Chullu 24
24
Wara-vwei dem min-zwonnu tem
1 Baŋa Wɛ ta ma ta de Moses o we:
2“Ta de Isarele tiina bam se ba ja Olivi nuga kalo na ye chekke to ba ba ba pa‑m min-zwonnu tem ŋwaane. Konto mo wó pa se te mini taa di taa, ye de ba dwia. 3Dɛ maama wɛ-zoore maŋa ne, Aron wó nii mo se min-zwonnu tem taa di Baŋa Wɛ yiga ne taa, se tega vo ka poore. Te nam wó taa wo wara-vwei di-yuu kom ne mo mɛ gare-jale dem na kwoli ni-gwonim dakaa kam to. Abam de á dwi dem wó taa tɔge ni dento mo taa wuu. 4Aron maa wó pa se min-zwonnu tem taa zege sabu-seŋa min-zwon-zego kom yuu ne konto, se te mini taa di taa Baŋa Wɛ yiga ne.
Wara-vwei dem bworobworo kom
5Nam viiri-na mun-bwei se á ma-de á wɔ bworobwooru fuga-telei. Abam wó kwei muni bwɛ sena mo á ma á ke bworobworo maama. 6Laam kwei-na bworobwooru tem á tiŋi gene selei. Teredo wó taa wo gena maama wone. Te nam wó taa tigi tabolo kolo sabu-seŋa na kwoli ko maama ye ko zege Baŋa Wɛ yiga ne to baŋa ne mo. 7Ta kwei-na talwoŋ-ywoŋa á ke gena maama wone, se kanto leiri bworobwooru tem yuu ne ka ji wodiu pɛɛre ka pa Baŋa Wɛ. 8Wɛ siu dɛ maama wone, Aron wó tiŋi bworobwooru tem konto mo Baŋa Wɛ yiga ne. Isarele tiina bam jege se ba taa ke konto mo maŋa maama se ko taa vei wuu. 9Bworobwooru tem konto ye Aron de o bia bam nyem mo. Ba nam jege se ba di-te jeiga kalo na ye wose to ne mo, te na tiini te ye wose to ŋwaane. Baŋa Wɛ pɔɔre-te o pɛɛra yam maama wone se te taa ye kaanem tiina bam nyem mo.”
Nɔɔno ná lwɛ Baŋa Wɛ kotu na wó na waarem delo to
10-11Nɔɔno wodwoŋi déem wora o kwo na ye Ejipti tu. O nu maa ye Isarele tu, o yere mo Selomifa. Wonto kwo yere mo Dibiri, ye o nwoŋi Dan dwi dem wone. Nɔɔno wom déem nwoŋi o ke jara de Isarele tu ba zoorem jei sem ne. Ba jara yam ne, mo nɔɔno wom sɔɔle lwarem o ma lwɛ Baŋa Wɛ yere dem. Ba ma ja‑o ba vo Moses tei. 12Ba ma ja nɔɔno wom ba pe, ye ba daare ba cheigi se Baŋa Wɛ veere o boboŋa o bere-ba nɔɔno wom taane dem baŋa ne.
13 Baŋa Wɛ laam ma ta de Moses o we:
14“Ja-na nɔɔno wom á nwoŋi abam na zoore mɛ to á vo dáa. Balo maama na nigi nɔɔno wom ta-balɔrɔ to maa wó daŋe ba je o yuu ne. Isarele tiina kɔ-fɔrɔ kom laam maa wó dole‑o de kandwa ba go. 15Nam ta de Isarele tiina bam maama we, wolo ná lwɛ o Tu Wɛ wom, konto tu tusim dem wó taa wo o yuu ne mo ye o maŋe se o na waarem. 16Wolo maama ná yaale Baŋa Wɛ yere, konto tu jege se o te mo. Á kɔgɔ kom maama jege se á dole‑o á go mo. O ná ye Isarele tu, naa o ye veiru mo de, kotu maŋe se o te mo.
17Nɔn-goro waarem ye se ba go o de mo. 18Nɔɔno nam ná go o dwoŋi varem, se o jwoori o yiri varem o pa varem wom tu. Woŋo kolo na ŋwe to mo wó leiri woŋo kolo na gɛ ko ŋwea to yuu ne. Ŋwea mo ba wó yiri ba ma ba leiri ŋwea. 19Nɔɔno ná ke zonne o dwoŋi yera ne, se ba ke o de zonne se de maŋe de zonne delo o na ke o dwoŋi wom yera ne to. 20Wolo ná bwori o dwoŋi yera kua, se ba bwori kotu de yera kua. Yi mo ba wó le ba ma leiri yi. Yeili de mo ba wó guri ba ma leiri yeili. Zonne delo maama o na ke o dwoŋi yera ne to, mo ba wó ke o de yera ne.#Matiyu 5:38 21Nɔɔno ná go varem, se o jwoori o yiri varem wom o pa o na go wolo varem to. Wolo nam ná go o dwoŋi nabiinu, se ba go o de.#Nwoŋim 21:12 22Ni dento zege de pae Isarele tiina maama mo, de veira balo na zoore de abam to. Amo mo ye abam Tu Baŋa Wɛ wom.”
23Moses ma yɔɔre o kwei Wɛ nia yam konto maama o pa Isarele tiina bam. Ba laam ma ja nɔɔno wom ba nwoŋi ba kɔgɔ kom zoorem jeiga kam ba vo dáa. Ba ma dole‑o de kandwa ba go. Konto to, Isarele tiina bam déem ke ne Baŋa Wɛ na pɛ Moses ni se ba ke tei to mo.
Àwon tá yàn lọ́wọ́lọ́wọ́ báyìí:
Chullu 24: KBG
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2020, Ghana Institute of Linguistics, Literacy and Bible Translation (GILLBT)