Fuɗɗoode 1
1
Habaru himɓe duuniyaaru
(1–11)
No dow e leydi tagiraa
1Diga fuɗɗoode, Alla tagii dow e leydi.
2Leydi jiɓino nun. Ni walaano fu goɗɗum e mayri, niwre nun ommunoo maayo, go Ruuhu Alla e yiiloo dow diyam.
3Alla wi'i: Jayŋol laatoo! Go jayŋol laatii. 4Alla yi'ii eŋol wooɗi, go Alla seenni jayŋol e niwre. 5Alla noddi jayŋol nyalooma, o noddi bo niwre jemma. Kiikiiɗe laatii, subaka bo laatii, kayre woni nyalaane arandeere.
6Alla wi'i: Goɗɗum laatoo hakkune diyeele nanduɗum hande gurol, gam ɗum seenna ɗe hakkune majje, ɗum laatii hande non. 7Alla weƴƴitii goɗɗum nanduɗum hande gurol hakkune diyeele ɗe ley e ɗe dow. 8Alla noddi jayri nin dow. Kiikiiɗe laatii, subaka bo laatii, kayre woni nyalaane ɗiɗawre.
9Alla wi'i diyam gonuɗam ley kammu hawta nokkuure woore, den jorɗum wurtoo. Ɗum laatii hande non. 10Alla noddi jorɗum leydi, o noddi bo beele diyam ɗen maayo. Alla yi'ii eɗum wooɗi. 11Ɓaawo mum, Alla wi'i: Leydi fuɗina fuɗo gooduko aawdiiji e leɗɗe dimooje ɓikkon ŋale fu e lenyol mum. Ɗum laatii hande non. 12Leydi fuɗini fuɗo gooduko ɓikkon feere feere, kole fu e lenyol mum, e leɗɗe dimooje ɓikkon, ŋale fu e lenyol mum. Alla yi'ii eɗum wooɗi. 13Kiikiiɗe laatii, subaka bo laatii, kayre woni nyalaane tatawre.
14Alla wi'i: Jayli laatoo dow gam seennontirgo nyalooma e jemma, ɗum laatoo maane gam seennontirgo wakkatiiji e nyalaaɗe e duuɓi. 15Ɗi laatoo fitillaaji faa dow, gam yaynango leydi. Ɗum laatii hande non. 16Alla waɗi jayli mawɗi ɗiɗi. Ɓurŋol mawnugo woni naaŋe, gam ŋol laamanoo nyalooma, ɓurŋol faanɗugo woni lewru gam ŋol laamanoo jemma. O waɗi bo koode. 17Alla ɓili ɗi dow gam ɗi jaynana leydi, 18gam ɗi laamanoo nyalooma e jemma, e gam seennontirgo jayŋol e niwre. Alla yi'ii eɗum wooɗi. 19Kiikiiɗe laatii, subaka bo laatii, kayre woni nyalaane nayawre.
20Alla wi'i: Diyam wurtina ko woodi yonki faa ɗuuɗa, colli bo fiira faa dow. 21Alla tagii liƴƴi mawɗi e tewuji ɗuuɗɗi feere feere gonuɗi der diyam e lenyi majji, o tagi bo colli lenyi feere feere. Alla yi'ii eɗum wooɗi. 22Alla barkiɗini ɗi wi'i, ɗi dima ɗi ɗuuɗa, ɗi kebbina maayo, colli bo ɗuuɗa der leydi. 23Kiikiiɗe laatii, subaka bo laatii, kayre woni nyalaane joyawre.
24Alla wi'i, mareefuuji feere feere rima ɗuuɗa der leydi, ɗi laatoo mareefuuji wuro, e ladooji, e tewuji ladde, ŋole fu e lenyol mum. Ɗum laatii hande non. 25Alla waɗi tewuji ladde feere feere e lenyi mum, e mareefuuji wuro e lenyi mum, e ladooji feere feere e lenyi mum. Alla yi'ii eɗum wooɗi.
Tagugo gorko e debbo
26Ɓaawo mum, Alla wi'i: En tagu neɗɗo nanduɗo en deydey. O laamanoo liƴƴi maayo e colli piiranɗi dow, e mareefuuji gonuɗi der leydi fu, e ko ladata dow leydi fu. 27Ɗon nun Alla tagi neɗɗo nanduɗo mo deydey. O tagi ɓe gorko e debbo. 28Alla barkiɗini ɓe o wi'i: Dimee ɗuuɗon, kebbinon leydi, laamoɗon dow mayri. Laamanee liƴƴi der maayo, e colli piiranɗi dow, e mareefuuji gonuɗi der leydi fu. 29Alla wi'i kade: Mi hokkii on fuɗo gonuko dow leydi, dimanko ɓikkon fu, e leggal dimoowal ɓikkon fu, ɗum fu ɗum laatoo nafa mon. 30O wi'i kade: Mareefuuji jahooji dow leydi fu, e colli, e ko woodi yonki fu, o hokkii ɗum fuɗo hecco ko laato nyaamdu majji. Ɗum laatii hande non. 31Alla yi'ii ko waɗi fu e wooɗi sanne. Kiikiiɗe laatii, subaka bo laatii, kayre woni nyalaane jeego'awre.
Àwon tá yàn lọ́wọ́lọ́wọ́ báyìí:
Fuɗɗoode 1: BFB
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Bible Fulfulde Bénin © SIM International 2015, 2024.