Markus 15
15
Si Hisus sa Atubangan ni Pilatu
(Mat. 27:1-2; 27:11-14; Lukas 23:1-5; Hu. 18:28-38)
1Pagka surip, nagpululungan dapu ti manga pangulu manughandug, ti manga paggurangunun manga Hudiyu, ti manga manugtudlu Kasuguan hanggan ti Katipunan manga Pinunu. Bag-u kanda pinagapus si Hisus, kanda dinara, ipinabahala yi sa kan Pilatu. 2Nagpaingana si Pilatu sa kan Hisus magkun, “Kawu aw ti Hari manga Hudiyu?” Magsagut si Hisus, “Kawu ngani duy ti magsabi.” 3Bag-u idinimanda siya manga pangulu manughandug tungkul sa mayamu bagay. 4Nakan nagpaingana maan si Pilatu sa kan Hisus, “Unman aw kawu may isagut? Mayamu kanda manga dimanda laban sa kanmu.” 5Dapat unman nagsagut si Hisus una di. Nakan lalu naglingut si Pilatu.
Nasintinsiyahan si Hisus sa Kamatayan
(Mat. 27:15-26; Lukas 23:13-25; Hu. 18:39; 19:16)
6Kada Kapistahan sa Pag-alaala sa Karibrihan pagpalpasan ni Pilatu ti usa ka pirisu, una hintay pag pirisu ti hagadun manga tawu. 7Ati katpung may usa ka tawu kay ngaran si Barabas. Napirisu siya minsan sa kay manga kaibahan nag-arburutu sida kaybi laban sa gubirnu, sa katpung nida nagguluhan may minatay paman. 8Nagpakarani ti manga tawu sa kan Pilatu nagpakihampang sa kanya hampay palpasan niya ti usa ka pirisu angay sa kay ugali buwat kada Kapistahan. 9Magkun si Pilatu sa kanda, “Gustu aw niyu kang palpasan ti Hari manga Hudiyu?” 10Dahil alam ni Pilatu maghirak ti manga pangulu manughandug nakan kanda ipinabahala si Hisus sa kanya. 11Dapat pagpakaudyukan manga pangulu manughandug ti kayamuan tawu hampay kanda pamuhunun sa kan Pilatu si Barabas ngap ti palpasan. 12Nagsagut maan si Pilatu magkun, “Nu katunda, hintay ti buwatun niku sa kanyu pagkumnun Hari manga Hudiyu?” 13Irininggit maan nida, “Ipaku siya sa kurus.” 14Sinabi ni Pilatu sa kanda, “Hayga duy, hintay pag kadautan kay binwat niya?” Dapat lalu waya kanda irininggit, “Ipaku siya sa kurus.” 15Sa kay gustu ni Pilatu pasibut-an ti manga kagustuhan tawu, nakan pinalpasan niya si Barabas. Dapat ipinagaruti niya si Hisus bag-u ipinakaun niya sa manga sundalu hampay ipaku sa kurus.
Pag-away-awayun manga Sundalu si Hisus
(Mat. 27:27-31; Hu. 19:2-3)
16Bag-u dinara manga sundalu si Hisus ipinaslud sa sugkadan balay ni Pilatu. Tinipun nida siyun ti kayamuan sundalu. 17Pinakulimpayan nida si Hisus rutay marara. Sinulapid nida ti dugihan bag-u kanda ipinasangbaw sa kay ulu ni Hisus ga sangbaw hari. 18Bag-u kanda ginalang magkun, “Pagmasulung kawu, Hari manga Hudiyu.” 19Bag-u binakul nida kay ulu usa ka bahi anyamu, kanda waya binug-anan. Bag-u nagluhud sida bilang kanda ginalang si Hisus. 20Pagka nakatapus kanda mag-away, bin-ul maan nida ti kulimpay marara, pinasulungan maan nida kay sadili rutay bag-u kanda yi ipinalwas hampay kanda yi ipaku sa kurus.
Ipinaku si Hisus sa Kurus
(Mat. 27:32-44; Lukas 23:26-43; Hu. 19:17-27)
21May nasulang sida usa ka tawu ginan sa kay tanman, si Simun taga Sirini, kay ama nida ni Alihanduru ni Rupu. Ipinalugus nida ipinas-an sa kanya kay kurus ni Hisus. 22Kanda dinara si Hisus tag sa daga kay ngaran Gulguta, kay ibug sabihun ga but-ul ulu pag rugar. 23Pinakan-an nida si Hisus intus may libug pamakimay kay ngaran mira, dapat unman siya nanginum. 24Bag-u kanda ipinaku siya sa kurus, bag-u inayaw-ayaw nida kay manga rutay, alinaban waya nida sa lunggungan. 25Ati katpung alas nuwibi ti udas kanda nagpaku sa kurus. 26Isinurat nida ti dimanda laban sa kanya magkun, “Ti Hari manga Hudiyu.” 27May duwa ka tulisan kay kadungan ni Hisus ipinaku waydi sa kurus, ti usa sa sikun baliwa pag kurus, kay usa sa wala baliwa pag kurus. 28Tinupad yi ti Kasuratan magkun, “Nibilang siya sa manga makasalanan.”
