2 कुरिन्थि 10
10
आत्मिक युद्ध
1आय तोज पौलुस जो तुमा आगाडी नम्र होय पण फासओ तुमाही हिमंत कोअत्लू का तुमामे ख्रिस्ताची नम्रता अने समस्यामुळ समजाडत्लो. 2आय ए विनंती कोअत्लू का तुमा आगाडी माहु निर्भय ओत हिमंत कोअला पोडहू कायना जेहलो आय किबी माहाहूपो जे आमाहा डील प्रमाणे सालणारो होमजीतेहे हिमंत देखाडीलो विचार कोअत्लू. 3काहाके जेबी आमाहा डीलमेऱ्यो सालीलो, फिरत्लो तेबी डीलोहोसे सुलायलो नाहा. 4काहाके आमू भानगडीइ हत्यार शारीरक नाहा पण किल्ले पोडीत ताकिला कोअता परमेश्वरोओ त्यापोरत सामर्थी होय. 5त्यापोत आमाहा फुसिलो अने हर एक गोठी जे परमेश्वरोओ ओलखीनाऱ्या विरोधाम उभे रोनारे तियाहा खण्डन कोअत्लू अने हर एक विचारांना बंदी कोईत ख्रिस्ताचे आज्ञाकारी बनाडत्लू, 6अने तीयार रोतलू का जांहा तुमाआ आज्ञा पालीत पुरोओत जानारू ताहा हर एक एहलाम आज्ञा उल्लंघन दण्डित कोए.
पौलुसोओ अधिकार
7तुमु तियाआ गोठीही पाला ज्या डोआ आगाडी होय जर कोडाआ स्वतः उपो भोरुसो होय का आय ख्रिस्ताआ होय तियाहा पण मालुम जोवे का जेहलो तो ख्रिस्ताआ होय तेहलूज आमाहा पण होय. 8काहाके जर आमू तिया अधिकारा विषयी फासी गर्व देखाडनारू जो प्रभूऊ तुमाआ बिगडाविला नाहा बोनाविलाकाजे आप्लु होय ताहा लाजवालो नाहा. 9ओ तुमामे यकोअता कोत्लू का पत्राआरी तुमामे बिवाडानारू आय ओवुहू कायना. 10काहाके ते कोअता तियाआ पत्र ताहा जाखोज अने जोरदार होय पण जांहा तो आगाडी रोतो ताहा तो डीलमेऱ्यो दुर्बळ अने तियाआ व्यक्तव्य ओलको लागेहे. 11जो एहलो कोत्लू तियाहा मालुम रोहू का एहलो आमा फासओ आमा पत्रामेह आमाहा वचने होय तेहलूज तुमा आगाडी आमाहा काम पण होय.
पौलुसोओ अधिकारोंओ सीमा
12काहाके आमाहा एवडी हिमंत नाहा का आमाहा स्वतः ला एहलो मांहाआरी गणतलू जानारू किंवा त्याआरी आपाहा मिलायेहे जे स्वतः ची प्रशंसा स्वतः कोअता अने स्वतःहा आपसामेहे मापोवांही तोलीत एकादिहरा मिलून फोगु ठरवील्यु. 13आमू जर बाडारी बारथे गर्व कोनारू नाहा ताहा पण यता हिवाजागे जी परमेश्वराने आमा कोअता ठरविले होय अने तीयाम तुमु पण आविलो गोये होय अने त्याज प्रमाणोओ गर्व पण कोअनारू. 14काहाके आमू आपाआ सीमा बारथे स्वतःहा वाडविनारू इच्छा कोईत नाहा जेहलो का तुमा जागेजा पुगाडलो अवस्थाम रोल्या ओते पण ख्रिस्ताची सुवार्ता होमलित तुमा जागेजा पूगी गोये ओते. 15आमू सीमा बारथे दिहरा कष्टापो गर्व कोईत नाहा पण आमाहा आशा होय का जेहलो-जेहलो तुमाआ विश्वास वाढल्या जाइअलो तेहलूज-तेहलूज आमाहा आपाआ सीमा अनुसार तुमा कोअता फासी वोदतो जानारू, 16म्हणजे आमाहा तुमाआ सीमा आगाडी जात सुवार्ता होम्लाड़नारू अने एहलो नाहा का आमाहा दिहीरा सिमेमेहे बनवल्या का मापो गर्व कोअनारू. 17पोन जो गर्व कोअनारू, तिये प्रभूपो गर्व कोईओलो. 18काहाके जो आपाआ प्रशंसा कोअत्लू तो नाहा पण तियाआ प्रशंसा प्रभू कोअत्लू, तोज ग्रहण ओवत्लु.
Àwon tá yàn lọ́wọ́lọ́wọ́ báyìí:
2 कुरिन्थि 10: NOINT
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Noiri (नोयरी) Bible by The Love Fellowship is licensed under Creative Commons Attribution-ShareAlike 4.0 License.