HABAKUK 3
3
Lox Rawg Bwan Cao Jhai
1Lox bwan rawg cao jhai Habakuk ka Shigawnot, 2Siyiex eue, aux hoik mhong ka lox sikah Maix mai koe krax lhat graung kah heue. Siyiex eue, kaing pa yuh Maix Cao deeh yaog tix ka daux num inkix, ka daux num inkix, hoik yuh ti lih sidawng ka daux krax pa song rhawm, doh keud ka krax pa caux rhawm liak. 3Siyiex hoek khaing veng Teman, Siyiex pa singax singeh hoek khaing gawng Paran, min plakngai Nawh tawb kheem ti deuh raoma khankix mai haktiex hoik naog ka krax pa yaog yaw Nawh Cao heue. 4Krax pa jhan riang Nawh Cao hoik awm pa riang singaix, Nawh Cao hoik koe krax jhan riang khankix khaing daux taix Nawh mai sibrawm Nawh hoik mox tix tan heue. 5Sivoe Nawh hoik koe jhawm saux preng mai hawt khaix caong Nawh Cao koe jhawm saux pa kied siaoh heue. 6Nawh Cao cung mai kieh haktiex yung yiang, Nawh Cao jhak mai kieh ceu pui kuceu sikua heue. Gawng lua pa koe sijheung hoik bih hoik laux, ton pa kaux sijheung hoik grhup heue. Daux krax pa yuh Nawh mawh pa awm paox tix leeing ju heue. 7Aux hoik yaox ka koe nyiex gox haktiex Khushan khankix ka daux krax pa kha rhawm, man tieb haktiex Midian khankix hoik siyaung heue. 8Siyiex eue, mawh ang Maix lai koe krax khaw rhawm ka rawm klawng khankix, mawh hoik koe krax pa song rhawm Maix ka rawm klawng, mawh hoik koe krax saux rhawm rhi Maix ka rawm sigrit sigra, ka yam brug Maix ka brung tix, pa mawh ling lawx krax pa taoh Maix khankix lie? 9Ak Maix hoik mawh pa jhi tix lih khawmuik, lox sijax mukheu pa ah Maix son pui kuceu mawh pa kaux cong heue. Maix hoik gwieh ti deuh haktiex ka rawm klawng khankix heue. 10Gawng khankix yaox ka Maix mai hoik koe krax siyaung, rawm khankix hoik tiang ti hu heue. Dee raux rawm sigrit sigra hoik lih lox sinum mai hoik yaog taix tix hoek ka piang dee lhaong heue. 11Singaix mai khix hoik kaog ka dah dee ot dee koe kix, kheu krax pa riang te Maix ti lih mai ka daux pa blang sawng riang plia Maix heue. 12Maix yaog ti hu daux haktiex ka daux krax pa saux rhawm saux rhi tix, Maix hoik dig ti tiang ceu pui khankix ka daux krax pa song rhawm tix heue. 13Maix lih hoek, sonsang taoh ka pui Maix khankix mai taoh ka kaw pa hoik groi Maix bee kah heue. Maix yieh laux ka cao kaing nyiex pui pa ang rahsee mai plak khaing daux num riah nawh tom hoek ka ngawg heue. 14Maix teei pliah blung phlat ka kaing pa mawh cao kaing pui naing nawh khankix heue. Kix hoik lih hoek awm bhaung kang lux sang kieh aux prung prang, krax gaux rhawm kix, mawh krax pa sang jawm kiied kix ti ih pui hot shia ka daux pa glip heue. 15Maix bruk brung dig daux sigreung rawm sigrit sigra, ka daux puk pak rawm khankix ti kaoh ka daux pa kied ting kied lhaong heue. 16Yam mhong aux lox sinum kaux aux hoik graung, siyieb jheeh aux hoik siyaung, krax rham krax sium hoik laig ka daux si-ang aux mai aux hoik koe krax siyaung rhawm ka daux tokaux aux, sonsang pon yiien yawg aux ka daux singaix hoek krax pa kha rhwm ka pui khankix, yam laig kix ti puing pui heue.
Lai Rhax Koe Krax Yum Rhawm
17Viang khaox ruh ang pon ti glaoh rao kawx, viang nhu plix siiet ang plix kawx mai khaox sanlun ang piien kawx mai viang tong kaung ang pon tawx pa ih, viang cub phung yung jud khaing daux kawg mai viang mawie ang lai koe ka daux kawg kawx, 18viang mawh nan, aux tak sang koe krax gaux rhawm ka daux Siyiex, aux tak sang nyawm rhawm ka daux Siyiex Cao taoh aux heue. 19Siyiex leeing ju mawh riang rao aux, Nawh Cao kieh caong aux awm caong cak#2Sa 22:34; Yaog 18:33 mai Nawh Cao kieh aux cong hu ka piang choek gawng dee pa lhaong khankix heue. In mawh son cao kaing ting cub pui pa tah ting khankix mai lox maox ting tah aux heue.
Àwon tá yàn lọ́wọ́lọ́wọ́ báyìí:
HABAKUK 3: WCL
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Wa Common Language Bible © Bible Society of Myanmar, 2012