Jeelim 4
4
Kohafe tiina bam taane
1 Baŋa Wɛ déem tage de Moses o we:
2“Pɔɔre Kohafe tiina bam Levi dwi tiina badaara bam wone se n jeeli ba ni, sɔ-yuu de sɔ-yuu, diga de diga. 3Ko ná ye baara balo na jege bena fintɔ se ko taa vei bena finnu ye ba yi se ba toŋe Baŋa Wɛ wara-jei sem totoŋa to, se n popone banto yera n tiŋi. 4Kohafe tiina bam totoŋa yam konto ye se ba taa nii wonnu telo na tiini te ye wose to baŋa ne mo.
5Ko ná yeini ko yi se á gɔ á vwoa yam se á vo jeiga kadwoŋi, Aron de o bia bam mo wó zo wara-vwei dem wone ba pare gare-jale delo na chege Wɛ di-yun-gala kam to, se ba ma-de ba kwoli Wɛ ni-gwonim dakaa kam. 6Ba laam wó kwei twan-nyenno ba kwoli-ka, se ba daare ba kwei gare-yi delo nyenyego na ye nazwon-pupwia to ba ma ba pu-ka. Ko kwaga ne, se ba laam tore dakaa kam zeŋem dɛ sem ka yera ne.
7Ko maa ná ye tabolo kolo baŋa ne ba na yeini ba ke bworobworo kolo na tigi da Wɛ ŋwaane to, ba ta wó kwei gare-yi delo nyenyego na ye nazwon-pupwia to mo ba kwoli-ko. Ba laam maa wó kwei zon-tanlɛ sem, de talwoŋ-ywoŋa zwe sem, de kabeili sem, de sana pɛɛra kikeiri sem, ba zege ko baŋa ne. Bworobworo kom jege se ko yeini ko taa wo tabolo kom baŋa ne mo maŋa maama. 8Ba ná tigisi wonnu tento maama tabolo kom baŋa ne ba ti, se ba kwei gare-yi nasoŋo chwɛ-chwɛ ba lware ba pu-te, se ba daare ba ma twan-nyenno ba kwoli te maama. Ko kwaga ne se ba laam tore tabolo kom zeŋem dɛ sem ko yera ne.
9Ba ta wó kwei gare-yi delo nyenyego na ye nazwon-pupwia to ba ma kwoli min-zwon-zego kom, de ko min-zwonnu tem, de wonnu telo na fɔge te kwɛ mini dem to, de tentwarem zon-tanlɛ sem, dedaane nuga kabɔɔro tem maama. 10Ba jege se ba kukuli-ko mo, de ko yera zela yam maama, twan-nyenno wone, se ba laam kwei-ko ba daŋe ko zeŋem dɛ sem baŋa ne.
11Ba daa ta wó kwei gare-yi delo nyenyego na ye nazwon-pupwia to mo ba ma kwoli sabu-seŋa kaanem dakaa kam,#Nwoŋim 30:1-10 se ba daare ba kwei twan-nyenno ba ma pu-ka. Ko kwaga ne se ba laam tore dakaa kam zeŋem dɛ sem ka yera ne.
12Aron de o bia bam ta wó kwaleme zela yalo maama ba na jege ba toŋe wara-jei sem wone to ye ba daare ba kukuli-te gare-yi delo nyenyego na ye nazwon-pupwia to wone. Ba laam maa wó kwei twan-nyenno ba ma ba pu te ni, ye ba daare ba kwei-te ba daŋe zeŋem dɛ sem baŋa ne. 13Ba ta wó kwoori tentwarem delo maama na wo zwɛɛm kaanem dakaa kam wone to mo ba yage, se ba daare ba kwei gare-yi na ye nasoŋ-pupwiu to ba ma kwoli-ka. 14Ba nam ta wó kwei zela yalo ba na jege ba toŋe kaanem dakaa kam totoŋa to mo ba tiŋi gare-yi dem konto baŋa ne. Ko maa ye mini zon-tanlɛ sem, de dɛ selo ba na jege ba chu ba le nɔna to, de sɛbullu tem, dedaane na-zwe sem mo. Ba ta wó kwei twan-nyenno mo ba ma ba pu te maama, ye ba laam tore dakaa kam zeŋem dɛ sem ka yera ne.
