ရှာန်လုကာ 22
22
အခန်း (၂၂)
ကိုယ်တော်ယေရှုတေသာန်းရှီးဒင်ကြံစည်သဘင်း
(ရှာန်မဿဲ ၂၆:၁-၅။ ရှာန်မာကု ၁၄:၁-၂။ ရှာန်ယောဟန် ၁၁:၄၅-၅၃)
1စီးမှါခ့်ခါ ပသခါပွဲတော်ညယ်ကော်ဘင်း တဆေးအပါသညယ် အွန်ယုတ်ပင်း မုန့်ပွဲတော်ကား ထန်နီမှာ။ 2ဂျူးပုရောဟိတ်ဟလာန်းစါတ်တုံန်းတာတ်ယောက် ကျမ်းကျိန်းပေါ့ပင်း အိုးဆကြီးတာတ်ကား ကိုယ်တော်ဒေ ရူရှီရှီသာန်းရှီးရန်ဘင်း နည်းလမ်းတေ သန်နင်းကြီးမှာ။ ဟမာန်တွာတ်ငှေါဘန်းတာတ်ငှေါ အန်တာတ်ကား သမီဆာတာတ်တေ စါတ်ပင်းအတွာတ်ထှာမှာ။ 3စီးမှါခ့်ခါ သာဝကရှစ်နူဘန်း ကလိန်းဟူးနောင်းဘေ ပါသဘင်း ယုဒရှာကာရုတ်ပါ မာရ်နတ်ကား ဆာန်ငါန်မှာ။ 4စီးမှါခ့်ခါ ယုဒကား ဂျူးပုရောဟိတ်ဟလာန်းစါတ်တုံန်းတာတ်ယောက် ဗိမာန်တော်စောင့်သဘင်း အရာရှိတုံန်းတာတ်ပါ လာန်ဘန်း ကိုယ်တော်ယေရှုတေ ရင်ဒင်အတွာတ် အန်တာတ်တေ ဟာနိမ် အွန်အီထှာကူဘင်းတေ ငှေါမှာ။ 5အန်ဘင်းဆိတ်တာတ်ရီးဒါး မွန်းဘန်း ယုဒတေ ဖူးအီဒင် သဘောတူတာန်မှာ။ 6အမှာတွာတ် ယုဒရီးဒါး သဘောတူသဘင်းအတွာတ် သမီဆာပရိတ်သတ်တေ အဘိုဘင်းအချိန်ဘေ ကိုယ်တော်ယေရှုတေ အန်တာတ်သဟူးပါ ရင်ဘန်းအပ်သဒင် အခွင့်အခါမလဲတေ သန်ဘန်းနင်းမှာ။
ပသခါပွဲအတွာတ်ပြာန်ဆာန်သဘင်း
7စီးမှါခ့်ခါ တဆေးအပါသညယ် အွန်ယုတ်ပင်းပွဲညယ်ကော်ဘင်း ပသခါပွဲတော်အတွာတ် သိုးနနူရှရှာဒေ သာန်းရှီးဘန်း ပူဇော်သကူဘင်းမာန်းရာတ် ထုတ်အီမှာ။ 8အမှာတွာတ် ကိုယ်တော်ယေရှုကား ပေတရုယောက် ယောဟန်တေ “ပသခါပွဲတော်ဘေ အလေယောက်အတူတူ ယုတ်တင် လာန်ဘန်းပြာန်ဆာန်သကြီး” ညယ် မိန့်သမှာ။
9အန်တာတ်ရီးဒါး “အရှာန်၊ အလေတေ ဟာဘင်းနေရာဘေ ပြာန်ဆာန်သစိန်းကာတ်တေ” ညယ် စိန်ယူကြီးမှာ။
10ကိုယ်တော်ကား “မြို့နောင်းဘေဆာန်မှါခ့်ခါ ဝဲတိပ်ရှီတုံန်းတေ ဖဲရီဘင်းသမီဆာဟော်ဝါတေ ကတုံန်ကူ။ ဟိန်ဟလိန်းဘေ လာန်ငါတ်ပန်း ဟိန်ဆာန်ဘင်း ကျေမ်းဘေ ဆာန်ကြီးရာန်။ 11စီးမှါခ့်ခါ ကျေမ်းဆိတ်တေ ‘အလေဘင်းအိုးဆကြီးကား တပယ့်တာတ်ယောက်အတူတူ ပသခါပွဲတော်အတွာတ် ယုတ်ထှာကူဘင်း အခန်းကား ဟာဘေညယ် နာန်တေ စိန်ယူစိန်းယုတ်အီမှာ’ ညယ် ငှေါကြီးရာန်။ 12အန်၌မှါခ့်ခါ ကျေမ်းဆိတ်ကား ဟနိမ်တေ အပေါ်ထပ်ပါကော်လာန်ဘဲဘန်း အဆာန်တာန့်နပ်လားလူကူဘင်း ဘာတ်ပင်းအခန်းတစ်ခန်းတေ ကာအီကူ။ အန်ဘင်းအခန်းဘေ ပသခါပွဲတော်အတွာတ် ပြာန်ဆာန်သကြီး” ညယ် မိန့်တော်မူသမှာ။
