Jeelim 22
22
Pɛ Balaki bwoŋi Balaam se o ba o woli‑o
1Isarele tiina bam déem ma gɔ ba vwoa yam ba vo ba yi Moaba laŋa kam te-kampare ba jeini da. Jei sem konto wo Jɔdan buga kam ni ne mo ye Jeriko de wo bubɛ dedwoŋi dem seeni.
2Zipore bu Balaki déem mo ye Moaba teo pɛ. O ma lɔre kolo maama Isarele tiina bam na ke de Amori tiina bam to. 3Foone ma tiini de zo o de o nɔɔna bam, Isarele tiina bam kɔgɔ kom na daga to ŋwaane. Moaba tiina bam nagwola ma te Isarele tiina bam ŋwaane. 4Ba ma ta de Midian tiina nakwa bam ba we, “Isarele tiina kɔgɔ kom lage ko ba ko chɔge debam de dé wonnu tem maama, ne nabea na yɔɔre ka gaane gaao pwola ne tei to mo.”
5Moaba Pɛ Balaki déem toŋe kwora o pa Beora bu Balaam se o ba o tei. Balaam déem zoore Amawa teo kodwoŋi ne, ko yere mo Petora. Ko déem wo Yuferata buga kam ni ne mo. Pɛ Balaki maa we:
“Nɔn-dwi dedwoŋi mo zege Ejipti ne ba ba ywo-seeni. Ba yɔɔre ba jage jei maama mo, ye ba laam ba ba jeini amo tega kam ni ne. 6Nɔɔna bam konto dana ba dwoi debam. Nam ba n sɔɔle lwarem n yage ba yera ne, se ko pa dé wane-ba dé zeili se ba viiri ba daare debam. Amo yei lanyerane we nmo ná yeini n sɔɔle Wɛ swolim n yage wolo yera ne, konto tu wó seene o jwoŋi Wɛ swolim mo. N ma‑n ná sɔɔle lwarem n daŋe wolo yuu ne, kotu wó seene o na lɛɛro mo.”
7Moaba de Midian tiina nakwa bam ma zaŋe se ba vo Balaam tei. Ba ma kwei kwora se ba ŋwe‑o o yi-nɛɛre totoŋe dem ŋwaane. Ba na yi da to mo ba pɛ‑o Balaki ni dem.
8Balaam ma leiri-ba o we, “Maŋe-na ywo-seeni á peini, se tega ná poore, se a laam leiri á taane dem, ne Baŋa Wɛ na veere o boboŋa o bere-ne tei to.” Moaba dedɛɛra bam ma maŋe o sɔŋɔ ne ba peini.
9Tete ne, Baŋa Wɛ ma ba Balaam tei ye o we, “Nɔɔna banto ye bera mo ye ba ba nmo sɔŋɔ?” 10Balaam ma leiri o we, “Moaba teo Pɛ Balaki mo toŋe-ba se ba ba ba ta de amo we, 11nɔn-dwi dedwoŋi mo nwoŋi Ejipti ne ba ba ba jage tega kam baŋa maama. O laam maa lage se a vo o tei, se a sɔɔle lwarem a daŋe ba baŋa ne, se o wane-ba o zeili se ba viiri ba daare‑o.”
12Wɛ ma ta ded‑o o we, “Yé sɛ n tɔge Balaki tontoŋena bam kwaga se á vo o tei. Nam yé sɔɔle lwarem n daŋe nɔn-kɔgɔ kom konto baŋa ne, se amo maŋe a swɛ ba swolim mo.”
13Tega na poore to, Balaam ma yi Balaki tontoŋena bam tei ye o ta de-ba o we, “Jwoori-na á tete teo, se Baŋa Wɛ ve se a da de abam a vo.” 14Moaba tiina dedɛɛra bam ma zaŋe ba jwoori ba vo ba ta de Balaki ba we, “Balaam wo sɛ se o tɔge debam se dé ba nmo tei.”
15Balaki daa ma toŋe o dedɛɛra badwonna se ba vo Balaam tei. Banto tiini ba ye naduna, ye ba daga ba dwoi boboa nɔɔna bam. 16Ba na yi Balaam tei to, mo ba we, “Zipore bu Balaki toŋe ni o we, n yé pa kolokolo che‑m se n ba omo tei. 17N nam ná tua, Balaki wó pa‑m kwora yalo maama n na lage to. O ta wó ke kolo maama n na lage se o ke o pa‑m to. Nam yɔɔre n ba n sɔɔle lwarem n daŋe nɔɔna bam yuu ne n pa‑o.”
18Balaam maa wo sɛ ye o leiri-ba o we, “Pɛ Balaki ná maŋe o lɔ sɔ-fɔrɔ mo, ye o laam su ko ni de sabu-seŋa dedaane lu-nyenno se o kwei o pa-ne de, amo ta bá wane a ve ni delo amo Tu Baŋa Wɛ wom na kwei o pa-ne to. A ba jege chwoŋa se a ke wo-kamunu naa wo-balaŋa de, ye ko dae kolo Baŋa Wɛ na pɛ amo ni se a ke to. 19Nam maŋe-na ywo-seeni á peini, nenɛɛne á dwonna bam daama na ke tei to. Amo ta wó nii Baŋa Wɛ jege boboŋe dedwoŋi se o daa veere o bere-ne na?”
20Tete dem konto ne, Baŋa Wɛ ma ta de Balaam o we, “Nɔɔna bam na tu se ba bwoŋi‑m se n vo Moaba to, tɔge de-ba n vo. Nmo nam wó ke kolo yerane amo na wó bere‑m se n ke to mo.” 21Tega na poore to, Balaam ma zaŋe o vɔ o bonaga de zela. O na diini-ka to, o ma tɔge de Moaba dedɛɛra bam pa se ba kɛ.
