Mataio 27
27
Kua Kave ia Iehu kia Pilato ke Fakamahino
(Mlk 15.1; Luk 23.1, 2; Ioa 18.28-32)
1I te tāeaopō o te aho na hohoko ai, na fai ai te tonu a nā ohitāulaga pule ma te kau toeaina uma, ke tāmate ia Iehu. 2Oi na fakatonu ai e kilātou ke noanoa ia Iehu ma takitaki kehe mai kinā, ma na tukulima atu ai kia Pilato te kōvana Loma, ke fakamahino e ia.
Ko te Mate o Iuta
(Gāl 1.18-19)
3Kua iloa e Iuta te fakalata ko Iehu kua fakahala, oi na lagona ai e ia tona halamō lahi, ma na fano ai kua toe fakafoki nā tupe hiliva e tolu hefulu ki nā ohitāulaga pule ma te kau toeaina. #Gāl 1.18, 19 4Kua lea vē atu ia Iuta, “Ko au kua agahala ona kua fakalata e au he tino e hēai hana agahala, ma ka oti tauānoa ai ia.”
Kua tali mai kilātou, “E hēai lele he mātou fekau ki ei. Faitalia lava koe ma te mea tēnā.”
5Kua togi e Iuta nā tupe hiliva ki lalo i loto o te Mālumalu, oi na fano kehe ai; kua fano oi hihi lava ia.
6Kua fakaputuputu e nā ohitāulaga pule nā tupe hiliva ma lea vē, “Ko te tupe tēnei o te fakamaligi toto ma e fakahā i te Tūlāfono ke tuku ki nā fakaputuga tupe o te Mālumalu.#27.6 ke tuku… te Mālumalu pe ke fakaaogā mo te Mālumalu” 7I te umaga o te lātou talanoaga, na maua ai te lātou tonu ke fakaaogā te tupe ke fakatau ai te fenua o te tino gaohi ipu ōmea, ke fai ma fenua tanu o tagata nukukehe. 8Ko te mea ia na fakaigoa ai te kelekele tēnā ko te “Fenua o te Toto” ke pa mai lava ki nā aho nei.
9Oi na taunuku ai te kupu a te pelofeta ko Ielemia na lea ai vē, “Na kave e kilātou nā tupe hiliva e tolu hefulu, te tau o tē na fuafua tona tau i te māliliega a iētahi o tagata o Ihalaelu, #Hkl 11.12, 13 10kua fakatau ai te fenua o te tino gaohi ipu ōmea, e vē ona fakatonu mai ai au, e te Aliki.”
Kua Fehiligia ia Iehu e Pilato
(Mlk 15.2-5; Luk 23.3-5; Ioa 18.33-38)
11Na kave ai ia Iehu ki mua o te kōvana Loma, ma na fehili atu ai te kōvana kia te ia, “Ko koe moni ko te tupu o tagata Iutaia?”
“Ko tēnā lava e lea ai koe,” na tali mai ai ia Iehu. 12Kae i te mōliaga o ia e nā ohitāulaga pule ma te kau toeaina, na hēki iei lele hana tali na fai kia te kilātou.
13Oi na lea atu ai ia Pilato kia te ia, “E kē lagona atu pe fia ia mea kua mōlia ai koe e kilātou?”
14Kae na hēki fofou ia Iehu ke tali kia te kilātou i he kupu e fokotahi, ma na kavea tēnā ma mea na ofo lahi lele ai te kōvana.
