लूका 16
16
बईमान मुनीम
1बल्ति ईशु ने चैला नु वी केहले, “कुई शाहुकारा चा हेक मुनीम हुता, ते लौका ने ओचे सामणे ओचे उपर हा अरोप लाला कि हा सारी जायजात उङारली जाये। 2शाहुकारा ने मुनीम नु हकारती कर केहले, ‘ईं का छै जको मैं दुधे बारे मां सुणे पला? आपणे मुनीमगिरी चा लेखा ङे, कांकि तु उग़ते कनु मुनीम ना रेह सग़ी।’ 3बल्ति मुनीम सोचु लाग़ला, ‘हमा मैं का करे? कांकि माया मालिक हमा मुनीमगिरी चे काम माये कनु खोसे पला। माटी तां माये कनु पटीजी ना, ते भीख मांगणे मां मनु शर्म आवे। 4मैं समझती गेला कि मनु का करने चाही छै कि जिसे बेले मुनीमगिरी चे काम माये कनु छुड़ाले जाओ तां लौक आपणे घरा मां माया कद्दर सत्कार करो।’
5“तब ओणे आपणे मालका चे ङेणे आला नु हेक-हेक करती हकारले ते पेहले कनु पूछले, ‘तु माये मालका नु कितना कर्जा ङेणा?’
6“ओणे केहले, ‘साओ मण तेल।’
“बल्ति ओणे ओनु केहले, ‘आपणा बाही-खाता चा ते ब़ेसती कर तुरन्त पंजहा मण लिखती नाख।’
7“बल्ति ओणे ङुजे कनु पूछले, ‘दुधे उपर कितना कर्जा छै?’
“ओणे केहले, ‘साओ मण कणक।’
“तां ओणे केहले, ‘आपणा बाही-खाता चती कर अस्सी मण लिखती नाख।’
8“मालिक ने ओ बेईमान मुनीम ची सिफत करली कांकि ओणे चतराई लारे काम गेहले हुते। कांकि ईं संसारिक लौक आपणे जिसड़े लौका लारे व्यवहारा मां सोज़ले ची ऊलाद्धी महु घणे चत्तर छी। 9ते मैं तम्हानु किहे पला, कि संसारा चे धन लारे आपणे वास्ते मित्र बणाती गिहा, कांकि जिसे बेले धन सम्पत्ति खत्तम हुती जई, तां नरीकार ते ओचे लौक तम्चा अनन्त निवास मां स्वागत करी। 10जको लौक थोड़े कनु थोड़े मां विश्वास चे लायक छी, वे घणा मां वी विश्वास चे लायक छी, ते जको थोड़े कनु थोड़े मां अधर्मी छी, वे घणा मां वी अधर्मी छी। 11ऐवास्ते जब तम्ही संसारा चे धन चे उपर सच्चे ना ठहरले, तां सच्चा धन तम्हानु कूण सोंपी? 12ते अगर तम्ही पराये धन चे उपर सच्चे ना ठहरले, तां जको तम्चा छै, ओ तम्हानु कूण ङी?
