word for the World International and The Word for the World Nigeria
