YOSUA 3
3
To Isaraeli mawote Koro Yarade
3:1-17
1Bangke reme mowuro-wuro mpodago i Yosua sangkani pai waʼa nto Isaraeli mompatikalimo, malaimo ungka ri kareʼe mpokema ntau seʼe ri Sitimi, megencumo ri wingke ngKoro Yarade. Njairia tau seʼe mawangu kema malantu-lantu tempo da mpowote. 2Pusa tatogo ndeme, waʼa ntadulako ntau seʼe mantolilimi pura-pura kema, 3mamparata songka seʼi ri waʼa nto Isaraeli ewaseʼi, “Ane ndikita waʼa ntadu mpanyomba anu mampoajumo Peti mPojanji i mPue Ala puemi, komi woʼu da moiwomo mampalaika kareʼe mpokema seʼi. Ndiluluwakamo Peti setu, 4paikanya neʼe mosu gaga ndipantonda Peti setu, da nditonda sambaʼa kilo meteri oyonya. Ewanceʼe ndipampowia da naka ndiincani jaya mbeʼi anu da ndilulu, maka bareʼepa ndiincani daera seʼi.”
5Natoʼo i Yosua ri waʼa nto Isaraeli, “Mbolimo komi pura-pura da mampakagali koromi, maka i raneo i Pue da mantuju tanda ngkuasa anu da ndipojingki ri oyomi.” 6Nepa napokau i Yosua waʼa ntadu mpanyomba mampoaju Peti mPojanji nepa da melinja mamporiuka waʼa nto Isaraeli. Nawianakamo kojo ntau seʼe silulu pai songka i Yosua.
7Ndatoʼo i mPue ri Yosua, “Montepuʼu sandeme seʼi siko kupapewali tau bangke painaka pura-pura to Isaraeli da mantubunaka siko pai da napaincani ntau seʼe kayakunya anu mangaaweri siko ewa kupangaaweri i Musa. 8Seʼi-seʼi songkamo waʼa ntadu mpanyomba anu mampoaju Peti mPojanji setu, ane jelamo ri koro ue, tau seʼe da menaʼu ri ue nepa mekakore mpaliu tau seʼe mosu ri wingkenya.”
9Nepa napeboo i Yosua waʼa nto Isaraeli, natoʼoka tau seʼe, “Maʼi ndipampedongeka nunjaa anu ndasongkaka i mPue Ala puemi ri komi. 10-11Ane tepelinjamo komi naini, manoto i mPue da mangarumba to Kanaʼa, to Heti, to Hewi, to Perisi, to Girigasi, to Amori pai to Yebusi. Pai ri tempo mpowote pampowoteka Peti mPojanji i mPue anu makuasa sambawo lino seʼi ri Koro Yarade da mamporiuka komi, da ndikitamo kamonconya Pue Ala anu tuwu reʼe ri oyomi. 12Seʼi-seʼi da ndipilisi tau sampuyu pai radua, sambaʼa lemba seʼe sambaʼa tau ungka ri banca nto Isaraeli. 13Naini ane meyojomo tadu mpanyomba anu mampoaju Peti mPojanji i mPue ri ue ngKoro Yarade setu, da tepogaʼamo uenya, ue anu moili ungka ri untunya da teʼonto.”
14-15Sindara setu tempo mpomota, pai ewa biasanya tempo setu Koro Yarade melampangi.
Sindara mpalai nto Isaraeli ungka ri kareʼe mpokemanya da mawotemo Koro Yarade, waʼa ntadu mpanyomba mesindiu mampoaju Peti mPojanji. Pai jabutu nayojo waʼa ntadu mpanyomba ue ri koronya setu, 16-17liu-liu tepogaʼa koro ue setu. Ndekuka ri tondo untunya tetaʼamaka uenya mompasambaka ri Adami, sambaʼa kota ri sambaliku ngkota Saritani. Ue anu tondo babanya moili mpaliu tudu ri Tasi Mate, painaka mangau-ngaumo pelinja nto Isaraeli mowote ri simpontu ngkota Yeriko. Waʼa ntodu mpanyomba anu mampoaju Peti mPojanji njau mekakore mpaliu ri tongo-tongo waka ngkoronya rantani pura mowote to Isaraeli.
