मरकुस 13
13
आखरी समय ची भविष्यवाणी
(मत्ती 24:1,2; लूका 21:5,6)
1जिसे बेले ओ मन्दरा चे महु निकले पलता, तां ओचे चैला महु हेक ने ओनु केहले, “हे गुरु, ङेख, किसड़ा बङा पत्थर ते किसड़ा भव्य भवन छै।”
2ईशु ने ओनु केहले, “का तम्ही ये बङे-बङे भवन ङेखा पले? इठे पत्थरा उपर पत्थर वी नी बचला रिही जको ढाला नी जई।”
आफत ते सताव
(मत्ती 24:3–14; लूका 21:7–19)
3जब ओ जैतून चे पहाड़ा उपर मन्दरा चे सामणे ब़ेहला हुता, तां पतरस ते याकूब ते यूहन्ना ते अन्द्रियास ने अलग़ जती कर पूछले, 4“अम्हानु बावड़ कि ये बाता कङण हुवे? ते जब ये बाता पुरीया हुवणे उपर हुवे ओ समय ची का निशानी हुवी ?”
5ईशु वानु किहुं लाग़ला, “चौकस रिहा, कुई तम्हानु भरमा ना सग़ो। 6ब़ोहत से माये नांवा लारे आती कर किहे, ‘मैं ओही छै,’ ते ब़ोहता नु भरमावे। 7जिसे बेले तम्ही लड़ाईया, ते लड़ाईया ची चर्चा सुणा, तां घब़राती ना जजा, कांकि यांचे हुवणे जरुरी छै, पर ओ समय अन्त नी हुवी। 8कांकि जाति उपर जाति, राज़ उपर राज़ चढ़ाई करे। ते भूकम्प हुवे, ते अकाल पड़े। ईं ङुखा ची शुरुआत हुवी।
9 #
मत्ती 10:17–20; लूक 12:11,12 “पर तम्ही आपणे बारे मां चौकस रिहा, कांकि वे प्राथनाघरा मां तम्हानु कोट्टे ते पंचेता मां सोंपे, ते माई वजह हाकिमा ते राजा चे सामणे खड़े करती ङिले जावा, ताकि वांचे वास्ते ग़वाही हो। 10पर जरुरी छै कि पेहले सुसमाचार, सारीया जातिया मां प्रचार करला जाओ। 11जिसे बेले वे तम्हानु पकड़ती कर सोंपे, तां पेहले कनु चिन्ता ना करजा कि अम्ही का किहुं, पर जको कोच्छ तम्हानु वेही घड़ी बावड़ले जाओ ऊंही केहजा, कांकि ब़ोलणे आले तम्ही कोनी, पर पवित्र आत्मा छै। 12भऊ भावा नु, ते ब़ा नु पूता मारणे वास्ते सोंपे, ते ब़ाले आई-ब़ा चे विरोध मां खड़े हुती कर वानु मरवाती नाखे। 13#मत्ती 10:22ते माये नांवा ची वजह सारे लौक तम्चे लारे बैर राखे, पर जको अन्त तक सब्र करली रिही, ओचा उद्धार हुवी।
आफत चा समय
(मत्ती 24:15–28; लूका 21:20–24)
14“तां जिसे बेले तम्ही उज़ाड़ने आली किज़ड़ी चीजे नु जिठे वाजिब कोनी ओठे भिली ङेखा, (पढ़ने आला समझती गिहो) तब जको यहूदिया मां हो, वे पहाड़ा उपर द्रोड़ती जाओ। 15#लूक 17:31जको छत्ते उपर हो, वे आपणे घरा महु कोच्छ चवणे वास्ते ना उतरो ते ना भीतर जाओ। 16ते जको खेता मां हो, वे आपणी ओढ़णी चवणे वास्ते पुठे ना आओ। 17वा ङिहां मां जको गर्भवती ते ङूध पिलातीया हुवे वांचे वास्ते हाय हाय! 18प्राथना करले करा कि सिआले मां ईं ना हो। 19#प्र.वा 7:14कांकि ओ समय इसड़े क्लेशा चा हुवी कि सृष्टि चे शुरुआत कनु, जको नरीकारा ने सृजली, हमा तक ना तां हुले ते ना बल्ति कङी हुवे। 20अगर नरीकार वां ङिहां नु ना घटाता, तां कुई प्राणी ना बचीया, पर चुणले आला ची वजह जानु ओणे चुणले, वां ङिहां नु घटाले।
