Lev%EDtico 4
4
I sipon porom rumal i mak atzalal
1I Ajwal xub'ij che ma Moisés:
2Chab'ij chke i je aj Israel: We jun winaq kuqel jun che utzij upixab' i Ajwal chu'anik taj, rajwaxik uri chi ku'an iri:
3We are i ajsujul sipon kmakunik, konojel uri i winaq re i tinimit kkeqaj umak. Rajwaxik uri kuk'am li jun me' chi lik klis taj re usipon porom rumal umak chi xu'ano. 4Rajwaxik uri chi kuk'am b'i me' le chwach i Ajwal pa okb'al che i ja re riqb'al ib' ru' i Dios, chila kuya u'ab' puwi ujolom i chikop le, xaq kuwor ni puqul chwach i Ajwal. 5I ajsujul sipon kuk'am jub'i' che ukik'el i me' le, re kuk'am b'i pa ja re riqb'al ib' ru' i Dios. 6Chila kumin uwi u'ab' chupam i kik' le kukitzka wuqmul chwach i kortin re i lo'laj k'ijib'al chila chwach i Ajwal. 7Te'uri i ajsujul sipon kusu jub'i' kik' chke i rok'a' i sujb'al sipon, re porb'al pom chi are umuyal uk'ok'al chwach i Ajwal chila chwach i ja re riqb'al ib' ru' i Dios, i kik' chi kk'is taj kutix ni chi raqan i porb'al sipon chi o chila chwach i ja re riqb'al ib' ru' i Dios. 8I me' le chi xkamsaxik re riqb'al kuyb'al mak, kelsax ni ronojel i xepu chi o chrij ronojel i rixkol, 9chekeb' u-riñón rachi'ilam i xepu chi o chrij u-loma xaq i xepu chi o chrij useseb' lik ronojel kresaj. 10Ile lik keje u'anik k-ani ni che pacha relsaxik i xepu che i toro, chi are sipon re riqb'al chomb'al ib'. Te'uri i ajsujul sipon kuporoj ni ronojel ile puwi i porb'al sipon; 11xwiri ronojel uti'lal i me' le, ujolom, raqan, rixkol, utz'umalil xaq ronojel ukis, 12kresaj nu b'i che i k'ijib'al ipa je o wi konojel i je aj Israel; kuk'am nu b'i che jun k'ijib'al chi lik ch'ajch'oj chila ipa ktix wi chaj, chila puwi i jut'ub'aj chaj le kunak' a' che ru' si' k'a kjar ni ronojel.
13We konojel i winaq aj Israel kemakunik, xwiri chu'anik taj kki'ano, man mijun chke kuch'ob'o chi utz ti kki'ano, lik konojel uri o kimak chwach i utzij upixab' i Ajwal. 14Are kkinab'ej konojel aj Israel winaq chi xemakunik, rajwaxik uri chi kkisujuj jun me' chwach i ja re riqb'al ib' ru' i Dios, re riqb'al kuyb'al mak. 15Chila i je unimaqil ke aj Israel kkiya ni ki'ab' puwi i chikop le te'uri kkiwor puqul chwach i Ajwal. 16Are uri i ajsujul sipon kuk'am b'i jub'i' che ukik'el i me' pa ja re riqb'al ib' ru' i Dios. 17Are uri kumin uwi u'ab' chupam i kik' le, kukitzka wuqmul chwach i kortin re i ja re i molb'al ib' chila chwach i Ajwal. 18Te'uri i ajsujul sipon kusu jub'i' kik' chke i ok'a' re i sujb'al sipon chi o chwach i Ajwal chila chwach i ja re riqb'al ib' ru' i Dios, i kik' chi kk'is taj kutix ni chi raqan i porb'al sipon chi o chila pa okb'al che i ja re riqb'al ib' ru' i Dios. 19Xaq kelsax ni ronojel i xepu che i me' le, xaq kporox ni puwi i sujb'al sipon. 20Ile lik keje u'anik k-ani ni che pacha relsaxik i xepu x-an che i toro chi kporoxik re riqb'al kuyb'al mak; keje uri ile chi i ajsujul sipon kuriq ni kuyb'al mak pkiwi ike man kkuytaj ni kimak chke. 21Te'uri kelsax nu b'i ronojel ni'pa uch'akul i me' che k'ijib'al ipa je o wi konojel i je aj Israel, kjarsax ni pa a' pacha x-ani che i jun nab'e. Ile are i jun sipon re i riqb'al kuyb'al mak ke konojel i je aj Israel winaq.
