PATADA 7
7
1Endomo waʼa mpauku, anaku, pai neʼe nukalingani nunjaa anu kusongkaka siko. 2Lulumo waʼa mpatujuku da naka dago ngkatuwumu. Lulumo mpodago waʼa pompaguru da ewa nupajagai ogu matamu ngkaliomu. 3Endomo mpaliu waʼa pompaguruku setu, pai da nudika ri rayamu. 4Da nurekemo kaloʼe ndaya setu da ewa kasangkompomu pai pangaincanimu da ewa balemu maramu. 5Kaloeʼe ndaya inceʼe da mampakalawa siko ungka ri weʼa wongo, ungka ri weʼa anu loʼe mangkelo tuama pai waʼa mpau anu momi.
Weʼa wongo
7:6-27
6Ri anu sandeme yaku metango ungka ri tuke banuaku. 7Nepa kukita waʼa ntuama anu ntongo mangurapa; paikanya anu kukomatasi inceʼe sambaʼa tau tengo ri oyo ntau seʼe. 8-9Ri ngkinowia montepuʼumo da tekarupu, ngalitau setu melinja-linja mosu ri posiku njaya anu da njoʼu ri banua mbeʼa sambaʼa. 10-12Weʼa setu inceʼemo weʼa anu berodo ri banuanya. Sakodi-sakodi njoʼu siʼa ri wiwi njaya, nepa ri tana lapa, bara mekakore tomunda ri porampu njaya. Tau setu makoje pai bareʼe maea matanya. Kukita siʼa mesuwu mampake rengko ewa weʼa wongo, mampomberataka ngalitau setu, tangara ndayanya majaʼa. 13Nasokowaka ngalitau seʼe nepa naeki. Bereʼe ea matanya natoʼoka siʼa, 14“Sandeme seʼi yaku da mabayari janjiku, inceʼe painaka yaku mampanyombaka panyomba. 15Inceʼe painaka kumesuwu mampepali siko, da naka siko maʼi mangkoni ri banuaku. Pai seʼi kupomberatakamo siko! 16Langka ngkayoreku roomo kukaʼuwika superei anu madolidi ungka ri tana Masiri, 17pai roomo kuwebuka lana wongi, cendana pai kayu manisi. 18Mewali maʼimo taperou pai tamampakaʼosa rayata sambengi seʼi. 19Langkaiku bereʼe ri banua, siʼa ntongo mpowelua ri tana ntau lawa. 20Maria doi nakeni pai bareʼepa da mewalili ri raya anu radua minggu seʼi.” 21Ewanceʼemo napangkanarasi mbeʼa setu ngalitau setu rantani naluluka pepokononya. 22Bareʼe marate napanawa-nawa nalulumo weʼa setu ewa japi anu ndanoʼo da njoʼu ri tampa mponyampa pai ewa tau anu da ndatarunggu da ndakeni ri tarunggu anu ndapatoka tila ntau tengo; 23sakodipa mata mpana da mamposuki sulenya. Ewa tonci anu moyoko njoʼu ri tolia, ewanceʼemo ngalitau setu bareʼe narata ndaya inosanya da marugimo.
24Inceʼe painaka ee waʼa anake, ndipedongeka pauku. Parindaya waʼa mpatujuku. 25Neʼe ndipapaliuka weʼa anu ewanceʼe mangkanarasi siko; neʼe nululu siʼa, 26maka siʼa mageromo katuwu ntuama anu sondo.bareʼemi teimba kasondonya, anu magero ua siʼa. 27Ane njoʼu ri banuanya, posokinya mantimamo jaya njoʼu ri kapate.
