Maleakhi 3
3
1 #
Mat. 11:10; Mrk. 1:2; Luk. 1:76; 7:27 Asogo ogwi ai en, Nenaik ’gain Onuk Logo a’ge di a’ge yu a’ge tu nak ano en disogo egei,
“An ne’gebela yorogu lemagoluk ap mesik yo’go oboluk perakpou weik o. His en an ’gain Nonuk Logo a’ge heranobogu legep ano re, his wongat oruakma erianoat nebe nu’gwarek nowi werikmu eba pobuk weik o. Ap an en yo’go poluk perakpou wegi a’ge his en,
Wemak e, oluk opogu legep ano en, wene an en wusogo wokhenebegi a’ge ai se’geksogo mo’gulhentauma o,” oluk egei.
2 #
Yoe. 2:11; Wah. 6:17 At odouk aphwami en emas a’ge hele’guogoluk werarogwi ai ’gela’ge emin, sabun sum soduk en il ’gut emagoluk emerogwi ai ’gela’ge emin, wema ai en e, at owi dakha ua ai, dakha oso holuk, ebe wagoam e, sa ’gela’ge ede ha’buksogo sebelholuk welema no. Mia o. 3Aphwami en perak odouk pam werakho degelogwi ai ’gela’ge, at ebe pobuk wemarik e, wene e’gin a’ge enebam pasulat, no’gorliselat, tua o. Aphwami logon emas emin, perak emin, odouk pam werakho degelogwi a’ge en degelogwi ai ’gela’ge, at en, is ap Allah eiye a’ge ai en wam di a’ge yu a’ge at ebaget wusogo narlogwi a’ge ai en at Allah agai a’ge ai hegitsogo narlogulom a’geat narlogu lemagoluk obap enebil wema o. 4O pageat Nenaik ’gain Onuk Logo a’ge ebaget wam di a’ge yu a’ge narlogwiam ede op aga laga ai ’gela’ge, pobuk is aphwami o Yehuda ’berlek emin, o kota Yerusalem a’ge emin, enemin en at ebaget narlogwiam e, ogola asogo op aga lema o.
5Nenaik ’gain Onuk logo a’ge di a’ge yu a’ge tu nak ano en disogo egei,
“An pobuk weiktik e, ap asuagun ele erlak a’ge waronobogwi a’ge emin, ’babi tenontogulat, tenontuagoluk togulat, togwi a’ge emin, an nonuk ho’buk ’balogo eniak esei enat lalonobogwi a’ge emin, ap logon ene’gik o’go wogontouwogoluk yo’go onoboluk o’go wogonto erlakma enat lalonobogulat, hwami sugwe a’ge emin, malik sebin a’ge emin, di obotut yu obotut takpoluk lalonobogulat, togwi a’ge emin, aphwami ena’gul onuk mu a’ge onowene hegitsogo hwalonto pukmu en wik-wiak tagonobogwi a’ge emin, an hau wusogo erliknobu erlakma en togwi a’ge ’berlegat ai, wene enebam pou weik o,” oluk egei.
Ene’gik wenakholuk, 10 pam lai lasu holuk, 9 nis agalat, mesigat nak ai Allah paget po wene
6Asogo egeitik mesik disogo egei,
“An henaik ’gain Nonuk Logo a’ge nebabut muat mesik om erlakma en notok modok welegi ai en e, his Yakub en dogo’gwe a’ge henebe erlagap honobo erlak welegep o. 7Hwerli his hena’balak naduk welegesa ai hwerli en ’bekhit his o yogodak welegep hwerli, his ’berlegat e, ’gebela ’bekhit o’gwe ukpoluk ’gwanisogo lagai ai ’gela’ge, an en e,
Disogo togu lomup, asogo togu lomup, oluk henesa’go weregis wene ai hologo hegitsogo tu erlakma en ukpoluk muat togu legep ai o. Holuk e, his yogodak pobuk togolik an ne’bek manis o. Wagaiam an ogo re, his hene’bek pobuk togolik weigat o. Asogo a’geat de, his en e,
Nis nenebe hat he’bek pobuk togolik wemagoluk no’gosogo tu en ese legen? oluk hin wokniogu legep ai o. 8An en wene his henebam hin disogo wokhentaigat,
His aphwami en heniak eseiyat an Allah lalnobu no? Modok mia o. Asogo a’geat de, his en an lalnobogu legebat ai o. A’ge re, his en e,
Ai ’gesogo en hat Allah lalhobogu lege no? oluk hin wokniogu legep ai o. Asogo ogu legep ai en e, an en e,
His en di a’ge yu a’ge hene’gik wenakho 10 pam lai lasu holuk, 9 his horlogulat, akhen mesik nak ai, an nebaget nobogwi erlagat o. Ye, his orogup o’gwe ai mesik woknogwi erlagat, togu legep ai enat lalnobogu legep o. 9Asogo togu legep ai en, an en his hena’gul onuk Israel a’ge henebe ’berlegat heman henebegi ai o.
