رومپا 4
4
حضرت اِبراہیم ایمانی سپے۔
1خُدے سکوندونلا ٹانگپو گیورچیسّی سکورلا نگاتانگونّی اتا اپو ، حضرت اِبراہیم لوبسکھانبوا نگاتی چی زیرگوس؟ 2کالتیس حضرت اِبراہیمی لاس زانگپوگونّی کھو خُدے سکوندونلا ٹانگپو تھیادنا، تینے کھوا پھوسو چوچیسّی تونجیگ یودڈو۔ اِین نانگ خُدے تھابسپو تیزوگ مانوگ۔ 3چیازیرنا ہلژخمہ شوقبُو بوے نانّگا مولدوگ، ”حضرت اِبراہیم خُدے وعدہ زادکھانبویکا ایمان چوسپا، کھوا خُدے می ٹانگپوجیگ تھیا زادس۔#4:3 گوزوگ زیرکھانّی شوقبُوئ 15: 6 تانگ 22 “
4لاس چوکھانّی میجیگّا تھوبکھانّی لاچھابو سکییسشیگ مانپا، کھوے لاس چوکھانّی تھوبتانگبو اینوگ۔ 5اِین نانگ میگون کھورانگونّی لاسّی جاستے مانپا، کھونگونلا ٹانگپو چوا زادکھان خُدے نانّگا ایمان چوچیسپوے ٹانگپو تھیا زادّانوگ۔ 6تینّا تسوگسلا گیالپو داؤد یانگ، لاس ماچوا، خُدے، ٹانگپو تھیا زادکھان برکت چانگونّی سکورلا مولس،
7”کھا مینیانچیسلا مُعافی تھوبکھانگون تانگ
دِیگپا کابّا زادکھان گُون،
تسامشیگی برکت چان مانوگ۔
8مسیح، دِیگپاگون سیا مازادکھانّی میبو
تسامشیگی برکت چان مانوگ۔“ #4:8 زابور شوقبُوئ 32۔ 1
9تا چی، ای برکت پو یہُودی پا چیگپوے پھیا اینّوگا، یا لقپہ ہلژخمہ ماچوکھانّی یہُودی مانکھان گُونی پھیانگ؟ نگاجے زیرّاد، کھوے ایمانی جاستے حضرت اِبراہیمی خُدے ٹانگپو تھیا زادس۔ 10اِین نانگ تیبو نام جونگ؟ کھو ٹانگپو تھیا زادچیسپو، کھوا لقپہ ہلژخمہ ماچوے سنگونلا چونگسّا یا لقپہ ہلژخمہ چوستے ستینگنے جونگ؟ تیبو کھوا لقپہ ہلژخمہ چوستے ستینگنے مانپا، سنگونلا چونگ۔ 11لقپہ ہلژخمہ چوے سانگ سنگونلا، حضرت اِبراہیمی ایمان یودچیس یانگ خُدے کھوا ٹانگپو اینکھان، کھونگرانگی ژالنے مولّا زادچیسپو، لقپہ ہلژخمہ چوکھانّی ستاگس پو اینپین۔ تینّابویپھیا حضرت اِبراہیم نی لقپہ ہلژخمہ ماچوا ایمان چوکھانگونّی ابا ژوگس اینوگ۔ یانگ تیگون کھونگرانگونّی ایمانی جاستے ٹانگپو تھیا زادّانوگ۔ 12حضرت اِبراہیم لقپہ ہلژخمہ چوکھانگونّیانگ ابا ژوگس اینوگ، اِین نانگ لقپہ ہلژخمہ چوے سانگ سنگونلا حضرت اِبراہیمی یودکھانّی ایمان ژوگس کھونگون لانگ یونگّوس۔
