ZAKHARIX 7
7
Krax Cu Nghiet
1Ka daux baux num kwang simiang Davit pon num tix num khix dim pa mawh khix khisalux pon ngaix gumlox Siyiex hoik hoek ka Zakharix heue. 2Yam an pui veng Betelax hoik ploi ka Shareza mai Reganmeliet mai pui nawh khankix hu sonsang rawg tix bwan ka plak sivoe Siyiex, 3sonsang chawk tix ka cao giex kaing li khankix, pa koe ka daux nyiex bwan Siyiex cao kru naing raoma mai ka cao jhai khankix ah nin. “Mawh kawn sang ot ex ti yiiem ka daux khix num pa hoik luan khankix tom nie lie? Awm krax pa hoik yuh ex daux num pa hoik luan khankix tom nie lie? 4Gumlox Siyiex cao kru naing raoma hoik hoek ka aux ah nin. 5“Maix krai pao ka pui haktiex khankix khawmuik mai ka cao giex kaing li khankix ah nin, yam hoik twah pex pa ih mai yam khi rhawm pex ti yiiem ka daux khix phwan mai khix aliah glang daux atixgliah num khankix, khex ruk mawh hoik twah pex pa ih ka son Aux tete lie?” 6Pex ih mai nyaux mawh ang pex ih mai nyaux son tokaux pex lie? 7Mawh ang pex khaw ti koe krax cu nghiet ka gumlox pa hoik pao Siyiex ti krai khankix, khaing ka cao jhai khankix phao voe, yam veng Yerusaliem mai veng pa koe hawt vung viang nawh khankix hoik koe pui ot mai hoik haok hwan mai yam hoik ot pui ka baoh plak seh mai dee tiem tiex khankix lie?”
Pa Grheu Tix Khaing Haktiex
8Gumlox Siyiex hoik hoek ka Zakharix ah nin, 9“Siyiex Cao kru naing raoma ah yuh nan, “Prawng ca ka daux krax pa mawh pa meh, jhi krax caux rhawm mai yuh ti tawx krax pa koe bwanson, ka puxaik tix ku kaux daux pui heue. 10Paw yuh krax kha rhawm ka miexmai kawn doe, ka pui haktiex tang meung mai ka pui pa hot sia khankix awx! Paw kieh tix kaux kawx, koe krax pa sang yuh tix pa caox ka daux rhawm tix ka piang puxaik nawh heue.” 11“Kix ang cu ti nghiet mai hoik veeh klip tix mai hoik thox yhaok tix son ang sang mhong heue. 12Kix hoik kieh rhawm tix kiien awm siang simaox mai ang nghiet ka gumlox beenli mai ka gumlox pa hoik ploi Siyiex cao kru naing raoma hoek khaing khuan ka cao jhai khankix phao voe heue. Mawh kheu nan, krax pa kied song rhawm hoik hoek khaing Siyiex cao kru naing raoma heue. 13Aux kok yo mai kix ang nghiet, awm an, kix rawg mhaing kawx Aux ang lai nghiet heue. Siyiex cao kru naing raoma ah nan heue. 14“Aux tak prung prang ti tik kix ka bhaung kanglux, ka daux sinax ceu pui khankix pa ang kix nyang sax tawng heue. Mawh kheu nan, haktiex kix lih ti mawh dee hoik yiien grai hu pui khankix, tom ang pui tix kaux kawx lailing ing tiang ka dee an, grawh grawng nawh, kix hoik kieh haktiex pa mhawm an mawh dee pa laux leeing heue.”
Àwon tá yàn lọ́wọ́lọ́wọ́ báyìí:
ZAKHARIX 7: WCL
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Wa Common Language Bible © Bible Society of Myanmar, 2012