10 #
Ima. 27:30; Bil. 18:21-24; Ula. 12:6; 14:22-29; Neh. 13:12 An nowi werikmu eba, so’boru di a’ge yu a’ge a’bik ebam louksogo welemagoluk, his en a’ge di a’ge yu a’ge horloluk, hene’gik wenakho 10 pam lai lasu holuk, 9 his agalat, mesik nak an nebagup a’ge ai ’berlegat an nowi werikmu di a’ge yu a’ge pogumu eba nobou waga lomup o. His en asogo nobou worogup holuk, an en di a’ge yu a’ge modok op a’ge ’bogorl pam en ’goduk husogo ebam louksogo ’belakhentau wagoam hwerlagup ai en e, an nebabut ’baluogoluk asogo tip o. 11His en di a’ge yu a’ge owi yorogup a’ge ebe ina’ge en nouwano oluk, an en wene ’balik o. Ye, anggur owi yorua a’ge e’gen ogosu erlige nak egesisolom erlakma en hwedik egesise lemagoluk takpaigat o. 12His honowi pam eba op modok lioktak wolorogup ai en e, aphwami ena’gul onuk lo’bok en e, disogo mo’gulhontogu lema o,
His aphwami Israel a’ge Allah en obaphenebiso hegi, oluk ogu lema, oluk an ’gain Nonuk Logo di a’ge yu a’ge tu nak a’ge ano en egi ai o,” oluk egei.
Allah en e, eiyagai edeap onobua wene
13Nenaik ’gain Onuk Logo a’ge en asogo egeitik mesik disogo egei,
“His an honogola mi-miarak noboluk heniak allogunsogo mo’gulnogu legep o. Asogo a’geat de, his en e, disogo ogu legep,
Nis en hat hobok ’gesogo ’balogu lege en ese legen? oluk ogulat, 14disogo ogu legebat o,
Nis Allah paget togu lege ai we, ’burlat togu lege o. ’Burlat Nenaik ’gain Onuk Logo a’ge di a’ge yu a’ge tu nak ano iak hologo hegitsogo nak togulat, nis wiak togu lege a’ge ukpoluk nenebabut heberlogo, oluk hweyang pogwi ai ’gela’ge nenede wiak agalat, togu lege ai pam, logon saborogu lege oluk u no? 15Aphwami onu’gwarek en erlikhorlogwi a’ge ai onogola enagai opogulat welagai o. Ye, aphwami wiak togwi a’ge ai, enebe op agai o. A’ge re, ai nak puk o. Is en e, Allah olot het oruak a? Erlak a, oluk ebabut ’balogwi a’ge ogo re, wene enebam pasu erlagat hogu lege o, oluk ogu legep ai o,” oluk egei.
16Asogo osoam, is aphwami logon Nenaik ’gain Onuk Logo a’ge onogorloksogo welagai a’ge en weneane is-is nak ogu legesayat. Is eniak egesa a’ge ai, at Nenaik ’gain Onuk Logo a’ge en esa’go hweliselat, pobi tiselat, tegei o. Asogo tegeirik e, aphwami at onogorloksogo welat, erligobogwi a’ge ai, ononuk tuesi’ga at ologotma welago a’ge pam pelal wokho pesimu oruak o.
17Nenaik ’gain Onuk Logo a’ge di a’ge yu a’ge tu nak a’ge ano en e,
“Is enebe an nu’gwarek neiyagaiat ema o. An nebe nannisogo tik ai erlige re, aphwami en ena’ge enede hwedik a’ge tenak poluk pekharok welagai ai ’gela’ge, an en is an nu’gwarek neiyagaiat wogenebiktik tenentarok weleik o. Aphwami eneiyagai en enaiklak eniak hologo is enebaget togukhwe, enaiklak en enedeap onobogwi ai ’gela’ge, an en is nedeap enebigat o. 18An neiyagai en pobuk aphwami enebabut op togwi a’ge ogo, wiak togwi a’ge ogo, an nebaget togwi a’ge ogo, an nebaget togwi erlak ogo, enebam hun-hun agoam e, henil enagat hagup o,” oluk egei.
Àwon tá yàn lọ́wọ́lọ́wọ́ báyìí:
Maleakhi 3: Wul
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