22We are jun aj-atzil kmakunik, xuqel utzij upixab' i Rajwal Dios, lik ajmak ni uri tupu chu'anik taj xu'ano 23Are ksaqix che chi makunnaq, rajwaxik uri chi kuk'am b'i jun me' chi lik klis taj re usipon, 24kuya ni u'ab' puwi ujolom i me' le, xaq kuwor ni puqul chwach i Ajwal chila che i k'ijib'al ipa kekamsax wi i chikop puwi i porb'al sipon. Ile are jun sipon re i riqb'al kuyb'al mak. 25Are uri i ajsujul sipon ru' uwi u'ab' kusu jub'i' kik' chke i ok'a' re i porb'al sipon chi o chwach i Ajwal chila chwach i ja re i molb'al ib', i kik' chi kk'is taj kutix ni chi raqan i porb'al sipon chi o chila chwach i ja re i molb'al ib'. 26Ronojel i xepu re i chikop le kk'atsax ni puwi i sujb'al sipon, pacha k-ani che i xepu re i sipon re chomb'al ib' chi kporoxik re riqb'al kuyb'al mak; keje uri ile chi ajsujul sipon kutz'onoj ni kuyb'al mak puwi i aj-atzil man keje ile kkuytaj ni umak che.
Sipon re riqb'al kuyb'al umak jun winaq
27We are jun chke i winaq re i tinimit kmakunik, xwiri chu'anik taj ku'ano, lik xuqel utzij upixab' i Ajwal, xaq lik ajmak ni uri. 28Are ksaqix che chi makunnaq, rajwaxik uri kuk'am b'i jun sipon rumal umak chi u'anom, kuk'am b'i jun ati chab'at chi lik klis taj; 29kuya ni u'ab' puwi ujolom i chab'at le chi kuya'o rumal umak xu'ano, xaq kuwor ni puqul chila che i k'ijib'al ipa kwor wi pkiqul i chikop puwi i sujb'al sipon chi poroxik re. 30Are uri i ajsujul sipon ru' uwi u'ab' kusu jub'i' kik' chke i rok'a' i porb'al sipon, i kik' chi kk'is taj kutix ni chuxe' i sujb'al sipon chi o chila chwach i ja re i molb'al ib'. 31Are uri kelsax ronojel i xepu che i ati chab'at le lik keje u'anik k-ani ni che pacha relsaxik i xepu che i toro re riqb'al chomb'al ib'. Are uri i ajsujul sipon kuporoj ni ronojel ile puwi i sujb'al sipon, lik jun umuyal uk'ok'al re i Ajwal. Keje uri ile chi ajsujul sipon kutz'onoj ni kuyb'al mak puwi i winaq le, man keje ile kkuytaj ni umak che.
32I winaq le we jun chij kusujuj re usipon riqb'al kuyb'al umak, rajwaxik uri chi lik jun ati chij chi klis taj kuk'am loq. 33Kuya ni u'ab' puwi ujolom i chij le xaq kuwor ni puqul chila che i k'ijib'al ipa kwor wi pkiqul i chikop puwi i porb'al sipon, ile are jun sujunik re riqb'al kuyb'al umak jun winaq, rumal umak xu'ano. 34Are uri i ajsujul sipon ru' uwi u'ab' kusu jub'i' kik' chke i ok'a' re i porb'al sipon, chi o chila chwach i ja re i molb'al ib', i kik' chi kk'is taj kutix ni chuxe' i sujb'al sipon le. 35Are uri kresaj ronojel i xepu che i ati chij le, keje k-ani ni che pacha relsaxik i xepu k-ani che i chij ma re riqb'al chomb'al ib'. Are uri i ajsujul sipon kuporoj ni ronojel ile chwi sujb'al sipon chwach i Ajwal. Keje uri ile chi ajsujul sipon kutz'onoj ni kuyb'al mak puwi i winaq le man keje ile kkuytaj ni umak chi u'anom.
Àwon tá yàn lọ́wọ́lọ́wọ́ báyìí:
Lev%EDtico 4: ACHICUB
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© Biblia Achí de Cubulco, Derechos reservados de Sociedad Bíblica de Guatemala