Kua Fakahala ia Iehu i te Oti
(Mlk 15.6-15; Luk 23.13-25; Ioa 18.39—19.16)
15Nae iei te faiga nae māhani ai lava te kōvana Loma i te taimi o te Kaiga Fakamanatu o te Pāheka. Nae tatala e ia ho he pāgotā e fokotahi, e fofou te kaifenua ke fakahaoloto e ia. 16I te taimi tēnā, nae iei he pāgotā lauiloa nae igoa kia Palapa.#27.16 Palapa I kinei ma te fuaikupu 17, e lahi nā fakamaumauga e lea mai Iehu Palapa 17Kua māopōpo mai te kaifenua, oi na fehili atu ai ki ei ia Pilato, “Ko ai te fofou koutou ke kō tatala fakahaolotoa mo koutou? Ko Palapa pe ko Iehu, tē e takua ko te Mehia?” 18Na ia iloa lelei lava ko te loto kino o nā takitaki Iutaia, te na kilātou kavakea ai ia Iehu kia te ia.
19Ka koi nofo ia Pilato ma māfaufau ki hana fakaikuga, kae kaumai ki ei te faifekau mai tana āvaga: “Nahe iei lele hau mea e fai ki te tino tēnā e hēai hana agahala, auā ko au na puapuagā lele i taku miti na fai i te pō, e uiga kia te ia.”
20Ma na tauānau ai e nā ohitāulaga pule ma te kau toeaina te kaifenua, ke lea kia Pilato ke tatala ake ia Palapa, kae ke tāmate ia Iehu. 21Kua fehili atu ia Pilato ki te kaifenua, “Ko ai o te toka lua tēnei e fofou koutou ke kō tatala atua mo koutou?”
Na tali mai kilātou, “Ko Palapa!”
22“Ko heā la te tatau ke kō faia kia Iehu, tēia e takua ko te Mehia?” na fehili vēnā atu ia Pilato.
Na tali mai kilātou, “Fakahātaulo te tino tēnā!”
23Kae kua fehili atu ia Pilato, “Aiheā, ko he holitūlāfono ā ta ia kua fai?”
Oi na kāmata ai kua taukālalaga leo lahi kilātou: “Fakahātaulo te tino tēnā!”
24I te kiteaga e Pilato kua hē aogā ke fakaauau pea, ona ko tagata kua tau hē mafai ke tāofiofi, oi na tago ai ki nā vai kua fafano ai ona lima i mua o te kaifenua ma lea vē atu, “E mamā au ma te toto o te tagata tēnei! E a koutou lava te mea tēnā!” #Teu 21.6-9
25Kua tali uma mai te kaifenua, “Ke i luga o kimātou ma a mātou fānau, te toto o te tagata tēnā!”
26Oi na tatala fakahaoloto ai e Pilato ia Palapa kia te kilātou; kae kua fakatonu e ia ke kini ia Iehu, ma tuku atu ai loa ke fakahātaulo.
Kua Fakatauemu nā Fitafita kia Iehu
(Mlk 15.16-20; Ioa 19.2, 3)
27Oi na kave ai ia Iehu e nā fitafita a te kōvana ki loto o te fale o te kōvana, ma na fakapotopoto uma ai te vāega tēnā o nā fitafita fakatāmilo ia Iehu. 28Ma na tatala kehe ai e kilātou nā kofu o ia ma fakakofu i he kofuloloa lanu kukula mālohi. 29Oi na fai ai e kilātou he pale i nā lālā o he lākau tālatala ma fakapale ai tona ulu. Kua tuku e kilātou ki tona lima taumatau he mealākau, oi na tōtutuli ai i mua o ia ma fakatauemu ki ei. Na lea vē atu ai kilātou, “Ke manuia te Tupu o tagata Iutaia” 30Ma na tūfeanu ai kilātou kia te ia ma ta tona ulu i he mealākau. 31Kua uma te fakatauemu o kilātou kia Iehu, oi na toe ui kehe ai e kilātou te kofuloloa, kae kua toe fakakofu lava i nā kofu o ia. Oi na takitaki ai e kilātou ki fafo ke fakahātaulo.