13خُدے حضرت اِبراہیم تانگ کھوے اولاد گونلا دُنیا گانگپو سالچیسلا وعدہ زادس۔ اِین نانگ تیبو حضرت اِبراہیمی شریعت کھانیانچیسپوے جاستے مانپا، ایمان گیُودتے خُدے نیامپو ٹانگپو ڈیل یودچیسپوے تھوبتے اینوگ۔ 14کالتیس خُدے وعدہ بو شریعت کھانیانکھان چیگپوے پھیا اینپینّا، تینے ایمانی گھوسدوم میدڈو یانگ خُدے وعدہ بو تونمید اینڈو۔ 15خُدے تھوگسثو، شریعت چاگچیسپوے جستے بابسّانوگ۔ اِین نانگ کالتیس شریعت میدنا تیبو کازوگی چاگین؟
16تینّابویپھیا وعدہ بو ایمان گیُودتے تھوبّانوگ۔ ایبو رین ماتانگاخدے شزدے اینوگ۔ یانگ شریعت پو کھانیانّادڈو یا میدڈو، کالتیس نگاتانّگا حضرت اِبراہیم تسوگسلا ایمان یودنا، نگاتانگ تشانگمالا تے سکیسپو تھوبچیس تانتان اینوگ۔ چیازیرنا حضرت اِبراہیم نی ایمان چوکھان تشانگمے ابا اینوگ۔ 17تینّابویپھیا خُدے ہلژخمہ شوقبُو بوے نانّگا حضرت اِبراہیمی مولس، ”نگے کھیورانّگا میرگیود مانگپوے ابا چواد۔#4:17 گوزوگ زیرکھانّی شوقبُوئ 17۔ 5 “ ایبو جونگ چیازیرنا حضرت اِبراہیم شیکھانگون سونتیا لانّگا زادکھان یانگ چانگ میدکھانّی نانگنے سوما جونگ چوگّا زادکھانّی خُدے نانّگا ایمان چوس۔
18ریوا بورچیسّی گیونتشان مید زان یانگ، حضرت اِبراہیم ریوا چوین دُوگس پاسانگ، کھو میرگیود مانگپوے ابا گیور، کازوگ خُدے کھوا مولس، ”کھیورانّگا اولاد ما مانگپوجیگ یونگین۔#4:18 گوزوگ زیرکھانّی شوقبُوئ 15: 5 “ 19یانگ حضرت اِبراہیم لو ہالام گیا زامشیگ سونتے کھوے زوگسپو گاستے شیچیس ژوگس یانگ، کھوے ناما سارہ ٹھوگو جورچیسّی کھیودنے تھالنانگ، حضرت اِبراہیم ایمان یول مایولّا ستانپو لوس۔ 20حضرت اِبراہیم خُدے وعدہ بویکا تھےژومس مانے ماچوس، ماتشاد کھوے ایمان بو مانّگا شیدچان گیورتے کھوے خُدائی ستودکھہ چوس ۔ 21خُدا وعدہ زادکھانبو ڈانڈا ڈوبچوگنیانّا زادچیسپویکا کھوا تانتان لوکھیل یودپین۔ 22یانگ حضرت اِبراہیم ایمانی جاستے خُدے کھوا ٹانگپو تھیا زادس۔ 23خُدے کھوا ٹانگپو تھیا زادکھان ڈیازادچیسپو، حضرت اِبراہیم چیگپوے پھانتھوگسّی پھیا مانپا، 24نگاتانگی پھانتھوگسّی پھیانگ اینپین۔ کالتیس حضرت عیسیٰ سی نگاتانگونّی مسیح، شیکھانگونّی ٹونے لانّگا زادسکھان خُدے نانّگا نگاتی ایمان چونا، کھونگی نگاتانگونّانگ ٹانگپو تھیا زادچیسپو نی، نگاتانگی پھانتھوگسپو اینوگ۔ 25خُدے حضرت عیسیٰ، نگاتانگونّی دِیگپے پھیا، ڈونگسّالا ستادا زادس۔ یانگ نگاتانگون ٹانگپو گیورچیسلا کھونگی حضرت عیسیٰ سونتیا لانّگا زادس۔
Ladakhi Bible by The Love Fellowship is licensed under Creative Commons Attribution-ShareAlike 4.0 License.