13စီးမှါခ့်ခါ ပေတရုယောက် ယောဟန်တာတ်ကား ပူကြီးရီဘန်း အန်တာတ်ကား ကိုယ်တော်ငှေါဘင်းအတိုင်း ကတုံန်ကြီးဘင်းအတွာတ် ပသခါပွဲတော်အတွာတ် ယုတ်တင်အူဒင်တေဒေ ပြာန်ဆာန်သကြီးမှာ။
နောက်ဆုံးကတိသစ္စာအွန်ဘန်းယုတ်ပင်းပွဲ
(ရှာန်မဿဲ ၂၆:၂၆-၃၀။ ရှာန်မာကု ၁၄:၂၂-၂၆၊ ၁၁:၂၃-၂၅)
14ပသခါပွဲတော်ဘေ ယုတ်တင်အူဒင်တေ ယုတ်ကူဘင်းအချိန်ထုတ်မှါခ့်ခါ ကိုယ်တော်ကား ဟိန်သာဝကတာတ်ယောက်အတူတူ စားပွဲဘေ ထုံးငါန်မှာ။ 15စီးမှါခ့်ခါ ကိုယ်တော်ကား အန်တာတ်တေ “ငါဒုက္ခတေ ခံသဘန်း ရှီးအခံဒလူကြီ အဘင်းပသခါပွဲတော်တေ ဟနိမ်ယောက်အတူတူယုတ်တင် ငါအကြီးကျယ် အလိုငှါမှာ။ 16ဟနိမ်တေ ငါငှေါကူ။ ဘုရားရှာန်ဘင်းသာသနာတော်ဘေ ပသခါပွဲတော်ဘင်းအဓိပ္ပာယ်#22:16 ပသခါပွဲတော်ဘင်း အဓိပ္ပာယ်ငှေါဘင်းနာကား ဘုရားရှာန်ကား သိုးရှရှာဟက်တစ်ဆာန့် နောက်ဆုံးဘေ ကျွန်ဘဝဟက် လွောပ်သစိန်းနိမ် ကိုယ်တော်ယေရှု ရှီးဘင်းဟက်တစ်ဆာန့် သမီဆတာတ်တေ အပြစ်တေဟက် လွောပ်သစိန်းကူဘင်း အကြောင်းတေ ဆိုလိုသလားထှာမှာ။ အန်ဘင်းဘေ ကိုယ်တော်ယေရှုတေ ပသခါပွဲတော်ဘင်း သိုးရှရှာယောက် နိုင်းသကာလားထှာမှာ။ ထွက် ၁၂၊ တရား ၁၆:၅-၈ အပြေ့စုံသကွန်းထုတ် ငါကား ပသခါပွဲတော်ဘေ အနားပန်းနူ ယုတ်ကဘန်းလားအချီရား” ညယ် မိန့်တော်မူသမှာ။
17စီးမှါခ့်ခါ ကိုယ်တော်ကား ခွာပ်တေလာဘန်း ဘုရားရှာန် ကျေးဇူးတော်တေ ချီးမွမ်းသစီးမှါခ့်ခါ “အဘင်းစပျစ်ဝိုင်ခွာပ်တေ လာဘန်း အချန်းချန်းမံဘန်းအူကြီး။ 18ဟနိမ်တေ ငါငှေါကူဘင်းကား အရာတ်ဟက်စသဘန်း ဘုရားရှာန်ဘင်းသာသနာတော် အပေါ်ထွန်းသကြီထုတ် စပျစ်ရှရှီဟက်လူဘင်း စပျစ်ဝိုင်ဒေ အနားပန်းနူ ဟာ၌မှါခ့်ခါစဲ ငါအူကဘန်းလားအချီရား” ညယ် မိန့်သမှာ။