21“ओ समय अगर कुई तम्हानु किहो, ‘ङेखा, मसीह इठे छै,’ जा, ‘ङेखा, ओठे छै’ तां विश्वास ना करजा। 22कांकि कूड़े मसीह ते कूड़े भविष्यवक्ता उठती खड़े हुवे, ते चैन्ह ते अदभोत काम ङिखाणे कि अगर हो सग़े तां चुणले आला नु वी भरमाती ङियो। 23पर तम्ही चौकस रिहा, ङेखा, मैं पेहले कनु तम्हानु सब बाता बावड़ती ङिलीया।
इन्सान चे पूता चे दोबारा आणे
(मत्ती 24:29–31; लूका 21:25–28)
24 #
प्र.वा 6:12
“वां ङिहां मां, ओ क्लेश चे बाद,
“ ‘सूरज चे अन्धारे हुती,
ते चाँदा चे सोज़ले जते रिही।
25 #
प्र.वा 6:13
ते आसमाना चे तारे ढिऊं लाग़े,
आसमाना चीया शक्तिया हलालीया जाये।’
26 #
प्र.वा 1:7
“बल्ति लौक, मैं इन्सान चे पूता नु बङी सामर्थ ते महिमा चे लारे बदला उपर आते ङेखे। 27ओस समय ओ आपणे स्वर्ग़दूता नु भेज़ती कर धरती चे ऐ कूणे कनु आसमाना चे ओ कूणे तक चारो दिशा कनु नरीकारा चे चुणले आले लौका नु भेले करी।
अंजीरा चे पेड़ा कनु शिक्षा
(मत्ती 24:32–35; लूका 21:29–33)
28“अंजीरा चे ब़ूटे कनु हा मिसाल सिखा, जिसे बेले ओची लड़ी मुलायम हुती जाये ते पाने निकलु लाग़ी, तां तम्ही जाणती गिहा कि गर्मी चा मौसम गोढु छै। 29यूं करती जिसे बेले तम्ही यां बाता नु हुते ङेखा, तां जाणती गिहा कि ओ गोढु छै, बल्कि दरवाजे उपर ही छै। 30मैं तम्हानु सच्च किहे पला कि जब तक ये सारीया बाता पुरीया ना हो, तब तक ये पीढ़ी चा अन्त नी हुवी। 31आसमान ते धरती टलती जाये, पर माया बाता कङी नी टले।
ओ ङिओ ते समय नु कुई ना जाणी
(मत्ती 24:36–44)
32 #
मत्ती 24:36
“ओ ङिओ जा वे घड़ी चे बारे मां कुई ना जाणी, ना स्वर्ग़ चे स्वर्ग़दूत ते ना पूत, पर हेको ब़ा नरीकार। 33ङेखा, जाग़ते ते प्राथना करते रिहा, कांकि तम्ही ना जाणा कि ओ समय कङण आवी। 34#लूक 12:36–38हा ओ इन्साना ची दशा छै, जको प्रदेस जते बेले आपणे घर छोड़ती जाये ते आपणे दासा नु अधिकार ङियो, ते हर हेक नु ओचे काम बावड़ती ङियो, ते द्वारपाल नु जाग़ते रेहणे ची आज्ञा ङियो। 35ऐवास्ते जाग़ते रिहा कांकि तम्ही ना जाणा कि घरा चा मालिक कङण आवी, आथणे जा आधी राती नु, जा कूकड़े चे बांग ङेणे चे समय जा पुरा फुटले। 36ओ अचानक आती जाये, इसड़ा ना हो, तम्ही नूहले आले लाभा। 37जको मैं तम्हानु किहे ऊंही सारा नु किहे, ‘तम्ही जाग़ते रिहा।’ ”
Àwon tá yàn lọ́wọ́lọ́wọ́ báyìí:
मरकुस 13: ODR
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
CC BY-NC-ND 4.0
