Chullu 4
4
Wɛleere saarem kaanem
1 Baŋa Wɛ laam ma ta de Moses o we:
2“Ta de Isarele tiina bam we: Abam wolo ná ke woŋo kolo Baŋa Wɛ nia yam na bere we ko chuli to, ye kotu ná wo paale o ke o tusi mo, pa-na se o ke tento:
3Wɛ kaanem tiina yiga tu wom mo ná ke o tusi konto dwoŋi, pa se o wɛleere jene ba nɔɔna bam maama yuu ne, o wó ja na-bala kalo na ba jege gɛɛ to mo o ba se o ma o ke wɛleere saarem kaanem o pa Baŋa Wɛ. 4O jege se o ja na-bala kam mo o ja o ba wara-vwei dem ni ne se o jeeri Baŋa Wɛ yiga ne. O laam wó kwei o jeŋa o daŋe ka yuu ne, se o daare o gwoni ka ba dáane. 5Kaanem tiina yiga tu wom maa wó lwo na-bala kam jana badwonna o ke zoŋa ne o ja o zo wara-vwei dem wone. 6O laam maa wó kwei o noa o laŋe jana bam, ye o miisi jana bam se ko jeeri gare-jale delo na leigi de che Wɛ di-yun-gala kam to.#Nwoŋim 26:31-33 O jege se o ke konto Baŋa Wɛ yiga ne kuni berepɛ mo. 7O ta wó ma jana bam o taare talwoŋa zwɛɛm bimbini na wo wara-vwei dem ne ye de zege Baŋa Wɛ yiga ne to, de nyea yana yam seeni.#Nwoŋim 30:1-6 Jana balo laam na daare to mo, o wó ja-ba o vo o zege wara-vwei ni dem ne ye o daare o lwo-ba zwɛɛm kaanem dakaa kam teiŋa ne. 8Kaanem tiina yiga tu wom laam jege se o le wɛleere saarem na-bala kam lara kam maama, de lara kalo na meeli ka wo-zela yam yera ne to de mo. 9O ta wó le ka tapwale-bia balei bam de lara kalo na meeli da to, de chwɛ dem kuri seeni o woli da. 10O na wó le wonnu tem konto to ye bedwe de o na yeini o ke tetei de na-bala kalo nɔɔno na jaane o ba se o ma ke yazura pɛɛre o pa Wɛ to. O laam maa wó zwɛ te maama zwɛɛm kaanem dakaa kam baŋa ne. 11Ko ná daare na-bala kam tankɔlɔ kom, de ka nɔna yam, de ka yuu kom, de ka nɛ sem, de ka wo-zela yam, de ka loro tem, 12kaanem tiina yiga tu wom jege se o kwei te maama na daare to o ja nwoŋi ba tigisim jeiga kam o yi dáa dáa. Jei sem konto wó taa ye pwola kalo ba na kwɛ Wɛ chullu tem ŋwaane ye ba dole zwɛɛm kaanem tentwarem da to. O wó kwei tento maama o ja o vo dáane o zwɛ dɛ selo na jege mini to baŋa ne, ba na dogele tentwarem mɛ to.
13Ko nam ná ye Isarele tiina kɔ-fɔrɔ kom maama ná ke ba tusi Wɛ yiga ne, ye ba wo paale ba ke, ba ta wó ga ba bora mo, ba na ke kolo Baŋa Wɛ nia yam na bere we ko chuli to ŋwaane, de ba ná maŋe ba wo lɔre we ba tusi mo de. 14Ba ná tu ba maane ba tusim dem ni ne, ko jege se ba ja na-bala mo ba ba se ba ma ke wɛleere saarem kaanem ba pa Wɛ. Ba wó kwei-ka ba ja ba vo wara-vwei dem yiga ne. 15Isarele nakwa bam maa wó vo Baŋa Wɛ yiga ne ba kwei ba je ba daŋe na-bala kam yuu ne, ye ba dedoa gwoni ka ba o go. 16Kaanem tiina yiga tu wom maa wó lwo na-bala kam jana badwonna o ke zoŋa ne o ja o zo wara-vwei dem wone. 17O laam maa wó kwei o noa o laŋe jana bam, ye o miisi jana bam se ko jeeri Wɛ di-yuu kom gare-jale dem. O jege se o ke konto Baŋa Wɛ yiga ne kuni berepɛ mo. 18O ta wó ma jana bam o taare talwoŋa zwɛɛm bimbini delo na wo wara-vwei dem ne ye de zege Baŋa Wɛ yiga ne to, de nyea yana yam seeni. Jana balo laam na daare to mo, o wó ja-ba o vo o zege wara-vwei ni dem ne ye o daare o lwo-ba zwɛɛm kaanem dakaa kam teiŋa ne. 19Kaanem tiina yiga tu wom ta wó lɔɔne na-bala kam lara maama mo, ye o daare o zwɛ-ka kaanem dakaa kam baŋa ne. 20O na yeini o ke tetei de na-bala kalo o na zwɛ o tete wɛleera saarem ŋwaane to mo, o ta wó ke konto dwoŋi de na-bala kam konto. Kaanem tu wom wó da chwoŋa kam konto o ma le nɔɔna bam lwarem se Wɛ de kwei ba tusim dem o yage o ma chɛ-ba. 21O ta jege se o kwei na-bala kam o ja o nwoŋi ba tigisim jeiga kam o vo dáa dáa, ye o daare o zwɛ-ka, nenɛɛne o na ke tei de na-bala kakam kam to. Ko maa ye wɛleere saarem kaanem mo ko pae Isarele nɔn-kɔgɔ kom maama.