19စီးမှါခ့်ခါ မုန့်တေလာဘန်း ဘုရားရှာန်ဘင်း ကျေးဇူးတော်တေ ချီးမွမ်းသဘန်းနာ မုန့်တေလပိုက်ပန်းနာ တပယ့်တော်တာတ်နင်းအီရာန်ဘန်း “အဘင်းမုန့်ကား ဟနိမ်နင်းအီဘင်း ငါလာန်ထှာမှာ။ ငါတေဆတီးလူဘင်းအနေယောက် ယုတ်ကြီး” ညယ် မိန့်တော်မူသမှာ။
20အန်ဘင်းအတိုင်း ယုတ်စီးမှါခ့်ခါ ကိုယ်တော်ကား စပျစ်ဝိုင်ခွာပ်တေ ငါတ်ပဲဘန်း “အဘင်းစပျစ်ဝိုင်ကား ဟနိမ်အတွာတ် ငါဘင်းဆယ်တေ လုတ်ဆာန်ပဲဘင်း ဘုရားရှာန်ယောက် သဘောတူသပဲဘင်း နယားထှာမှာ။ 21အန်နိမ်စါန်းငှေါဒီ ငါတေ ရန်သူတာတ်သဟူးပါ အပ်သကူဘင်းဆိတ်ကား အဘင်းစားပွဲဘေ အရာတ်ငါယောက်တူတူ ယုတ်ပန်းနင်းမှာ။ 22သမီဆာဆားတော် ရှီးထှာကူငှေါဘင်းနာကား ဘုရားရှာန်ချမှတ်သပဲဘင်းအတိုင်းထှာမှာ။ အန်နိမ်စါန်းငှေါဒီ သမီဆာဆားတော်တေ ရန်သူတာတ်သဟူးနောင်းဘေ အပ်သဘင်းဆိတ်ကား ဒုက္ခထုတ်ကူထှာမှာ” ညယ် မိန့်တော်မူသမှာ။ 23အန်၌မှါခ့်ခါ တပယ့်တော်တာတ်ကား အန်တာတ်နောင်းဟက် ဟာဟမဲကား အန်နိမ်အမဲဘင်းအွန်ဒင် ကြံသနင်းဒေညယ် အချန်းချန်း ငှေါနင်းကြီးမှာ။
ဟာဟမဲကားအရေးပါသဘင်းဆိတ်ထှာတေ
24စီးမှါခ့်ခါ တပယ့်တော်တာတ်ကား အန်တာတ်နောင်းဟက် ဟာဟမဲတေ အကြီးမြတ်ဆုံးပဲကူငှေါဘင်းနာယောက် ပတ်သက်သဘန်း အချန်းချန်း ငြာမ်းသဘန်းနင်းကြီးမှာ။ 25ကိုယ်တော်ကား အန်တာတ်တေ “ဂျူးသမီဆာအချီဘင်း ဆိတ်တာတ် ရှာန်းပလာန်တာတ်ကား အန်တာတ်တိုင်းသူ ပြေဆားတာတ်စောက်ပေ အမိန့်အာဏာတုံန်းယောက် အုပ်ချုပ်သကြီးဟာဘန်း အန်တာတ်အာဏာတေနပ်ပန်း အန်တာတ်တေ ‘သမီဆာတာတ်အကျိုးတေ အွန်ဘင်းဆိတ်တာတ်’ ညယ် ကော်စိန်းကြီးကာတ်မှာ။ 26အန်နိမ်စါန်းငှေါဒီ ဟနိမ်ကား အန်တာတ်နိမ် အထှာစိန်းဆာ။ ဟနိမ်နောင်းဘေ အရေးပါသဘင်းဆိတ်ကား အရေးအပါသဘင်းဆိတ်နိမ် ထှာသင့်သမှာ။ ဟနိမ် ခေါင်းဆောင်ထှာဘင်းဆိတ်ကား အစေခံနိမ် ထှာနင်းထှာကူ။ 27စားပွဲဘေ ယုတ်တင် ထုံးပန်းနင်းဘင်းဆိတ်ယောက် ယုတ်တင်တေဒေ ဧည့်ခံသအီဘင်း ဆိတ်တာတ်နောင်းဘေ ဟာဟမဲကား ပိုသောအရေးပါသောဒေ။ စားပွဲဘေ ထုံးပန်းယုတ်နင်းဘင်းဆိတ်ကား ပိုသဘန်း အရေးတုံန်းမှာအချီနော်။ အန်နိမ်စါန်းငှေါဒီ ငါကား ဟနိမ်ကြားဘေ ယုတ်တင်တေဒေ ဧည့်ခံသအီဘင်း ဆိတ်နိမ်ထှာမှာ။ 