मत्‍ती 28

ईसू कौ जीबित हैबो

(मरकुस 16:1–10; लूका 24:1–12; यूहन्‍ना 20:1–10)

1जब यहूदिन कौ आराम दिन बीत गयौ,तब सप्‍ताह के पहले दिन इतबार कूं बडे़ सबेरे मरियम मगदलीनी और दूसरी मरियम कब्र देखबे आई।

2तब अचानक भौत जोर ते धरती हली और पिरभू कौ एक सुरग दूत सुरग ते उतरौ और कब्र के जौरै आयकै बानें पत्‍थर लुढ़कायौ और बापै बैठ गयौ। 3वाकौ मौंह बिजली की तरैह ते चमक रयो हतो और कपड़ा बर्फ की तरह सफेद हते। 4सुरग दूत कूं देखकै पहरेदार भय ते थर थर कांपबे लगौ और मरे जैसौ है गयौ।

5सुरग दूत ने बिन औरतन ते कही, “डरपौ मत तुम ईसू कूं ढूढ रहीऔं जो क्रूस पै चढायो गयौ हतो। 6बू य्हांपै नांय बू तौ जी उठोए, जैसे बानें कही हती, आऔ तुम बा जगैह कूं देख लेओ ज्हांपै बू रखौ गयौ हतो। 7जल्दी जायकै वाके चेलान ते कहौ, ‘बू मरे भयेन में ते जी उठौ हैं। बू तुम लोगन ते पैहले गलील कूं पौंहचेगौ। और म्हांपै तुम लोग बाय देखिंगे।’ जि तुम लोगन के काजै मेरौ सन्देस है।”

8जल्दी ते बे औरत भय और बड़े आनन्द के संग कब्र पैते लौटकै चेलान कूं खबर दैबे भागीं। 9तब ईसू अचानक बिन औरतन के आगें आयकै खडौ है गयौ और बानें नमस्‍कार करौ। और बिनें आगे बढकें ईसू कै पामन में झुककै दन्‍डबत करौ और पैरन कूं पकर लियौ। 10तब ईसू ने बिनते कही, “डरपौ मत मेरे भईयन ते जायके कहौ, कै बे गलील कूं जायें, म्हांपै बे मोय देखिंगे।”

पैहरेदार कौ ब्यौरा

11जब बे जाय रयीं हती तब पहरेदारन में ते कछु लोगन नें नगर में आयकै पूरौ हाल यहुदी पिरधान पुरोहितन कूं कैह सुनांयौ। 12तब यहुदी पिरधान पुरोहित और यहुदी बुजुर्ग नेतन्‍नें इकठ्‌ठे हैके सलाह करी और सिपाइन नें भौत सारौ पईसा दियौ, 13और कही, “तुम लोगन ते ऐसे कह दियौ, कै जब ‘हम सब सो गये हते’, तब ईसू के चेला रात में आये और वाकी ल्हासै उठायकें लै गये। 14अगर जि बात राजपाल कूं पतौ परैगी तौ बाय हम समझा दिंगे, और तुमें जोखिम ते बचाय लिंगे।” 15पहरेदारन्‍ने पईसा लै लिये और बैसौई करौ, जैसौ उनैं सिखायौ गयौ हतो। तब ते यहुदिन में जि बात फैल गयी, और अबई तक यहुदिन में प्रचलित है।

महान आदेस

(मरकुस 16:14–18; लूका 24:36–49; यूहन्‍ना 20:19–23; प्रेरितन के काम 1:6–8)

16 # मत्‍ती 26:32; मर 14:28 तब ईसू के ग्‍यारह चेला गलील के पहाड के जौरै गये ज्हांपै ईसू नें बिनकूं बुलायौ हतो। 17चेलान नें ईसू कूं देखकें नमस्‍कार करौ पर काऊ काऊए संका ना भई। 18तब ईसू ने बिनके जौरै आयकें कही, “मोय सुरग और धरती कौ सबरौ अधिकार मिलौ है। 19#प्रेरि 1:8जामारै तुम जाऔ और सबरे देसन के लोगन कूं चेला बनाऔ, और बिनकूं पिता और पुत्र और पबित्र आतमा के नाम ते बपतिस्मा देओ, 20और उन सब बातन कूं जिनकी मैंनें तुमकूं आग्‍या दईएं मानबौ सिखाऔ, और देखौ,मैं दुनियां के अन्‍त तक हमेसा तुमारे संग हूं।”

Àwon tá yàn lọ́wọ́lọ́wọ́ báyìí:

मत्‍ती 28: BRAJ

Ìsàmì-sí

Pín

Daako