Kua Fakahātaulo ia Iehu
(Mlk 15.21-32; Luk 23.26-43; Ioa 19.17-27)
32Ka koi ōatu kilātou ki fafo o te kakai, kae fetaui ma he tamāloa mai Kulene, ko Himona tona igoa. Oi na fakamālohia ai e nā fitafita ia Himona, ke amo e ia te hātaulo o Iehu. 33Ma na taunuku atu ai kilātou ki he koga nae takua ko Kolokota, ko te uiga o te igoa tēnei ko te, “Koga o te Ulupoko.” 34I kinā na tuku atu ai e kilātou kia Iehu he uaina na palu ki ei he mea kokona; kae na tofo oioti ki ei ia Iehu, kae na hēki inu ki ei.#Hal 69.21
35Oi na fakahātaulo ai e kilātou ia Iehu, ma na fai ai te lātou vili ke vāevae ai nā kofu o Iehu kia te kilātou.#Hal 22.18 36Kua uma te mea tēnā, oi na nonofo ai lava i kinā, oi leoleo ia Iehu. 37I luga ake o tona ulu kua kilātou tūhia ai te mea na mōlia ai e vēnei, “Ko Iehu tēnei, te Tupu o Tagata Iutaia.” 38Oi na fakahātaulo ai e kilātou ni tino kaihohoa e toka lua fakatahi ma Iehu, ko tētahi i tona itū taumatau ma tētahi i tona itū tauagavale.
39Ko nā tino na kui ake i kinā na lūlū o lātou ulu ma fai a lātou kupu fakatauemu kia Iehu. #Hal 22.7; 109.25 40Na lea vē atu kilātou, “Ko koe tēnā na lea e kē talepea ki lalo te Mālumalu, oi toe fakatū ai i nā aho e tolu? Fakaola lava la koe e koe. Kāfai koe ko te Ataliki o te Atua, fanaifo la ki lalo mai te hātaulo!” #Mat 26.61; Ioa 2.19
41Na vēnā foki oi fakatauemu nā ohitāulaga pule, nā faiākoga o te Tūlāfono ma te kau toeaina kia Iehu ma lea vē, 42“Na fakaola e ia iētahi tino, ka ko tēia e hē ia mafaia oi fakaola ia ia lava! E hē ko ia nei ko te Tupu o Ihalaelu? Kāfai e ia mafaia oi fanaifo ki lalo o te hātaulo, oi fātoā talitonu ai kitātou kia te ia. 43E talitonu ki te Atua ma lea ko ia ko te Ataliki o te Atua. Tātou kikila la pe i na fofou te Atua ke lāveaki e ia i te taimi nei!” #Hal 22.8
44E pa foki lava kinā tino kaihohoa na fakahātaulo fakatahi ma Iehu, na fakatauemu foki vēnā kia te ia.
Ko te Mate o Iehu
(Mlk 15.33-41; Luk 23.44-49; Ioa 19.28-30)
45Kua ta te itūlā e hefulu lua i te aoauli, oi na pōulitia uma ai te fenua kātoa ke pa ki te tolu i te afiafi. 46I te tolu i te afiafi, na kalaga leo lahi ai ia Iehu, “Eli, Eli, lama hapatani?” ko tona uiga, “Toku Atua, toku Atua, heā te kua kē tīakia ai au?” #Hal 22.1
47Ko iētahi tino nae tutū i kinā, na kilātou lagona atu ana kupu na kalaga ai, ma na lea vē ai, “Ko te tagata nei e taukalaga kia Elia!” 48I te taimi lava tēnā, na vili atu ai hētahi o kilātou ma he oma kua uma te lolō ki he uaina taugōfie; kua tuku e ia ki te pito o he mealākau, ma na hiki ake ai ke fakainu ai ia Iehu.#Hal 69.21
49Ka ko iētahi tino kua lea vē, “Fakatali! Tātou kikila pe i na hau ia Elia oi fakaola ia!”
50Oi na toe kalaga leo lahi ai ia Iehu, ma na tō ai loa tana mānava.
