Maleakhi 2
2
1Nenaik ’gain Onuk Logo di a’ge yu a’ge tu nak a’ge ano en, ap at eiye a’ge disogo mo’gulesiat,
“An en henesa’go wusogo wene disogo mo’gulhentaik,
2His en di paget yu paget togulat, henede pam en an honogorloksogo erliknobogularat togu lomup o. His en an niak egi a’ge hologo togup erlak holuk, heman henebaik o. His en so’boru di a’ge yu a’ge horlogu lorogup a’ge ai, heman pegi a’ge nagat aga lema o. His en an niak hologo togulom henebit ai en, his en a’ge op a’ge eba ’berlegat arat heman pegi o. 3His heneiyagai an en wene enebam pasulat, wam an narlnogu legep ai a’ge al his honorogole pam egelik pasulat, henebe wam al ’bulogo pogumu eba hwikhentai lasulat, tik o. 4#Bil. 3:11-13Asogo tagoam e, his en e,
Nenaik ’gain Onuk Logo a’ge en nis at eiye a’ge nene’ba Lewi en dogoma’gwe a’ge wene werak nenebesi a’ge ano sogwi ago erlakma en demat nak aga lemagoluk, nenesa’go weregei ai o, oluk pobirak pogu lomul o.
5 #
Bil. 25:12
An en wene weragenebegi ai pam, an en mo’gulentasulat e,
His henebe helalugat lioktak obat wolorogup ani o. Asogo welat, erliknobogulat nonuk logap nobogu lomup o, oluk wene weragenebegi ai o. Asogo wene weragenebegi a’ge ai, an en wokhentaik oluk egi a’ge wogentigisat o. Ye, eria hegit e, is an logapsogo erliknobogulat, onogorloksogo welat, togu legesayat ai o. 6Is en is ado pema wene wiak a’ge mo’gulonto erlakma en, hegit a’ge nak mo’gulontogu legesa ai o. Is enebe an nemin lo’boksogo welat, an nogola nagai epasu legi a’ge hegitsogo togu legesa ai o. Asogo togulat, aphwami ado pema enebe a’bigat wiak togwi a’ge ukpoluk enebabut heberlemagoluk mo’gulontogu legesa ai o. 7Is ap an eiye a’ge ai eniabuk e, is aphwami pema an ’gain Nonuk Logo a’ge nebe enaluk emagoluk hegitsogo mo’gulontogulom aiyat o. Holuk e, an en is yo’go onoboluk peragonobou wegi ai en e, aphwami en e,
Allah ogola agai epasu a’ge no’gosogo tu no? oluk isat enebam hin wo yo.
8Asogo a’geat de, yogodak his ap an eiye a’ge yu. His henebabut hegit tu a’ge oruakhweat de, wiak a’ge togu legep ai o. Aphwami logon onoyuk a’gul dungsogo wathorlogwi ai ’gela’ge, wiak emagoluk wene wiak a’ge mo’gulontogu legep ai o. An en e, his ap Lewi en dogo’gwe a’ge wene wathenebegis a’ge hegitsogo tu erlakma en modok wiak nak togu legep ai o. 9His en e, an niak hologo hegitsogo tu erlakma en, an en henesa’go weregis wene ano aphwami Israel a’ge mo’gulontogulat,
Yu op, yu wiak, oluk, enagap o’borloma a’ge nak pobirak poluk mo’gulontogu legep ai en, is en his henebe onogola en mi-miarak honobuagoluk takhenebaik o,” oluk egei.