28ငါကား အခက်ခဲတေ၊ ဒုက္ခတေယောက်ကြုံဒီထှာမှါခ့်ခါ ဟနိမ်ကား ငါယောက်အတူတူ ငှါနင်းကြီးရီဘင်းဆိတ်တေ ထှာကြီးမှာ။ 29ငါဘင်း အဝါဘုရားရှာန်ကား ငါတေ ရှာန်းပလာန်နိမ် အုပ်ချုပ်သလူဘင်း အခွာမ်းအာဏာတေ အီပဲနိမ် ငါရီးဒါး ဟနိမ်တေ ရှာန်းပလာန်နိမ် အုပ်ချုပ်သလူဘင်း အခွာမ်းအာဏာတေ အီကူ။ 30အမှာတွာတ် ငါဘင်းသာသနာတော်နောင်းဟက် ဟနိမ်ကား ငါစားပွဲဘေ ငါယောက်အတူတူ ယုတ်လူကြီးထှာကူ။ အန်ဘင်းအပြာန် ဟနိမ်ကား ပလာန်စောက်ပေထုံးဘန်း အစ္စရေးအမျိုးအနွယ် ရှစ်နူဘန်းကလိန်းမျိုးတေ အုပ်ချုပ်သကြီးထှာကူ” ညယ်မိန့်တော်မူသမှာ။
ပေတရုငြာမ်းသကူဘင်းနာတေ ကြိုသဘန်းမိန့်သဘင်း
(ရှာန်မဿဲ ၂၆:၃၁-၃၅။ ရှာန်မာကု ၁၄:၂၇-၃၁။ ရှာန်ယောဟန် ၁၃:၃၆-၃၈)
31ကိုယ်တော်ကား ဆာတ်သဘန်း “ရှိမုန်၊ ရှိမုန်၊ သက်ကြီး၊ လပါးအွန်ဘင်းဆိတ်ကား အန်သတူယောက် လာပ်ခေါတ်တေခွဲတာန်နိမ် မာရ်နတ်ရီးဒါး ဟနိမ်ဟော်ဝါစီတေ စမ်းသပ်သကူဘင်း အခွာမ်းတေစိန်နင်းဘန်း။ 32အန်နိမ်စါန်းငှေါဒီ ရှိမုန် နာန်ငါတေ ဆာတ်သဘန်း ယုံကြည်သကွန်း ငါဆုစိန်အီမှာ။ နာန် နောင်တလူဘန်း ငါပါဒီဟာန်းမှါခ့်ခါ နာန်အမူးနရှီတေထှာဘင်း တခြားတပယ့်တော်တာတ်တေဒေရီးဒါး ငါစောက်ပေ ပိုသောယုံကြည်သကွန်း အွန်အီ” ညယ် မိန့်သမှာ။
33အန်၌မှါခ့်ခါ ရှိမုန်ပေတရုကား “အရှာန်၊ ငါကား အရှာန်ယောက်အတူတူ ထောင်နောင်းပါစါန်းထှာကာတ်ထှာ၊ ရှီးဘင်းလမ်းပါစါန်းထှာကာတ်ထှာ လာန်ငါတ်ကွန်း အဆာန်တာန့်ထှာနင်းဘန်း” ညယ် လျှောက်တာန်သမှာ။
34အန်၌မှါခ့်ခါ ကိုယ်တော်ကား “ပေတရု၊ နာန်တေ ငါငှေါကူ။ အရာတ်မှါတ် အူအကြယ်ကြီ နာန်ကား ငါတေအမိန်းရှာတ်ခါးညယ် ဆွန်းပန်းတိုင်တိုင်ငြာမ်းသကူ” ညယ် မိန့်တော်မူသမှာ။
ဖူးရှီထောင်း၊ ခရီးလာန်လားဘေလာဘင်းရှီးထောင်းယောက်သာန်
35စီးမှါခ့်ခါ ကိုယ်တော်ကား တပယ့်တော်တာတ်တေ “ငါကား ဟနိမ်တေ ဖူးရှီထောင်း၊ ရှီထောင်းယောက် ဟက်တင်းတေ အပါသညယ် ဘုရားရှာန်ဘင်း ဆတာန်းမလဲဒေ ဟောသကာဒင်အတွာတ် မြို့တေ ထိန်တေဘေ တာတ်နီမှါခ့်ခါ ဟနိမ်ဘေ စယ်ယာ့ စယ်ယာ လိုသမှာညယ် ငှါရီးလဲ” ညယ် စိန်ယူမှာ။ အန်၌မှါခ့်ခါ တပယ့်တော်တာတ်ကား “အဘိုရီရား” ညယ် လျှောက်တာန်သကြီးမှာ။
