Lukasi Phrinzangpo I.
I.
1Nganti bariang chhespariks lasuni lukspo rshtanma mangraos khaqkhursed zere rshmang bed. 2Khong ryaḵẖsikana speri rshpangpo nang jabsthoq baskhanun songmana mallaqa, khongis ngantanga shadskhan dyana zosteka, 3ngâ-ang, Kasa Theophilos skumjang, ryaḵẖsikana juk thsaqpa nyamshan songsena mallaqa Yeranga salpo base rshtude zbria rgyalba shes. 4Dekana, yeranga ltsabskhan sperauni strunglukspo rshtaḵẖspa chhok.
5Youdaiasi rgyalpo Herodesi namzeang Abia-i phroeang yodkhan Zakharias zerkhan kohen chikchik yodsuk; yang khoe aneo Aaroni bumouniangna inmin yang khoe minga Elisabet (zeredpin). 6Yang khong nyiska Ashipi rgyazgqeang khadrang inmin yang Ashipi Kasalun nang molskhanun saqi lzadrul base rshnongs-med inmin. 7Yang Khonga phru mana maskyesuk chiazerbana Elisabet miskye-khan yodpin; yang nyiskoe naso chhimi yodsuk. 8Ni, ḏinḏek song : Khos Ashipi dunla rangi phroe respeka kohehi las ben yodtsana, 9koheni khrimspo nazomse trijim rdukpa khoe mingpeka shingbu bingse Ashipi rtsangma malsiang song. 10Yang sharbi mibongsun saqis trijim (rdukchi) thoa phyistâ laqpa zunen yodpin. 11Ni, Ashipi sko-khanchik trijim rdukpi malsi trangljongsla langspao khoa thong. 12Yang, Zakharias (kho) thongse droqs yang khoa mangmo han song. 13Ni, skokhanpos khoa zes : Wa, Zakharias, jiks majiks! Chiazerbana khyeri rgoshasun ha gosed; yang khyeranga khyeri ane Elisabet na barla buthsek skyok; yang khyeres khoe minga Yoanne taḵẖsha in. 14Yang kho khyeranga thadkha nang rgamo chhok, yang mi mangmo kho skyespi phya thaduk. 15Chiazerbana kho Ashipi rgyazgoeangnuk chhô chhok; yang rgunchhang hana rarosi thungchasun mana thungcha men; yang rangi ami ltoa khuriangna Rtsangma Semsika rgyangskhan chhok. 16Yang, khos Israeli buthsaun mangmo rangi Ashipa, mana Ashipi rolla ldzoqtuk. 17Yang mezpouni snyingun phrûnla ldzoqpa yang gongrgyal bakhanun khadranguni shangspeang (dukpa), Ashipi phya chetaq songkhan mithsir ldanma kho khorang Eliasi Sems nang khyudiang Khoe dunla bingcha in. 18Yang Zakhariasis sko-khanpoa zes : Ngâ dyao gatsuga rshtaḵẖspa chhok ? Chiazerbana nga chhimik in, yang ngi aneo naso yongskhan in. 19Yang sko-khanpos khoa tamlaniang zes : Nga Ashipi rgyazgoeang langse dugen yodkhan Gabriel in; yang nga khyerang na spera tangma yang khyeranga di phrinzangun hagochukpa kale tangskhan song. 20Yang misto, dyûn gangrgya chna yodkhan jaqpo thsaqpa khyerang tamja yang spera taagma minyankhan chhok; chiazerbana khyeres rangi thoa gangrgya chha yodkhan ngi tamunla chhesluks mabas. 21Yang mibongspo Zakharias yongduriga ten base yodpin yang kho rtsangma malseang gorchawa khong rgyal. 22Ni, kho bingsena khongunla spera tangma makhyud, yang khongunla rtsangma malseang khoa miklama khyenchik thongmin zere khongunis rshtaḵẖspa bas. Yang khos khongunla laqrda bas, yang kho tamja lus. 23Yang ḏinḏek song, khoe jabsthoqi jaqun gangmana, kho rangi khangmâ song.
