ROMA 11
11
Kabuya ndaya mPue Ala ri banca nto Isaraeli
11:1-12
1 #
Plp. 3:5
Seʼi da kupeoasi, Bara ndatajimo kojo i mPue Ala tau seʼe? Manoto bareʼe! Yaku ngkalioku sambaʼa to Isaraeli muli i Burahima ungka ri lemba i Benyami. 2Bareʼe kojo! Bareʼe da ndataji i mPue Ala tau-A anu lawi roo ndapilisi ungka ri tepuʼunya. Ndiincani waʼa ngkasangkompo, nunjaa anu ndaʼuki ri Sura Magali kono i Elia, ri pampetumbunya katedikanaka nto Isaraeli ri Pue Ala. Natoʼo i Elia, 3#1 Raj. 19:10, 14 “Pue, waʼa nabi-Mi puramo napepate waʼa ntau, pai pura-pura waʼa lampaʼani mpanyomba ri Komi puramo ndagero. Jamo yaku ngkalioku yabinya, pai napepali woʼu ntau seʼe jaya da mampepate yaku.” 4#1 Raj. 19:18 Ewambeʼi pesono i mPue Ala ri Elia? Ndatoʼo i mPue Ala, “Njaupa Kudika papitu ncowu tau-Ku. Waʼa ntau seʼe bareʼepa reʼe panyombanya ri Lamoa Baali.” 5Ewanceʼe ri tempo seʼi: Njaupa santila kodi waʼa ntau anu ndapilisi i mPue Ala ua katowe ndaya-A. 6Sira mampilisi waʼa ntau seʼe ua towe ndaya-A banya ua kadago mpowia ntau seʼe. Maka ane pompilisi i mPue Ala setu merontada ri powia ntolino, inceʼe posokinya katowe ndaya mPue Ala banya towe ndaya anu maliogu. 7Mewali, ewambeʼimo pantoʼota? Waʼa nto Isaraeli bareʼe marata nunjaa anu napepali. Anu marata inceʼe podo santila kodi ri waʼa ntau anu roo ndapilisi i mPue Ala. Anu ntaninya mapenimo rayanya, bareʼemo nadonge peboo mPue Ala. 8#Paw. 29:4, Yes. 29:10 Maka lau ndaʼuki ri Sura Magali ewaseʼi, “Ndapakapenimo i mPue Ala raya ntau seʼe; pai nawa-nawanya ndapakatengomo; pai rantani wawaseʼi mata ntau seʼe bareʼemo yosa pai bongomo talinganya.” 9#Pol. 69:23-24 I Mokole Daudi woʼu mantoʼo,
“Mbolimo waʼa mposusa ntau seʼe da mewali tolia ri tau seʼe ngkalionya,
pai da mewali tilombu da kanawu pai da kagero ntau seʼe!
10Mbolimo naka wengi mpeolenya da naka neʼe yosa peolenya;
mbolimo da naka bungku rantani masae-sae.”
11Kupeoasi woʼu ri sindara ngkanawu nto Yahudi, ara pewalinya seʼe da nakagero ntau seʼe? Manoto bareʼe! Paikanya ua kasalaa ntau seʼe, banca ntaninya anu tesorepaka, painaka mebete kanyau ndaya nto Yahudi ri banca ntaninya setu. 12Banca nto Yahudi masalaa maka bareʼe malulu pepokono i mPue Ala, painaka waʼa banca ntaninya ndadonco i mPue Ala. Pagonya ane madago muni pokenta nto Yahudi pai i Pue Ala; da meruu woʼu kagana-gana mpopadonco anu da ndawai i mPue Ala!
Katesorepaka waʼa lemba ntaninya anu banya to Yahudi
11:13-24
13Mewali, seʼi-seʼi kumompau pai waʼa ngkasangkompo anu banya to Yahudi! Yaku seʼi lawi ndapakanoto da mewali suro tila waʼa banca anu banya to Yahudi, kupotetalaka kojo tetala seʼe, pai kusuʼulaka ri wawo ntanoanaku. 14Maʼai kupampomata-mata da naka kukoto mampapebete kanyau ndaya nubancaku ngkalioku, da naka pewalinya ewanceʼe da reʼe jayaku mancorepaka santila ri tau seʼe. 15Ua pantumbalaka i mPue Ala tau seʼe, madago muni pokenta mPue Ala pai lino; pagonya ane da ndatarima i mPue Ala tau seʼe! Inceʼe siwiamo pai tau seʼe anu mate wali ngkatuwu muni!
16Ane saowo roti anu uyu-uyunya ndapepombaika ri Pue Ala, posokinya ngkewaʼa-waʼa roti setu da ndapepombaika ri Pue Ala. Pai ane kalenya i Pue Ala tumpunya, inceʼe posokinya waʼa raʼanya seʼe paka Sira tumpunya. 17Santila ungka ri waʼa ndaʼa ngkaju lana – inceʼemo to Yahudi – roomo ndasoʼati. Pai ri waka ngkasoʼanya seʼe ndapomuya raʼa ngkaju lana yopo, inceʼemo waʼa ngkomi anu banya to Yahudi. Komi ndapomuya njairia da ndiparata dago ngkatuwu ntanoana waʼa nto Yahudi. 18Inceʼe puʼunya painaka neʼe ndipesaru-saru waʼa ntau seʼe anu ewa raʼa ndasoʼa setu. Neʼe ndikalingani komi podo raʼanya. Pai banya raʼa anu mampakoni kalenya, paikanya kalenya anu mampakoni raʼanya.