36အန်၌မှါခ့်ခါ ကိုယ်တော်ကား “အန်နိမ်စါန်းငှေါဒီ အရာတ်ကား ဖူးရှီထောင်းငှါဘန်းကား လာကြီး။ ရှီထောင်းတေရီးဒါး လာကြီး။ ဟနိမ်ဘေ သာန်အဘိုဘန်းကား ဆာန်ဆုန်စယ်ယာတေမာဘန်း သာန်တေမီးကြီး။ 37ဟနိမ်တေ ငါငှေါကူဘင်းကား ‘ဟိန်ကား ရာဇဝတ်ဆားညယ် သတ်မှတ်သလား ခံသထှာကူ’ ညယ် ကျမ်းကျိန်းဘေ ရေးသပဲဘင်း ငါအကြောင်းကား ပြေ့စုံဒီကဘန်းလားထှာမှာ။ အန်ဘင်းတေကား အမှါတ်ကြီ အဟုတ်မလပ်ထှာရီကဘန်း” ညယ် မိန့်တော်မူသမှာ။
38အန်၌မှါခ့်ခါ တပယ့်တော်တာတ်ကား “အရှာန် ယူဝါမ်။ အလေဘေ သာန်ကလိန်းကာတ်ငှါမှာ” ညယ် လျှောက်တာန်သမှါခ့်ခါ ကိုယ်တော်ကား “ကွန်းဘန်း” ညယ် မိန့်တော်မူသမှာ။
သံလွင်ကယာစောက်ပေဆုစိန်ဘင်း
(ရှာန်မဿဲ ၂၆:၃၆-၄၆။ ရှာန်မာကု ၁၄:၃၂-၄၂)
39စီးမှါခ့်ခါ ကိုယ်တော်ယေရှုကား ဟိန်အွန်နေကျအတိုင်း သံလွင်ကယာစောက်ပါ ကြွတော်မူသမှာ။ တပယ့်တော်တာတ်ရီးဒါး ကိုယ်တော်ဟလိန်းပါ ဒီရာတ်ကြီးမှာ။ 40ကိုယ်တော်ကား အန်ဘင်းနေရာဘေထုတ်မှါခ့်ခါ တပယ့်တော်တာတ်တေ “ဟနိမ် အပြစ်အွန်ပတ်ကွန်းအတွာတ် ဖြားယောင်းသွေးဆောင်သလား အခံသထှာကွန်း ဘုရားရှာန်ဘေ ဆုစိန်ကြီး” ညယ် မိန့်တော်မူသမှာ။ 41စီးမှါခ့်ခါ ကိုယ်တော်ကား အန်တာတ်ဟက် အစစ်ဆာလမ်းစာဘင်း နေရာဘေလာန်ဘန်း တထူထောက်သောဘန်းနာ 42“အို အဝါဘုရားရှာန်၊ အဝါဘုရား အလိုငှါဘန်းကား ငါဘေထှာရီကူဘင်း ဒုက္ခဆာန်းရဲတေဒေ ဖယ်သအီယုတ်။ အန်နိမ်စါန်းငှေါဒီ ငါအလိုအတိုင်းအချီညယ် အဝါဘုရားရှာန် အလိုတော်အတိုင်းထှာစိန်းကိုင်ယုတ်” ညယ် ဆုစိန်မှာ။ 43အန်၌မှါခ့်ခါ ရွှေမြို့တော်ဟက် မဲဘင်းဟမန်းဟော်ဝါဒီဘန်း ကိုယ်တော်ဒေ အားအီမှာ။ 44ကိုယ်တော်ကား အကြီးကျယ်ဝမ်းနည်းပူဆွေးသဘန်း အားရပါးရ ဆုစိန်မှါခ့်ခါ ဆယ်တေကား ကာစောက်ပေအက်နိမ် ကိုယ်တော်ဘင်း တုတ်ဝဲတေကား ဆယ်တေနိမ် ကာစောက်ပေ အက်ဆွန်နီမှာ။