22Yiga tiina bam wone dedoa ná ke o tusi Wɛ yiga ne, ye o wo paale o ke, o ta wó ga o bora mo, o na ke kolo o Tu Baŋa Wɛ nia yam na bere we ko chuli to ŋwaane. 23Ba ná pɛ o maane we o sage chwoŋa, se o ja bo-bala kalo na ba jege gɛɛ to o ba o ke kaanem. 24O jege se o kwei o jeŋa mo o daŋe ka yuu ne, se o laam gwoni ka ba o go. O wó ke konto ko maŋe de jeiga kalo ba na yeini ba goe zwɛɛm kaanem vara bam Baŋa Wɛ yiga ne to mo. Nɔɔno wom kaanem dem konto ye wɛleere saarem kaanem mo. 25Kaanem tu wom laam maa wó de o noa boŋo kom jana ne, se o ma jana bam o taare zwɛɛm kaanem dakaa kam nyea yana yam. Jana balo na daare to ye se o lwo-ba zwɛɛm kaanem dakaa kam teiŋa ne mo. 26Se ko ná ye varem wom lara kam maama, o jege se o zwɛ ka maama mo kaanem dakaa kam baŋa ne, nenɛɛne o na zwɛ lara o ma ke yazura pɛɛre dem tei to. Kaanem tu wom wó da chwoŋa kam konto mo o ma le nɔɔno wom lwarem, se Wɛ de kwei o tusim dem o ma chɛ‑o.
27Á kɔgɔ kom wone nɔɔno de nɔɔno ná ke o tusi Wɛ yiga, ye o wo paale o ke, o ta wó ga o bora mo, o na ke kolo Baŋa Wɛ nia yam na bere we ko chuli to ŋwaane. 28Ba ná pɛ o maane o tusim dem ni ne, se o ja bo-choa kalo na ba jege gɛɛ ka yera ne to o ba o ke kaanem o wɛleere dem ŋwaane. 29O jege se o kwei o jeŋa mo o daŋe ka yuu ne, se o laam gwoni ka ba, jeiga kalo ba na yeini ba goe zwɛɛm kaanem vara bam da to. 30Kaanem tu wom laam maa wó de o noa boŋo kom jana ne, se o ma jana bam o taare zwɛɛm kaanem dakaa kam nyea yana yam. Jana balo na daare to ye se o lwo-ba zwɛɛm kaanem dakaa kam teiŋa ne mo. 31O ta jege se o lɔɔne ko lara kam mo, nenɛɛne o na ke tei dedaane yazura pɛɛre varem lara kam to. O ta wó zwɛ lara kam kaanem dakaa kam baŋa ne se ka lwom taa ywomma ko pae Baŋa Wɛ. Kaanem tu wom wó da chwoŋa kam konto o ma le nɔɔno wom lwarem, se Wɛ de kwei o tusim dem o ma chɛ‑o.
32Nɔɔno nam ná kuri pia o ma o ke wɛleere kaanem, kotu wó ja pi-choa mo na ba jege gɛɛ ka yera ne to o ja o ba. 33O laam maa wó kwei o jeŋa o daŋe pia kam yuu ne, ye o daare o gwoni ka ba se ko taa ye wɛleere saarem kaanem. O wó ke konto jeiga kalo ba na yeini ba goe zwɛɛm kaanem vara bam da to. 34Kaanem tu wom laam maa wó de o noa boŋo kom jana ne, se o ma jana bam o taare zwɛɛm kaanem dakaa kam nyea yana yam. Jana balo na daare to ye se o lwo-ba zwɛɛm kaanem dakaa kam teiŋa ne mo. 35O ta jege se o lɔɔne pia kam lara kam mo, nenɛɛne o na ke tei dedaane yazura pɛɛre pia lara kam to. O ta wó kwei lara kam o daŋe Baŋa Wɛ pɛɛra yadwonna yam baŋa ne o daare o zwɛ-ka kaanem dakaa kam baŋa ne. Kaanem tu wom wó da chwoŋa kam konto o ma le lwarem delo nɔɔno wom na ke to, se Wɛ de kwei o tusim dem o ma chɛ‑o.
Àwon tá yàn lọ́wọ́lọ́wọ́ báyìí:
Chullu 4: KBG
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2020, Ghana Institute of Linguistics, Literacy and Bible Translation (GILLBT)