13 #
मत्ती 6:24
“कुई दास ङोन मालिका ची सेवा ना कर सग़ी, कांकि ओ तां हेके लारे बैर ते ङुजे लारे प्रेम राखी, जा हेके लारे मिड़ला रिही ते ङुजे नु तोच्छ जाणी। तम्ही नरीकार ते धन ङुंहु ची सेवा ना कर सग़ा।”
ईशु चे उपदेश
(मत्ती 11:12,13; 5:31,32; मरकुस 10:11,12)
14फरीसी जको लोभी हुते, ये सारीया बाता सुणती कर ईशु नु ठठा मां उङारु लाग़ले। 15ईशु ने वानु केहले, “तम्ही तां लौका चे सामणे आपणे आप नु धर्मी बणावा, पर नरीकार तां तम्चे मना नु जाणे, कांकि जको चीजा लौका चे नजरी मां महान छी, वे नरीकारा चे नजरी मां नफरत चा छी।
16 #
मत्ती 11:12,13 “व्यवस्था ते भविष्यवक्ता, यूहन्ना तक रेहले, ओ समय कनु नरीकारा चे राज़ चा सुसमाचार सुणाला जाये पला, ते हर कुई बङी तेजी लारे ऐस तरफ छिकीले आवे पले। 17#मत्ती 5:18बल्ति आसमान ते धरती चे टलती जाणे सरल छै, पर मूसा ची व्यवस्था ची हेक-हेक ठींबी अटल छै।
18 #
मत्ती 5:32; 1 कुरि 7:10,11 “जको कुई आपणी घराआली नु त्याग़ती कर ङुजी लारे बीहा करे, ओ व्यभिचार करे, ते जको कुई इसड़ी त्याग़ली हुली असतरी लारे बीहा करे, ओ वी व्यभिचार करे।
धनवान बन्दे ते लाजर
19“हेक धनवान बन्दे हुते जको बैंजनी ते मलमल ची ओढ़णी घालता ते हर ङिओ सोख-विलास ते धूम-धाम लारे रेहता। 20ते लाजर नांवा चा हेक कंगाल घाव लारे भरला आला, ओची चौखटी उपर छोड़ती ङिला जता 21ते ओ चाहता, कि धनवान ची जूठ परूथ लारे आपणे ढेड्ड भरो, बल्कि कुत्ते वी आती कर ओचे घाव चाटते। 22ते इसड़े हुले कि ओ कंगाल मरती गेला, ते स्वर्ग़दूता ने ओनु चती कर अब्राहम ची गोङी मां पुचाले, ते ओ धनवान वी मरला ते पुरीला गेला। 23ते अधोलोक मां ओणे ङुखा मां पले आले उपर ङेखले, ते दूरी कनु अब्राहम ची गोङी मां लाजर नु ङेखले। 24ते ओणे साङ मारती केहले, ‘हे ब़ा अब्राहम, माये उपर दया करती लाजर नु भेज़ती ङे कि आपणी आंगली पाणीया मां ब़ोड़ती माई जुबानी नु ठाडी करो, कांकि मैं ये ज्वाला मां तड़फे पला।’
25“पर अब्राहम ने केहले, ‘हे पूत, याद कर कि तु आपणे जीन्दगी मां आच्छीया चीजा तां गेहती चुकला, ते यूंही लाजर बुरीया चीजा, पर हमा ओ इठे शान्ति लारे छै, ते तु तड़फी पला। 26ते यां सारीया बाता नु छोड़ती अम्चे ते तम्चे बीच मां हेक बङा खङा ठहराला गेला छै कि जको इठु ओस पार तम्चे गोढु जाणे चाहवे, वे ना जा सग़ी, ते ना कुई उठु ऐ पार अम्चे गोढु आ सग़े।’
27“धनवान ने केहले, ‘तां ऐ ब़ा, मैं दुधी बिनती करे पला कि तु लाजर नु माये ब़ा घरे भेज़। 28कांकि माये पाँच भऊ छी, ओ वांचे सामणे यां बाता ची ग़वाही ङियो, इसड़े ना हो कि वे वी ङुखा ची जग़ह मां आओ।’
29“अब्राहम ने ओनु केहले, ‘वांचे गोढु तां मूसा ते भविष्यवक्ता चीया किताबा छी, वे वांची सुणा।’
30“धनवान बन्दे नु उत्तर ङिला, ‘ना, हे ब़ा अब्राहम, पर अगर कुई मरला आला महु वांचे गोढु जाओ, तां वे मन फिरावे।’
31“अब्राहम ने धनवाना नु केहले, ‘जब वे मूसा ते भविष्यवक्ता ची ना सुणी, तां अगर मरला आला महु कुई वी जीता हुवी तां वे ओची नी मने।’ ”
Àwon tá yàn lọ́wọ́lọ́wọ́ báyìí:
लूका 16: ODR
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
CC BY-NC-ND 4.0