45ကိုယ်တော်ကား ဆုစိန်လားဟက်ရဲရီဘန်း တပယ့်တော်တာတ်ပါ ဒီဟာန်းမှါခ့်ခါ တပယ့်တော်တာတ်ကား အကြီးကျယ်အဆေင်အမဲငှါဘင်းအတွာတ် ပါမ်ပါန်းသဘန်း အေ့စ်ဘာတ်ပွတ်နင်းကြီးဘင်းနာတေ ကတုံန်ငါန်မှာ။ 46အန်၌မှါခ့်ခါ ကိုယ်တော်ကား တပယ့်တော်တာတ်တေ “ဟနိမ် ဟမာန်တွာတ် အေ့စ်ဘာတ်ပွတ်နင်းကြီးတေ။ ဟနိမ် အပြစ်အွန်ပတ်ကွန်းအတွာတ် ဖြားယောင်းသွေးဆောင်သလား အခံသထှာကွန်း ရဲဘန်း ဆုစိန်ကြီး” ညယ် မိန့်သမှာ။
ကိုယ်တော်ယေရှုရင်ခံသထှာဘင်း
(ရှာန်မဿဲ ၂၆:၄၇-၅၆။ ရှာန်မာကု ၁၄:၄၃-၅၀။ ရှာန်ယောဟန် ၁၈:၃-၁၁)
47ကိုယ်တော် အန်နိမ်မိန့်သမှါခ့်ခါ သာဝကရှစ်နူဘန်း ကလိန်းဟူးနောင်းဟက် ဟော်ဝါထှာဘင်းယုဒကား သမီဆာအုပ်တုံန်းတေ ဦးဆောင်သဘန်း ကိုယ်တော်ပါ ကော်ရီမှာ။ ဟိန်ကား ကိုယ်တော်ဘင်း လပါမ်တေ ဆတွန်းယောက် သွန်းဘန်း နှုတ်ဆက်သဒင်အတွာတ် ဟိန်ပိုက်ပါ ဒီနင်းမှာ။ 48ကိုယ်တော်ကား ဟိန်ဒေ “ယုဒ၊ နာန်ကား သမီဆာဆားတော်တေ လပါမ်တေ ဆတွန်းယောက်သွန်းဘန်း သစ္စာဖောက်သောလဲ” ညယ် စိန်ယူမှာ။
49တပယ့်တော်တာတ်ကား ဟာနိမ်ထှာရီကူငှေါဘင်းနာတေ မိန်းရှာတ်ခါဘင်းအတွာတ် ကိုယ်တော်ဒေ “အရှာန်၊ အလေ အန်တာတ်တေ သာန်ယောက် ဝါမ်းနာန်ထှာကလဲ” ညယ် စိန်ယူမှာ။ 50စီးမှါခ့်ခါ တပယ့်တော်တာတ်နောင်းဟက် ဟော်ဝါကား အတုံန်းဟန်ဆုံးဂျူးပုရောဟိတ်ပင်း အစေခံဟော်ဝါတေ သာန်ယောက်ဝါမ်းနာန်မှါခ့်ခါ အန်ဘင်းဆိတ် ညာပါဘင်းကနား တူလာန်ဘဲမှာ။
51အန်၌မှါခ့်ခါ ကိုယ်တော်ကား “အနယ်ယောက်ရပ်သစိတ်” ညယ် မိန့်သစီးဘန်း တူရာန်ဘင်း အစေခံကနားဒေ တဟူးယောက်ထိသဘန်း မလဲအတိုင်းထှာဟာန်းစိန်းမှာ။
52စီးမှါခ့်ခါ ကိုယ်တော်ကား ဟိန်ဒေရင်ကူညယ်ဒီကြီးဘင်း ဂျူးပုရောဟိတ်ဟလာန်းစါတ်တုံန်းတာတ်၊ ဗိမာန်တော်စောင့်သဘင်း အရာရှိတာတ်ယောက် ဂျူးသမီဆာဟလာန်းစါတ်တာတ်တေ “ဟနိမ်ကား ငါတေရင်တင်အတွာတ် ဟမာန်တွာတ် ဒုတ်တူကာတ်တေ၊ သာန်တေငါတ်ပန်း အဘင်းဘေ ဒီကြီးတေ။ ဟနိမ်ကား ငါတေ ရာဇဝတ်ဆားညယ် ထာန်သနင်းကြီးလဲ။ 53ငါကား မာန်းရာတ်၌တိုင်း ဗိမာန်တော်ဘေငှါနင်းမှါခ့်ခါ ဟနိမ် ဟမာန်တွာတ်ငါတေ အရင်ကြီးတေ။ အန်နိမ်စါန်းငှေါဒီ အဘင်းအချိန်ကား ဟနိမ်အခွာမ်းရေးထှာဘန်း မာရ်နတ်ရီးဒါး ဟိန်ဘင်း အမဲဘင်း တန်ခိုးတေဒေ အွန်နင်းဘင်းအချိန်ရီးထှာမှာ” ညယ် မိန့်တော်မူသမှာ။