51Oi na haelua ai te kiepupuni i loto o te Mālumalu, mai luga ke pa ki lalo. Na lūlū foki te kelekele ma māvaevae nā papa, #Eho 26.31-33 52kua mātalatala ia gutu o tugamau, ma e tokalahi ia tagata o te Atua na feoti, kae kua toe fakatutū ki te ola. 53Kua olo kehe mai o lātou tugamau, ma i te toe tū maiga o Iehu mai te oti, na olo ai ki te Kakai Paia, ma na kitea kilātou e te tokalahi o tagata i kinā.
54I te kiteaga e te takitakikau o te toka helau fakatahi ma nā fitafita nae kilātou leoleoa ia Iehu, te mafuie ma iētahi mea na tutupu, oi na ofo lele ai kilātou ma lea vē, “E hako lava, ko te tagata tēnei ko te Ataliki o te Atua.”#27.54 ko te Ataliki o te Atua pe ko he ataliki o he atua
55E tokalahi nā fafine nae mulimuli kia Iehu mai Kalilaia ma nae fehoahoani kia te ia, nae i kinā ma nae taukikila mamao atu. #Luk 8.2-3 56Ko iētahi o kilātou iēnei, ko Malia te Makatala, ko Malia te mātua o Iakopo ma Iohefa, ma te mātua o nā ataliki o Hepetaio.
Ko te Tanuga o Iehu
(Mlk 15.42-47; Luk 23.50-56; Ioa 19.38-42)
57Kua pa ki te afiafipō, oi na taunuku ifo ai he tamāloa maukoloa mai Alimatea; ko Iohefa tona igoa, ma ko hētahi foki ia o hoko o Iehu. 58Kua fano kia Pilato ke tuku ake te tino o Iehu ke kave e ia. Oi na fakatonu ai e Pilato ke fōki te tino o Iehu kia Iohefa. 59Oi na kave ai e Iohefa te tino o Iehu, kua āfīfī i he kie lino mamā, 60ma tuku ki loto o te tugamau na fātoā uma te keli ki loto o he itū mauga papa mo ia lava, ma ko hēki fakaaogā lele. Oi na fuli ai e ia he fatupae lahi, kua pupuni ai te gutu o te tugamau ma na fano kehe ai loa. 61Ko Malia te Makatala, ma tētahi Malia, nae nonofo i kinā fakahaga ki te tugamau.
Kua Leoleo te Tugamau e nā Fitafita
62I te aho alafaki, ko te Hāpati tēnā, na olo ai nā ohitāulaga pule ma te kau Falehaio kia Pilato 63ma lea vē atu ki ei, “Te kōvana, e kimātou manatua ka koi ola tēnā tino talapepelo, na fai tana kupu vēia, ‘Ko au ka toe fakatū mai i te oti, kāfai e teka nā aho e tolu.’ #Mat 16.21; 17.23; 20.19; Mlk 8.31; 9.31; 10.33-34; Luk 9.22; 18.31-33 64Fakatonu kō ke leoleo fakalelei tona tugamau ke pa ki te tolu o aho, kae ke hē mafai ai e nā hoko o ia oi kaihohoa tona tino, ma lea ai ki tagata, ko Iehu kua toe fakatū mai i te oti. Ko te talapepelo mulimuli tēnei, ka hili atu lele te kino, i lo te talapepelo muamua.”
65Oi na lea atu ai ia Pilato kia te kilātou, “Kave ni fitafita ma olo oi fai te mea e koutou iloa, e malu lelei ai te puipuiga o te tugamau.”
66Oi na olo ai loa kua fakamau lelei te fatu e tapuni ai te tugamau; kua fakapipiki ki ei te fakamau fakailoga e fakahā ai he tino e tago ki ei, ma na tuku ai nā fitafita ke leoleoa.
Àwon tá yàn lọ́wọ́lọ́wọ́ báyìí:
Mataio 27: TOKU
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Bible Society New Zealand Charitable Trust
