Pulim 50
50
1Josɛf déem na maane we o kwo tege to, o ma pare o to o baŋa ne, o maa jege‑o o kukwora ye o keeri lanyerane. 2Josɛf déem ta pɛ ni mo se o tontoŋena kwei terale nuga ba ma turi o kwo yera yam ba kwɛ ba tiŋi se ba laam di o lua. Ba ma seene ba kwɛ‑o ba tiŋi. 3Ba déem mɛ da finna mo ba kwɛ‑o, ne ko na yeini ko ke tei to. Ejipti tiina bam déem ma keeri‑o da fuserepɛ.
4Ba keira maŋa kam na ti to, mo Josɛf déem tage Pa-faro wom nakwa bam o we, “Nenɛɛne abam yi ná su de amo, se á kwei-na kwora kanto á vo á ta de Pa-faro wom we, 5‘A kwo na lage o te to, o pɛ se a du duuri a pa‑o we, a jege se a ke‑o yibeeli delo o na kwɛ o tiŋi o tete ŋwaane Kanaan teo kom ne to mo. Konto to, pa-ne pwola se a vo dáane a suli a kwo wom se a laam jwoori.’ ” 6Pa-faro wom na nigi to, o maa we, “Véi n suli n kwo wom, se ko tɔge o na pɛ se n du we n wó ke tei to.”
7Josɛf déem ma ja o kwo wom o vo se o suli. Pa-faro wom nakwa bam maama déem tɔge‑o mo ba vo. Dedɛɛra balo maama na wo Pɛ sɔŋɔ ne to dedaane Ejipti teo kom dedɛɛra bam maama de déem wora. 8Josɛf diga tiina de o chorro tem dedaane o kwo sɔŋɔ tiina maama déem dɛ‑o mo ba vo se ba suli o kwo wom. Balo yerane na daare Gosen ne to maa ye bu-balɛ sem, dedaane peeni, de bone, ko woli de naane mo. 9Jar-keira de ma tɔge ba vo, ba badwonna jei sisei-torokooro wone ye badwonna de dɔge sisei baŋa ne ba maa via. Ko déem tiini ko ye kɔ-fɔrɔ mo.
10Ba ma vo ba bɛ Jɔdan buga kam ye ba daare ba yi jeiga kalo Atade na fere o mena da to. Ba ma zege da ba mɔ nagoro wɛɛne. Josɛf ma maŋe da da yarepɛ o keeri o kwo wom ye o di lua kam. 11Kanaan tiina balo na zoore jei sem konto ne to na nɛ ba keira kam Atade jeiga kam ne to, ba maa we, “Ejipti tiina banto na jeeri ywo to wo mo tiini ko chɔge ye ba keeri dedɛ.” Ba déem maa jege jeiga kam ba bwoi we ‘Abel-Mizarim’.#50:11 Abel-Mizarim kuri mo ye Ejipti tiina keira kam Jeiga kam konto maa ye Jɔdan buga kam bubɛ dedem dem seeni.
12Jakob bia bam déem ma ke ba kwo na pɛ-ba ni se ba ke tei to.#Pulim 47:30 13Ba déem zeŋe o yera mo ba vo ba suli Kanaan ne. Ko nam ye peo-bɔɔne dem na wo Machapela pwola kam ne to mo ba déem suli‑o. De bwola de Mamere mo, ye Abaraham yeigi-de Hiti tu Eforon tei ne se o taa ke o nɔɔna de wone. 14Ba déem na ke o kwo wom ba ti to, Josɛf laam ma jwoori Ejipti, wonto de o chorro tem, ko woli de balo maama na dɛ ba vo Jakob lua kam to.
Josɛf jwoori o pa o chorro tem na baare
15Josɛf chorro tem na maane we ba kwo daa tera to, ba ma ke ni daane ba we, “Dé déem na tiini dé ke lwarem dé pa Josɛf to, dɛ delo o bane ta wo debam baŋa ne, ye o boŋe se o jwoori o ŋwe jene dé yera ne.”#Pulim 37:18-28 16Ba déem ma toŋe kwora ba pa Josɛf ba we, “Nmo kwo daama yage ni dento mo ye o laam daare o te, 17ye o we dé ta taane dento de nmo we ‘A lwoori‑m se n kwei n chorro tem wɛleere de ba na ke wo-lɔŋɔ kolo ba pa se ko yi‑m to n yage n ma n chɛ-ba.’ Debam ye n kwo wom Wɛ tontoŋena mo. Dé lwoori‑m se n kwei lwarem delo dé na ke‑m to n yage n ma n chɛ debam.” Ba kwora kam na to Josɛf zwɛ ne to, o ma ka yi-na.
18O chorro tem de laam ma vo o tei. Ba ma tiiri tega ne o yiga ne ye ba we, “Debam laam ye nmo kabɛ mo.”#Pulim 37:7 19Josɛf déem ma ta-ba o we, “Yé ta‑á kɔre-na foone. Amo bá wane a leiri Wɛ yuu ne. 20Abam déem ya boŋe se á ke amo mo lwarem. Wɛ ma pipiri á boboŋe dem pa se de ke lam. Kolo na seene ko ke to ya ná wo ke, nɔɔna dedɛ ŋwea zem ya jei mo. 21Konto ŋwaane, yé ta‑á kɔre-na foone. Amo wó taa nii abam de á bia baŋa ne se á na wodiu á di.” O déem ta ŋɔɔne wo-laaro de o chorro tem mo pa se ba jwoori ba na baare.
Josɛf toone
22Josɛf de o kwo sɔŋɔ tiina bam ma lɛɛre ba maŋe Ejipti ne. O bena maama déem maa ye bena bi de fuga (110). 23O déem nɛ Efrayim bia se ko yi dwia yatɔ laŋa ne. Manasɛ bu Makira de bia déem ta jeini Josɛf nɛ baŋa ne ba lora maŋa ne.
24Josɛf déem ma ta de o chorro tem o we, “Ko laam yi amo toone. Wɛ nam mo wó zeini abam. O wó ja abam o ja nwoŋi logo konto ne, ye o daare o ja abam o jwoori á nabaara tega kam se á ta‑á jei da. Tega kam konto o ya seene o yia o du duuri mo se o kwei-ka o pa Abaraham, de Izaak, de Jakob.” 25Josɛf déem ma pa se Jakob bia bam du duuri ba pa‑o ye o we, “Wɛ wó seene o ba o woli abam se á yage ywo. Abam nam ná maa viira, se á kwei amo kwi sem á woli da á ja kɛ.”#Nwoŋim 13:18; Josua 24:32
26Josɛf déem jege bena bi de fuga (110) mo ye o te. Ba ma kwei terale nuga ba ma turi o yera yam ba kwɛ ba tiŋi. Ba na ke konto ba ti to, ba déem kwei‑o ba ke dakaa ne mo ba zege Ejipti teo kom ne.
Àwon tá yàn lọ́wọ́lọ́wọ́ báyìí:
Pulim 50: KBG
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2020, Ghana Institute of Linguistics, Literacy and Bible Translation (GILLBT)