मत्ती 20
20
मजदूर गी मिसाल
1सुरग गो राज एक अंगूरां गै बाग खातर दिनगै टेम मजदूरिया ल्याण गेयै एक जमिन्दार बरगो है 2बण चांदी गै रिपिया पर मजदूर कर'गे काम करण खातर बाग में घाल दिया। 3नो बजे जमिन्दार घरूं बारै गेयो तो बण देख्यो कै केई लोग बजार में इनै बिनै इंयाई बेकार में खड़या है। 4जद बण बानै केयो, “थे मेरै मजदूरी पर चालो। जितो थारो हिसो बणसी, मैं थानै दे दैयूंगा।” 5जद बे काम पर उड़ग्या, फेर बण दोफारै बारा बजे अर फेर तीन बजे बिंया करयो। 6फेर बो पांच बजे ओर बजार में गेयो। फेर बण लोगां नै भेळा खड़या देख्या। जद बण पूछयो, “थे बेकार में भेळा क्यामी खड़या हो।” 7बां केयो, “म्हानै मजदूरी पर कोई कोनी लेग्यो।” जद बण केयो, “मेरै बाग में मजदूरी पर चालो।” 8जद आथण होयो, तो जमिन्दार आपगै मुनीम नै केयो, “झिका मजदूरिया पेली आळा अर बाद आळा, सारा नै बुला'गे बांगी ध्याड़ी दे दे।” 9जद बण सारा नै एक एक चांदी गो रिपियो दे दियो। 10फेर झिका दिनगै लाग्या बां सोच्यो म्हानै कीं जादा मिलसी। पण सारा नै एक एक रिपियो ई मिल्यो। 11रिपियो तो बां ले लियो पण जमिन्दार सागै ओखा होगे केण लागग्या। 12झिका म्हारूं बाद में आया, बां एक घंटो ई काम करयो। फेर बी थे सारा नै एकसी मजदूरी दी। म्हे तो सारै दिन तावड़ै में काम करयो। 13बामूं एक जणै नै जमिन्दार केयो, “मैं थारै सागै कोई भेदभाव कोनी करयो। आपणी पेलां ई एक रिपियै में बात खोलेड़ी है। 14झिको हक बणै बो लेल्यो अर जाओ। झिका नै बाद में ल्यायो बानै बी एक रिपियो देस्यूं झिको थानै दियो है। 15मनै मेरो धन कितो कितो बांटणो है, इंगो हक मनै है। मैं आच्छो काम करूं, ईंखातर थे लोग मेरै पर रीस बळो। 16ईंखातर झिका पेला है बे बाद में होज्यैगा अर झिका बाद में है बे पेला होज्यैगा।”
आपगी मोत गै बारै में यीसू गी तीसरी बात
(मरकुस 10:32-34; लूका 18:31-34)
17जद यीसू आपगै बारा चेला सागै यरुसलेम जावै हो तो बानै एक पासै ले जा'गे चालता चालता केयो। 18“सुणो। आपां यरुसलेम पूगण आळा हां। मिनख गै बेटै नै बठै मुख्य याजकां अर नेम सिखाण आळां गै हाता में पकड़ाइज्यैगो। बे बिनै मोत गी सजा दैयगा। 19फेर बे गेर यहुदियां गै हात में बिनै सोंप दैयगा अर बे बिंगी बेजती करैगा अर कोड़ा मारैगा अर करूस पर चढा दैयगा पण बो तीसरै दिन पाछो जींवंतो होज्यैगो।”
20फेर जबदी गै बेटै गी मां आपगै बेटा सागै यीसू कनै आयी अर झुकगे प्रणाम करयो अर कीं मांग्यो। 21यीसू बिनै केयो, “तूं के चावै? बा बोली कै मैं चाऊं मेरा दोनूं बेटा नै तेरै राज में एक थारै सजै पासै एक खबै पासै बिठा लेई।” 22यीसू बोल्यो, “तूं कोनी जाणै तूं के मांगण लागरी है? मैं झिको दुख सेऊंगा, बो थे सेल्योगा के?” बां केयो, “हां म्हे सेल्यांगा।” 23यीसू बानै केयो, “थे ओ दुख तो सेल्योगा, पण मेरै दाहिणै अर बाए बिठाण गो मेरै कनै हक कोनी। अठै बेठण गो हक तो बानै है झिका नै मेरो पिता परमेसर बिठासी।” 24जद बां दूसरा दस चेला ओ सुण्यो तो बां दोनां पर भोत रीस बळया। 25जद यीसू बानै बुला'गे केयो, “थे जाणो हो कै, गेर यहुदी राजा बां लोगां पर आपगी ताकत दिखाणी चावै। अर बांगा मुख्य नेता लोगां पर आपगो हक जताणो चावै। 26पण थारै बिचाळै इंया नई होणो चईयै। पण थारै मू झिको मोटो बणणो चावै बिनै दास बणणो पड़ैगो। 27अर थारै मू झिको प्रधान बणणो चावै बिनै सारा गो दास बणणो पड़ैगो। 28जिंया मिनख गो बेटो है, बो आपगी सेवा कराण कोनी आयो पण सेवा करण आयो है। अर भोत लोगां खातर आपगा प्राण देगे लोगां नै बचाण खातर आयो है।”
29जद यरीहो नगर ऊं जाण लागरया तो एक भोत मोटी भीड़ बांगै लारै चाल पड़ी। 30बठै सड़क गै किनारै दो आंधा आदमी बेठया। जद बानै ठा लागग्यो कै यीसू जावै है। तो बां रोळो मचागे केयो, “हे प्रभु, दाऊद गा बेटा म्हारै पर दया कर।” 31जद भीड़ में लोगां बानै धमकाया कै चुप रेओ। पण बे ओर जोर ऊं रोळो मचाण लागग्या। प्रभु दाऊद गा बेटा म्हारै पर दया कर। 32जद यीसू रुकगे केयो, “थे के चावो मैं थारै खातर करूं।” 33बां केयो, “प्रभु म्हे चावां म्हानै दिखण लागज्यै।” 34यीसू नै बां पर दया आ'गी। जद बण बांगी आंख्या पर हात लगायो, बिं टेम ई बानै दिखण लागग्यो। अर बे बिंगै लारै चाल पड़या।
Àwon tá yàn lọ́wọ́lọ́wọ́ báyìí:
मत्ती 20: BGQ
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2023 (Active), Wycliffe Bible Translators, Inc. All rights reserved. © WIn Publishing Trust
