Matius 5
5
Onogola enagai ho wene
(Lukas 6:20-23)
1Aphwami a’bik wagaimu, Yesus il yerentesirik e, dom pam ligagarik hweriogo oruakma, is at iak wogu legesa a’ge ebano e’bek ligegesa. 2Ligegesema re, wene is enemin mo’gulentasulat e,
3“Aphwami onogola en,
An e, Allah il pam, ebe a’ge paget an nerlagaik welegi o, oluk opogwi a’ge ai, Allah eragam enebasumu eba eiye isat ema ai en e,
onogola enagaiat opogulom o.
4 #
Yes. 61:2
Ye, aphwami onogola wik-wiaksogo welagai a’ge ai, Allah en enede sebelua ai paget en e,
onogola enagaiat opogulom o.
5 #
Mzm. 37:11
Aphwami enebabut enago a’ge ai re, Allah en o obok mo’gulnentesi a’ge ai re, isat eiye ema ai en e,
onogola enagaiat opogulom o.
6 #
Yes. 55:1,2 Ye, aphwami so’boru emin, ik emin, nele ago ’gela’ge, Allah ogola epasu a’ge logo poluk tugulom enagai opogwi a’ge ai, so’boru onogum ningsogo no’gwi ’gela’ge, pobuk Allah en onogola opsogo ebe a’ge wogontouwa ai en e,
onogola enagaiat opogulom o.
7Aphwami enebe enedesogo welagai a’ge ai, nenaik Allah en is edeabonobua ai en e,
onogola enagaiat opogulom o.
8 #
Mzm. 24:3,4 Aphwami enede mesigat degelak welagai a’ge ai, pobuk Allah ebe enil houwa ai en e,
onogola enagaiat opogulom o.
9Aphwami enemin il ’belak oruakma, is logon en la’bolik onobogwi a’ge ai, at Allah en,
Yu an neiyagai o, oluk mo’gulontouwa ai en e,
onogola enagaiat opogulom o.
10 #
1Pet. 3:14
Ye, aphwami en Allah ogola epasu a’ge logo pogwi a’ge paget is pema en wiagabonobogwiam, Allah eragam enebasumu eba eiye isat ema ai en e,
onogola enagaiat opogulomat o.
11-12 #
2Taw. 36:16; Per. 7:52; 1Pet. 4:14 His owan oruakhwe, pageat is ap Allah iak mo’gulontogu legesa a’ge wiagabonobogu legesa ’gela’ge, his an nebe paget, is aphwami pema en wene yakhontogulat, wiagaphonobogulat, eniak eseiyat honobok ogulat, di wiak yu wiak henebam pogulat, togwi holuk e, honogola henagaiat opogulom o.
Pobuk nenaik ’bogorl pam a’ge en lok a’ge woknontouwa oluk, honogola henagai opogulat, hau worugulat, loksogo togu lemis o,” oluk mo’gulentesi.
Mayu paget emin, o dakharak paget emin, mo’gulentesi wene
(Markus 9:50; Lukas 14:34-35)
13 #
Mrk. 9:50; Luk. 14:34,35 Asogo mo’gulentesirik e, “Aphwami yema ’berlegat paget, mayu ’gela’ge hisat welegep o. A’ge re, mayu ai orlouk erlak ago holuk e, no pam orlougap po epegep. Erlak o. Orlougap po a’ge modok erlak en e, ’gelilogo hwikholuk aphwami onoyuk en ’besilogo hwikhogwi o.
14 #
Yoh. 8:12; 9:5 Ye, aphwami ’gwiangma dakharak onobogwi a’ge, hisat welegep o. O kota duk ebe pam werik a’ge hisaru re, mia o. 15#Mrk. 4:21; Luk. 8:16; 11:33Esaga ’gwialogo sogoluak lekho pogwi re, erlak o. E delak pam pogwiam aphwami olema welagai a’ge enebe ’berlegat o dakharak enebasu. 16#1Pet. 2:12Ai ’gela’ge, his op tugumu, is pema en,
Is op togwi o, oluk, henaik ’bogorl pam a’ge ano erliktuagoluk, his aphwami enilem ai ’gela’geat dakhasogo welemis o,” oluk mo’gulentesi.
