MALAKHIX 1
1
Pa Kied Moh Siyiex
1Gumlox pa plak jhi Siyiex ka ceu pui Isarelax khankix khaing ka Malakhix. 2Siyiex ah nin “Aux hoik moh ka pex, viang mawh nan, pex kawn ah nin “Mawh hoik moh Maix yix ka daux krax grawng ceu patix lie?” “Ang Esaw hoik mawh pux ke Yakop lie? “Siyiex ah nin, Aux hoik moh ka Yakop, 3Aux hoik koeng ka Esaw, #Ro 9:13hoik kieh praix gawng ot nawh khankix mai sinngao nawh mawh pa laux leeing, son sox praix daux tiag heue. 4Ceu pui Edom khankix#Isa 34:5-17, 63:1-6; Ye 49:7-22; Yez 25:12-14, 35:1-15; Amo 1:11-12; Aw 1-14 ah nin, viang ex mawh pa hoik laux leeing yam in kawx mai ex tak sang deeh ing cox sum ka dee pa laux leeing ankix. “Siyiex cao kru naing raoma ah nin “Grham kix sum, Aux tak sang yieh ti tik. Pui tak sang kok kix mawh dee pang dee kwang pui caox caig mai kok kix mawh pui pa song rhawm Siyiex ka leeing ju heue. 5Ngai pex tak sang yaox mai pex tak ah nin “Siyiex mawh pa koe min plakngai sibrawm ka mee haktiex Isarelax heue.”
Krax Tan Pa Ang Singax
6Kawn simex koe krax nab yam ka keeing tix mai siliex koe krax pa lhat graung ka Simiang tix. Phan Aux mawh keeing, koe krax pa nab yam ka Aux dee mawx lie? Phan Aux mawh Simiang mawh koe krax pa lhat graung ka Aux dee mawx lie? Siyiex cao kru naing raoma ah nin ka pex pa mawh cao giex kaing li khankix, pa koe lox salao ka ceu kaux Aux. Viang mawh nan, pex kawn ah nin “Mawh ah yix lox salao ka ceu kaux Maix ka daux krax ceu patix lie?” 7“Pex tan pa ih pa hoik seeing brai ka piang khu dee tan Aux, viang mawh nan, pex kawn ah nin; “Mawh hoik seeing brai yuh yix Maix ka grawng ceu patix lie? “Mawh kheu pex ah nin; “Pheen Siyiex mawh pa ang cee ang cak heue. 8Yam tan pex ti tawx pa dug ngai son krax tan pa appong, #Pi 15:21ang an mawh pa caox lie? Yam tan pex ti tawx pa chawh caong mai pa koe jhawm saux, ang an mawh pa caox lie? Phan maix tan ti tawx an ka cao kwang veng pex nawh khex sang koe krax pa khaw rhawm rhi ka pex lie? Nawh khex sang rieb ti teei pex ka daux krax pa koe rhawm tix lie? Siyiex cao kru naing raoma ah nan heue. 9Yam in pex khyox khaw ti yaox krax pa koe rhawm rhi Siyiex, sonsang kieh Nawh Cao koe krax caux rhawm ka piang pex. Phan grawng in mawh pa hoik yuh tix khaing taix pex, Nawh Cao khex sang jhak ka pakngai pex lie? Siyiex cao kru naing raoma ah nan heue. 10Kieh simie pui ka daux sinax pex koe tix kaux pa nyeep ti priex siviex nyiex bwan, son ang pex pon ti phlu ngu ka piang khu dee tan Aux ka daux pa giex going heue. Aux ang koe krax khaw rhawm ka pex mai Aux ang lai rieb ti teei krax tan tix ceu kawx khaing daux taix pex. Siyiex cao kru naing raoma ah nan heue. 11Grawh grawng nawh jah khaing baoh dee lih singaix, tom hoek ka baoh dee klip singaix, ceu kaux Aux tak sang mawh pa ting lhaong ka daux sinax ceu pui tang ceu, ka baoh dee an kix kudah tak sang tan nyawng bhawng ka ceu kaux Aux mai khawm krax tan pa singax, grawh grawng nawh, ceu kaux Aux, tak sang mawh pa ting lhaong ka daux sinax ceu pui khankix. Siyiex cao kru naing raoma ah nan heue. 12“Viang mawh nan pex koe krax map ka ceu kaux Aux ah nin, “Pheen Siyiex mawh pa hoik seeing mai pa ih ka piang nawh khankix, mawh pa ang koe ceu koe cak heue.” 13“Pex deeh baox ah nin, kaing inkix koe ceu pa taug pa mao kah! Pex koe lox salao kah heue. Siyiex cao kru naing raoma ah nin. “Pex viex tobrie pa tud rhim tix, pa chawh caong mai pa saux khankix hoek sonsang tan. Mawh tak sang rieb Aux ti teei in khaing daux taix pex lie? “Siyiex ah nan heue. 14“Kieh krax jhax lawg koe ka piang pui pie lhen an, pa koe yung mhaing ka daux cub phung yung nawh, pa hoik yuh lox mukheu mai tieh ti tan pa laux maung ka Siyiex grawh grawng nawh, Aux mawh simiang pa ting lhaong, “Ceu kaux Aux mawh pa sang koe krax pa lhat graung, ka daux sinax ceu pui khankix heue. “Siyiex cao kru naing raoma ah nan heue.
Àwon tá yàn lọ́wọ́lọ́wọ́ báyìí:
MALAKHIX 1: WCL
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Wa Common Language Bible © Bible Society of Myanmar, 2012