19Paikanya da nditoʼo, “Io monco, paikanya waʼa raʼa setu ndatandosi da naka dago ndapampecangkoka yaku ri wotonya!” 20Incetu lawi monco. Paikanya tau seʼe ndataji ua bareʼe meaya, pai komi ndatarima ua peayami. Mewali inceʼe neʼe ndipobangke-bangkeka; moruana pewalinya ewanceʼe da ndipokaeka ndaya. 21Maka ane bareʼe ndapepurungi i mPue Ala mantaji to Yahudi ewa raʼa ntepuʼu setu, neʼe ndisarumaka da ndapepurungi woʼu mantaji komi! 22Mewali, ireʼi takitamo kojo ewambeʼi kadago ndaya i mPue Ala pai ewambeʼi kabareʼenya maya ndapesaru-saru Sira. Ndahuku tau anu masalaa, paikanya mabuya raya-A ri komi – podoia komi da todo tuwu ri kabuya ndaya-A. Maka ane bareʼe, komi seʼe da ndataji. 23Pai kakononya waʼa nto Yahudi, ane napeʼontoka ntau seʼe meewa, tau seʼe da ndatarima muni; maka i Pue Ala Makuasa da mantarima muni tau seʼe. 24Komi anu banya ungka ri banca nto Yahudi ewa raʼa ngkaju lana yopo. Ane sako komi madago ndapampatuwu ri woto ngkaju lana, pagonya woʼu waʼa nto Yahudi anu ndapaporapaka ewa raʼa ntepuʼu ngkaju lana. Manoto inceʼe anu saru-saru ri Pue Ala, da mampapewalili muni tau seʼe ri woto ngkaju lana ntau seʼe ngkalionya.
Puru ndaya mPue Ala da tila ntau pura-pura
11:25-32
25Ee waʼa ngkasangkompo! Kupomata-mata neʼe ndisarumaka ndiincanimo pura-puranya. Maka reʼe anu ndatinako ndaya i mPue Ala, paikanya bareʼe naincani ntau. Da rayaku naka ndiincani: Inceʼemo santila ri to Yahudi mapeni woʼo, paikanya pewalinya ewanceʼe, podo da naka imba ntau anu banya to Yahudi gana-gana anu da madadu i Pue Ala. 26#Yes. 59:20-21 Nepa pura-pura to Yahudi da ndasorepaka. Maka lau ndaʼuki ri Sura Magali ewaseʼi,
“Mokole Tadungkadago da rata ungka ri Sioni;
Sira da mampalisi pura-pura waʼa ngkajaʼa ungka ri muli i Yako.
27 #
Yer. 31:33-34
Yaku da mampakainti pojanji pai tau seʼe.
Ri tempo ngkabareʼenyamo kukitanaka waʼa ncalaanya.”
28Ua waʼa nto Yahudi bareʼe napokono mantarima Nuntu ngKatuwu ungka ri Pue Ala, tau seʼe mewali iwali i mPue Ala; pai inceʼemo anu mewali porasi ri komi anu banya to Yahudi. Paikanya ua tau seʼe anu ndapilisi i mPue Ala, inceʼe puʼunya painaka to Yahudi bareʼe bali pampotowe i mPue Ala ua tau piamo ntau seʼe. 29Maka ane i Pue Ala mampilisi pai madonco tau, bareʼe sangkani i Pue Ala da mawali yali nunjaa anu roo ndapowia. 30Komi i owi bareʼe mepoʼinaya ri Pue Ala. Paikanya seʼi-seʼi bareʼemo ndakitanaka waʼa ncalaami ua kabareʼenya mepoʼinaya waʼa nto Yahudi. 31Ewanceʼe seʼe waʼa nto Yahudi setu wawaseʼi tau seʼe bareʼe mepoʼinaya ri Pue Ala, da naka komi bareʼe ndakitanaka waʼa ncalaami. Paikanya tau seʼe woʼu ripurinya da tongawa bareʼemo ndakitanaka waʼa ncalaanya. 32Maka ndapapaliumo i mPue Ala pura-pura tolino bareʼe mepoʼinaya, da naka tongawa kojo ewambeʼi kapuru ndaya-A ri tau pura-pura.
Peunde ri Pue Ala
11:33-36
33 #
Yes. 55:8
Ewanceʼe ntano peawa ngkakoreʼe mPue Ala! Sira loʼe pai mayombu mponawa-nawa! Isema anu da mangkoto maluluwaka waʼa mpobotusi-A? Isema anu mangkoto da marata ndaya pawianaka-A tetala-A? 34#Yes. 40:13 Lau ndaʼuki ri Sura Magali ewaseʼi,
“Isema anu maincani nawa-nawa i mPue Ala?
Isema anu da mangkoto da mantotoraka Sira?
35 #
Ayu. 41:11
Isema anu roo mawaika Sira bara nunjaa-njaa painaka da mamperapi silinya?”
36 #
1 Kor. 8:6
I Pue Ala anu mampapewali pura-puranya. Pura-puranya mopuʼu ungka ri Pue Ala, pai i Pue Ala tumpunya. Pai Siramo tumpu mpeawa anu bareʼe da reʼe kapusanya. Ami.