Allah en wene enesa’go weregei a’ge
ano paget mo’gulentesi wene
17Asogo mo’gulentesirik e, mesik disogo mo’gulentesi,
“An wegi ai re, Allah iak nenesa’go weregei wene ano emin, is ap Allah iak mo’gulontogu legesa a’ge eniak ai emin, eniak sagaligoluk wegi erlak o. Demat emagoluk wegi o. 18#Luk. 16:17An niak demat mo’gulhentaik. ’Bogorl emin, ’gwiang emin, owan om erlak oruakhwe ya re, wene Allah en nenesa’go weregei a’ge ai, pelal weiyat, sobon al ’gela’ge emin, enasu’gen mesigat ’gela’ge emin, erlak om erlakma en, modok ’berleksogoat demat ema o. 19Holuk e, ap sa en Allah en egei wene wei a’ge mesigat holuk sebelogo poluk, is pema en asogo togu lemagoluk mo’gulentasu lema holuk e, Allah eragam enebasumu eba, at ai onuk malik wei a’ge ’gela’ge onogola miayat opogu lema o. A’ge re, ap sa en Allah iak ai hegitsogo tagalat, is aphwami pema en asogoat togu lemagoluk mo’gulontogu lema holuk e, Allah eragam enebasumu eba, at ai onuk oruak ’gela’geat oruakhwe onuk logo pogu lema o. 20Allah ogola epasu a’ge hegitsogo tuogoluk, is aphwami en Allah iak pelal wogo eiye a’ge ebano emin, ap Farisi a’ge emin, enebabut togwi ai ’gela’geat togu lema holuk e, Allah eragam enebasumu eba ’gua erlak o. Demat Allah ogola epasu a’ge ’bekhitsogo togu lorogup holuk nak e, ’gwi lagup o,” oluk mo’gulentesi.
Onolot het ago ai paget mo’gulentesi wene
(Lukas 12:57-59)
21 #
Kel. 20:13; Ula. 5:17 Asogo mo’gulentesirik e, mesik disogo mo’gulentesi,
“Wene Allah en nis nena’bu nene’balak mo’gulentasulat e,
Aphwami waronobogup o,
oluk egei a’ge ai,
Waronobogup holuk e, wene henebam pouwa a’ge oruak o, oluk egesa ano henesa’go holugu legebat o. 22A’geat de, an en wene mesik yu mo’gulhentaik. Hat mesik en hare paget holot het ago holuk e, wene mesik hebam pouwa a’ge oruak o. Hat mesik en hare mesik mo’guleselat,
Hat hebe uo a’ge yu re! oluk oso holuk e, is ap wene edip ’belo’gogumu eba wokhoboluk loluk, wene hebam pou wayat o. Hat mesik en,
Hat hebe hede modok erlak yu re! oluk oso holuk e, wene hebam poluk odouk orlouk a’bikmu perakhobouwa o. 23Holuk e, hat mesik en ha’ge op a’ge woluk Allah akhit pei lasulat, hogola en e,
Nare ano en e,
At wiak tegeimu, oluk wene nebam pasu, oluk hu’gwarek en hede ebetlau wago holuk e, 24woluk lagun a’ge ai Allah paget pogumu eba weat poluk, pobuk togolik hare ano e’bek woroguntik, wene ano ’beli’gogo erlagap po yo. Wene ano arat ’bele’gik poluk e, pobuk laguntik Allah akhit po yo. 25Ye, ap mesik he’birek il ’belak a’ge en hat wokhoboluk ap wene edip ’belo’gogumu lagaimu re, is ap eba en pobuk wokhoboluk polisi ene’bek lagaiam e, is polisi lak en pobuk wokhoboluk, ene’gik herle wusogo onobogumu louwano oluk, he’birek il ’belak a’ge ai re, ebela owan lagalat eriayat wene ’beli’gogo erlagap po yo. 26Asogo erlagap po erlak holuk e, he’gik herle wusogo hoboma, ap ai e’belak hat hebam oruak a’ge ano o’go daksogo owan wogoum erlak oruakhwe,
liplauma modok erlak o, oluk demat mo’gulhentegis o,” oluk mo’gulentesi.