15Abam ná ti yiga se á gɔ á vwoa yam se á vo jeiga kadwoŋi, se Kohafe tiina bam ba ba zeŋe wara-jei sem yera zela de wonnu telo maama na woli ka totoŋa to se á kɛ. Ko nam ye se Aron de o bia mo da yiga ba kwoli wonnu tem konto. Te na tiini te ye wose te pae Wɛ to ŋwaane, Kohafe tiina yé dwei-te. Ba ná dwei te kolo, ba jege se ba te mo. Mo wonnu telo Kohafe sɔ-yuu tiina bam na jege se ba zeŋe ba ja kɛ to.
16Kaanem tu Aron bu Eleaza nam mo wó taa nii min-zwonnu tem wo nuga kam, de talwoŋ-ywoŋa kalo na wó zwɛ to#Nwoŋim 30:34-38; Chullu 8:10, de dɛ dɛ wodiu pɛɛra yam, de Wɛ swolim nuga kam baŋa ne. Wonto ta wó taa nii wara-vwei dem dedaane de yera zela yalo maama na pɔɔre Baŋa Wɛ zula ŋwaane to baŋa ne.”
17 Baŋa Wɛ ta ma ta de Moses de Aron o we:
18“Yé pa-na se Kohafe sɔ-yuni dwi dem ti Levi tiina bam wone. 19Ba nam ná lage ba zeŋe zela yalo na ye wose to, ba na wó ke tei se ba yé te to mo tento: Aron de o bia bam mo wó zo wara-vwei dem wone se ba bere nɔɔno maama o totoŋe de woŋo kolo o na wó zeŋe to. 20Kohafe tiina bam tete nam ba jege chwoŋa se ba zo wara-vwei dem wone ba taa kare ba nii de yera zela yam, se ko yé pa ba te.”
Gereson tiina bam taane
21 Baŋa Wɛ déem tage de Moses o we:
22“Nam ta jeeli Gereson tiina bam ni, sɔ-yuu de sɔ-yuu, diga de diga. 23Ko ná ye baara balo na jege bena fintɔ se ko taa vei bena finnu ye ba yi se ba toŋe Baŋa Wɛ wara-jei sem totoŋa to, se n popone banto yera n tiŋi. 24Gereson tiina bam totoŋa yam de zela yalo ba na wó zeŋe to mo tento: 25Ba wó taa zeŋe wara-vwei dem tete, dedaane gare-jala yalo na kwoli-de to, de twan-nyenno telo na daŋe da to, de gare-jale delo na leigi vwei dem ni ne to, 26de gare-jala yalo na kwoli wara-jei sem konkɔlɔ kom mɛ vwei dem tete de kaanem dakaa kam na wora to maama, de konkɔlɔ kom ni gare-jale dem, dedaane gwaaro tem konto ŋone de te yera zela maama. Gereson tiina bam mo wó taa toŋe wonnu tem konto maama totoŋa yam. 27Aron de o bia bam mo wó taa nii Gereson tiina totoŋa yam baŋa ne. Á wó pa-ba ni se ba lɔre woŋo de woŋo kolo maama ba na wó zeŋe to. 28Mo totoŋa yalo Gereson dwi tiina bam na jege se ba taa toŋa wara-vwei dem ŋwaane to. Kaanem tu Aron bu Itamara nam mo wó taa nii-ba se ba taa toŋe ba totoŋa yam.”
