ZEPHANIX 2
2
Lox Kok Yo Pa Doh Keud Ka Phimap
1Pui pa ang tawng ti kaig tua khankix eue, khrawm pex tau heue. 2Sivoe ang nyang bax tawm gumlox lih, sivoe ang singaix an nyang luan awm kam, sivoe ang krax pa kied song rhawm Siyiex nyang bax hoek ka piang pex, sivoe ang krax song rhawm Siyiex nyang bax hoek, pex khrawm tix tau heue. 3Pex pa koe rhawm awn rhawm tiiem ka piang haktiex khankix, pa hoik priex ti hawt gumlox tat jhawm prawng Siyiex khankix eue, pex sawg ka Siyiex heue. Sawg ka krax pa rahsee sawg ka krax pa tiiem rhawm rhi, phan yuh nan ka daux singaix lih krax song rhawm Siyiex, pex nieb pon mox tix nie.
Krax Ciyang Piang Pui
4Grawh grawng nawh veng Gaza tak sang mawh pa hoik tik vud tix mai veng Ashakelon, tak sang mawh dee pa laux leeing, kix tak grheu pui veng Ashadot khankix lih hu ka daux bawg yam jung singaix mai veng Ekaron tak sang mawh pa reeig ti tik heue. 5Pui ankix pa ot hawt praok rawm sigrit sigra, pa mawh ceu pui Kheratix khankix eue, koe krax kha rhawm heue. Haktiex Khanan pa mawh haktiex dee ot pui Philitix khankix eue gumlox Siyiex tieh feen ka pex ah nin, #Isa 14:29-31; Ye 47:1-7; Yez 25:15-17; Yol 3:4-8; Amo 1:6-8; Zak 9:5-7Aux tak sang yuh maix laux leeing, son ang pui lai ot tan tix kaux kawx heue.” 6Haktiex praok rawm sigrit sigra khankix tak sang mawh dee pa klai rib riem mai dee peung son cao pa liang yung khankix mai kawg yung khankix son cub phung yung heue. 7Haktiex praok rawm sigrit sigra in tak sang mawh son nyiex ceu pui Yudax pa kawn deuk an khankix, kix tak sang yaox ti liang cub phung yung kix tan, ka daux ponsawm kix tak sang it ka daux nyiex veng Ashakelon khankix heue. Grawh grawng nawh Siyiex pa mawh Siyiex kix, tak sang hoek ti kia ngien ka kix mai deeh teei pui pa giex laung kix ing heue. 8Aux hoik mhong lox salao ceu pui Yudax #Isa 15:1—16:14, 25:10-12; Ye 48:1-47; Yez 25:8-11; Amo 2:1-3mai grawng pa tang ceu pui Amon phimap,#Ye 49:1-6; Yez 21:28-32, 25:1-7; Amo 1:13-15 ka pa hoik salao kix ka pui Aux khankix mai ah lox ting ca nyhau mai laig baox ka mee haktiex kix heue. 9Mawh kheu nan, Siyiex Cao kru naing raoma, Siyiex ceu pui Isarelax ah nin “Awm im ju Aux, haktiex Mawbax tak sang mawh pa awm veng Sawdom mai pui haktiex Amon khankix tak sang mawh pa awm veng Gawmawrax, pa hoik tieh ti mawh pang kat khankix mai daux kih, mawh dee pa laux leeing jheung jheung heue. Pui aux pa kawn deuk khankix tak sang hu tud rhim ti teei kix mai pui pa kawn deuk khankix ka daux meung, Aux tak sang pon ti cie sin kix heue. 10Grawng in hoek ka piang kix, kheu krax pa lhaong rhawm kix, kheu hoik ah kix lox pa ting ca nyau mai hoik salao ka pui Siyiex cao kru naing raoma heue. 11Siyiex tak sang mawh pa lhat graung kix kah heue. Mawh kheu Nawh Cao tak sang kieh siyiex piang haktiex khankix krawx hu heue. Pui khankix ku kaux mai khawm ceu pui khankix, pa ot ka klawn tiex rawm sigrit sigra kawx tak sang krub ka Nawh Cao ka dee ot dee koe tix heue. 12Pex pa mawh ceu pui Ethiopiya khankix eue, #Isa 18:1-7 vaid Aux tak sang mawh pa pah pex yum heue. 13Nawh Cao tak sang nyeu taix taix lih ka piang plak laong mai yuh haktiex Asurix laux leeing #Isa 10:5-34, 14:24-27; Na 1:1—3:19mai kieh veng Nineve mawh dee pa yiien grai hu pui, awm kroh kroing daux tiagtu heue. 14Cub tobrie mai totiag khankix kuceu tak it ka daux sigreung veng heue. Sim Vam po mai goh tak sang ot ka piang nuk daux siviex iak, sim khankix tak ah lox tix ka heue. Krax yiien yawg grai hu pui tak sang koe ka daux diang siviex tan, khaox Arit pa hoik thui ti deuh plang khankix hoik jieh laux heue. 15In mawh veng pasax koe krax gaux rhawm, pa hoik sax ot yiien yawg tix heue. Ah nin ka daux rhawm tix, “Koe ngie aux, lheu khaing aux ang lai koe pui tang kaux heue. Yam in nawh hoik lih ti mawh dee pa yiien grai hu pui mai dee it totiag khankix yuh ka mawx, can pui pa tiang ti hu hawt baoh nawh, tak ah lox nyiah mai yaog vuh vied taix tix kah heue.”
Àwon tá yàn lọ́wọ́lọ́wọ́ báyìí:
ZEPHANIX 2: WCL
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Wa Common Language Bible © Bible Society of Myanmar, 2012