24Ni, di jaquni jukna khoe ane Elisabet skyecha khur, yang kho khorang lza qa thsaqpa ibse duks. (chiazerbana khos) dyu zes : 25Miuniangna yodkhan ngi khrelbilukspo Ashipaola zdikpa thsore de jaquniang dyanda khyerchi shazde nga-a baspa zads.
26Ni, trugi resi lzeang Ashipas Gabriel zerkhan skopao Galilaiasi Nazareth zerkhan grongdusshigiang, 27Dawidi khangmapa minga Yoseph serkhan michiga tria songkhan mi masheskhan baqston mabakhani der tangs. Yang baqston mabakhani ming poa Mariam zered suk. 28Yang yongen yodtsana skopaos bomoa zes : Ju byormo spngkhan! bomouniang shazde thobskhan bomo Ashipao khyerang na nyambo dukshikl 29Ni, bomô khoe sperawa droqs; yang dyu chi jubachawek in zere sams. 30Yang skopaos bomoa zes : la Mariam. Jiks majiks. Chiazerbana Ashipa-a khyerang byormo shes. 31Yang misto, khyerang skyecha chhok, yang (khyeranga) buthsek skyok, yang khyeres khoe minga Yeshu taḵẖsha in. 32-33Kho rgyalba chhok, yang saq basang Thonmoe Rshraspo zercha chhok; yang Ashipa Mana Ashipaos khoe ata Dawidi rgyal-khriyu khoa saluk. Yang khos Yaqubi khangmapaunika mana rshtane rgyalchos bok, yang khuri rgyastridpoa jukchik michha. 34Ni, Mariamis skopao-la jus : ngâ mik mashespana do gatsuga chhok ? 35Yang tamlaniang skopaos bomoa zes : Rtsangma Semspo khyerika ngonuk, yang Saq basang Thonmoe khyudpos khyorika grimaq ba zatuk ni, dephya Rtsangma skyeskhanpoa Ashipi Rshras zercha chhok. 36Yang, misto, khyeri rshnyen Elisabetang chhimisongseang buthsek skyecha khurs, yang miskyecha zerkhanpoa trugi resi lzao song. 37Chiazerbana Ashipa nanyambo chang minyanshashik med. 38Ni, Mariamis zes : Ziksang, (ngâ) Ashipi tsonmo (in); ngâ yeri sperao na zomse ba zadshik! Yang skopao bomoe der na rgale song.
39Ni, Mariam hur langse, de jaquniang broqyulla, Yudaiai grongchigiang rtsomse song. 40Yang, Zakhariosi khangmeang juks yang Elisabetla ju bas. 41Yang ḏinḏek song : Elisabetla Mariami jubachao gotsana, phrus khoe ltoeang phare ṯung tangs; yang Elisabet rtsangma Semsika gang. 42Yang thonmo skadika kustabse zes : Khyerang aneuniang rgyalba songshik, yang khyeri ltoe ldanskhanpo skidchan songshik! 43Yang ngi Ashipi amao ngi der skyodchi de shazdeo ga na song ? 44Chiazerbana, misto, khyeri ju-i skadpo ngi rshneang hlebachikna phrus mâthadkha songse ngi Itoeang phare ṯung tangs. 45Yang chhesluks baskhan do bomô rgyalba songshik, chiazerbana Ashipi ngoslana de bomoa mole yodkhan kasalun gangrgya chhacha in.
46Yang Mariamis zes : Ngi stroqpos Ashipi stodkha bed. 47Yang ngi Semspo nga khonchukkhan Ashipika thad. 48Chiazerbana, khoe rangi tsonmoe babsmooluksika ltas; ni, ltosang, darena eltek mithsirun jung nga rgyalba shesuk. 49Chiazerbana khyud yodkhanpos ngi phya stodpariks lasun phingsed. Yang khuri mingpo rtsangma in; 50yang khoo jikskhanunika mithsiruni mithsi-run shazde chhok. 51Khos rangi rshpungtsali ngadpo stans. Khos stroqse, snyinguniang ngarchani samluks yodkhanun tre trea song. 52Khos rgyalchos bakhanun khriunikana phabs, yang babsmo yodkhanun thonmo bas. 53Khos ltoḵẖskhanun rgyala yodkhanunika drangs shuks, yang khos phyikpo songkhanun laqstonga ldzoqse tangs. 54Kho rangi shazde bachi itu ba rangi jabsthoq bakhan Israeli laqa skyods. 55Ngachi mezpounla, Abraham nang khoo mith-sirpoa khoe molchasun na zomse rshtane phya (bas). 56Ni, Mariam de Elisabet nanyambo lza sum thsaqpa duks, yang rangi khangmâ loqse song.