Merari tiina bam taane
29“Ta jeeli Merari tiina bam ni, sɔ-yuu de sɔ-yuu, diga de diga. 30Ko ná ye baara balo na jege bena fintɔ se ko taa vei bena finnu ye ba yi se ba toŋe Baŋa Wɛ wara-jei sem totoŋa to, se n popone banto yera n tiŋi. 31Merari tiina bam na wó taa toŋe totoŋa yalo maama wara-vwei dem seeni to mo ye se ba zeŋe wonnu tento tem: ywoa yalo wara-vwei dem na leigi ya yera ne to, dedaane de da-gare sem, de de da-dɛɛra yam, de luuru telo baŋa ne dɛ sem na zege to, 32de da-dɛɛra yalo na kaare wara-jei konkɔlɔ kom to, de ya zegem wonnu tem, de paara yam maama, de ŋone sem, de zela yalo maama na wora totoŋa yam konto ŋwaane to. Á wó pa nɔɔno maama ni se o lɔre woŋo de woŋo kolo o na wó zeŋe to. 33Mo totoŋa yalo maama Merari dwi tiina bam na jege se ba taa toŋa wara-vwei dem ŋwaane to. Kaanem tu Aron bu Itamara nam mo wó taa nii-ba se ba taa toŋe ba totoŋa yam.”
Ba na jeeli Levi dwi tiina bam ni tei to
34Moses de Aron, dedaane Isarele kɔgɔ kom nakwa bam ma seene ba jeeli Kohafe tiina bam ni, sɔ-yuu de sɔ-yuu, diga de diga. 35Ko ná ye baara balo na yi bena fintɔ se ko taa vei bena finnu, ye ba yi se ba taa toŋe wara-jei sem totoŋa to, 36ba na gage-ba se ko tɔge de ba sɔ-yuni tem to, ba ye baara morro telei de bia yarepɛ de finnu (2,750) mo. 37Kohafe sɔ-yuni tem baara balo maama na toŋe wara-jei sem totoŋa, ye Moses de Aron jeeli ba ni to mo konto. Ba déem jeeli-ba se ko maŋe de Baŋa Wɛ na pɛ Moses ni se o ke tei to mo.
38Ba déem ma jeeli Gereson tiina bam ni, sɔ-yuu de sɔ-yuu, diga de diga. 39Ko ná ye baara balo na yi bena fintɔ se ko taa vei bena finnu, ye ba yi se ba taa toŋe wara-jei sem totoŋa to, 40ba na gage-ba se ko tɔge de ba sɔ-yuni tem to, ba ye baara morro telei de bia yaredo de fintɔ (2,630) mo. 41Gereson sɔ-yuni tem baara balo maama na toŋe wara-jei sem totoŋa, ye Moses de Aron jeeli ba ni to mo konto. Ba déem jeeli-ba se ko maŋe de Baŋa Wɛ na pɛ Moses ni se o ke tei to mo.
42Ba déem ma jeeli Merari tiina bam ni, sɔ-yuu de sɔ-yuu, diga de diga. 43Ko ná ye baara balo na yi bena fintɔ se ko taa vei bena finnu, ye ba yi se ba taa toŋe wara-jei sem totoŋa to, 44ba na gage-ba se ko tɔge de ba sɔ-yuni tem to, ba ye baara morro tetɔ de bia yalei (3,200) mo. 45Merari sɔ-yuni tem baara balo maama na toŋe wara-jei sem totoŋa, ye Moses de Aron jeeli ba ni to mo konto. Ba déem jeeli-ba se ko maŋe de Baŋa Wɛ na pɛ Moses ni se o ke tei to mo.
46Ko déem ma pa se Moses de Aron, dedaane Isarele nakwa bam jeeli Levi tiina bam maama ni, sɔ-yuu de sɔ-yuu, diga de diga. 47Ko ná ye baara balo na yi bena fintɔ se ko taa vei bena finnu, ye ba yi se ba taa toŋe wara-jei sem totoŋa ye ba zeŋe se zela to, 48ba maama déem ye baara morro nana de bia yanu de funɔnɔ (8,580) mo. 49Ba déem jeeli-ba se ko tɔge de Baŋa Wɛ ni dem mo. Moses ma pa se nɔɔno maama lɔre o totoŋe dem de woŋo kolo o na wó zeŋe to.
Konto to, ba déem jeeli Levi tiina bam maama ni nenɛɛne Baŋa Wɛ na pɛ Moses ni se o ke tei to mo.
Àwon tá yàn lọ́wọ́lọ́wọ́ báyìí:
Jeelim 4: KBG
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2020, Ghana Institute of Linguistics, Literacy and Bible Translation (GILLBT)