29Ti manga maglawuy siyun nagmuransa diman waydi sa kan Hisus. Nagtuknatukna kanda ulu magkun, “Malu ngani tunda, unman aw kawu ti mangguba Balay Diyus bag-u ipatindug uman sa sulud tulu ka sirang? 30Ribrihan yi nimu kanmu sadili bilug. Pagdugsun yi ginan sa kurus.” 31Katunda diman pag hinangalhangal siya manga pangulu manughandug hanggan manga manugtudlu Kasuguan. Kay sabi nida, “Irinibri niya ti iba, dapat unman kaya niya iribri kay sadili. 32Pagdugsun yi taynguna ginan sa kurus ti Pinili Diyus Manugribri pag Hari, ti Hari Israil hampay makitan nimi bag-u kami maniwala sa kanya.” Hinangalhangal diman si Hisus manga tulisan kadungan niya ipinaku sa kurus.
Ti Pagkamatay ni Hisus
(Mat. 27:45-56; Lukas 23:44-49; Hu. 19:28-30)
33Pagka karaw-an yi sirang nagdulum ti init sa bilug kalibutan hanggan palis ti init. 34Pagka palis ti init, nagtawag laun si Hisus magkun, “Ilui, Ilui, lima sabaktani?” Kay ibug sabihun, “Diyus niku, Diyus niku, hayga pinabay-anan nimu aku?” 35May manga matindugan siyun nakadnug sa kay bagaw ni Hisus. Magkun sida, “Malu magtawag maaw siya sa kan Ilyas.” 36Madali nalagiw ti usa, binasa niya maaslum pag intus ti ispungha bag-u ipinauli sa pudpud anyamu bag-u pinasupsup sa kan Hisus magkun, “Pag-alagad dapu, bantayan nita nu ngatay lumuwang si Ilyas hampay ipadugsun siya ginan sa kurus.” 37Nagtawag maan daka si Hisus bag-u naugtasan arup.
38Bag-u nagisi sa karaw-an ti limbun rutay sa Balay Diyus ginan sa tungud sadsad sa sirung. 39May matindugan sa sirung kurus usa ka kapitan sundalu. Pagka nakitan niya nu kabitay kay namatay ni Hisus, sinabi niya magkun, “Tutuu inda pag tawu imaw gid ti Anak Diyus.” 40May manga babayi diman siyun magbantay ginan sa arayu. Minsan sa kanda si Marya Magdalina hanggan si Marya kay ina nida magtar-ari ni Husi ni Santiyagu, hanggan si Salumi siyun diman. 41Tunda pag manga babayi nagkuyug sa kan Hisus kay di waya sa Galiliya, nangawat sida sa kanya sa tanan niya pangailangan. Ag mayamu waya manga babayi nagkuyug waydi sa kan Hisus tabug sa Hirusalim.
Kay Naglubung sa kan Hisus
(Mat. 27:57-61; Lukas 23:50-56; Hu. 19:38-42)
42Maghugut yi marukirum. Ati pag sirang kanda pangalistu sa Kapistahan bag-u aldaw Sirang Pamahari yi. 43Rinmas-ug si Husi taga Arimatiya. Inda pag usa ka pinunu paggalangun manga tawu. Magpatigagad siya sa kay paghari Diyus. Nagpanghas siya sa kay sadili nagpakarani sa kan Pilatu bag-u kay hinagad kay bangkay ni Hisus. 44Pagka naalaman ni Pilatu tigbak yi si Hisus, naglingut siya. Nakan ngani ipinab-ul niya ti kapitan manga sundalu kay pinaingana nu ngatay kumun. 45Pagka naalaman ni Pilatu sa kapitan kuntay tutuu tigbak yi si Hisus, pinasibut-an niya si Husi bul-a yi ti bangkay. 46Binili ni Husi ti usa ka pisahan katsa. Pagka bin-ul niya ti bangkay ginan sa kurus, kay yi ngani sinaput sa katsa bag-u ipinauli niya sa tinaguktukan batu. Bag-u ilinigid niya ti usa ka daka pag batu itinalakup sa sabian tinaguktukan batu. 47Nagbantay diman waydi si Marya Magdalina hanggan si Marya kay ina ni Husi, nakitan nida nu naan pag ipinauli kay bangkay ni Hisus.
Àwon tá yàn lọ́wọ́lọ́wọ́ báyìí:
Markus 15: HNN
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Copyright © 2023 by OMF International, Philippines