57Ni, dare, Elisabeti skyechi tho hlep, yang khoa buthsek skyes. 58Yang anêka Ashipas rangi snyingthsikchao ngonon yodsuk zero khyimtsespaun nang rshnyenunla go, yang khongis kho nanyambo thadkha bas. 59Yang, ḏinḏek song : jaq rgyadi jaqa khong phrui laqrtsangma ba yongs, yang khongis khoe mingpoa rangi ati mingtaḵẖspo Zakharias zes. 60Yang, tamlaniang khoe amaos zes : dyu ma zer, dobasang khoe minga Yoannes zershik! 61Yang khontes amawa zes : khyeri rshnyenuniang ḏinda mingtaḵẖs yodkhan sumed. 62Ni, khongis khoe atawa khoa chi mingpo taḵẖssha thaded zere laqrda bas. 63Yang khos laqshingshik khyong zere trise dyu zoren zbris : Khoe mingtaḵẖspo Yoannes in. Yang jung rgyal. 64Ni, dyana tho khurika khoe khao be yang khoe lchê (gadpo grol), yang khos Ashipi stodkha ben spera tangs. 65Yang khongi khrid khoreang yodkhanun jung jiks; yang Yudaiasi broqyul gangmeang dyûn tsoqi rshmang ben yodsuk. 66Yang gokhanun jungis doun snyingiang jaqse zes : Ni? di phrû gatsuk chhok. Chiazerbana Ashipi khyud nadrose yodsuk.
67Yang khoe Ata Zakharias Rtsangma Semspoeka gang, yang dyu zere khyon : 68Ashipa Israeli Ashipi stodkha songshik, chiazerbana khos rangi mithsirpe-ka ltaso (khongi) phya khomlukspo ldans. 69Yang ngachi phya rangi jabsthoq bakhan Dawidi khangmeang khomluksi khyud ltsangs. 70(Dyao) ryaḵẖsi thoekana rangi Rtsangma gochukkhanuni khos molskhanun na zomse (ltsangs). 71(dyaos) ngachi mirgakhanun nang khon jaqkhanun jungi laqyoqikana ngacha khomchuktuk. 72Ngachi mezpounika shazde bachao gangrgya bok yang khuri rtsangma chhadchhamdo itu bok. 73(do) ngantanga tangcha yodkhan ngachi ata Abrahamla borskhan Nao in. 74Ngacha ngachi mirgakhani laqyoqikana khomchukse n achas jiksmo medpika khoe jabsthoq bok. 75Ngachi thsê jaqun gangma rtsangma songseang yang khadrang songseang (jabsthoq bok). 76Yang khyerang phru, jung basang Thonmoe gochukkhan zercha chhok; chiazerbana khyerang Ashipi lamun ldanchukspa sna snâ chhok; 77(do) khonti nyespaun daqchukcha khuri-mithsirunla khomluksi shespo tangcha (chhok). 78Ngachi Ashipi snyingi shazde rshmangpos ngachika gyeni yulikana yongskhan nyimao sharchuks. 79(dyu) thup nang shiluksi nyimphraqiang dukse yodkhanunla od barcha ngachi gombaun sonluksi lampeka strulba (sharchuks).
80Dekana, phrû chho chhen yang Semspeang ngadchan chhon song; yang kho Israelika ngonmi jaqpo thsaqpa thangstonguniang duks.
Àwon tá yàn lọ́wọ́lọ́wọ́ báyìí:
Lukasi Phrinzangpo I.: SOMA
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© Société Biblique de Genève