Matiyu 16
16
A zna əznù shni
1Afarisiyi n Asadusiyii ɓa ɓe Yeisu aba ɓa tu wo mwi, ɓai nya wo nge wo wu ɓa əznù n kwo gbmi n əshemi.
2Wa dnaɓəgbe, “She wyeshe she, fya gna, ‘Anyì ɓə wu nsu bmagyii, ntuge anyìbmana wulo n byeibyeii,’ 3jesnu n labmii, fya gna, ‘N naiye ogbma ɓa zhi n asei ntuge anyìbmana wulo byeibyeii, jesnu n tnutnui.’ Fye kpəlo shi fye ɓa ɓwa awyeknaya da anyìbmana ɓo she fya gye ɓa wu, ama fye ta myilo fyei da əznù cala ye nya ɓo m. 4Cala akpizhniyi n anagbáizhniyi nyai kwo zna əznù shni, ama a taa ga kwo dəho m, akpəge əznù Yunana nya.” Nlonu Yeisu wa laka n əɓa aba wa lo wo nya.
Afarisiyi yisti n Asadusiyi nyai
5She ɓa ɓə pi nuwna-znudna ya, amwutuyi ɓa kwu zamwi to ɓa la biledi shi m. 6Yeisu wa gna ɓa, “Fye zhni pəceye. Fye la əwyewna ntu n yisti Afarisiyi nya ɓo n Asadusiyii.”
7Ɓa da ɓəda n ajei əɓahniɓahni, ɓa gna, “Ntuge yi to ɓe n biledi shi nu m.”
8Woi kpe əɓo n ɓa da, Yeisu wa nyaɓo, “Əfye agaiciyaganunui gbagbaida, knyiyi nu zhni fyei da aɓo fyehnifyehni nge fye to biledi shilo nu ma a? 9Fye too du fye ɓwa awyega m? Fye ta pá biledi ngwnu-atnu əɓo lo n aza dugwu-atnu ɓo gyi nyi m, jesnu acekwnu ngwnu aknyiyi nu n nunui n awyiwoii ń fye ɓə yezhi a? 10Kwo biledi ngwnu-tnaaba ntu aza dugwu ngwnu-anyi ɓo jesnu acekwnu ngwnu aknyiyi nu n nunui n awyiwoi ń fye ɓə yezhi a? 11Kwo ze n wunanu to fyei ɓwa awyega nge mi to ɓə daɓo n fyei ntu ń biledi ɓo nu ma a? Ama fye zhni pəceye ntu Afarisiyi yisti ɓo n Asadusiyii.”
12Nlonu ɓa kwu awyega ɓwa nge wo to ɓə gnyi woi daɓo nge ɓa zhni pəceye n yisti yi nu n a fyi n biledi nyi m, ama ntu ń nyawu Afarisiyi nya ɓo n Asadusiyii.
Byitusu gbmiɓo ge Yeisu zhni Masifu
13She Yeisu ɓə ɓe Kaisariya Fyilibyi əknyi, wa nya əwo amwutuyi əɓo, “Aza gna nge Əza Nugwnu zhni nyika nu a?”
14Ɓa dnaɓəgbe, “Azaho gna Yohana Batizimazhniyi nu; azaje gna nge Iliya; dudulonu azaje gna Irimyiya nu, kwo sheɓəgwognayi ho.”
15Wa nyaɓo, “Ama əfye ma a? Fye gna ge mi zhni nyika nu a?”
16Sima Byitusu wa dnaɓəgbe, “Ho zhni Masifu nu, Shekwoyi wyewyeyida Nugwnu.”
17Yeisu wa dnaɓəgbe, “Anabəlikada nu ń hoi, Sima Jona nugwnu, ntuge nayi n amii nu to wu ho əɓəye m, ama əmi Dada nu ń wo dna ń əshemi nyi. 18Mi gna ho nge əho nu zhni Byitusu, jesnu tu ń apma ye nu n mi ɓa mi əmi ikilisiya, abwokwnumi Akwu nya taa gnyiapaapa n əkwoi m. 19Mi ɓə ga ho anyagwunya əshebemi nya; nyahonyahoi ń a kwo pa dna ń anyì a ɓa kwo pa dna ń əshemi, jesnu nyahonyahoi ń aa kwo loya dna ń anyì a ɓaa kwo loya dna ń əshemi.” 20Nlonu wa ga əwo amwutuyi əgbe nge ɓa to gna zahozahoyi nge əwo nu zhni Kirisiti m.
Yeisu pma əwo əfyi ɓo da
21Ənya n kwo laka nsayii Yeisu wa ya woi ga əwo amwutuyi awyega nge ɓəshishinu wa lo Urishelima jesnu woi gyeazhnì n mwa ń abyeda akwnu, apirisiti atukwoda ɓədo n owa anyawuyii, ntuge ɓəshishinu a ɓə la wo wu jesnu n nyipyei tayii ai la wo kala ń wyewyeyi.
22Byitusu wa pmyi wo gnyi n gnagna, wa ya woi gnaknyi wo. Wa gna, “Nanyi, Dagayi! Əɓəye taa snu ho m kpeekpe!”
23Yeisu wa pmyiawye wa gna Byitusu, “Pmyiyagnyi ń əmi avnu, Shetam! Ho zhni bwonyice nya nu ń əmi aba; ho to n nubwozhni Shekwoyi nyai dnalo n bwugba m, ama zanyikwoci azanga nya nu n ɓwasnu.”
24Nlonu Yeisu wa gna əwo amwutuyi, “Zahozahoyi ń wo ncei pmalo waa zhni əmi mwutuyi, ɓəshishinu waa əwohni aɓəna jesnu wa la əwohni znudu wa vyi mi. 25Ntuge əza ń wo ncei pmalo wa gnyi əwohni wyewyeyi wo ɓa ɓwu kwo nuwna, ama əza ń wa ɓwu əwohni wyewyeyi nuwna ntu əmi ɓo wo ɓa ɓwa kwo. 26Knyi əɓo manai nu lo ń əza ɓa ɓwa ń anyì vnyanya, ama waa ɓwu əwo wyewyeyi nuwna a? Kwo knyiyi nu n əza ɓa ga dna n doshna ntu əwo wyewyeyi ɓo a? 27Ntuge Əza Nugwnu ɓəə ɓé dna ń əwo Dada latu ń əwo amaləkai woi ga zahozahoyi gyiba vyi ɓəhoɓəhoi shi wo ɓə zhni.
28“Ɓəhnihni əmi nu gna fye, azaho gnyiagnyi zhilo n ya n ɓa taa to əfyi wo m akpəge ɓa kwu gye Əza Nugwnu woi kashi shnizhi ɓe dna n əwo əbemi.”
Àwon tá yàn lọ́wọ́lọ́wọ́ báyìí:
Matiyu 16: OGNB
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Biblica® Open Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Biblica® Open Gbagyi Contemporary Bible™, New Testament
Copyright © 1997, 2025 by Biblica, Inc.
“Biblica” ɓədo n Biblica əznù zhazhai, ɓa zhni aɓwaze aznù nu n a cei kafyilo n United States Patent and Trademark Office (Amerika əznù aɓwaze nya ɓədo n nyazhnizhni ofyisii) n Biblica, Inc. ncei yafyi. Apmazhni n gbegai nu.
“Biblica” is a trademark registered in the United States Patent and Trademark Office by Biblica, Inc. Used with permission.
See promoVersionInfo in metadata.xml for Creative Commons license.