Balaam de o bonaga kam
22 Baŋa Wɛ bane nam ya zaŋe de Balaam mo o na tɔge de-ba o maa vei to ŋwaane. Balaam déem diini o bonaga mo ye ba via. O tontoŋena balei de maa tɔge ba via. Ba na maa vei to, Baŋa Wɛ maleka ma zege ka che Balaam chwoŋa se o yé kɛ. 23Bonaga kam na nɛ we Baŋa Wɛ maleka kam chege ba chwoŋa ye se-zɔɔ wo ka jeŋa ne to, mo ka yage chwoŋa kam ye ka lɔ ka zo gaaro wone. Balaam maa mage-ka ye o ja-ka o jwoori o de chwoŋa kam ne.
24 Baŋa Wɛ maleka kam ma vo ka yi chwoŋa kam mɛ na ye memena ye ka tigi kabiri selei laŋa ne to. Kadwi selo Vini teeni na wo se wone to maa tigi chwoŋa kam jazem de jagwia ne. Maleka kam maa zege da ka che chwoŋa kam. 25Bonaga kam daa ma na Baŋa Wɛ maleka kam. Ka ma peene ka tete de kabira kam pa se kabiri kam kweere Balaam napere. O daa ma mage o bonaga kam.
26 Baŋa Wɛ maleka kam ta ma fɔɔre ka yi ka zege chwoŋa kam mɛ na tiini ka peene to ne. Laŋa daa tera se bonaga kam tɔge jazem naa jagwia seeni ka kɛ. 27Ka de na nɛ konto to, mo ka to tega ne ka tiga. Balaam daa maa ware o bane o ja. O ma kwei o nacheiga o jege bonaga kam o maga. 28Se nɛ sem ni ne, mo Baŋa Wɛ pɛ bonaga kam chwoŋa se ka ŋɔɔne. Ka ma bwei Balaam ka we, “Bɛ mo a ke a chɔge pa se n yɔɔre n mage-ne kuni betɔ tento dwoŋi?” 29Balaam ma leiri-ka o we, “Ko ye nmo na pɛ se a nye de jworo to ŋwaane mo. A ya ná maŋe a jege se-zɔɔ ywo-seeni, a ya wó go‑m lela.”
30Bonaga kam laam maa we, “Amo dae nmo tete bonaga mo ye n jege-ne n diini maŋa maama na? A nam yeini a ke tento dwoŋi nmo yera ne na?” Balaam ma leiri we, “Aawo! N ta wo ke tento dwoŋi.”
31Konto baŋa ne mo Baŋa Wɛ pore Balaam yia, pa se o na Baŋa Wɛ maleka kam na chege chwoŋa kam ka zega ye se-zɔɔ wo ka jeŋa ne to. Balaam na nɛ to, o ma tiiri o vwi o yibia tega ne.
32Maleka kam ma bwei‑o ka we, “Bɛŋwaane mo nmo mage n bonaga kam kuni betɔ konto? Amo nwoŋi se a ba a dwoni de nmo, kokuri to, a nɛ we chwoŋa kalo n na kwei to ba jege kuri. 33Ko ná dae n bonaga kam ŋwaane, tento a ya go‑m. Ka nɛ-ne mo pa se ka ywori chwoŋa kam ne kuni betɔ. Ko ya ná dae konto, a ya wó go‑m ye a daare a yage n bonaga kam pa se ka viiri.”
34Balaam ma leiri maleka kam o we, “Amo ke a tusi. A ya yeiri we nmo chege chwoŋa mo se n dwoni de amo. De ko de, nmo yi ná wo su a veiŋa kam, amo wó jwoori sɔŋɔ.”
35 Baŋa Wɛ maleka kam ma ta ded‑o ka we, “Ta tɔge de nɔɔna bam n kɛ. Nam lɔre se n ta kolo yerane amo na wó bere‑m se n ta to.” Balaam laam ma da de Balaki dedɛɛra bam o kɛ.
36Balaki na nigi we Balaam wo chwoŋa ne o beene o tei to, mo o nwoŋi o vo se o jeeri‑o Moaba teo kodwoŋi ne. Ko déem wo Aranon buga kam ni ne mo, se ko maŋe de o laŋa kam siseini. 37O na yi da to, o ma bwei Balaam o we, “Bɛ mo ke ye n wo sɛ a kwora kam a na toŋe to? Bɛ mo ye n wo tu lela? Nmo boŋe se a jeŋa muri se a ŋwe‑m mo na?” 38Balaam ma leiri‑o o we, “Ko ná ye tei maama, a laam tua. A nam ba jege chwoŋa se a ta taane se de dwoni tei yerane Wɛ na bere-ne se a ta to.”#Amosi 3:8
39Ba ma tɔge daane ba vo Kiriaf-Huzofa. 40Ba na yi da to, Balaki ma kwei naane de pei o ke kaanem. O ma fɔ nɔna yam wone o kwei o pa Balaam de o teo dedɛɛra balo na tɔge ded‑o to. 41Tega na poore to, Balaki ma zaŋe o ja Balaam o vo Bamofe-Baal. Balaam na zege dáane to, o wae o nii o nae Isarele tiina kɔ-fɔrɔ kom wone nɔɔna bam badaara.
Àwon tá yàn lọ́wọ́lọ́wọ́ báyìí:
Jeelim 22: KBG
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2020, Ghana Institute of Linguistics, Literacy and Bible Translation (GILLBT)