“’Babi yogunat togup,” oluk mo’gulentesi wene
27 #
Kel. 20:14; Ula. 5:18 Asogo mo’gulentesirik, mesik e’berlik disogo mo’gulentesi,
“At Allah en eselat e,
Hwami ’babi tenentagup o,
oluk egei ai, henesa’go hweligebat o. 28A’geat de, an en wene yu mo’gulhentaik. Ap sa en, hwe mesik il yetholuk, ogola en e,
Eige. An hwe ai ’babi teli e, oluk epasu holuk, ogola en ’babi demat arat tisoat o. 29#Mat. 18:9; Mrk. 9:47Holuk e, hil ’bekhit akhit en wiagap hebiso holuk e, hwelilogo hwikhomup o. Hebe ebesik odouk orloukmu hwikhia louwano oluk hwelilogo hwikholuk pema nak oruakma re, op o. 30#Mat. 18:8; Mrk. 9:43Ye, he’gik ’bekhit akhit en wiagaphobu ’gela’ge ago holuk e, he’gik ’bekhit akhit ai daksogo hwikhomup o. Hebe ebesik odouk orloukmu hwikhia louwano oluk, daksogo hwikholuk pema akhit nak oruakma op o,” oluk mo’gulentesi.
“Hwami lologo ugenebagup o,”
oluk mo’gulentesi wene
(Matius 19:9; Markus 10:11-12; Lukas 16:18)
31 #
Ula. 24:1-4; Mat. 19:7; Mrk. 10:4 Asogo mo’gulentesirik, e’berlik mesik disogo mo’gulentesi,
“Wene mesik pageat mo’gulentasulat e,
Ap mesik ugwe lologo ukpaiyogoluk holuk e,
An hwe yu ukpaik o, oluk, suesi’ga ’balogo re, hwe ai wogomat o,
oluk egeiyat. 32#Mat. 19:9; Mrk. 10:11,12; Luk. 16:18; 1Kor. 7:10,11Asogo a’geat de, an en wene mesik yu mo’gulhentaik. Ap mesik ugwe wogo a’ge, is ap pema en ’babi tu erlakmayat de, lologo ukpasu holuk, hwe ai ’babi tuagoluk ukpesi o. Ye, at ap mesik en, hwe lologo pouwa a’ge ano wasu holuk, ’babiat wouwa o,” oluk mo’gulentesi.
“Ho’buk ’balu puk o,” oluk mo’gulentesi wene
33 #
Ima. 19:12; Bil. 30:2; Ula. 23:21 Asogo mo’gulentesirik, mesik disogo mo’gulentesi,
“Wene mesik yu, Allah en nena’bu nene’balak ebano mo’gulentasulat e,
His heniak eseiyat an henaik Allah nonuk ho’buk ’balogup o.
An disogo tik o, oluk an nonuk ho’buk ’balogup holuk e, henaik ’gain Nonuk Logo a’ge nilem egep ’gela’geat tip o.
oluk wene egei a’ge henesa’go hologu legebat o. 34#Yes. 66:1; Mat. 23:22; Yak. 5:12 A’geat de, an en mesik yu mo’gulhentaik o. His en e, at ap mesik mo’gulogulat,
Di a’ge yu a’ge onuk ho’buk ’balogo mo’gulhegis o, oluk, mo’gulom e, mia o. Allah ebe ’bogorl ai pam he’berik welat wene hegirap pasu. Holuk e, ’bogorl ai onuk ho’buk ’balu re, modok mia o. 35#Mzm. 48:2; Yes. 66:1Nenaik Allah oyuk ’gwiang yu pam he’berik welago. Holuk e, ’gwiang yu onuk ho’buk ’balogo mo’gulonto modok mia o. O kota Yerusalem ai an henaik ’gain Nonuk Logo a’ge eba welegi o. Holuk e, o ai onuk ho’buk ’balu erlagat o. 36Yogodak e, nasu holobu om o, eselat, yogodak e, nasu sing om o, eselat, osoma heniak hologo holobu agalat, sing agalat, tago modok erlak o. Holuk e, hena’gul ai onuk ’balogo ho’buk ’balu mia o. 37His en,
I o, uogoluk holuk e,
I oat u o. Ye,
Erlak o, uogoluk holuk e,
Erlagat u o. Wene muat a’ge mesik mangno ti lagup holuk e, Iblis ebabut wiak a’ge ano en honogola ’gagalisokhwe ogup ani o,” oluk mo’gulentesi.
