ROMA 14
14
Neʼe mampetisala kasangkompomu
14:1-12
1 #
Kol. 2:16
Tau anu malente peaya ndayanya da ndisabe mpodago ri oyomi. Neʼe ndipopaisoka ua gorimo mparata ndayanya. 2Reʼe tau anu malulu parata ndayanya maya mangkoni mpengaya-ngaya. Paikanya reʼe tau anu malente peaya ndayanya, natoʼo ri rayanya siʼa podo da mangkoni waʼa inau. 3Tau anu mangkoni mpengaya-ngaya neʼe mampetikodi tau anu maria ngaya napompalika; pai tau anu maria ngaya pangkoni anu napompalika, bareʼe woʼu maya mampetisala tau anu mangkoni mpengaya-ngaya, maka siʼa ndatarimamo i mPue Ala. 4Ara isema komi painaka da mampetisala anamayunu ntau ntaninya? Bara madungka bara mekakore ntano inceʼe puenya anu maincani. Pai lawi anamayunu setu sangaya-ngaya da mekakore maka i Pue Ala makuasa mampapekakore.
5Reʼe tau anu mampariwawo sambaʼa eo, meruu pai waʼa eo anu ntaninya, pai tau ntaninya mampasiwia pura-pura eo bereʼe posisalanya. Inceʼe bareʼe makuja, papaliukamo sambaʼa-sambaʼa seʼe malulu parata ndayanya. 6Tau anu mampariwawo sambaʼa eo, inceʼe nawianaka ua pantubunakanya i Pue. Ewanceʼe seʼe tau anu mangkoni mpengaya-ngaya, powianya setu ua mantubunaka i Pue, maka siʼa maunde i Pue ua waʼa mpangkoni setu. Ewanceʼe seʼe tau anu mampilisi pangkoni anu maya da nakoni; tau setu woʼu mantubunaka pai maunde i Pue Ala. 7Bereʼe sambaʼa tau ri oyota anu tuwu podo tila ngkoronya ngkalionya; bara da mate tila ngkoronya ngkalionya. 8Katuwuta inceʼe anu i mPue. Pai ane mate kita inceʼe seʼe woʼu anu i mPue. Mewali tuwu bara mate kita seʼi i Pue tumpunya. 9I Kerisitu mate pai tuwu muni, inceʼe puʼunya painaka Sira mewali Pue ri pura-pura anu tuwu pai ri pura-pura anu mate. 10#2 Kor. 5:10 Mewali, ee waʼa ngkasangkompo! Wenu painaka da nupetisala kasangkompomu anu sambaʼa-mbaʼa mpeaya pai siko? Pai nunjaa yowenya da mampetikodi siʼa? Maka kita pura-pura sangaya-ngaya da mancuaraki gadera mpobotusi i mPue Ala. 11#Yes. 45:23 Lau ndaʼuki ri Sura Magali,
“Pantoʼo i mPue Ala,
sambaʼa-sambaʼa tau da manyomba ri suara-Ku;
pai pura-pura tau da mangaʼaku kayakunya Pue Ala.”
12Mewali, kita pura-pura sambaʼa pai sambaʼa da mampesonoka waʼa mpowiata ri suara mPue Ala.
Neʼe nupowia anu da malinguni kasangkompomu
14:13-23
13Inceʼe puʼunya painaka neʼe kita mombepetisala sambaʼa pai sambaʼa. Moruana tamompari-mpari naka neʼe reʼe powiata anu mangkelo raya ngkasangkompota rantani manawu ri kasalaa. 14Maka yaku sambaʼa-mbaʼa pai i Yesu, painaka kuaya kojo bereʼe anu lawi karika ungka ri pontepuʼunya, paikanya reʼe anu karika ri sambaʼa tau, ane naepe ndayanya karika. 15Paikanya ane pangkonimu sangaya pangkoni, siko mampakajuʼa raya ngkasangkompomu anu sambaʼa-mbaʼa mpeaya pai siko, powiamu anu ewancetu banya mopuʼu ri towe ndaya. I Yesu matemo tila ngkatesorepaka ntau setu, neʼemo nupapaliu siʼa da manawu ua pangkitanya pangkonimu. 16Inceʼe puʼunya painaka neʼe podo maendo koromi ngkaliomi. 17Maka ri raya mPoparenta mPue Ala kono pangkoni pai panginu banya inceʼe anu ndapariwawo. Anu ndapariwawo inceʼemo pepoʼinaya ri pepokono mPue Ala, tuwu ri kalindo ndaya mancabe ri wongko ndaya pombai Inosa mPue Ala. 18Tau anu mamporiokoi i Kerisitu ewanceʼe, tau setu mampakawongko raya mPue Ala, pai da napomawo waʼa ntau ntaninya.
19Kamonconya anu tatinako ndaya inceʼemo waʼa mpowia anu mampapebete kasambaʼa-mbaʼa ri pombewangunaka. 20Neʼe podo ua anu ndakoni, siko majaʼatimo tetala anu roo ndawianaka i mPue Ala. Pura-pura pangkoni lawi maya ndakoni; paikanya ane pangkonimu setu mampakanawu kasangkompomu ri raya ncalaa, powiamu anu ewanceʼe masala. 21Moruana neʼemo nukoni sanga mpinatuwu pai manginu anggoro, pai powia anu ntaninya anu da mampapopuʼu sambaʼa kasangkompomu anu sambaʼa-mbaʼa mpeaya da masalaa. 22Mbolimo nunjaa anu nuaya setu, wianakamo ri suara mPue Ala tilamu ngkaliomu. Tau anu maepe bareʼe mowia sala pai naepe kojo kamonconya, tau setu da lindo rayanya. 23Paikanya tau anu kanuʼu-nuʼu rayanya kono sangaya pangkoni, paikanya ripurinya nakoni pangkoni setu, tau setu da ndapetisala i mPue Ala; maka tau setu bareʼe mowia malulu peaya ndayanya kono nunjaa anu monco pai anu sala. Pai nunjaa ntano anu ndawianaka bareʼe mopuʼu ri peaya ndaya inceʼe salaa.