Aphwami Israel a’ge Allah emin hwedik wolom erlakma en togu legesa wene
10Nis nenaik ebe mesigat nak erlak no? Nis nenebe ’berlegat Allah emategat en walnentesi erlak no? Asogo a’geat de, nis-nis logon en logon lalogo wiagapsogo onobogu lege ai pam Allah en nene’balak enebe wene wusogo wogenebegei a’ge ai mi-miarak pogu lege ai nopaget. 11Aphwami Yehuda a’ge re, nenaik Allah en e, wene watnenebegei a’ge ai sagalogo ukpoluk e, at emin hwedik wolom erlakma en, aphwami o Yerusalem welagai a’ge emin, aphwami Israel a’ge onowi lo’gwe ’berlegat welagai a’ge emin, Allah apseri epasu a’ge nak togwi ai o. Nenaik ’gain Onuk Logo a’ge u’gwarek owi ede hwedik a’ge werikmu eba wiagapsogo re, hwami aphwami ena’gul onuk mu a’ge onogulani onodogwi enasua erliktogwi a’ge enebe wogonobogwi ai o. 12Aphwami logon enebabut asogo togwi a’ge ai, Nenaik ’gain Onuk Logo a’ge en aphwami Israel a’ge ene’gerlakma en mukho lebikpouwak o. Aphwami ena’gul onuk nis a’ge en nenaik ’gain Onuk Logo di a’ge yu a’ge tu nak a’ge ano ebaget wam di a’ge yu a’ge wusogo narlogumu, is ai nenemin en narlogulom modok erlak o.
13His en wiak logon mu a’ge togu legebat o. His en e, Allah paget wam di a’ge yu a’ge wusogo narlogu legep a’ge ai wo erlak ai en, ngi togwi, nge togwi oruakma wam di a’ge yu a’ge Allah paget narlogumu ano henil a’bosu ik ’gela’ge ye’gel ago ai o. 14His en e,
“Nenaik Allah en, nis en wam di a’ge yu a’ge wusogo narlogu lege a’ge ai wo erlakma en ukpasu ai nopaget e,” oluk hin wogu legep ai pobisogo mo’gulhentaik o. His henebe souwe pam honugwami wogonobogulat Allah il pam disogo egep ani o,
An nugwe yuat wogo modok weleik o, oluk egep ani o. Honugwami ai henarilak ’gela’ge henemin lo’boksogo modok wolom a’geat de, enil salogu legep ai en e, at Allah wogogu legep a’ge ai, wo erlakma en, ukpasu ai o. 15Nenaik Allah ebe ’biren erlak, mesigarat ai en e, his honugwami henemin henebe henede mesigarap pasu erlak no? At Nenaik ’gain Onuk Logo a’ge en asogo tiso ai nopaget no? His en heneiyagai Allah eiyagai demat a’ge dagonobuagoluk asogo tagenebasu ai o. Holuk e, wiak tuano oluk honu’gwarek en henede sebelogu lomup o. Honugwami henebe souwe pam wogenebigep a’ge enil salu erlakma en opsogo nak togu lomup o. 16Nis aphwami Israel a’ge Nenaik ’gain Onuk Logo a’ge en e,
“Hwami ap wogo a’ge uak lologo ugonobogu legep ai an modogat nebit o. His ap pema en honugwami asogo wiagap onobu modok nebit o. Holuk e, honugwami enil salogulomno oluk, honu’gwarek en henede sebelogu lomup o,” oluk oso ai.
“O agauwa enemdema wouwa a’ge ano arat horok lau waga,” oluk egei wene
17His heniak ogu legep ai pam e, Allah ebirap pogu legep a’geat de, his en e,
“Nis en e, no’gosogo togulat Nenaik ’gain Onuk Logo a’ge ebirap pogu lege no?” oluk hin wogu legep ai, do’buksogo mo’gulhentaik. His en e,
“Aphwami wiak togwi a’ge ’berlegat Nenaik ’gain Onuk Logo a’ge en op epasulat enebe enebam lo’buk oso,” oluk ogu legebat o. Ye, mesik e, disogo ogu legep,
“Allah en wene e’gin a’ge hegitsogo nak hwalentasu oluk ogwi a’ge ano ebe ’geba oruak,” oluk hin wogu legep ai pam Allah ebirap pogu legep ai o.
Àwon tá yàn lọ́wọ́lọ́wọ́ báyìí:
Maleakhi 2: Wul
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