“His wiagaphonobogwi holuk o’go pagup no yo,”
oluk mo’gulentesi wene
(Lukas 6:29-30)
38 #
Kel. 21:24; Ima. 24:20; Ula. 19:21 Asogo mo’gulentesirik, wene mesik disogo mo’gulentesi,
“Pageat wene mesik disogo egesa,
Henil hwelilogwi holuk e, o’go enilat hwelelu o. Ye, heniak moluktogwi holuk e, o’go eniagat moluktu o,
oluk egesa a’ge ai henesa’go hologu legebat o. 39Asogo a’geat de, an en wene mesik yu mo’gulhentaik o. Wiagaphonobogwi holuk o’go pagup o. Honorogole ’bekhit akhit la’buksogo wathonobogwi holuk e, hware o’gwe eminat wathobuagoluk wogomup o. 40Is aphwami pema en, is ap wene edip ’belo’gogwi a’ge ebano ene’bek wokhonoboluk louwarik,
Hosum ogola ’buktak a’ge woknemin, oluk oso holuk e, ai emin, hosum sogwei sum o’borl o’gwe ’buktak a’ge ano eminat, lo’boksogo wogoum o. 41Ap mesik en iak ningsogoat eselat e,
Sum a’ge yu horok eria pei lak o, oso holuk e, his en dagansogoat enebei lu o. 42Ye, at ap mesik en,
Ha’ge ai an woknemin, oluk ’gonu oso holuk e, henebit opo erlakma en e, wogomubat o. At ap mesik en,
Hat en a’ge ai pobuk wokheik en e, lodu mesik woknemin, oluk oso holuk e,
Nebit, u erlakma en wogoumat o,” oluk mo’gulentesi.
“Aphwami enemin il ’belak a’ge ai henedesogo wolom o,” oluk mo’gulentesi wene
oluk mo’gulentesi wene
(Lukas 6:27-28,32-36)
43Asogo mo’gulentesirik e, mesik disogo mo’gulentesi,
“Pageat is pema en e, wene disogo mo’gulentigisa,
His en aphwami henemin welegep a’ge henede hwedik welat e,
is pema enemin il ’belak a’ge holuk e, henebirabat onobo yo, oluk egesa a’ge ai henesa’go hologu legebat ai o. 44-45Asogo a’geat de, an en wene mesik yu mo’gulhentaik ai o. At nenaik Allah ’bogorl pam a’ge mo eiye welat ’gwiangma dakhasogo aphwami enebabut wiak a’ge emin, op a’ge emin, ’berlegat enebaget yogo pasu o. Ye, moru ’belakpobu ago ai re, is ’bekhitsogo togwi a’ge et, dagansogo togwi a’ge et, ’berlegat enebaget ’belakpou wagalat, tiso ai ’gela’ge, his henaik Allah ’bogorl pam a’ge eiyagai emagoluk, aphwami enemin il ’belak a’ge ai henedeabonobogulat e, is wiagaphonobogwi a’ge ai, Allah en obabonobuagoluk, is enebaget se’ban ogu lomup o. 46Ye, is aphwami pema en, his enedeaphonobogwi a’ge ai nak his en henedeabonobogu lorogup holuk e, Allah en o’go wokhontouwa no? Erlak o. Ai ’gela’ge re, is ap pemerintah a’ge paget uang ’gonu oluk odoktogwi a’ge ai re, enebabut asogoat togwi o. 47Henarilak honorokhwi holuk nak e, hau waronobogu legep holuk, his nak henebabut ai ’gela’ge togu legep puk o. Is aphwami o’borlma a’ge enebabut asogoat togwi erlak no? Asogoat togwi o. 48#Ima. 19:2; Ula. 18:13Holuk e, nenaik Allah ’bogorl pam a’ge ebabut op modok ’garoktak welat edeabenebiso ’gela’ge, his asogoat henedeabonobogu lomup o,” oluk mo’gulentesi.
Àwon tá yàn lọ́wọ́lọ́wọ́ báyìí:
Matius 5: Wul
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