ကိုယ်တော်ယေရှုတေရှိမုန်ပေတရုငြာမ်းသဘင်း
(ရှာန်မဿဲ ၂၆:၅၇-၅၈၊၆၉-၇၅။ ရှာန်မာကု ၁၄:၅၃-၅၄၊၆၆-၇၂။ ရှာန်ယောဟန် ၁၈:၁၂-၁၈၊၂၅-၂၇)
54စီးမှါခ့်ခါ အန်တာတ်ကား ကိုယ်တော်ဒေ ရင်ဘန်း အတုံန်းဟန်ဆုံးဂျူးပုရောဟိတ်ကျေမ်းပါ ကော်လာန်ဘဲကြီးမှာ။ ရှိမုန်ပေတရုကား မလမ်းမကမ်း ဟလိန်းဟက် လာန်ငါတ်မှာ။ 55စီးမှါခ့်ခါ သမီဆာစယ်ယာကား ကျေမ်းဝါမ်းဘလမ်းဘေ ဝိုင်းသောထုံးဘန်း ဝါမ်ကွပ်နင်းကြီးမှါခ့်ခါ ရှိမုန်ပေတရုကား အန်တာတ်ယောက်အတူတူ လာန်ဘန်းထုံးနင်းမှာ။ 56အစေခံအီးရှီဟော်ဝါကား ဝါမ်ကွပ်နင်းဘင်း ရှိမုန်ပေတရုထုံးဘန်းနင်းဘင်းနာဒေ ကတုံန်မှါခ့်ခါ ဟိန်ဒေ သေသေချာချာယူဘန်း “အဘင်းဆိတ်ရီးဒါး ယေရှုယောက် အတူတူနင်းမှောက်ပင်းဆိတ်ထှာမှာ” ညယ် ငှေါမှာ။
57အန်နိမ်စါန်းငှေါဒီ ရှိမုန်ပေတရုကား “အီးရှီ၊ အန်ဘင်းဆိတ်တေ ငါအမိန်းရှာတ်ခါး” ညယ် ငြာမ်းသမှာ။
58အချိန်အစစ်ဆာမှါတ်မှါခ့်ခါ တခြားဘင်းသမီဆာဟော်ဝါကား ရှိမုန်ပေတရုဒေ ကတုံန်ဘင်းအတွာတ် “နာန်ရီးဒါး အန်တာတ်နောင်းဟက် ဟော်ဝါထှာမှာ” ညယ် ငှေါမှာ။ အန်နိမ်စါန်းငှေါဒီ ရှိမုန်ပေတရုကား “ပဟာန်း ငါကား အန်တာတ်နောင်းဟက်အချီရား” ညယ် ငြာမ်းသဟာန်းမှာ။
59တစ်နာရီမှါတ်ခါန်းမှါခ့်ခါ တခြားဟော်ဝါကား “အဘင်းဆိတ်ရီးဒါး ဂါလိလဲပြေဆားထှာဘင်းအတွာတ် ယေရှုယောက်အတူတူ ငှါနင်းရီကူဘင်းနာကား သေချာသမှာ” ညယ် သေသေချာချာငှေါမှာ။
60အန်နိမ်စါန်းငှေါဒီ ရှိမုန်ပေတရုကား “ပဟာန်း နာန် ဟမာန်ငှေါနင်းမှာငှေါဘင်းနာဒေ ငါအမိန်းရှာတ်ခါး” ညယ် ငြာမ်းသဟာန်းမှာ။ အန်နိမ်ငှေါနင်းစါတ် ချတ်ချန်းတုံန်း အူကြယ်ရီမှာ။ 61အန်၌မှါခ့်ခါ အရှာန်ကား ရှိမုန်ပေတရုဒေ လှည့်သပန်းယူဝါမ်မှာ။ ရှိမုန်ပေတရုရီးဒါး ဟိန်ဒေ အရှာန်မိန့်သည်ဘင်း “အရာတ်မှါတ် အူအကြယ်ကြီ နာန်ကား ငါတေအမိန်းရှာတ်ခါးညယ် ဆွန်းပန်းတိုင်တိုင်ငြာမ်းသကူ” ညယ် ငှေါဘင်းတူးတေ ဆတီးလူမှာ။ 62စီးမှါခ့်ခါ ဟိန်ကား ပြာန်ပါပူဝါမ်ဘန်း အကြီးကျယ်တုံန်း ဟပ်ပန်းနင်းနာန်မှာ။
