रोमियों 5
5
परमेश्वर रे लोक्कां तांइ इक्क नौई जिन्दगी
परमेश्वर कने मेल
1इधेरे तांइ परमेश्वर ने असा जो मसीह बिच विश्वास करणे रे जरिये धार्मिक ठैहराया। ते प्रभु यीशु मसीह रे जरिये असा रा परमेश्वर कने मेल-मिलाप होया। 2असा रे विश्वास रे जरिये मसीह ने असा जो अनुग्रह दित्ते रा है, जिस बिच असी अज्ज टिके रे हिन, ते असी बड़ी हिम्मत ते खुसी कने परमेश्वर री महिमा जो बंडणे तांइ उत्सुक हिन। 3सिर्फ ए ही नी, पर असी ए सोच्ची करी दुख-तकलिफां सहणे बिच भी खुस हिन, कि दुख-तकलीफ सहणे कने सबर बदधा, 4ते सबर बद्दणे कने खरा स्वभाव बणदा, ते खरा स्वभाव बणने कने असा री आस बद्दधी। 5ते इस आस कने असा जो निराशा नी हुंदी, किजोकी परमेश्वर ने असा जो पवित्रात्मा दित्ते रा है, जे असा रे मन जो परमेश्वर रे प्यार कने भरी दिंदा। 6किजोकी जां असी कमजोर ही थिये, तां मसीह यीशु, परमेश्वर रे ठैहराए रे समय पर दुष्ट लोक्कां तांइ मरे। 7कुसकी धार्मिक मणू तांइ अपणी जान दैणा ता कुसकी तांइ मुस्किल होई सकदा। पर शायद कोई जणा कुसकी भले मणू तांइ अपणी जान दैणे तांइ तैयार होई भी जाए। 8पर जां असी पाप्पी ही थिये तां परमेश्वर ने असा तांइ अपणे पुत्तर री कुर्बानी देई करी ए ज़ाहिर कित्ता कि से असा कने किन्ना प्यार करदे। 9ते किजोकी मसीह यीशु रा असा रे पाप्पां तांइ अपणा खून बहाई करी कुर्बानी दैणे रे जरिये परमेश्वर ने असा जो धार्मिक ठैहराया, इधेरे तांइ मसीह ने असा जो परमेश्वर रे गुस्से का जरुर बचाणा।
10पर जां हल्ले असी परमेश्वर रे खिलाफ ही थिये, तां ही असी परमेश्वर रे इकलौत्ते पुत्तर री मौत री वजह कने असा रा परमेश्वर कने मेल जोल कराई दित्ता गेया, पर अवे जां मसीह यीशु जिन्दे हिन तां तिन्हा ने असा जो छुटकारा जरुर दैणा। 11ते सिर्फ ए ही नी, असा रा प्रभु यीशु मसीह रे जरिए, परमेश्वर कने मेल जोल होए रा है, इधेरे तांइ असी परमेश्वर बिच खुस रैह्न्दे।
आदम रे जरिये मौत, मसीह यीशु रे जरिये जिन्दगी
12जिय्यां कि परमेश्वर रे बणाए रे इक्क मणू, आदम री वजह कने पाप दुनिया बिच आया, ते से पाप करणे री वजह कने से मरेया, ते इसी तरिक्के कने लोक्कां रे पाप करणे री वजह कने मौत सारेयां बिच फैल्ली गयी, किजोकी आदम री सतांन होणे री वजह कने से पापी स्वभाव असा सारेयां बिच चलदा रेया। 13परमेश्वर रे मूसा जो कानून दैणे रे पैल्ले का भी पाप दुनिया बिच ता थिया, पर जित्ते मूसा रा कानून नी थिया, तित्ते पाप नी गिणेया गेया। 14तां भी आदम का लेई करी मूसा तिकर जिन्ने लोक्कां ने पाप कित्ता ते से सारे मरी गे, इत्ते तिकर से मणू भी मरी गे जिन्हा ने परमेश्वर रे हुकमां जो नी टालेया, जिय्यां आदम ने टालेया थिया। जां आदम आया, तां तिसेरे पाप करणे री वजह कने सारे लोक्कां री जिन्दगी पर असर पेया, पर जां मसीह यीशु दुनिया बिच आए तां पाप्पां का छुटकारा दैणे री वजह कने सारे लोक्कां री जिन्दगी पर असर पेया। 15पर आदम रे पाप ते परमेश्वर रे अनुग्रह रे दान बिच बड़ा बड्डा फर्क है। किजोकी आदम रे पाप करणे री वजह कने मते लोक्कां बिच मौत फैल्ली गयी। पर तिसका जादा बधी करी मसीह यीशु रे जरिये मते लोक्कां जो परमेश्वर रा बड़ा अनुग्रह ते धार्मिकता रा दान मिल्लेया। 16परमेश्वर ने जे दान असा जो दित्तेया से आदम रे पाप रे अंजाम सांई नी है, किजोकी इक्क मणू रे पाप करणा, सजा दैणे री वजह बणेया, पर असा रे मते पाप करणे रे बावजूद भी परमेश्वर ने असा जो धार्मिकता रा दान दित्तेया। 17इक्क मणू रे पाप करणे री वजह कने मौत सारे लोक्कां बिच फैल्ली गेई, पर तिसका जादा बदधी करी परमेश्वर री अनौखा अनुग्रह ते धार्मिकता रा दान है, किजोकी जिन्हा ने भी ए दान पाणा, तिन्हा ने मसीह यीशु रे जरिये पाप ते मौत पर जीत हासिल करी के हमेसा री जिन्दगी पाई लैणी। 18इधेरे तांइ जिय्यां की आदम रा पाप करणा, सजा दैणे री वजह बणेया, तिय्यां ही मसीह यीशु रे धार्मिकता रे कम्म करणे री वजह कने लोक्कां जो नौई जिन्दगी मिल्ली ते से परमेश्वर री नजर बिच धार्मिक ठैहराए गे। 19किजोकी इक्क मणू रे परमेश्वर रे हुकम जो ना मनणे री वजह कने मते मणू पापी ठैहराए गे, तिय्यां ही इक्क मणू रे परमेश्वर रे हुकम जो मनणे री वजह कने मते मणू धार्मिक ठैहराए गे। 20परमेश्वर ने लोक्कां जो मूसा रे जरिये कानून इधेरे तांइ दित्तेया गेया ताकि से जाणी सके कि से किन्ने पाप कने भरे रे थिये, पर जां मणू जादा का जादा पाप करणा लग्गे, तां परमेश्वर रा अनुग्रह भी जादा बदधी करी होया। 21इक्क मणू रे पाप करणे री वजह कने मौत सारे लोक्कां बिच फैल्ली गई, पर असा रे प्रभु यीशु मसीह रे जरिए परमेश्वर रे अनुग्रह ने तिन्हा जो धार्मिक ठैहराणा ते तिन्हा जो हमेसा री जिन्दगी दैणी।
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.