63ကိုယ်တော်ယေရှုတေ ဒဲဘန်းနင်းဘင်းစစ်ဆားတာတ်ကား ကိုယ်တော်ဒေ နီးဘန်း သာန်းကြီး၊ တွောတ်ကြီးမှာ။ 64ကိုယ်တော်ဘင်းမိတ်တူရှီဒေ ပစယ်ကန်းယောက် အွပ်ပန်း “နာန်တေဟာဟမဲ သာန်းဘန်းနင်းမှာ ငှေါဘင်းနာတေ ခန့်မှန်းတာန်စါန်း” ညယ် ငှေါကြီးမှာ။ 65စီးမှါခ့်ခါ ကိုယ်တော်ဒေ နည်းအမျိုးမျိုးယောက် စော်ကားသဘန်းငှေါကြီးမှာ။
ကိုယ်တော်ယေရှုတေစစ်ဆေးသဘန်း စိန်ယူဘင်း
(ရှာန်မဿဲ ၂၆:၅၉-၆၆။ ရှာန်မာကု ၁၄:၅၅-၆၄။ ရှာန်ယောဟန် ၁၈:၁၉-၂၄)
66ဟလာန်းယားမှါခ့်ခါ ဂျူးပုရောဟိတ်ဟလာန်းစါတ်တုံန်းတာတ်ယောက် ကျမ်းကျိန်းပေါ့ပင်း အိုးဆကြီးတာတ်ပါသဘင်း ဂျူးသမီဆာဟလာန်းစါတ်တာတ်ကား တရားလွှတ်တော်ဘေ#22:66 တရားလွှတ်တော်ငှေါဘင်းကား ဂျူးသမီဆာဟလာန်းစါတ်တာတ် အတူတူကတုံန်ကြီးဘန်း ဂျူးသမီဆာတာတ်ယောက် ပတ်သက်သဘန်း တရားစီရာန် ဆုံးဖြတ်သဘင်းနေရာထှာမှာ။ အတူတူစုသဘန်း ကိုယ်တော်ဒေ အန်တာတ်မန်းဘေကော်ဘန်း 67“နာန်ကား မေရှိယချီလဲ အလေတေငှေါ” ညယ် ငှေါကြီးမှာ။ အန်၌မှါခ့်ခါ ကိုယ်တော်ကား “ဟနိမ်တေ ငါငှေါဘန်းရီးဒါး ဟနိမ်ကား ငါတေ ယုံသကြီးကလားအချီရား။
68ဟနိမ်တေ ငါစိန်ယူပန်းရီဒါး ဟနိမ်ဖြေသကြီးကလားအချီရား။ 69အန်နိမ်စါန်းငှေါဒီ အရာတ်ဟက်စသဘန်း သမီဆာဆားတော်ကား တန်ခိုးတော်တုံန်းဘင်း အဝါဘုရားရှာန်ဘင်း ညာပါဘေ ထုံးဘန်းနင်းကူ” ညယ် မိန့်သမှာ။
70အန်၌မှါခ့်ခါ အန်ဘင်းဆိတ်တာတ်ကား “အန်နိမ်ငှေါဘန်းကား နာန်ကား ဘုရားရှာန်ဘင်းဆားတော်ချီလဲ” ညယ် စိန်ယူကြီးမှါခ့်ခါ ကိုယ်တော်ကား “ဟနိမ်ငှေါဘင်းအတိုင်း ထှာမှာ” ညယ် ပြန်သဘန်းမိန့်သမှာ။
71အန်ဘင်းဆိတ်တာတ်ရီးဒါး “အလေကိုယ်တိုင် ဟိန်ဆတွန်းဟက်ပူရီဘင်းဒေ သက်ပူလူကြီးဘင်းအတွာတ် ဟမာန်သက်သေဆဲ အလိုသဘန်း” ညယ် ငှေါကြီးမှာ။
Àwon tá yàn lọ́wọ́lọ́wọ́ báyìí:
ရှာန်လုကာ 22: ZKD
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Kadu Bible by Beyond Translation is licensed under Creative Commons Attribution-ShareAlike 4.0 License.
